• ‘Wayemthokozisile UNkulunkulu’
    INqabayokulinda (Ekazulu wonke)—2017 | No. 1

    • U-ENOKI “WAPHROFETHA NGABANTU LABA”

      Kungenzeka ukuthi u-Enoki wayelesizungu njengoba kwakunguye yedwa owayelokholo kuNkulunkulu ngesikhathi aphila ngaso. UNkulunkulu wakhe uJehova wayelubona yini ukholo lwakhe? Ye, wayelubona. Ngelinye ilanga uJehova wakhuluma lenceku yakhe ethembekileyo u-Enoki. Wamtshela umlayezo okwakumele ayewutshela abantu. Ngalokhu wenza u-Enoki waba ngumphrofethi wokuqala olamazwi abhalwa eBhayibhilini. Amazwi akhe siyawazi ngoba uJuda umfowabo kaJesu waphefumulelwa ukuthi awabhale sekudlule iminyaka eminengi u-Enoki wafa.a

      Sasisithini isiphrofetho sika-Enoki? Sasisithi: “Khangelani, iNkosi iza lezinkulungwane lezinye izinkulungwane zabangcwele bayo ukwahlulela abantu bonke, lokubalahla ngamacala bonke abangamesabiyo uNkulunkulu ngenxa yezenzo zabo zonke zokweyisa uNkulunkulu abazenzayo ezindleleni zabo zokwedelela uNkulunkulu, langenxa yamazwi wonke alukhuni izoni ezingamesabiyo uNkulunkulu ezawakhuluma kubi ngaye.” (UJuda 14, 15) U-Enoki wayelokholo oluqinileyo lokuthi uNkulunkulu wayezasigcwalisa isiphrofetho lesi. Ukholo lwakhe lwaluqine okokuthi wayebona angani uNkulunkulu usekwenzile. Umcijo esiwutholayo lapha ngowokuthi lanxa lokhu kwakungakenzakali umphrofethi yena wayeleqiniso lokuthi kuzayenzakala loba sekutheni.​—U-Isaya 46:10.

      U-Enoki utshumayeza abantu abangamesabiyo uNkulunkulu

      U-Enoki waba lesibindi sokutshela abantu ababewonakele umlayezo kaNkulunkulu

      Wayengabe esizwa njani u-Enoki ngesikhathi ehamba ememezela umlayezo lo? Okwenza sibone ukuthi isixwayiso lesi sasilamandla yikukhangela amabala awasebenzisayo. Amabala anjengathi ‘ukungesabi’, ‘ukweyisa’ ‘lokwedelela’ aveza ububi bezenzo zabantu bangaleso sikhathi. Isiphrofetho lesi sasixwayisa ngokuthi kusukela ekuxotshweni e-Edeni abantu babelokhu bewonakala ngamandla. Abenza okubi babezabhujiswa ngesikhathi uJehova esiza ‘lezinkulungwane zabangcwele’ loba izingilosi ezilamandla. Ngesibindi u-Enoki wabatshela isixwayiso lesi njalo wakwenza eyedwa. Kungenzeka ukuthi uLameki ekhula wayembukela ukhulu wakhe etshumayela futhi emangaliswa yisibindi ayelaso. Thina singafundani kulokhu?

      Ukholo luka-Enoki lwenza sizibuze ukuthi thina sibona umhlaba ngendlela uNkulunkulu awubona ngayo yini. Umlayezo wokwahlulelwa u-Enoki ayekhuluma ngawo usasebenza lalamuhla. Isiphrofetho sika-Enoki sagcwaliseka lapho uJehova ebhubhisa ababi ngoZamcolo ngesikhathi sikaNowa. Imbubhiso leyo iyisibonelo sembubhiso esesikhangelane layo. (UMathewu 24:38, 39; 2 UPhetro 2:4-6) Khathesi uNkulunkulu kanye lezinkulungwane zezingilosi zakhe sebemi ngomumo ukuze babhubhise abantu ababi. Sonke kumele sisiqakathekise isixwayiso sika-Enoki njalo sitshele labanye. Izihlobo labangane bangakuphikisa uze ubone angani usele egcekeni. Khumbula ukuthi uJehova kazange amtshiye u-Enoki, lakhathesi kasoze azitshiye izinceku zakhe ezithembekileyo.

  • ‘Wayemthokozisile UNkulunkulu’
    INqabayokulinda (Ekazulu wonke)—2017 | No. 1

    • a Ezinye izifundiswa zithi uJuda wathatha amazwi la ebhukwini okuthiwa ngelika-Enoki. Ibhuku leli kalitholakali emibhalweni engcwele njalo lilezinganekwane futhi akwaziwa lokuthi labhalwa ngubani. Lilaso isiphrofetho sika-Enoki esiqondileyo kodwa kungenzeka ukuthi umlobi walo wasithola komunye umbhalo wakudala ongasekho loba ukuthi wasitshelwa ngomlomo. Mhlawumbe uJuda laye wasithola kulowo mbhalo isiphrofetho lesi kumbe ukuthi walandiselwa ngumfowabo uJesu owabona u-Enoki ngawakhe ngesikhathi esezulwini.