Indaba eqakatheke kakhulu okukhulunywa ngayo eBhayibhilini imayelana loMbuso kaNkulunkulu. UMbuso lo yiwo ozasetshenziswa nguJehova ukuthi enze umhlaba wonke ube lipharadayisi njengoba wayehlosile ekuqaliseni. Uyini uMbuso kaNkulunkulu? Sikwazi njani ukuthi usuqalisile ukubusa? Kuyini osekwenziwe nguMbuso kaNkulunkulu njalo uzakwenzani esikhathini esizayo? Sizaphendula imibuzo le esifundweni lesi lakwezimbili ezilandelayo.

1. Uyini uMbuso kaNkulunkulu futhi ngubani iNkosi yawo?

UMbuso lo nguhulumende osezulwini owabekwa nguJehova uNkulunkulu futhi iNkosi yawo nguJesu Khristu. (UMathewu 4:17; UJohane 18:36) IBhayibhili lithi uJesu ‘uzakuba yiNkosi kuze kube nini lanini.’ (ULukha 1:32, 33) Njengoba uJesu eyiNkosi yoMbuso kaNkulunkulu, uzabusa bonke abantu emhlabeni.

2. Ngobani abazabusa loJesu?

Kulabanye abazabusa loJesu. “Abantu abavela kuzo zonke izizwana, lezindimi, lemihlobo yabantu kanye lezizwe . . . bazakuba ngamakhosi babuse umhlaba.” (ISambulo 5:9, 10) Bangaki abazabusa loJesu? Lamuhla kulamamiliyoni abantu abangamaKhristu kodwa abangu-144 000 yibo kuphela abazabusa loJesu besezulwini. (Bala iSambulo 14:1-4.) Wonke amanye amaKhristu azaphila emhlabeni ebuswa nguMbuso lo.—IHubo 37:29.

3. Kuyini okwenza uMbuso kaNkulunkulu ubengcono kulemibuso yabantu?

Lanxa ababusi bomhlaba bengafisa ukwenza izinto ezinhle, abalawo amandla okwenza konke abakufisayo. Ikanti abanye ababusi baqakathekisa okufunwa yibo ukwedlula ukuncedisa abanye abantu. Imibuso yabantu iyatshiyelwana kodwa uMbuso kaNkulunkulu uzabusa kuze kube nini lanini. UNkulunkulu “uzabeka umbuso ongasoze utshabalaliswe.” (UDanyeli 2:44) UJesu uzabusa umhlaba wonke futhi kasoze abandlulule muntu. Phela ulothando lomusa futhi wahlulela kuhle. Yikho uzafundisa labantu ukuthi labo babe lothando, lomusa njalo bahlulele kuhle.—Bala u-Isaya 11:9.

4. Umhlaba wonke uzabuswa nguhulumende olamandla

UJesu Khristu nguMbusi olamandla ukwedlula loba nguphi umbusi owake wabakhona. Bala uMathewu 28:18 beselixoxa ngombuzo lo:

• Kuyini okwenza uJesu abe nguMbusi ongcono kulabanye ababusi?

Imibuso yabantu iyatshiyelwana futhi umbusi ngamunye ubusa indawo encane. UMbuso kaNkulunkulu wona ke? Bala uDanyeli 7:14 beselixoxa ngemibuzo elandelayo:

• Kungani kuyizindaba ezinhle ukuthi uMbuso kaNkulunkulu “kawusoze utshabalaliswe”?

• Kungani kuyizindaba ezinhle ukuthi uMbuso lo uzabusa umhlaba wonke?

5. Ukubusa kwabantu kuzaphela

Kungani kumele uMbuso kaNkulunkulu utshabalalise imibuso yabantu? Bukelani IVIDIYO beselixoxa ngemibuzo elandelayo.

IVIDIYO: Uyini UMbuso KaNkulunkulu?—Isiqephu (1:41)

• Ukubusa kwabantu kubangeleni?

Bala umTshumayeli 8:9 beselixoxa ngemibuzo le:

• Ubona angani kuqondile yini ukuthi uMbuso kaNkulunkulu utshabalalise imibuso yabantu? Kungani usitsho njalo?

6. UMbuso kaNkulunkulu ulababusi abalendaba lathi

INkosi yethu uJesu ‘iyasizwela ebuthakathakeni bethu’ ngoba yake yaphila lapha emhlabeni. (KumaHebheru 4:15) Amadoda labesifazana abangu-144 000 abazabusa loJesu bakhethwe nguJehova “kuzo zonke izizwana, lezindimi, lemihlobo yabantu kanye lezizwe.”—ISambulo 5:9.

