Abantu balemibono etshiyeneyo ngendaba yokunatha utshwala. Abanye bathi kuqondile ukuzinathela labangane ngezinye izikhathi, abanye bona bathi akumelanga sibuthinte, ikanti abanye banatha baze badakwe. IBhayibhili lona lithini ngokunatha utshwala?

1. Kubi yini ukunatha utshwala?

IBhayibhili alikwalisi ukunatha utshwala ngoba liveza ukuthi buphakathi kwezipho ezinengi uNkulunkulu asinike zona. Ngokwesibonelo, lithi ‘iwayini lithokozisa inhliziyo yomuntu.’ (IHubo 104:14, 15) IBhayibhili liphinda likhulume ngamanye amadoda labesifazana ababekhonza uNkulunkulu ababenatha utshwala ngezinye izikhathi.—1 KuThimothi 5:23.

2. Kuyini okutshiwo liBhayibhili okunganceda labo abakhetha ukunatha utshwala?

UJehova kafuni sinathe kakhulu kumbe sidakwe. (KwabaseGalathiya 5:21) ILizwi lakhe lithi: “Ungabi phakathi kwabantu abanatha kakhulu iwayini.” (IZaga 23:20) Ngakho nxa ungakhetha ukunatha uwedwa kumbe ulabanye abantu, kumele unanzelele ukuthi awunathi uze ucine ungasenelisi ukucabanga kuhle, ukuzibamba ekukhulumeni lasezenzweni kumbe uze ucine usiba lemikhuhlane ebangelwa yikunatha kakhulu. Nxa kukwehlula ukuzibamba, kungabangcono ukuthi ungasanathi.

3. Singatshengisa njani ukuthi siyabahlonipha abanye endabeni yokunatha utshwala?

Umuntu ngamunye uyazikhethela ukuthi uyafuna yini ukunatha utshwala kumbe hatshi. Akumelanga simahlulele umuntu okhetha ukunatha njalo akumelanga simbambe ngamandla lowo okhetha ukungabuthinti. (KwabaseRoma 14:10) Kanti njalo akumelanga sinathe utshwala nxa ukwenza njalo kuzaphambanisa abanye. (Bala uRoma 14:21.) Phela akumelanga ‘sizifunele okunceda thina kodwa okunceda abanye.’—Bala u-1 Khorinte 10:23, 24.

GEBHA UJULE

4. Okungakunceda nxa sokumele ukhethe ukuthi uzanatha yini loba hatshi

UJesu wayekubona njani ukunatha utshwala? Ukuze uthole impendulo yombuzo lo, ake sihlole isimangaliso sokuqala uJesu asenzayo. Bala uJohane 2:1-11 beselixoxa ngemibuzo le:

• Isimangaliso lesi sitshengisa ukuthi uJesu wayekubona njani ukunatha utshwala?

• Njengoba uJesu engazange athi ukunatha utshwala kubi, kumele simsole yini umKhristu okhetha ukunatha?

Ukuba lenkululeko yokunatha akutsho ukuthi sokumele unathe ngaloba yisiphi isikhathi. Bala iZaga 22:3 beselixoxa ngokuthi kuqondile yini ukunatha nxa:

• Uzatshayela kumbe usebenzise umtshina othile?

• Uzithwele?

• Udokotela ekutshele ukuthi unganathi?

• Kuyikuthi kunzima ukuyekela ungavele ubuqalise?

• Umthetho kahulumende ungakuvumeli ukuthi unathe?

• Ulomuntu ongasafuni kubuthinta ngenxa yohlupho lokudakwa ayelalo kudala?

Bukelani IVIDIYO ukuze ubone ukuthi kuyini okungakunceda ukhethe kuhle nxa ufuna kube lotshwala emtshadweni wakho loba komunye nje umbuthano ozawuhlela.

IVIDIYO: Kumele Kube Lotshwala Yini? (2:41)

Bala uRoma 13:13 lo-1 Khorinte 10:31, 32 beselixoxa ngombuzo olandelayo ngemva kokubala umbhalo ngamunye:

• Ivesi le ingakunceda njani ukuthi ukhethe ngendlela ezathokozisa uJehova?

5. Kumele unathe utshwala obunganani?

Nxa ukhetha ukunatha utshwala kumele ukhumbule ukuthi uJehova kafuni sidakwe. Ngenxa yani? Bala uHoseya 4:11, 18 beselixoxa ngombuzo olandelayo:

• Kuyini okwenzakalayo nxa umuntu anganatha kakhulu?

Kuyini okuzakunceda ukuthi unganathi kakhulu? Yikuzibamba lokuzifakela umngcele. Bala iZaga 11:2 beselixoxa ngombuzo lo:

• Kungani kuqakathekile ukuzifakela umngcele endabeni yokunatha?

