Sekuseduze ukuthi uJehova aqede zonke inhlupho esilazo esebenzisa uMbuso wakhe. Zindaba ezinhle kakhulu lezi futhi wonke umuntu kumele atshelwe ngazo! UJesu wanika abalandeli bakhe umsebenzi wokutshela abantu izindaba ezinhle. (UMathewu 28:19, 20) OFakazi bakaJehova bayawenza yini umsebenzi lo?

1. Okutshiwo kuMathewu 24:14 kuyenzakala yini lamuhla?

UJesu wathi: “Lezizindaba ezinhle zoMbuso zizatshunyayelwa emhlabeni wonke.” (UMathewu 24:14) OFakazi bakaJehova bayakukholisa ukwenza umsebenzi lo oqakathekileyo. Sitshumayela izindaba ezinhle emhlabeni wonke ngezindimi ezedlula 1 000! Okwenza siphumelele emsebenzini lo omkhulu kangaka yikuthi uJehova uyasincedisa ukuthi siwukhuthalele njalo siwenze ngendlela ehlelekileyo.

2. OFakazi bakaJehova batshumayela ngaphi?

Sitshumayela loba ngaphi esithola khona abantu. Silingisela amaKhristu akuqala ngokutshumayela ‘endlini ngendlu.’ (ImiSebenzi 5:42) Ukutshumayela ngalindlela kwenza senelise ukuxoxa lamamiliyoni abantu umnyaka ngamunye. Siphinda sitshumayele lasezindaweni zomphakathi ngoba abanye abantu abatholakali lapho abahlala khona. Sisebenzisa loba yiliphi ithuba esilitholayo ukuze sitshele abantu ngoJehova langalokho afuna ukusenzela khona.

3. Ngubani okumele atshumayele izindaba ezinhle?

Wonke amaKhristu eqiniso kumele atshele abanye izindaba ezinhle. Siyawuqakathekisa kakhulu umsebenzi lo yikho sisenza okusemandleni ethu ukuthi sitshele abantu izindaba ezinhle ukuze basindiswe. (Bala u-1 Thimothi 4:16.) Asibhadalwa ukwenza umsebenzi lo ngoba iBhayibhili lithi: “Liphiwe mahala, phanini mahala.” (UMathewu 10:7, 8) Siqhubeka sitshumayela lanxa abanye abantu bengasilaleli ngoba umsebenzi wethu wenza uJehova athokoze.

GEBHA UJULE

4. Sitshumayeza bonke abantu

IVIDIYO: Ukutshumayela “Lasemikhawulweni Yomhlaba” (7:33)

• Uthini ngalokho okwenziwa ngoFakazi bakaJehova ukuze batshumayele?

Bala uMathewu 22:39 loRoma 10:13-15 beselixoxa ngemibuzo elandelayo:

• Umsebenzi wethu wokutshumayela utshengisa njani ukuthi sithanda bonke abantu?

• UJehova uthini ngalabo abatshumayela izindaba ezinhle?—Khangela ivesi 15.

5. Sisebenza loNkulunkulu

Kunengi esikubona kusenzakala okutshengisa ukuthi uJehova uqondisa umsebenzi wethu wokutshumayela. Isibonelo somzalwane okuthiwa nguPaul ohlala eNew Zealand siyakutshengisa lokho. Wathi etshumayela endlini ngendlu ngelinye ilanga wathola omunye umama owamtshela ukuthi mhlalokho ekuseni wayekhuleke kuNkulunkulu esebenzisa ibizo elithi Jehova, emcela ukuthi athume umuntu ozamtshumayeza. UPaul uthi: “Ngafika endlini kamama lo ngemva kwama-awa amathathu ethandazile.”

Bala u-1 Khorinte 3:9 beselixoxa ngombuzo olandelayo:

• Okwenzakala kumzalwane okuthiwa nguPaul kutshengisa njani ukuthi uJehova uyawuqondisa umsebenzi wokutshumayela?

Bala imiSebenzi 1:8 beselixoxa ngombuzo olandelayo:

• Kungani sidinga ukuncediswa nguJehova emsebenzini wokutshumayela?

Ubukwazi yini?

Emhlanganweni esiba lawo phakathi kweviki siyafundiswa izindlela zokutshumayela. Sewake wawungena yini umhlangano lo? Uthini ngendlela esifundiswa ngayo ukutshumayela?

