Ukungena Imihlangano YaboFakazi BakaJehova Kuzakunceda Njani?

Sewake waya emihlanganweni yaboFakazi bakaJehova yini? Mhlawumbe uyafisa ukwenza njalo kodwa uyesaba. Ungabe uzibuza ukuthi: ‘Kwenziwani emihlanganweni leyo? Yindaba kuqakathekile ukuthi ngiyingene?’ Esifundweni lesi uzabona ukuthi ukuhlangana labanye kuzakunceda kakhulu njalo kukwenze usondele kuNkulunkulu.

1. Kungani oFakazi bakaJehova besiba lemihlangano?

IBhayibhili liyasitshela ukuthi yindaba kuqakathekile ukungena imihlangano. Lithi: “Ngizamdumisa uJehova ebandleni elikhulu.” (IHubo 26:12) OFakazi bakaJehova emhlabeni wonke bayakukholisa ukuhlangana iviki ngayinye ukuze bakhonze uNkulunkulu. Okunye okwenziwa emihlanganweni yabo yikuhlabela lokuthandaza. Baphinda babe leminye imihlangano emikhulu lapho abahlangana khona bebanengi.

2. Kuyini ozakufunda emihlanganweni yethu?

Emihlanganweni yethu kufundwa iLizwi likaNkulunkulu njalo ‘liyachasiswa’ ukuze sizwisise elikutshoyo. (Bala uNehemiya 8:8.) Ngakho nxa ungayingena imihlangano le uzafunda okunengi ngoJehova. Uzazwisisa ukuthi uyakuthanda futhi lokhu kuzakwenza ube ngumngane wakhe. Uzabona lokuthi konke akufundisa khona kuzakunceda njani ukuthi uthokoze empilweni.—U-Isaya 48:17, 18.

3. Ukuxoxa labanye emihlanganweni yethu kuzakunceda njani?

UJehova ufuna sitshengise ukuthi silendaba labanye yikho esithi: “Kasicabanganeni ukuze sivuselelane ethandweni lasemisebenzini emihle, singayekeli ukuhlangana ndawonye.” (KumaHebheru 10:24, 25) Emihlanganweni yethu uzahlangana labantu abalesifiso sokufunda okunengi ngoNkulunkulu njengawe futhi uzabona ukuthi balothando. Abakukhulumayo kuzakukhuthaza kakhulu ngoba kuvela eBhayibhilini. (Bala uRoma 1:11, 12.) Uzananzelela ukuthi abantu ozaxoxa labo bayathokoza lanxa belezinto ezibakhathazayo. Lokhu ngokunye okutshengisa ukuthi kungani uJehova esikhuthaza ukuthi singene imihlangano!

GEBHA UJULE

4. Imihlangano yaboFakazi bakaJehova

AmaKhristu okukhulunywa ngawo eBhayibhilini ayehlangana ndawonye ukuze akhonze uJehova. (KwabaseRoma 16:3-5) Bala uKholose 3:16 beselixoxa ngombuzo lo:

• AmaKhristu okukhulunywa ngawo eBhayibhilini ayemkhonza njani uJehova?

IVIDIYO: Kuyini Okwenzakala EWolu YoMbuso? (2:12)

• Esikubale kuKholose 3:16 kuhambelana njani lalokho okubone kuvidiyo?

• Kuyini okuthandileyo kuvidiyo lasemfanekisweni mayelana lemihlangano yethu?

Bala u-2 Khorinte 9:7 beselixoxa ngombuzo lo:

• Yindaba kungacelwa mali emihlanganweni yaboFakazi bakaJehova?

Cela okufundisayo akutshengise ukuthi kuzaxoxwa ngani emhlanganweni olandelayo.

• Ubona angani yikuphi ozakukholisa kakhulu emhlanganweni lo?

Ubukwazi yini?

Ungangena ku-jw.org uyenelisa ukudinga ukuthi imihlangano yaboFakazi bakaJehova yenzelwa ngaphi futhi nini.