6. Ungalunqoba uhlupho lokudakwa!

IVIDIYO: ‘Yayisingidakile Impilo Engangiyiphila’ (6:32)

• UDmitry wayesenzani angadakwa?

• Kwakulula yini ukuthi atshiye ukunatha?

• Kuyini okwamnceda ukuthi anqobe uhlupho ayelalo?

Bala u-1 Khorinte 6:10, 11 beselixoxa ngemibuzo le:

• IBhayibhili lithini ngokudakwa?

• Kuyini okutshengisa ukuthi umuntu olohlupho lokudakwa angenelisa ukutshintsha?

Bala uMathewu 5:30 beselixoxa ngombuzo olandelayo:

• UJesu wasebenzisa umzekeliso wokuquma isandla ukuze atshengise ukuthi kumele sizimisele ukulahlekelwa nxa sifuna ukuthokozisa uJehova. Kuyini okumele ukwenze nxa ukutshiya ukudakwa kukuthwalise nzima?a

Bala u-1 Khorinte 15:33 beselixoxa ngombuzo lo:

• Kuzakwenzakalani nxa ulabangane abanatha kakhulu?

ISIFINQO

Utshwala yisipho uJehova asiphe sona kodwa kafuni ukuthi labo abakhetha ukunatha banathe kakhulu kumbe badakwe.

Ufundeni?

• IBhayibhili lithini ngotshwala?

• Kungani kuyingozi ukunatha kakhulu?

• Singatshengisa njani ukuthi siyabahlonipha abanye endabeni yokunatha utshwala?

THOLA OKUNENGI

Bukela ividiyo le ukuze uthole amacebo anganceda abasakhulayo endabeni yokunatha utshwala.

Qala Ucabange Ungakanathi (2:31)

Bala isihloko lesi ukuze uthole amacebo angakunceda nxa ulohlupho lokunatha kakhulu.

“Amacebo Azakunceda Ukuthi Unganathi Wedlulise” (INqabayokulinda, January 1, 2010)

Kuqondile yini ukuthi amaKhristu eqiniso atshayanise ama-glass nxa enatha? Bala isihloko lesi ukuze uthole impendulo.

“Imibuzo Ebuzwa Ngabafundi” (INqabayokulinda, February 15, 2007)

Bala isihloko esithi “Ngangibukhelela Okuzwayo” ukuze ubone okwanceda eyinye indoda ukuthi itshiye ukunatha kakhulu.

“IBhayibhili Liyamntshintsha Umuntu” (INqabayokulinda, May 1, 2012)

Ngamunye wethu uyazikhethela indlela afuna ukugqoka ngayo lendlela azilungisa ngayo. Nxa singasebenzisa izimiso eziseBhayibhilini endabeni le sizakhetha ngendlela ezasithokozisa, iphinde ithokozise loJehova. Ake sihlole ezinye izimiso ezingasinceda.

1. Kuyini okumele sicabange ngakho endabeni yokugqoka lokuzilungisa?

Kumele sikhethe ‘izigqoko ezilesithunzi, ezingadlulisi amalawulo futhi ezitshengisa ukuthi sizisebenzisa kuhle ingqondo zethu.’ Kanti njalo kumele sizilungise ngendlela etshengisa ukuthi ‘sizinikele kuNkulunkulu.’ (1 KuThimothi 2:9, 10) Nanku okumele sicabange ngakho: (1) Kufanele sigqoke ngendlela ‘elesithunzi.’ Akuthandabuzwa ukuthi usuke wakunanzelela ukuthi abafowethu labodadewethu bagqoka futhi bazilungise ngendlela ezitshiyeneyo nxa besemihlanganweni yebandla. Kodwa lokhu bakwenza betshengisa ukuthi bayamhlonipha uNkulunkulu. (2) ‘Ukungadlulisi amalawulo’ kutsho ukungagqoki ngendlela evusa imizwa yabanye kumbe ekudonsela amehlo. (3) Sitshengisa ukuthi ‘sizisebenzisa kuhle ingqondo zethu’ ngokungagijimisani laloba yiphi indlela yokugqoka kumbe eyokuzilungisa ebakhona. (4) Indlela esizilungisa ngayo kumele itshengise ukuthi ‘sizinikele kuNkulunkulu’ weqiniso lokuthi sikhonza yena yedwa.—1 KwabaseKhorinte 10:31.

2. Kungani kumele sicabange ngabafowethu labodadewethu nxa sikhetha esizakugqoka?

Lanxa sikhululekile ukuzikhethela esifuna ukukugqoka, kuqakathekile ukuthi sicabange ngabanye. Kumele sizimisele ukungakhubi abanye ngoba iBhayibhili lithi: “Ngamunye wethu kathokozise umakhelwane wakhe, amenzele okuhle okuzamakha.”—Bala uRoma 15:1, 2.