6. Silalela umlayo esiwuphiwe nguNkulunkulu wokuthi sitshumayele

Ngesikhathi samaKhristu akuqala, izitha zazama ukuvimba umsebenzi wokutshumayela owawusenziwa ngabalandeli bakaJesu. AmaKhristu la ‘avikela izindaba ezinhle ngokusemthethweni.’ (KwabaseFiliphi 1:7) Lalamuhla oFakazi bakaJehova benza okufananayo.a

IVIDIYO: Ukuvikela Izindaba Ezinhle Ngokusemthethweni (2:28)

Bala imiSebenzi 5:27-42 beselixoxa ngombuzo olandelayo:

• Kungani singasoze siyekele ukutshumayela?—Khangela amavesi 29, 38, lo-39.

ISIFINQO

UJesu wanika abalandeli bakhe umsebenzi wokutshumayela izindaba ezinhle emhlabeni wonke. UJehova uyabancedisa abantu bakhe ukuthi bawenze kuhle umsebenzi lo.

Ufundeni?

• Kwenziwani ukuze kutshunyayelwe izindaba ezinhle emhlabeni wonke?

• Umsebenzi wethu wokutshumayela utshengisa njani ukuthi sithanda bonke abantu?

• Ubona angani ukutshumayela kungakwenza uthokoze yini? Kungani usitsho njalo?

THOLA OKUNENGI

Bukela ividiyo le ukuze ubone ukuthi oFakazi bakaJehova batshumayela njani emadolobheni amakhulu.

Ukutshumayela Ngokubukisa Amabhuku EParis (5:11)

Bukela ividiyo le ubone ukuthi oFakazi bakaJehova benzeni ukuze batshumayeze iziphepheli.

Ukutshumayeza Iziphepheli (5:59)

Bukela ividiyo le uzwe ukuthi omunye uthi kungani ukutshumayela kumenza athokoze.

Ngiyathaba Ukuthi Ngakhetha Lumsebenzi (6:29)

Bala isahluko lesi uzwe ngamacala esawanqobayo emthethwandaba amayelana lomsebenzi wethu wokutshumayela.

“Abamemezeli BoMbuso Badlulisela Izindaba Zabo Emthethwandaba” (UMbuso KaNkulunkulu Uyabusa!, isahluko 13)

UJesu wathi wonke umuntu ofuna ukuba ngumKhristu kumele abhabhathizwe. (Bala uMathewu 28:19, 20.) Kutshoni ukubhabhathizwa? Kumele wenzeni nxa ufuna ukubhabhathizwa?

1. Kutshoni ukubhabhathizwa?

Ibala lesiGrikhi elithi “ukubhabhathizwa” litsho “ukucwiliswa” emanzini. UJesu wathi ebhabhathizwa wacwiliswa emfuleni uJodani ‘wasephuma.’ (UMakho 1:9, 10) AmaKhristu eqiniso lawo ayacwiliswa emanzini nxa ebhabhathizwa.

2. Ukubhabhathizwa kutshengisani?

Ukubhabhathizwa kutshengisa ukuthi umuntu usezinikele kuJehova uNkulunkulu. Kodwa kutshoni ukuzinikela? Kutsho ukukhuleka kuJehova umthembisa ukuthi uzakwenza intando yakhe lokuthi uzakhonza yena yedwa okwempilo yakho yonke. Umuntu ozinikela kuNkulunkulu uyabe ekhetha ‘ukuzidela lokuqhubeka elandela’ izimfundiso zikaJesu futhi emlingisela. (UMathewu 16:24) Ukuzinikela lokubhabhathizwa kwakhe kumenza abe ngumngane kaJehova futhi athole labangane abathanda uJehova.

