• Kuyini Okuzakunceda Ukuthi Ukhethe Kuhle?
    Ungathokoza Kuze Kube Nini Lanini!—Ibhuku Elizakunceda Uzwisise IBhayibhili

    • 5. Cabanga ngemizwangedwa yabanye

      Abantu batshiyene yikho besenza izinqumo ezitshiyeneyo. Singatshengisa njani ukuthi silendaba lemizwangedwa yabanye? Ake sixoxe ngezibonelo ezimbili:

      Isibonelo sokuqala: Udadewethu othanda ukuzicomba uthuthela ebandleni elilabodadewethu abaphatheka kubi nxa bebona umuntu othanda ukuzicomba.

      Bala uRoma 15:1 lo-1 Khorinte 10:23, 24 beselixoxa ngemibuzo elandelayo:

      • Ngemva kokucabangisisa ngamavesi lawa, udadewethu lo angakhetha ukwenzani? Uzakwenzani nxa kulomuntu ongakhubeka ngenxa yento umzwangedwa wakho okuvumela ukuthi uyenze?

      Isibonelo sesibili: Lanxa umfowethu ekwazi ukuthi akukubi ukunatha utshwala, yena ukhetha ukungabuthinti. Uthi enxuswe komunye umbuthano abone abafowethu benatha.

      Bala umTshumayeli 7:16 loRoma 14:1, 10 beselixoxa ngemibuzo le:

      • Ngemva kokucabangisisa ngamavesi lawa, umzalwane lo angakhetha ukwenzani? Uzakwenzani nxa ungabona umuntu esenza into umzwangedwa wakho ongakuvumeliyo ukuthi uyenze?

      Okuzakunceda ukuthi ukhethe kuhle

      Owesifazana uyakhuleka.

      1. Thandaza kuJehova umcele akuncedise ukuthi ukhethe kuhle.—UJakhobe 1:5.

      Owesifazana ofananayo uvule iBhayibhili njalo uhlolisisa emabhukwini ethu ukuze abone ukuthi iBhayibhili lithini ngesinqumo okumele asenze.

      2. Hlolisisa okutshiwo liBhayibhili lamabhuku adindwe yinhlanganiso yethu ukuze uthole izimiso ongazisebenzisa. Ungacela lokuthi amaKhristu aqinileyo ekukhonzeni akucebise.

      Owesifazana ofananayo uyacabangisisa.

      3. Cabangisisa ngokuthi awusoze uzisole yini ngesinqumo sakho lokuthi sizabaphatha njani abanye.