Ungatshengisa Njani Ukuthi Usekela UMbuso KaNkulunkulu Kuphela?

UJesu watshela abafundi bakhe wathi: “Alisibo bomhlaba.” (UJohane 15:19) Lokhu kutsho ukuthi akumelanga singene kwezombusazwe kumbe siye ezimpini. Kodwa ngezinye izikhathi kunzima ukungangeni endabeni zomhlaba lo ngenxa yokwesaba ukuchothozwa. Manje singenzani ukuze sitshengise ukuthi sisekela uMbuso kaJehova uNkulunkulu kuphela?

1. AmaKhristu eqiniso ababona njani ohulumende?

AmaKhristu eqiniso ayabahlonipha ohulumende. Senza lokho esakutshelwa nguJesu. Wathi: “Buyiselani okukaKhesari kuKhesari.” Lokhu kutsho ukuthi kumele silalele imithetho kahulumende egoqela lokubhadala imithelo. (UMakho 12:17) IBhayibhili lithi uJehova uvumele ukuthi ohulumende babuse okwakhathesi. (KwabaseRoma 13:1) Kodwa kumele sikhumbule ukuthi ohulumende kabalamandla okuqeda inhlupho ezikhona. Yikho uNkulunkulu ezasebenzisa uMbuso wakhe ukuze aqede zonke inhlupho zethu.

2. Singatshengisa njani ukuthi sisekela uMbuso kaNkulunkulu kuphela?

Silingisela uJesu ngokungangeni kwezombusazwe. Ngemva kokubona esinye isimanga esasenziwe nguJesu, abantu basebefuna ukumenza inkosi kodwa kazange avume. (UJohane 6:15) Kungani uJesu wala ukuba yinkosi? Impendulo siyithola kulokho akukhuluma ngelinye ilanga. Wathi: “UMbuso wami awusiwo walumhlaba.” (UJohane 18:36) Njengoba singabalandeli bakaJesu lathi asingeni endabeni zomhlaba ezinjengokuya empini. (Bala uMikha 4:3.) Siyayihlonipha ifulegi yelizwe kodwa asiyisaluthi ngoba lokho yikuyikhonza. (1 UJohane 5:21) Akulaqembu lezombusazwe esilisekelayo loba esiphikisana lalo, kanti njalo akulamuntu esimvotelayo. Sikhetha ukusekela uMbuso kaNkulunkulu, okutsho uhulumende wakhe osezulwini.

GEBHA UJULE

3. AmaKhristu eqiniso awangeni endabeni zomhlaba lo

Kumele silingisele isibonelo sikaJesu lesabalandeli bakhe. Bala uRoma 13:1, 5-7; lo-1 Phetro 2:13, 14. Ngemva kwalokho bukelani IVIDIYO beselixoxa ngemibuzo elandelayo.

IVIDIYO: AmaKhristu Eqiniso Awathathi Hlangothi—Ingxenye 1 (4:28)

• Kungani kumele sihloniphe iziphathamandla?

• Singatshengisa njani ukuthi siyazihlonipha iziphathamandla?

Amanye amazwe athi awasekeli izimpi kodwa nxa kungaba lempi phakathi kwamanye amazwe amabili ayasekela ngokuwanika imali lezikhali. Kutshoni sibili ukungangeni endabeni zomhlaba lo? Bala uJohane 17:16. Ngemva kwalokho bukelani IVIDIYO beselixoxa ngombuzo olandelayo.

IVIDIYO: AmaKhristu Eqiniso Awathathi Hlangothi—Ingxenye 2 (3:11)

• Singatshengisa njani ukuthi asingeni kwezombusazwe?

Kumele wenzeni nxa iziphathamandla zifuna wenze into ephikisana lomthetho kaNkulunkulu? Bala imiSebenzi 5:28, 29. Ngemva kwalokho bukelani IVIDIYO beselixoxa ngemibuzo elandelayo.

IVIDIYO: AmaKhristu Eqiniso Awathathi Hlangothi—Ingxenye 3 (1:18)

• Kumele wenzeni nxa umthetho kahulumende uphikisana lomthetho kaNkulunkulu?

• Ubona angani kukuziphi izimo lapho okungamelanga amaKhristu enze lokho okufunwa nguhulumende?

4. Ungangeni kwezombusazwe ngokwenzayo langokucabangayo

Bala u-1 Johane 5:21. Ngemva kwalokho bukelani IVIDIYO beselixoxa ngemibuzo elandelayo.