• Uzwa njani ngokuthi uJesu lalabo abazabusa laye bayazizwisisa inhlupho zethu? Kungani usitsho njalo?

7. UMbuso kaNkulunkulu ulemithetho emihle kakhulu

Ohulumende bayafaka imithetho ukuze bavikele abantu. UMbuso kaNkulunkulu lawo ulemithetho enceda labo abayilalelayo. Bala u-1 Khorinte 6:9-11 beselixoxa ngemibuzo le:

• Ubona angani bekuzabe kunjani emhlabeni aluba wonke umuntu ulandela imithetho kaNkulunkulu?a

• Ucabanga ukuthi labo abafuna ukubuswa nguMbuso kaNkulunkulu kumele bayilalele yini imithetho abanika yona? Kungani usitsho njalo?

• Kuyini okutshengisa ukuthi labo abangalaleli imithetho kaNkulunkulu bangatshintsha?—Khangela ivesi 11.

ISIFINQO

UMbuso kaNkulunkulu nguhulumende osezulwini ozabusa umhlaba wonke.

Ufundeni?

• Ngobani abazabusa eMbusweni kaNkulunkulu?

• Kuyini okwenza uMbuso kaNkulunkulu ubengcono kulemibuso yabantu?

• Abafuna ukubuswa nguMbuso kaNkulunkulu kumele benzeni?

THOLA OKUNENGI

Bala isihloko lesi uzwe ukuthi uJesu wathi uMbuso kaNkulunkulu ungaphi.

“UMbuso KaNkulunkulu Yinto Esenhliziyweni Yakho Yini?” (Isihloko esikuwebhusayithi yethu)

Kungani oFakazi bakaJehova bekhetha uMbuso kaNkulunkulu hatshi imibuso yabantu?

Sikhetha Ukusekela UMbuso KaNkulunkulu (1:43)

Zwana ukuthi iBhayibhili lithini ngabangu-144 000 abakhethwe nguJehova ukuthi bayebusa loJesu.

“Ngobani Abazakuyaphila Ezulwini?” (Isihloko esikuwebhusayithi yethu)

Bala isihloko lesi uzwe ukuthi kuyini okwenza omunye umama owayesejele wangathandabuzi ukuthi nguNkulunkulu kuphela ozalungisa izinto emhlabeni.

“Sengikwazi Ukuthi Ngubani Ozaqeda Ukuphathwa Kubi Kwabantu” (Vukani!, November 2011)

UJesu watshela abafundi bakhe wathi: “Alisibo bomhlaba.” (UJohane 15:19) Lokhu kutsho ukuthi akumelanga singene kwezombusazwe kumbe siye ezimpini. Kodwa ngezinye izikhathi kunzima ukungangeni endabeni zomhlaba lo ngenxa yokwesaba ukuchothozwa. Manje singenzani ukuze sitshengise ukuthi sisekela uMbuso kaJehova uNkulunkulu kuphela?

1. AmaKhristu eqiniso ababona njani ohulumende?

AmaKhristu eqiniso ayabahlonipha ohulumende. Senza lokho esakutshelwa nguJesu. Wathi: “Buyiselani okukaKhesari kuKhesari.” Lokhu kutsho ukuthi kumele silalele imithetho kahulumende egoqela lokubhadala imithelo. (UMakho 12:17) IBhayibhili lithi uJehova uvumele ukuthi ohulumende babuse okwakhathesi. (KwabaseRoma 13:1) Kodwa kumele sikhumbule ukuthi ohulumende kabalamandla okuqeda inhlupho ezikhona. Yikho uNkulunkulu ezasebenzisa uMbuso wakhe ukuze aqede zonke inhlupho zethu.

2. Singatshengisa njani ukuthi sisekela uMbuso kaNkulunkulu kuphela?

Silingisela uJesu ngokungangeni kwezombusazwe. Ngemva kokubona esinye isimanga esasenziwe nguJesu, abantu basebefuna ukumenza inkosi kodwa kazange avume. (UJohane 6:15) Kungani uJesu wala ukuba yinkosi? Impendulo siyithola kulokho akukhuluma ngelinye ilanga. Wathi: “UMbuso wami awusiwo walumhlaba.” (UJohane 18:36) Njengoba singabalandeli bakaJesu lathi asingeni endabeni zomhlaba ezinjengokuya empini. (Bala uMikha 4:3.) Siyayihlonipha ifulegi yelizwe kodwa asiyisaluthi ngoba lokho yikuyikhonza. (1 UJohane 5:21) Akulaqembu lezombusazwe esilisekelayo loba esiphikisana lalo, kanti njalo akulamuntu esimvotelayo. Sikhetha ukusekela uMbuso kaNkulunkulu, okutsho uhulumende wakhe osezulwini.

