Kungani Sihlupheka?

Nxa kungenzakala into embi futhi ezwisa ubuhlungu sijayele ukubuza ukuthi, “Yindaba kwenzakale into enje?” Kuyaduduza ukwazi ukuthi iBhayibhili lilempendulo yombuzo lo.

1. USathane wenzani okwabangela ukuthi abantu bahlupheke?

USathane uDeveli wahlamukela uNkulunkulu ngoba wayefuna ukubusa. Wayenga u-Adamu lo-Eva ukuthi labo bahlamuke. Lokhu wakwenza ngokutshela u-Eva amanga ngoNkulunkulu. (UGenesisi 3:1-5) Wamenza wacabanga ukuthi kulento uJehova ayemfihlela yona. Amazwi akhe enza kwakhanya angani abantu bangathokoza nxa bezenzela abakufunayo. USathane wakhuluma amanga okuqala ngokutshela u-Eva ukuthi kasoze afe. Yikho iBhayibhili lisithi uSathane “ungusomangase futhi unguyise wamanga.”—UJohane 8:44.

2. U-Adamu lo-Eva bakhetha ukwenzani?

UJehova wayenike u-Adamu lo-Eva yonke into ababeyifuna. Wabatshela ukuthi bangadla izithelo zaloba yisiphi isihlahla esivandeni ngaphandle kwezithelo zesihlahla esisodwa zwi. (UGenesisi 2:15-17) Kodwa bona badla isithelo okwakuthwe bangasidli. U-Eva ‘wakha isithelo wadla’ njalo ngokuya kwesikhathi u-Adamu laye ‘wasidla.’ (UGenesisi 3:6) Kwakulula ukuthi u-Adamu lo-Eva benze okulungileyo ngoba babengelasono kodwa beqa umlayo kaNkulunkulu ngabomo. Isono abasenzayo satshengisa ukuthi babengafuni ukubuswa nguNkulunkulu futhi sabangela ukuthi bahlupheke.—UGenesisi 3:16-19.

3. Ukungalaleli kuka-Adamu lo-Eva kusithinta njani thina?

Ukungalaleli kuka-Adamu lo-Eva kwabenza baba lesono futhi isono leso basidlulisela kubo bonke abantwababo. IBhayibhili lithi: “Isono sangena emhlabeni ngomuntu oyedwa [u-Adamu], lokufa kwangena ngesono, ngaleyondlela ukufa kwafika ebantwini bonke.”—KwabaseRoma 5:12.

Nanzi ezinye izizatho ezenza sihlupheke: Ukwenza izinqumo ezimbi kumbe izinqumo ezimbi ezenziwa ngabanye lokuba sendaweni engayisiyo ngesikhathi esingayisiso.—Bala umTshumayeli 9:12.

GEBHA UJULE

4. Ngubani obangela ukuhlupheka?

Abantu abanengi bacabanga ukuthi uNkulunkulu nguye obusa umhlaba. Kodwa abakucabangayo kuliqiniso yini? Bukelani IVIDIYO.

IVIDIYO: Ngubani Obusa Umhlaba? (1:24)

Bala uJakhobe 1:13 lo-1 Johane 5:19 beselixoxa ngombuzo lo:

• NguNkulunkulu yini obangela ukuhlupheka?

5. Ukubusa kukaSathane kubangeleni?

IVIDIYO: Yindaba UNkulunkulu Evumela Ukuhlupheka?—Isiqephu (3:07)

Bala uGenesisi 3:1-6 beselixoxa ngemibuzo le:

• Yiwaphi amanga akhulunywa nguSathane?—Khangela ivesi 4 lo-5.

• Amanga kaSathane enza abantu bacabangeni ngoJehova?

• Ngokwalokho okwakhulunywa nguSathane, ukubuswa nguNkulunkulu kungenza abantu bathokoze yini?

Bala umTshumayeli 8:9 beselixoxa ngemibuzo elandelayo:

• Ukubusa kukaSathane kubangeleni? Ubona angani uJehova angasibusa ngcono yini?