IVIDIYO: Kungani Kumele Sibe Lesibindi?—Sokungathathi Uhlangothi (2:49)

• Kuyini okwenza u-Ayenge wakhetha ukungajoyini iqembu lezombusazwe lokungasaluthi ifulegi?

• Ubona angani wakhetha kuhle yini?

Yiziphi ezinye izimo ezingenza kube nzima ukungangeni endabeni zomhlaba lo? Bukelani IVIDIYO beselixoxa ngemibuzo elandelayo.

IVIDIYO: Izifundo Esizithola KuNqabayokulinda: Ungaphumi Endleleni Eyiyo (5:16)

• Singakubalekela njani ukuzigqaja ngelizwe elithile nxa sibukele imidlalo?

• Kungani kungamelanga singene endabeni zomhlaba lo lanxa okwenziwa ngabezombusazwe kusithinta?

• Kungani kungamelanga sivume ukuthi okukhulunywa ngabezindaba kumbe abanye abantu kusenze sisekele izindaba zomhlaba lo?

ISIFINQO

AmaKhristu eqiniso kumele azimisele ukungangeni endabeni zomhlaba lo lokungasekeli ezombusazwe ngalokho akucabangayo, akukhulumayo lakwenzayo.

Ufundeni?

• AmaKhristu eqiniso ababona njani ohulumende?

• Kungani singangeni kwezombusazwe?

• Yiziphi izimo ezingenza kube nzima ukungangeni endabeni zomhlaba lo?

THOLA OKUNENGI

Bukela ividiyo le ubone ukuthi kuyini okungasilahlekela nxa sizimisele ukungangeni kwezombusazwe.

UJehova Kakaze Asilahle (3:14)

Bukela ividiyo le ubone ukuthi izimuli zingabulungiselela njani ubunzima ezizahlangana labo ngenxa yokungangeni endabeni zomhlaba.

Ungangeneli Kwezombusazwe Nxa Usembuthanweni (4:25)

Bukela ividiyo le ukuze ubone okwenza eyinye indoda yatshiya umsebenzi eyayiwuqakathekisa kakhulu.

“Zonke Izinto Ziyenzeka NgoNkulunkulu” (5:19)

Bala isihloko lesi uzwe ukuthi ungatshengisa njani ukuthi awusongxenye yomhlaba nxa ukhetha umsebenzi ofuna ukuwenza.

“Umuntu Ngamunye Uzazithwalela Umthwalo Wakhe” (INqabayokulinda, March 15, 2006)

Wonke amaKhristu eqiniso azaphikiswa kumbe ahlukuluzwe futhi lokhu akumelanga kusimangalise.

1. Kungani kumele sikhangelele ukuthi sizahlukuluzwa?

IBhayibhili lithi: “Bonke abazimisele ukuphila bezinikele kuNkulunkulu futhi bemanyene loKhristu uJesu labo bazahlukuluzwa.” (2 KuThimothi 3:12) UJesu wahlukuluzwa ngoba wayengangeni endabeni zomhlaba kaSathane. Lathi siyaphikiswa kumbe sihlukuluzwe ngohulumende labakhokheli bamasonto ngoba kasingeni endabeni zomhlaba lo.—UJohane 15:18, 19.

2. Kumele senzeni ukuze sihlale silungele ukuhlukuluzwa?

Kumele sifunde ukuthemba uJehova khathesi. Ngakho zinike isikhathi sokuthandaza nsuku zonke lesokubala iLizwi likaNkulunkulu. Zimisele ukungena yonke imihlangano yebandla. Lokhu kuzakunceda ukuthi ube lesibindi sokumelana laloba yikuphi ukuphikiswa, ngitsho lalokho okungavela kwabangakini. Umphostoli uPhawuli owahlukuluzwa kanengi wathi: “UJehova ungumsizi wami; kangisoze ngesabe.”—KumaHebheru 13:6.

Okunye okuzakwenza ube lesibindi yikuhlala utshumayela ngoba kuzakunceda ukuthi uthembe uJehova futhi ungesabi abantu. (IZaga 29:25) Nxa ungaba lesibindi sokutshumayela khathesi, uzakwenelisa ukuqhubeka utshumayela langesikhathi uhulumende engasasivumeli ukuthi senze njalo.—1 KwabaseThesalonika 2:2.