GEBHA UJULE

3. AmaKhristu eqiniso awangeni endabeni zomhlaba lo

Kumele silingisele isibonelo sikaJesu lesabalandeli bakhe. Bala uRoma 13:1, 5-7; lo-1 Phetro 2:13, 14. Ngemva kwalokho bukelani IVIDIYO beselixoxa ngemibuzo elandelayo.

IVIDIYO: AmaKhristu Eqiniso Awathathi Hlangothi—Ingxenye 1 (4:28)

• Kungani kumele sihloniphe iziphathamandla?

• Singatshengisa njani ukuthi siyazihlonipha iziphathamandla?

Amanye amazwe athi awasekeli izimpi kodwa nxa kungaba lempi phakathi kwamanye amazwe amabili ayasekela ngokuwanika imali lezikhali. Kutshoni sibili ukungangeni endabeni zomhlaba lo? Bala uJohane 17:16. Ngemva kwalokho bukelani IVIDIYO beselixoxa ngombuzo olandelayo.

IVIDIYO: AmaKhristu Eqiniso Awathathi Hlangothi—Ingxenye 2 (3:11)

• Singatshengisa njani ukuthi asingeni kwezombusazwe?

Kumele wenzeni nxa iziphathamandla zifuna wenze into ephikisana lomthetho kaNkulunkulu? Bala imiSebenzi 5:28, 29. Ngemva kwalokho bukelani IVIDIYO beselixoxa ngemibuzo elandelayo.

IVIDIYO: AmaKhristu Eqiniso Awathathi Hlangothi—Ingxenye 3 (1:18)

• Kumele wenzeni nxa umthetho kahulumende uphikisana lomthetho kaNkulunkulu?

• Ubona angani kukuziphi izimo lapho okungamelanga amaKhristu enze lokho okufunwa nguhulumende?

4. Ungangeni kwezombusazwe ngokwenzayo langokucabangayo

Bala u-1 Johane 5:21. Ngemva kwalokho bukelani IVIDIYO beselixoxa ngemibuzo elandelayo.

IVIDIYO: Kungani Kumele Sibe Lesibindi?—Sokungathathi Uhlangothi (2:49)

• Kuyini okwenza u-Ayenge wakhetha ukungajoyini iqembu lezombusazwe lokungasaluthi ifulegi?

• Ubona angani wakhetha kuhle yini?

Yiziphi ezinye izimo ezingenza kube nzima ukungangeni endabeni zomhlaba lo? Bukelani IVIDIYO beselixoxa ngemibuzo elandelayo.

IVIDIYO: Izifundo Esizithola KuNqabayokulinda: Ungaphumi Endleleni Eyiyo (5:16)

• Singakubalekela njani ukuzigqaja ngelizwe elithile nxa sibukele imidlalo?

• Kungani kungamelanga singene endabeni zomhlaba lo lanxa okwenziwa ngabezombusazwe kusithinta?

• Kungani kungamelanga sivume ukuthi okukhulunywa ngabezindaba kumbe abanye abantu kusenze sisekele izindaba zomhlaba lo?

ISIFINQO

AmaKhristu eqiniso kumele azimisele ukungangeni endabeni zomhlaba lo lokungasekeli ezombusazwe ngalokho akucabangayo, akukhulumayo lakwenzayo.

Ufundeni?

• AmaKhristu eqiniso ababona njani ohulumende?

• Kungani singangeni kwezombusazwe?

• Yiziphi izimo ezingenza kube nzima ukungangeni endabeni zomhlaba lo?

THOLA OKUNENGI

Bukela ividiyo le ubone ukuthi kuyini okungasilahlekela nxa sizimisele ukungangeni kwezombusazwe.

UJehova Kakaze Asilahle (3:14)

Bukela ividiyo le ubone ukuthi izimuli zingabulungiselela njani ubunzima ezizahlangana labo ngenxa yokungangeni endabeni zomhlaba.

Ungangeneli Kwezombusazwe Nxa Usembuthanweni (4:25)

Bukela ividiyo le ukuze ubone okwenza eyinye indoda yatshiya umsebenzi eyayiwuqakathekisa kakhulu.

“Zonke Izinto Ziyenzeka NgoNkulunkulu” (5:19)

Bala isihloko lesi uzwe ukuthi ungatshengisa njani ukuthi awusongxenye yomhlaba nxa ukhetha umsebenzi ofuna ukuwenza.

“Umuntu Ngamunye Uzazithwalela Umthwalo Wakhe” (INqabayokulinda, March 15, 2006)