ISanihedrini iyavumelana lecebo likaKhayifasi lokuthi uJesu abulawe. Kambe uNikhodemu olilunga leSanihedrini njalo omthandayo uJesu uzamncweba indlebe ngecebo leli yini? Kungelani lokuthi utsheliwe loba hatshi, uJesu uyasuka eJerusalema ukuze angabulawa isikhathi esibekwe nguNkulunkulu singakafiki.

Amacebo eSanihedrini okuthi uJesu abulawe kawaphumeleli ngenxa yokuthi uJesu uyasuka aye edolobheni lako-Efrayimi elingabe lisenyakatho mpumalanga kweJerusalema. Uhlala lapho labafundi bakhe njalo ukhatshana lezitha zakhe. (UJohane 11:54) Kodwa iPhasika lika-33 C.E. seliseduze yikho ngesikhatshana uJesu uyaqhubeka ngohambo. Udabula eSamariya elubangise enyakatho aze ayefika eGalile njalo lolu luhambo lwakhe lokucina endaweni le njengoba esezakufa.