Amazwi la aphezulu wawanyenyezelwa ngumngane wakhe oseduze, kulokuthi amduduze wona ahle amthunuka ngoba yena loyise babengamathe lolimi. Amazwi ayehlala ewaphindaphinda ngathi “ubaba ufe kabuhlungu.” Lanxa kwasekudlule iminyaka, ezingxoxweni zakhe kwakulokhu kuzwakala ukuthi inxeba lokufelwa lalingakapholi.

Iqiniso esingeke silibalekele elabonwa languKathy ngelokuthi kuthatha isikhathi ukuthi amanxeba okufelwa aphole ikakhulu nxa belizimbila zantabanye lalowo oyabe esetshonile. IBhayibhili likuveza mgceke ukuthi ukufa ‘yisitha sokucina.’ (1 KwabaseKhorinte 15:26) Ukufa ngeke sikubalekele, kungena ekhaya abantu belibele kusithathele abantu esibathandayo. Akula ngitsho loyedwa ongathi yena kakaze abuzwe ubuhlungu bokufelwa. Akumangalisi ukuthi sizizwe siphelelwa size siswele lokuthi sibambe ngaphi nxa ukufa sekufikile.

Engxenye lawe wawuke uzibuze ukuthi: Kuthatha isikhathi esingakanani ukuze ubuhlungu lobu buphele? Kuyini okunganginceda ukuthi ngingadabuki kakhulu? Ngingabaduduza njani abafelweyo? Ngizaphinda ngibabone yini ngawami la?

Sowake wahlaselwa ngumkhuhlane okwesikhatshana yini? Kungenzakala ukuthi ubuhlungu owabuzwayo sowabukhohlwa ngoba waphanga wasila. Manje ubuhlungu bokufelwa butshiyene kakhulu lalokhu. Kwelinye ibhuku elikhuluma ngendlela ongapholisa ngayo amanxeba okufelwa ngumkakho, isikhwicamfundo u-Alan Wolfelt wabhala wathi: “Akwenzakali ukuthi ubuhlungu bokufelwa buphele.” Waphinda wathi: “Ngokuya kwesikhathi langokuncediswa ngabanye ubuhlungu bungathi hu.”

Akubuyisele ingqondo yakho emuva ucabange ngendlela u-Abhrahama aphatheka ngayo ngesikhathi efelwe ngumkakhe. IBhayibhili lithi “u-Abhrahama wahamba ukuyamzilela uSara lokumlilela.” NgesiHebheru umutsho lo ulamazwi athi “waqalisa ukumlilela” okutsho ukuthi kwamthatha isikhathi elokho edabukile.a Omunye ongamcabanga nguJakhobe, yena watshelwa amanga okuthi indodana yakhe uJosefa yayidlithizwe yisilo. Wakhala “okwezinsuku ezinengi” labemuli yakhe baze behluleka ukumduduza. Kwadlula iminyaka eminengi ukufa kukaJosefa kulokhu kumudla.—UGenesisi 23:2; 37:34, 35; 42:36; 45:28.

Lakhathesi kuyenzakala lokhu ikakhulu umuntu angafelwa ngumuntu amthandayo. Ake sizwe okulandiswa ngabanye.

• “Umkami uRobert watshona mhlaka 9 July 2008. Ilanga okwenzakala ngalo ingozi lalizifananela lamanye amalanga. Saqala sadla ukudla kwekuseni, wathi esephuma esiya emsebenzini njengenjayelo wangiqabuja, wangigona wasesithi ‘Ngiyakuthanda’. Khathesi sokudlule iminyaka engu-6 kodwa ubuhlungu bakhona ngilokhu ngibuzwa. Angiboni ukuthi kuzafa kwaphela engqondweni yami ukufa kukaRobert.”—UGail oleminyaka engu-60.

• “Lanxa sekuyiminyaka edlula engu-18 umkami sewatshona ngisadabukile njalo ngisalokhu ngimkhumbula. Ngingabona into enhle kuhle kufike yena engqondweni futhi ngiyabe sengicabanga ukuthi aluba ukhona ubezakholisa laye ukubona lokho engikubonayo.”—U-Etienne oleminyaka engu-84.

Kuyasicacela ukuthi ubuhlungu bungathatha isikhathi eside njalo kuyimvelo. Umuntu ngamunye udabuka ngendlela etshiyene leyomunye yikho akumelanga sisole abanye ngendlela abenza ngayo nxa bengafelwa. Yikho-ke lawe akumelanga uzethese umlandu nxa ubuhlungu sobukukhulela. Pho ungenzani ukuze amanxeba okufelwa aphole?