3. Indlela esigqoka ngayo lesizilungisa ngayo ingabanceda njani abanye?

Kufanele sizame ukugqoka ngendlela elesithunzi ngaso sonke isikhathi, ikakhulu nxa sisiya emihlanganweni yebandla lasekutshumayeleni. Indlela esigqoka ngayo lesizilungisa ngayo akumelanga ikhube abantu esibatshumayezayo, kodwa kufanele ibadonsele eqinisweni njalo ‘icecise imfundiso yoMsindisi wethu.’—KuThithusi 2:10.

GEBHA UJULE

4. Indlela esigqoka ngayo lesizilungisa ngayo kumele itshengise ukuthi sihlonipha uJehova

Kungani kumele sinanzelele indlela esizilungisa ngayo lesigqoka ngayo? Bala iHubo 47:2 beselixoxa ngemibuzo le:

• Ukukhumbula ukuthi sibizwa ngebizo likaJehova kusinceda njani endabeni yokugqoka lokuzilungisa?

• Ubona angani kuqakathekile yini ukugqoka kuhle nxa sisiya emihlanganweni yebandla kumbe ekutshumayeleni? Kungani usitsho njalo?

5. Okungasinceda ukuthi sigqoke kuhle njalo sizilungise ngendlela elesithunzi

Bukelani IVIDIYO.

IVIDIYO: “Konke Elikwenzayo Kwenzeleni Inkazimulo KaNkulunkulu” (10:18)

Izigqoko zethu kumele zihlanzeke futhi zibe sesimeni esihle kungelani lokuthi ziyadula yini kumbe hatshi njalo kumele zihambelane lalokho esiyabe sikwenza ngalesosikhathi. Bala u-1 Khorinte 10:24 lo-1 Thimothi 2:9, 10. Ngemva kwalokho xoxani ngokuthi kungani kungamelanga sigqoke izigqoko . . .

• ezingcolileyo kumbe ezingaqedakaliyo.

• ezibambayo, ezikhanyiselayo kumbe ezivusa imizwa yabanye.

AmaKhristu awakho ngaphansi koMthetho kaMosi kodwa kunengi angakufunda kuwo okutshengisa indlela uJehova afuna sigqoke futhi sizilungise ngayo. Bala uDutheronomi 22:5 beselixoxa ngombuzo olandelayo:

• Kungani kungamelanga owesilisa agqoke kumbe azilungise ngendlela ezamenza akhanye angani ngowesifazana kumbe ukuthi owesifazana agqoke futhi azilungise ngendlela ezamenza akhanye angani ngowesilisa?

Bala u-1 Khorinte 10:32, 33 lo-1 Johane 2:15, 16 beselixoxa ngemibuzo le:

• Kungani kungamelanga indlela esigqoka ngayo lesizilungisa ngayo ikhube abanye emphakathini kumbe ebandleni?

• Abantu bajayele ukugqoka lokuzilungisa njani emphakathini okuwo?

• Kuqondile yini ukuthi umKhristu aphongulandela loba yiphi indlela abantu abagqoka futhi bazilungise ngayo? Kungani usitsho njalo?

ISIFINQO

Nxa singagqoka ngendlela elesithunzi futhi sizilungise kuhle, siyabe sitshengisa ukuthi sihlonipha uJehova labanye abantu.

Ufundeni?

• Kungani uJehova elendaba lendlela esigqoka ngayo lesizilungisa ngayo?

• Kuyini okumele sicabange ngakho endabeni yokugqoka lokuzilungisa?

• Indlela esigqoka futhi sizilungise ngayo ingabanceda njani abanye abantu ukuthi bafune ukufunda ngoJehova?

THOLA OKUNENGI

Bala isihloko lesi ubone ukuthi indlela ogqoka ngayo ingabatshelani abanye abantu.

“Ngikhangeleka Njani?” (Isihloko esikuwebhusayithi yethu)

Bala isihloko lesi uzwe ukuthi iBhayibhili lithini ngama-tattoo.

“IBhayibhili Lithini Ngama -Tattoo?” (Isihloko esikuwebhusayithi yethu)

Bala isihloko lesi ubone ezinye izimiso ezingakunceda nxa ukhetha okokugqoka.

“Indlela Ogqoka Ngayo Iyamdumisa Yini UNkulunkulu?” (INqabayokulinda, September 2016)

Bala isihloko lesi ubone ukuthi kuyini okwatshintsha indlela omunye umama ayebona ngayo indaba yokugqoka lokuzilungisa.

“Indaba Yokugqoka Lokuzilungisa Yayingikhathaza” (Vukani!, December 22, 2003)