1. U-Adamu lo-Eva babengelasono ngesikhathi besesivandeni esilipharadayisi. Kodwa bahlamukela uJehova ngokulalela uSathane

2. Ukuhlamuka kwabo kwabangela isono, lokuhlupheka kanye lokufa

3. UJehova uzasusa isono njalo aqede ukuhlupheka lokufa. Umhlaba uzaphinda ube lipharadayisi elilabantu abangelasono

6. UJehova ulendaba lathi

UNkulunkulu uyakubona yini ukuhlupheka kwethu? Zwana ukuthi iNkosi uDavida lomphostoli uPhetro bathini. Bala iHubo 31:7 lo-1 Phetro 5:7 beselixoxa ngombuzo lo:

• Uzwa njani ngokuthi uJehova ulendaba lawe lokuthi uyakubona ukuhlupheka kwakho?

ISIFINQO

Ukuhlupheka kwabangelwa nguSathane uDeveli labazali bethu bokuqala, u-Adamu lo-Eva. UJehova uyakubona ukuhlupheka kwethu futhi sekuseduze ukuthi akuqede.

Ufundeni?

• Yiwaphi amanga uSathane awatshela u-Eva?

• Ukungalaleli kuka-Adamu lo-Eva kusithinta njani thina?

• Sazi njani ukuthi uJehova ulendaba lathi lokuthi uyasibona nxa sihlupheka?

THOLA OKUNENGI

Bala isihloko lesi uzwe ukuthi iBhayibhili lithi isono kuyini.

“Siyini Isono?” (Isihloko esikuwebhusayithi yethu)

Bala isihloko lesi uzwe indaba eyavuswa nguSathane uDeveli e-Edeni.

“Kungani UNkulunkulu Evumela Ukuhlupheka?” (INqabayokulinda, January 1, 2014)

Bala isihloko lesi uthole impendulo yombuzo ohlupha abantu abanengi.

“Kungani UNkulunkulu Engazange Angenele Ngesikhathi Kubulawa AmaJuda Amanengi?” (Isihloko esikuwebhusayithi yethu)

Bukela ividiyo le ubone ukuthi kuyini okwenza eyinye indoda yatshintsha indlela eyayiphila ngayo.

UJehova Kangitshiyanga (5:09)

U-Adamu lo-Eva abazange balalele uNkulunkulu futhi ukungalaleli kwabo kwabangela isono, ukuhlupheka lokufa.a Lanxa kunjalo, uJehova wenza indlela yokusikhulula esonweni lasekufeni esebenzisa iNdodana yakhe uJesu Khristu. IBhayibhili lifundisa ukuthi ukufa kukaJesu kwaba yinhlawulo yabantu bonke. Inhlawulo yimbadalo ekhitshwayo ukuze kukhululwe umuntu othunjiweyo. UJesu wanikela ngokuphila kwakhe okupheleleyo ukuze asihlawulele. (Bala uMathewu 20:28.) UJesu wayengakhetha ukuzihlalela emhlabeni kuze kube nini lanini, kodwa wakhetha ukusifela futhi lokhu kwasivulela ithuba lokuphinda sithole ukuphila okungapheliyo okwalahlwa ngu-Adamu lo-Eva. Inhlawulo itshengisa ukuthi uJehova loJesu bayasithanda. Esifundweni lesi sizaxoxa ngokuthi ukufa kukaJesu kusinceda njani.

1. Ukufa kukaJesu kusinceda njani khathesi?

Zinengi izinto esizenzayo ezidanisa uJehova ngenxa yokuthi silesono. Kodwa nxa sifuna ukuba ngabangane bakhe kumele sizimisele ukungazenzi ngabomo lezozinto njalo simcele ukuthi asithethelele esebenzisa inhlawulo kaJesu Khristu. (1 UJohane 2:1) IBhayibhili lithi: “UKhristu wafela izono kwaba kanye kuphela, umuntu olungileyo efela abangalunganga, ukuze alikhokhele elisa kuNkulunkulu.”—1 UPhetro 3:18.

2. Ukufa kukaJesu kuzasinceda njani ngesikhathi esizayo?

UJehova wathuma iNdodana yakhe engelasono ukuthi izosifela “ukuze wonke umuntu otshengisa ukuthi uyakholwa kuyo angabhujiswa kodwa abe lokuphila okungapheliyo.” (UJohane 3:16) Sekuseduze ukuthi uJehova asebenzise uJesu ukuqeda zonke izinto ezimbi ezabangelwa yikungalaleli kuka-Adamu. Nxa sifuna ukuphila kuze kube nini lanini emhlabeni olipharadayisi kumele sibe lokholo enhlawulweni kaJesu.—U-Isaya 65:21-23.

