7. UMbuso kaNkulunkulu ulemithetho emihle kakhulu

Ohulumende bayafaka imithetho ukuze bavikele abantu. UMbuso kaNkulunkulu lawo ulemithetho enceda labo abayilalelayo. Bala u-1 Khorinte 6:9-11 beselixoxa ngemibuzo le:

• Ubona angani bekuzabe kunjani emhlabeni aluba wonke umuntu ulandela imithetho kaNkulunkulu?a

• Ucabanga ukuthi labo abafuna ukubuswa nguMbuso kaNkulunkulu kumele bayilalele yini imithetho abanika yona? Kungani usitsho njalo?

• Kuyini okutshengisa ukuthi labo abangalaleli imithetho kaNkulunkulu bangatshintsha?—Khangela ivesi 11.

Abantu abanengi kabakhululekanga ukukhuluma ngendaba zemacansini. Kodwa iBhayibhili liyakhuluma ngendaba le futhi liyibeka ngendlela elesithunzi. Elikutshoyo kuyasinceda njalo kuyasivikela ngoba kuvela kuJehova uMdali wethu. UJehova ufuna senze okumthokozisayo ngoba uyakwazi ukuthi ukwenza njalo kuzasenza sithokoze kuze kube nini lanini.

1. UJehova uthini ngokuya emacansini?

Ukuya emacansini yisipho uJehova asinike abantu. Kodwa uthi indoda lomfazi abatshadileyo yibo kuphela okumele baye emacansini. Isipho lesi sinika abatshadileyo ithuba lokuthi batshengisane ukuthi bayathandana lelokuba labantwana. IBhayibhili lithi: “Thokoza ngomfazi wobutsha bakho.” (IZaga 5:18, 19) UJehova ufuna amaKhristu atshadileyo athembeke kubomkawo. Lokhu kutsho ukuthi akumelanga aye emacansini labanye abantu.—Bala uHebheru 13:4.

2. Kutshoni ukungaziphathi?

IBhayibhili lithi: “Labo abafebayo . . . abasoze balithole ilifa loMbuso kaNkulunkulu.” (1 KwabaseKhorinte 6:9, 10) Abalobi beBhayibhili ababhala ngesiGrikhi basebenzisa ibala elithi por·neiʹa ngesikhathi bekhuluma ngokungaziphathi. Ibala leli ligoqela (1) ukuya emacansini lomuntu ongatshadanga laye,a (2) ukuba yisitabane (3) lokulala lenyamazana. Ukubalekela “ubufebe” kwenza uJehova athokoze njalo kuyasivikela.—1 KwabaseThesalonika 4:3.

GEBHA UJULE

3. Balekela ubufebe

Ijaha elalithembekile okuthiwa nguJosefa labaleka ngesikhathi owesifazana othile efuna ukulala lalo. Bala uGenesisi 39:1-12 beselixoxa ngemibuzo le:

• Kuyini okwenza uJosefa wabaleka?—Khangela ivesi 9.

• Ucabanga ukuthi okwenziwa nguJosefa kwakuqondile yini? Kungani usitsho njalo?

IVIDIYO: Balekela Ubufebe (5:06)

UJehova ufuna sonke sibalekele ubufebe. Bala u-1 Khorinte 6:18 beselixoxa ngemibuzo elandelayo:

• Yiziphi izimo ezingenza umuntu acine efebile?

• Ungakubalekela njani ukungaziphathi?

4. Ungasinqoba isilingo!

IVIDIYO: Nqoba Isilingo Ngokubala IBhayibhili (3:02)

• Umfowethu wenzeni ngesikhathi enanzelela ukuthi izinto azenzayo lazicabangayo zizakwenza ukuthi acine engasathembekanga kumkakhe?

AmaKhristu athembekileyo lawo ayake athwale nzima ngezinye izikhathi ukuthi ahlale elemicabango ehlanzekileyo. Ungenzani ukuze ukhiphe imicabango emibi engqondweni yakho? Bala uFiliphi 4:8 beselixoxa ngemibuzo le:

• Yizinto ezinjani okumele sicabange ngazo?

• Ukubala iBhayibhili lokwenza okunengi emsebenzini kaJehova kungasinceda njani ukuthi sibalekele ukwenza isono?