Manengi kakhulu amacebo ongawathola ngendaba le. Lanxa kunjalo ayisiwo wonke angakunceda. Abanye bangakutshela ukuthi ungakhali njalo ungazitshengiseli ukuthi uzwa njani. Ikanti abanye bathi khala ungafeli ngaphakathi. Kodwa kukhona iBhayibhili elisitshela khona okungasinceda ngendaba le, lezinye izifundiswa ezikuvumayo ukuthi kuliqiniso.

Amasiko amanengi athi izinyembezi zendoda zehlela esifubeni besitsho ukuthi indoda akumelanga ibonakale ikhala. Kumele siyangeke yini ngokwehlisa izinyembezi nxa siphakathi kwabantu? Izingcitshi ezikhangela ngokusebenza kwengqondo zithi, ukukhala ngeyinye yezindlela okukhanya ngayo ukuthi sidabukile. Ukukhala kungakunceda ukuthi uqhubeke ngempilo kungelani lokuthi udabuke kangakanani. Ukukuvalela ngaphakathi kungabangela inkalakatha yesilonda esingeke siphole. IBhayibhili alikuvumi ukuthi indoda ikhalele ngaphakathi nxa idabukile. Ake ucabange ngalokho okwenziwa nguJesu ngesikhathi kufe uLazaro umngane wakhe. Lanxa wayelamandla okuthi amvuse wakhala izinyembezi.—UJohane 11:33-35.

Ngezinye izikhathi umuntu ofelweyo angaba lolaka ikakhulu nxa ukufa kufike elibele. Zinengi izinto ezingenza umuntu ofelweyo afikelwe lulaka. Okunye kwakhona yikuthi umuntu ayabe emthembile aphongukhuluma engacabanganga amazwi abuhlungu. Eyinye indoda okuthiwa nguMike eyeSouth Africa nxa ilandisa ithi: “Ngangileminyaka engu-14 ngesikhathi ubaba etshona. Sisemngcwabeni umfundisi wama-Anglican watshumayela esithi uNkulunkulu uyabathatha masinyane abantu abalungileyo lanxa isikhathi sabo singakafiki.”a Kwangicaphula ngoba phela wayengasekho ubaba onguye obesinakekela. Khathesi sekudlule iminyaka engu-63 kodwa kusangifuthela.”

Kuthiwani pho nxa ulokhu uzithonisela? Kujayelekile ukuthi umuntu angafelwa engalindelanga ahlale ekhuluma izinto ezinjengokuthi, ‘Ngabe ngamenzela ukuthi lokuthi aluba kafanga.’ Kwesinye isikhathi kungenzakala ukuthi mhla licinana lavusana kwathunqa uthuli. Izinto ezinjengalezi zingenza uhlale ulokhu uzithonisela kokuphela.

Nxa ulokhu uzidla izibindi njalo ufikelwa lulaka ungakuvaleli esifubeni. Kuqakathekile ukuthi uxoxe lomngane wakho omthembayo ozakulalela njalo akududuze ngokukuqinisekisa ukuthi imicabango enjalo ijayele ukubafikela abafelweyo. IBhayibhili lisitshela ukuthi: “Umngane ulothando ngezikhathi zonke, lomzalwane uzalelwa izikhathi zenhlupheko.”—IZaga 17:17.

Umngane omkhulu ongaba laye nxa ufelwe nguMdali wethu uJehova uNkulunkulu. Thandaza umtshele konke okusenhliziyweni yakho ngoba ‘uyakukhathalela.’ (1 UPhetro 5:7) Ungenza njalo uzathola “ukuthula kukaNkulunkulu okudlula ukuqedisisa konke,” okuzathoba ubuhlungu obuzwayo ngoba yikho akuthembisayo. (KwabaseFiliphi 4:6, 7) Mvumele uNkulunkulu ukuthi apholise amanxeba akho ngokubala iLizwi lakhe iBhayibhili elisiduduzayo. Bhala phansi imibhalo eduduzayo. (Khangela ibhokisi.) Okunye ongakwenza yikuzama ukuyibamba ngekhanda. Ukwenza njalo kungakunceda ikakhulu ebusuku nxa uwedwa ubuthongo sobusala ukwehla.—U-Isaya 57:15.

Kulendoda esizayithi nguJack eleminyaka engu-40 esanda kutshonelwa ngumkayo obebulawa yimvukuzane. UJack uthi ngezinye izikhathi isizungu siyake simkhulele, kodwa ukuthandaza yikho okumncedayo. Nxa elandisa uthi, “Ngingakhuleka kuJehova isizungu sihle siphele. Ngiyake ngiphaphame ebusuku ubuthongo sobungiphelele. Kodwa ngingabala ngicabangisise ngamavesi aduduzayo bese ngithandaza ngikhulume indlela engizwa ngayo ngaphakathi ngizizwa sengingcono njalo sengihlalisekile engqondweni lasenhliziyweni. Ngingenza njalo ngizwa lobuthongo sobusehla.”