3. Kumele wenzeni nxa ufuna ukubhabhathizwa?

Kuqakathekile ukuthi uqale ufunde ngoJehova futhi ube lokholo kuye ungakabhabhathizwa. (Bala uHebheru 11:6.) Ukuqhubeka ufunda ngoJehova kuzakwenza umthande futhi lokholo lwakho luzaqina. Kuzakwenza ube lesifiso sokutshela abanye ngaye njalo uzimisele ukuphila ngendlela emthokozisayo. (2 KuThimothi 4:2; 1 UJohane 5:3) Akuthandabuzwa ukuthi nxa ungaziphatha ‘ngendlela efaneleyo phambi kukaJehova ukuze umthokozise kukho konke,’ uzakuba lesifiso sokuzinikela kuye lesokubhabhathizwa.—KwabaseKholose 1:9, 10.a

GEBHA UJULE

4. Ukubhabhathizwa kukaJesu kusifundisani?

Bala uMathewu 3:13-17 ukuze ubone okwenzakala ngesikhathi uJesu ebhabhathizwa. Ngemva kwalokho xoxani ngemibuzo le:

• UJesu wabhabhathizwa elusane yini?

• Wabhabhathizwa njani? Wafafazwa ngamanzi yini?

UJesu waqalisa ukwenza umsebenzi ayewuthunywe nguNkulunkulu esebhabhathiziwe. Bala uLukha 3:21-23 loJohane 6:38 beselixoxa ngombuzo olandelayo:

• UJesu wayeseqakathekisa wuphi umsebenzi ngemva kokubhabhathizwa?

5. Ungesabeli khatshana ukubhabhathizwa

Ukuzinikela lokubhabhathizwa kungakhanya kuyinto eyethusayo. Kodwa nxa ungaqhubeka ufunda ngoNkulunkulu uzakunqoba ukwesaba ubusubhabhathizwa. Bukelani IVIDIYO lizwe okwanceda abanye ukuthi bacine sebebhabhathiziwe.

IVIDIYO: Ukuba Ngumngane KaJehova (1:11)

Bala uJohane 17:3 loJakhobe 1:5 beselixoxa ngombuzo lo:

• Kuyini okumele ukwenze ukuze ubhabhathizwe?

1. Sizinikela kuJehova ngokukhuleka kuye simthembisa ukuthi sizakwenza intando yakhe njalo sikhonze yena yedwa okwempilo yethu yonke

2. Nxa sibhabhathizwa siyabe sitshengisa abanye ukuthi sesizinikele kuNkulunkulu

6. Ukubhabhathizwa kwenza ube lilunga lemuli kaJehova

Nxa ungabhabhathizwa uba lilunga lemuli emanyeneyo esemhlabeni wonke. Bonke oFakazi bakaJehova bakholwa izinto ezifananayo futhi baziphatha ngendlela efananayo kungelani lokuthi bahlala ngaphi lokuthi bakhuliswe njani. Bala uJakhobe 2:23 lo-1 Phetro 2:17 beselixoxa ngombuzo olandelayo:

• Ukubhabhathizwa kunceda ngani?

ISIFINQO

UJesu wathi wonke umuntu ofuna ukuba ngumKhristu kumele abhabhathizwe. Ukuze umuntu abhabhathizwe kumele afunde ngoJehova njalo abe lokholo oluqinileyo. Kumele azimisele ukuphila ngendlela emthokozisayo futhi azinikele kuye.

Ufundeni?

• Kutshoni ukubhabhathizwa njalo kungani kuqakathekile?

• Kutshoni ukuzinikela? Ukubhabhathizwa kutshengisani?

• Kumele wenzeni nxa ufuna ukubhabhathizwa?

THOLA OKUNENGI

Bala isihloko lesi uzwe ukuthi kutshoni ukubhabhathizwa.

“Kutshoni Ukubhabhathizwa?” (Isihloko esikuwebhusayithi yethu)

Bala isihloko lesi uzwe ukuthi ungenzani ukuze ubhabhathizwe.

“Ukuthanda UJehova Kuzakwenza Ubhabhathizwe” (INqabayokulinda, March 2020)

Bala isihloko lesi uzwe ukuthi kuyini okwenza eyinye indoda yabhabhathizwa.

“Babefuna Ngihlolisise Ukuthi Engikufundayo Kuliqiniso Yini” (INqabayokulinda, February 1, 2013)

Bala isihloko lesi uzwe ukuthi kungani kuqakathekile ukubhabhathizwa lokuthi ungenzani ukuze ubhabhathizwe.

“Kumele Ngibhabhathizwe Yini?” (Izimpendulo Zemibuzo Ebuzwa Ngabasakhulayo, Ingxenye 2, isahluko 37)