5. Ukulalela uJehova kuyasinceda

IVIDIYO: Ukuswela Ulwazi Olweneleyo (9:31)

• Ijaha elisakhulayo lazifaka njani esilingweni?—Khangela iZaga 7:8, 9.

• IZaga 7:23, 26 zitshengisa ukuthi ukungaziphathi kubangela ubuhlungu obukhulu. Ukubalekela ubufebe kusivikela njani?

• Ukuziphatha kuhle kungasinceda njani ukuthi sihlale sithokoza?

Abanye abantu bathi okutshiwo liBhayibhili mayelana lobutabane kucindezela abanye. Kodwa okwenza uJehova wafaka imithetho enjalo yikuthi ufuna sithokoze. Abalalela imithetho le bazaphila kuze kube nini lanini. Bala u-1 Khorinte 6:9-11 beselixoxa ngombuzo lo:

• Ngaphandle kobutabane, yiziphi ezinye izinto eziqanjwe emavesini la ezingamthokozisiyo uNkulunkulu?

Sonke kumele sitshintshe indlela esiphila ngayo ukuze sithokozise uNkulunkulu. Kungani kuqakathekile ukuthi senze njalo? Bala iHubo 19:8, 11 beselixoxa ngemibuzo elandelayo:

• Ubona angani indlela uJehova afuna siziphathe ngayo iqondile yini? Kungani usitsho njalo?

ISIFINQO

Ukuya emacansini yisipho uJehova asinike indoda lomfazi abatshadileyo.

Ufundeni?

• Kutshoni ukuziphatha kubi?

• Kuyini okuzasinceda sibalekele ubufebe?

• Kusinceda ngani ukulalela imithetho kaJehova emayelana lokuziphatha?

THOLA OKUNENGI

Bala isihloko lesi ukuze ubone ukuthi kungani uNkulunkulu efuna indoda lomfazi baqale batshade bengakahlali bonke.

“IBhayibhili Lithini Ngendoda Lomfazi Abahlala Ndawonye Bengatshadanga?” (Isihloko esikuwebhusayithi yethu)

Bala isihloko lesi uzwe ukuthi kungani kungamelanga sizizonde izitabane lanxa iBhayibhili lisithi ubutabane abuqondanga.

“Ukuba Yisitabane Kubi Yini?” (Isihloko esikuwebhusayithi yethu)

Bala isihloko lesi ukuze ubone ukuthi imithetho kaNkulunkulu emayelana lokuziphatha isivikela njani.

“Ukumumuza Izitho Zensitha Zomunye Umuntu Yikuya Emacansini Yini?” (Isihloko esikuwebhusayithi yethu)

Bala isihloko esithi “Abazange Bangenyanye” ukuze ubone ukuthi kuyini okwenza indoda eyayiyisitabane yatshintsha indlela eyayiphila ngayo ukuze ithokozise uNkulunkulu.

“IBhayibhili Liyamntshintsha Umuntu” (INqabayokulinda, April 1, 2011)

Lanxa umthanda sibili uJehova njalo uzama ngamandla akho wonke ukumthokozisa, zikhona izikhathi lapho ozamphambanisela khona. Kodwa-ke amanye amaphutha ayizono ezinkulu kuJehova. (1 KwabaseKhorinte 6:9, 10) Nxa ungenza isono esinjalo, hlala ukhumbula ukuthi uJehova uyabe elokhu ekuthanda futhi ezimisele ukukuthethelela lokukuncedisa ukuthi ulungisise ubungane bakho laye.

1. Kumele senzeni nxa sifuna ukuthi uJehova asithethelele?

Abantu abamthandayo uJehova bayazisola nxa bangenza isono esikhulu. UJehova ubaduduza ngamazwi la athi: “Lanxa izono zenu zibomvu gebhu, zizakwenziwa zibe mhlophe njengongqwaqwane.” (U-Isaya 1:18) Nxa singaphenduka okweqiniso uJehova uzasixolela. Kodwa kutshoni ukuphenduka? Kutsho ukuzisola ngenhliziyo yonke ngalokho esikwenzileyo, sizimisele ukungakuphindi njalo sicele ukuthi uJehova asithethelele. Ngemva kwalokho kumele sizimisele ukwenza akufunayo njalo sibalekele imicabango kumbe izenzo ezibangele ukuthi senze isono leso.—Bala u-Isaya 55:6, 7.