Kulomunye owesifazana okuthiwa nguVanessa owatshonelwa ngunina. Laye wazibonela ukuthi umthandazo ulamandla sibili. Uthi: “Nxa ngasengifikelwa yimicabango ebuhlungu ngangibiza ibizo likaNkulunkulu besengibihla. UJehova wayeyilalela imithandazo yami njalo wayenginika amandla engangiwadinga.”

Abasebenza ukweluleka abafelweyo baye bakhuthaza labo abayabe belokhu besehluleka ukuthoba amanxeba okufelwa ukuthi bazame ukwenza imisebenzi enceda abanye. Ukwenza njalo kungakwenza ujabule njalo uzizwe usungcono. (ImiSebenzi 20:35) AmaKhristu amanengi afelweyo lawo kuwaduduzile ukwenza njalo.—2 KwabaseKhorinte 1:3, 4.

Sowake waphelelwa waswela amazwi okududuza umuntu ofelweyo? Kwezinye izikhathi ungadinga uswele amazwi ucine usuvala owakho ugoqe lezandla. Kodwa kukhona ongakwenza okungamnceda ofelweyo.

Okuqakatheke kakhulu yikuthi ubekhona njalo umtshele ukuthi ulusizi ngokumehleleyo. Kwezinye indawo ukuyabamba izandla loba ukumbambatha ofelweyo yindlela yokududuza esebenzayo kakhulu. Nxa ofelweyo efuna ukukhuluma, mnike indlebe. Njengoba abafelweyo bengaphela amandla singabancedisa ngemisebenzi enjengokupheka, ukukhangela abantwana loba ukubancedisa ngamalungiselelo omngcwabo. Lokhu kungabaduduza kakhulu ukwedlula amazwi obungawatsho.

Ngokuya kwesikhathi mhlawumbe ungaqalisa ukuxoxa ngobuntu obuhle lezinye izinto ezithokozisayo umufi ake wazenza. Izingxoxo ezinjalo zingamthoba ofelweyo aze acine esebobotheka. Lokhu kwake kwenzakala kuPam oseleminyaka engu-6 wafelwa ngumkakhe u-Ian. Uthi: “Abanye bayake bangixoxele ngezinto ezinhle engingazaziyo u-Ian ake azenza, khonokhu kwenza ngichelese emoyeni wami.”

Abachwayisisayo babika ukuthi inengi labantu abafelweyo liyancediswa kusanda kwenzakala umonakalo kodwa ngemva kwesikhathi abantu bayakhohlwa ngabo. Woba leqiniso lokuthi uhlala uthintana lowafelwayo.a Abantu abanengi abalahlekelweyo bayabonga kakhulu nxa sisenza njalo ngoba kuyawathoba amanxeba abo.

Owesifazana waseJapan okuthiwa nguKaori wafelwa ngunina kwathi ngemva kwezinyanga ezingu-15 waphinda wafelwa ngudadewabo, lokhu kwenza ukuthi adabuke kakhulu. Okuthokozisayo yikuthi abangane bakhe abazange bake bamkhohlwe. Omunye wakhona nguRitsuko, yena umdala ngeminyaka kuloKaori wamcela ukuthi abe ngumngane wakhe oseduze. UKaori uthi: “Sengikhuluma iqiniso, angizange ngikuthande ayekutsho. Ngangingafuni kube lomuntu othatha isikhundla sikamama, njalo ngangizitshele ukuthi akula ongenelisa. Kodwa indlela umama uRitsuko ayengiphatha ngayo yangenza ngabaseduze kwakhe. Maviki wonke sasihamba ndawonye ekutshumayeleni lasemihlanganweni yethu yebandla. Wayengicela ukuthi sizonatha itiye emzini wakhe, engiphathela ukudla njalo wayehlala engibhalela izincwadi lamakhadi. Uthando lukaRitsuko lendlela ayengiphatha ngayo kwangiduduza kakhulu.”

Sekudlule iminyaka engu-12 uKaori wafelwa ngunina, kodwa khathesi yena lomkakhe bazinikela ukuthi isikhathi sabo esinengi basichithe betshumayela. UKaori uqhubeka esithi: “Lakhathesi umama uRitsuko ulokhu engithanda. Angekeli ukuyambona nxa ngivakatshele ekhaya njalo ngiyakholisa kakhulu ukuxoxa laye.”