1. Emihlanganweni yethu kuba lentshumayelo ezithethwe eBhayibhilini, kubukelwe amavidiyo besekusiba labanye abasitshengisa ukuthi singafundisa njani abantu iBhayibhili. Imihlangano yethu iqalisa ngengoma langomthandazo njalo iphela ngendlela efananayo

2. Kuba lesikhathi lapho abantu abakhululeke khona ukutsho lokho abakutholileyo ngesikhathi belungiselela

3. Wonke umuntu ukhululekile ukungena imihlangano yethu kungelani lokuthi utshadile, ulabantwana kumbe usegugile

4. Imihlangano yaboFakazi bakaJehova ingenwa mahala futhi akucelwa mali

5. Zama ngamandla wonke ukuthi ungene imihlangano

Cabanga ngalokho okwakumele kwenziwe nguJesu labangakibo. Babehamba phose amalanga amathathu besuka eNazaretha besiya eJerusalema belanda umkhosi oqakathekileyo owawusenziwa kanye ngomnyaka. Bala uLukha 2:39-42 beselixoxa ngemibuzo le:

• Ubona angani kwakulula yini ukuya eJerusalema?

• Kungani kumele uzame ngamandla wonke ukungena imihlangano yethu?

• Ubona angani kuzakunceda yini ukuya emihlanganweni yethu lanxa kungaba nzima ukwenza njalo? Kungani usitsho njalo?

• Yindaba kumele singene imihlangano sikhathi sonke?

ISIFINQO

Ukungena imihlangano yethu kuzakunceda ukuthi uhlangane labanye abalesifiso sokufunda okunengi ngoJehova futhi kuzakwenza ube ngumngane wakhe.

Ufundeni?

• Kungani uJehova efuna sihlangane labanye ukuze simkhonze?

• Uzafundani emihlanganweni yaboFakazi bakaJehova?

• Kuzakunceda njani ukungena imihlangano yethu?

THOLA OKUNENGI

Engxenye uyesaba ukuya emihlanganweni yaboFakazi bakaJehova. Nxa kunjalo, bukela ividiyo le ubone ukuthi kuyini okwanceda omunye ukuthi acine esekuthanda ukuya emihlanganweni yethu.

Asisoze Sayikhohlwa Indlela Abasemukela Ngayo (4:16)

Bukela ividiyo le ubone ukuthi ukungena imihlangano kwayinceda njani eyinye indoda lokuthi kuyini okwenza yacina isikuthanda ukuya emihlanganweni.

Ngayithanda Kakhulu Imihlangano! (4:33)

Bala isihloko lesi uzwe ukuthi abanye bathini ngokungena imihlangano yethu.

“Kungani Kumele Ungene Imihlangano EWolu YoMbuso?” (Isihloko esikuwebhusayithi yethu)

Bala isihloko lesi uzwe ukuthi ukungena imihlangano yethu kwayitshintsha njani impilo yendoda eyayithanda ukulwa.

“Ngangihlala Ngithwele Umbhobho” (INqabayokulinda, July 1, 2014)

5. Izinto zitshintshe kakhulu emhlabeni kusukela ngo-1914

Bukelani IVIDIYO.

IVIDIYO: Izinto Zitshintshe Kakhulu Emhlabeni Kusukela Ngo-1914 (1:10)

UJesu wakhuluma ngokwakuzakwenzakala eseyiNkosi yoMbuso kaNkulunkulu. Bala uLukha 21:9-11 beselixoxa ngombuzo lo:

• Uyake uzibone zisenzakala yini izinto lezi kumbe uzwe ngazo?

Umphostoli uPhawuli wakhuluma ngokuthi abantu bazabe benjani ngensuku zokucina. Bala u-2 Thimothi 3:1-5 beselixoxa ngombuzo olandelayo:

• Uyake ubabone yini abantu okukhulunywa ngabo lapha?

6. Esingakwenza ukuze sitshengise ukuthi uMbuso kaNkulunkulu uyabusa

Bala uMathewu 24:3, 14 beselixoxa ngemibuzo le:

• Yiwuphi umsebenzi owenziwayo otshengisa ukuthi uMbuso kaNkulunkulu usubusa?

• Ubona angani ungenzani ukuze wenelise ukuncedisa emsebenzini lo?

UMbuso kaNkulunkulu uyabusa futhi sekuseduze ukuthi uqede zonke inhlupho ezisemhlabeni. Bala uHebheru 10:24, 25, beselixoxa ngombuzo olandelayo:

• Kumele senzeni njengoba ‘sibona usuku lusondela’?