GEBHA UJULE

3. Ukufa kukaJesu kuzaqeda isono lokufa

IVIDIYO: Kungani UJesu Wafa?—Ingxenye 1 (2:01)

• Kuyini okwalahlekela u-Adamu ngesikhathi ehlamukela uNkulunkulu?

Bala uRoma 5:12 beselixoxa ngombuzo lo:

• Ukona kuka-Adamu kukuthinta njani?

Bala uJohane 3:16 beselixoxa ngombuzo olandelayo:

• Kungani uJehova wathuma iNdodana yakhe emhlabeni?

1. U-Adamu wayengelasono ekuqaliseni kodwa ukona kwakhe kwabangela ukuthi bonke abantu babe lesono futhi bafe

2. UJesu wayengelasono njalo ukufa kwakhe kwavulela abantu ithuba lokuthi baphile kuze kube nini lanini bengaselasono

4. Ukufa kukaJesu kunceda wonke umuntu

IVIDIYO: Kungani UJesu Wafa?—Ingxenye 2 (2:00)

• Ukufa komuntu oyedwa kubanceda njani abantu abanengi?

Bala u-1 Thimothi 2:5, 6 beselixoxa ngombuzo lo:

• Ekuqaliseni u-Adamu wayengelasono kodwa ukona kwakhe kwabangela ukuthi bonke abantu babe lesono futhi bafe. UJesu laye wayengelasono njengo-Adamu ekuqaliseni. Kuyini okwenza ukufa kwakhe kwaba “yinhlawulo efaneleyo” futhi kubanceda njani abantu?

5. Inhlawulo yisipho esisiphiwe nguJehova

Umngane kaJehova ngamunye ubona inhlawulo iyisipho esiphiwe yena ngokwakhe. Ukuze ubone isibonelo salokhu, bala uGalathiya 2:20 beselixoxa ngombuzo lo:

• Kuyini okutshengisa ukuthi umphostoli uPhawuli wayebona inhlawulo iyisipho esasiphiwe yena?

Ukona kuka-Adamu kwabangela ukuthi yena labantwabakhe bagwetshelwe ukufa. Kodwa uJehova wathuma iNdodana yakhe ukuthi izosifela ukuze sithole ukuphila okungapheliyo.

Ngesikhathi ubala amavesi alandelayo, zama ukucabanga ukuthi uJehova wezwa njani lapho ebona iNdodana yakhe ihlukuluzwa. Bala uJohane 19:1-7, 16-18 beselixoxa ngombuzo lo:

• Uzwa njani ngalokho uJehova loJesu abakwenzele khona?

ISIFINQO

Ukufa kukaJesu kwenza uJehova asithethelele njalo kusinika lethuba lokuphila kuze kube nini lanini.

Ufundeni?

• Kungani uJesu wafa?

• Kuyini okwenza ukufa kukaJesu kwaba “yinhlawulo efaneleyo”?

• Ukufa kukaJesu kungakunceda njani?

THOLA OKUNENGI

Bala isihloko lesi uzwe ukuthi kuyini okwenza ukufa kukaJesu kube yinhlawulo yabanengi.

“Kuyini Okwenza Ukufa KukaJesu Kube ‘Yinhlawulo Yabanengi’?” (Isihloko esikuwebhusayithi yethu)

Bala uzwe ukuthi kuyini okumele ukwenze nxa ufuna ukusindiswa.

“UJesu Usisindisa Njani?” (Isihloko esikuwebhusayithi yethu)

Bala uzwe ukuthi uJehova uyabathethelela yini abantu abenze izono ezinkulu.

“Imibuzo YeBhayibhili Iyaphendulwa” (INqabayokulinda, May 1, 2013)

Bala isihloko lesi uzwe ukuthi ukufunda ngomhlatshelo kaKhristu kwayinceda njani eyinye indoda.

“Angisabuswa Ludlakela” (Isihloko EsikuWebhusayithi)