3. Kungani kuqakathekile ukuthi sihlale sithembekile nxa sihlukuluzwa?

Ukuhlukuluzwa kubuhlungu, kodwa nxa singaqinisela ukholo lwethu luzaqina. Ukunanzelela indlela uJehova asincedisa ngayo lasinika ngayo amandla okuthi siqinisele kwenza sisondele kuye. (Bala uJakhobe 1:2-4.) UJehova uzwa ubuhlungu nxa esibona siphathwa kubi kodwa uyathokoza nxa esibona siqinisela. IBhayibhili lithi: “Nxa liqinisela ekuhluphekeni ngenxa yokuthi lenza okuhle, uNkulunkulu uyakwamukela lokho.” (1 UPhetro 2:20) Nxa singahlala sithembekile kuJehova ngesikhathi sihlukuluzwa, uzasinika ukuphila okungapheliyo emhlabeni omutsha. Ngalesosikhathi sizabe sesikhonza uJehova kungelamuntu osiphikisayo.—UMathewu 24:13.

GEBHA UJULE

4. Ungenelisa ukuhlala uthembekile lanxa abangakini bekuphikisa

UJesu wayekwazi ukuthi ayisibo bonke emulini abazathokoza nxa usukhethe ukukhonza uJehova. Bala uMathewu 10:34-36 beselixoxa ngombuzo lo:

• Abangakini bangenzani nxa usukhethe ukukhonza uJehova?

IVIDIYO: UJehova Wasamukela (5:13)

• Kuyini ozimisele ukukwenza nxa isihlobo kumbe umngane wakho angazama ukukwekelisa ukukhonza uJehova?

Bala iHubo 27:10 loMakho 10:29, 30 beselixoxa ngombuzo olandelayo ngemva kokubala umbhalo ngamunye:

• Umbhalo lo ungakunceda njani nxa uphikiswa ngabangakini kumbe ngabangane?

5. Qhubeka ukhonza uJehova lanxa uhlukuluzwa

IVIDIYO: Woba Lesibindi Nxa Uhlukuluzwa (6:27)

• Izibonelo ezikuvidiyo le zingakunceda njani ukuthi ube lesibindi?

Bala imiSebenzi 5:27-29 loHebheru 10:24, 25 beselixoxa ngombuzo olandelayo ngemva kokubala umbhalo ngamunye:

• Kungani kumele siqhubeke sikhonza uJehova nxa singasavunyelwa ukutshumayela kumbe ukungena imihlangano yethu?

6. UJehova uzakuncedisa ukuthi uhlale uthembekile

IVIDIYO: UJehova UNkulunkulu Uzanginika Amandla (3:40)

• Kuyini okwanceda abafowethu labodadewethu obabone kuvidiyo ukuthi babekezelele ubunzima?

Bala uRoma 8:35, 37-39 loFiliphi 4:13. Ngemva kokubala umbhalo ngamunye xoxani ngombuzo lo:

• Umbhalo lo utshengisa njani ukuthi ungenelisa ukubekezelela loba yibuphi ubunzima ongahlangana labo?

Bala uMathewu 5:10-12 beselixoxa ngombuzo olandelayo:

• Kuyini okuzakwenza uthokoze lanxa uhlukuluzwa?

ISIFINQO

UJehova uyathokoza nxa esibona siqinisela ngesikhathi sihlukuluzwa futhi uzasincedisa ukuthi sihlale sithembekile.

Ufundeni?

• Kungani kumele amaKhristu eqiniso akhangelele ukuthi azahlukuluzwa?

• Kuyini okumele ukwenze khathesi ukuze wenelise ukuqinisela nxa usuhlukuluzwa?

• Kuyini okuzakunceda ukuthi wenelise ukubekezelela loba yibuphi ubunzima ozahlangana labo?

THOLA OKUNENGI

Bukela ividiyo le uzwe umfowethu osakhulayo elandisa ukuthi uJehova wamncedisa njani ngesikhathi ebotshelwe ukwala ukuya empini.

Bekezela Nxa Uhlukuluzwa 2:34)

Bukela ividiyo le ubone okwanceda umfowethu lomkakhe ukuthi bakhonze uJehova bethembekile okweminyaka eminengi lanxa babehlukuluzwa.

Ukukhonza UJehova Ngezikhathi Zotshintsho (7:11)

Bala isihloko lesi uzwe ukuthi ungenzani khathesi ukuze ube lesibindi nxa usuhlukuluzwa.

“Kulungiselele Khathesi Ukuhlukuluzwa” (INqabayokulinda, July 2019)

Bala isihloko lesi uzwe ukuthi kumele wenzeni ukuze uhlale uthembekile kuJehova nxa uhlukuluzwa ngamalunga emuli.

“Iqiniso Kalilethi Ukuthula Kodwa Liletha Inkemba” (INqabayokulinda, October 2017)