2. UJehova usebenzisa obani ukuze ancedise umuntu owenze isono esikhulu?

UJehova ukhuthaza umuntu owenze isono esikhulu ukuthi ‘abize abadala bebandla.’ (Bala uJakhobe 5:14, 15.) Abadala bayamthanda uJehova njalo bayazithanda lezimvu zakhe. Bafundisiwe ukuthi bangamncedisa njani umuntu onjalo ukuthi alungisise ubungane bakhe loJehova.—KwabaseGalathiya 6:1.

Abadala bamncedisa njani umuntu owenze isono esikhulu? Bayamqondisa besebenzisa iBhayibhili, bamcebise njalo bamkhuthaze ukuze angaphindi enze isono esifananayo. Lokhu kwenziwa ngabadala ababili loba abathathu. Kodwa nxa engazimiselanga ukuphenduka, abadala bayamsusa ebandleni ukuze bavikele ibandla.

GEBHA UJULE

3. Ukuvuma isono kwenza siphinde sibe ngabangane bakaJehova

Loba yisiphi isono umuntu asenzayo sizwisa uJehova ubuhlungu. Yikho kumele sivume izono zethu kuye. Bala iHubo 32:1-5 beselixoxa ngombuzo lo:

• Kungani kuqakathekile ukuthi sivume izono zethu kuJehova?

IVIDIYO: “UJehova Uyabalaya Abathandayo” (3:01)

• Abadala bamncedisa njani uCanon ukuthi aphinde abe ngumngane kaJehova?

Akumelanga sibafihlele lutho abadala ngoba bafuna ukusinceda. Bala uJakhobe 5:16 beselixoxa ngombuzo lo:

• Kunceda ngani ukutshela abadala iqiniso?

4. UJehova ulesihawu kulabo abenze isono

Nxa umuntu owenze isono esikhulu engafuni ukuphenduka uyasuswa ebandleni ngoba kafuni ukuphila ngendlela kaJehova. Umuntu onjalo kuyabe kungasamelanga sitshise ingxoxo laye. Bala u-1 Khorinte 5:6, 11 beselixoxa ngombuzo olandelayo:

• Njengoba nje imvubelo ibilisa inhlama, ukuba lobudlelwano lesoni esingafuni ukuphenduka kuliphambanisa njani ibandla?

Indlela uJehova aphatha ngayo abantu abenze isono isifundisani ngaye?

5. UJehova uyasithethelela nxa siphenduka okweqiniso

UJesu wasebenzisa umzekeliso osinceda sizwisise ukuthi uJehova uzwa njani nxa umuntu owonileyo ephenduka. Bala uLukha 15:1-7 beselixoxa ngombuzo lo:

• Umzekeliso lo usifundisani ngoJehova?

Bala uHezekheli 33:11 beselixoxa ngombuzo olandelayo:

• Kuyini okumele umuntu akwenze ukuze kukhanye ukuthi usephendukile?

ISIFINQO

UJehova uzasithethelela nxa sizisola okweqiniso ngesono esisenzileyo futhi sizimisele ukungasiphindi.

Ufundeni?

• Kusinceda ngani ukuvuma izono zethu kuJehova?

• Kumele senzeni nxa sifuna ukuthi uJehova asithethelele?

• Kungani kumele sitshele abadala nxa senze isono esikhulu?

THOLA OKUNENGI

Bukela ividiyo le ubone ukuthi eyinye indoda yakubona njani ukuthi uJehova uyathethelela njengoba kutshiwo ku-Isaya 1:18.

Ungathandabuzi Ukuthi UJehova Uyathethelela (5:02)

Bala isihloko lesi uzwe ukuthi ukususwa kumnceda njani umuntu owonileyo kanye lebandla lonke.

“Abadala Bangatshengisa Njani Ukuthi Balothando Lesihawu?” (INqabayokulinda, August 2024)

Bala isihloko lesi uzwe ukuthi abadala batshengisa njani ukuthi balothando lesihawu nxa bencedisa umuntu osusiweyo.

“Abadala Bangabancedisa Njani Abasuswa Ebandleni?” (INqabayokulinda, August 2024)

Bala isihloko esithi “Ngasengifuna Ukubuyela KuJehova” uzwe ukuthi eyinye indoda eyayisitshiye ukukhonza uJehova yenzani ukuze ibuyele kuye.

“IBhayibhili Liyamntshintsha Umuntu” (INqabayokulinda, April 1, 2012)