UPoli ohlala eCyprus onguFakazi kaJehova ngomunye owahlala ethola uncedo. UmkaPoli, uSozos owayekhokhela ebandleni wayelomusa njalo eyisibonelo esihle ngoba wayehlala enxusa izintandane labafelokazi ukuthi bazokudla bezikholisela emzini wakhe. (UJakhobe 1:27) Okuzwisa ubuhlungu yikuthi uSozos wafa eseleminyaka engu-53 ebulawa ngumkhuhlane ohlasela ubuchopho okuthiwa yi-brain tumor. UPoli uthi: “Ngalahlekelwa ngumkami owayengithanda okwasekuleminyaka engu-33 sindawonye.”

Ngemva komngcwabo uPoli lesicino sakhe uDaniel esileminyaka engu-15 bathuthela eCanada. Bekhonale baqalisa ukungena lelinye ibandla laboFakazi bakaJehova. UPoli uthi: “Abazalwane esasingena labo babengazi lutho ngobunzima esasidlule phakathi kwabo. Kodwa khonokho akuzange kube ngumgoqo owawubavimba ukuthi basiduduze ngamazwi alomusa njalo basincedise. Lokhu kwamnceda kakhulu umfana wami ngoba ngaleso sikhathi wayemdinga sibili uyise. Ababekhokhela ebandleni bamfaka ekhwapheni umntanami. Omunye wabo wayesiba leqiniso lokuthi kamkhohlwa uDaniel nxa besiyazilibazisa labanye loba besiyadlala ibhora.” Bobabili uPoli lendodana yakhe baziphilele kuhle.

Zinengi izindlela esingaduduza futhi sincedise ngazo abafelweyo. IBhayibhili liyasiduduza ngokusitshela ngethemba elihle esikhathini esizayo.

UGail okuke kwakhulunywa ngaye ekuqaliseni ubekhanya ethandabuza ukuthi uzafa wakukhohlwa ukufa komkakhe uRobert. Lanxa kunjalo ukulindele ngabomvu ukuphinda ambone emhlabeni omutsha esiwuthenjiswa nguNkulunkulu. UGail uthi: “Umbhalo engiwuthanda kakhulu ngokaSambulo 21:3 lo 4.” Uthi: “UNkulunkulu yena uqobo uzakuba labo. Uzazesula zonke izinyembezi emehlweni abo. Akusayikuba khona futhi ukufa loba ukulila loba ukukhala loba ubuhlungu, ngoba umumo omdala wezinto usudlule.”

UGail uthi: “Isithembiso lesi siyazicacela. Ngizwa ngibazwela kakhulu abantu abafelweyo abangazi lutho ngesithembiso sokuthi abafileyo bazaphinde baphile.” Ngenxa yokuthi uGail uyakukholwa lokhu useye wazinikela ukuthi atshumayele izindaba ezinhle kubomakhelwane bakhe okwamahora angu-70 ngenyanga, ebatshela ngesithembiso sikaNkulunkulu sokuthi “akusayikuba khona futhi ukufa.”

Mhlawumbe ungala umbe phansi uthi ‘inkomo ingazala umuntu komhlahlandlela.’ Kodwa, ake uqale ucabange ngoJobe owake wagula wabangwa lezibi. (UJobe 2:7) UJobe wayesefisa ukuthi ngabe uhle azifele kodwa lanxa kunjalo, wayelokhu ekholwa ukuthi uNkulunkulu ulawo amandla okumvusa aphinde aphile emhlabeni. Wayengathandabuzi ngesikhathi esitsho amazwi la: “Aluba ungangifihla ethuneni . . . Uzabiza lami ngizasabela; uzasifisa lesosidalwa esenziwa yizandla zakho.” (UJobe 14:13, 15) UJobe wayekukholwa ukuthi uNkulunkulu uzamkhumbula abe esemvusa aphinde aphile.

Sekuseduze ukuthi uNkulunkulu asigcwalise isithembiso leso ngokuvusa uJobe kanye labanye abasemathuneni lapho umhlaba lo usiba lipharadayisi. (ULukha 23:42, 43) ImiSebenzi 24:15 ithi, “kuzakuba lokuvuka kwabafileyo.” UJesu laye wathi: “Kakungalimangalisi lokhu ngokuba siyeza isikhathi lapho kuzakuthi bonke abasemathuneni abo bezalizwa ilizwi layo baphume.” (UJohane 5:28, 29) UJobe uzasibona ngawakhe isithembiso lesi sigcwaliseka. Uzajabulela ukuphinda abe lamandla njengasebutsheni bakhe njalo inyama yakhe ‘isivuselelwe njengeyomntwana.’ (UJobe 33:24, 25) Lokhu kuzakwenzakala lakulabo abakukholwayo ukuthi uNkulunkulu uzabavusa abantu abafileyo baphinde baphile khona lapha emhlabeni.

Kungenzakala ukuthi imicijo esikhulume ngayo esihlokweni lesi ingabuqedi nya ubuhlungu olabo ngenxa yokufelwa ngumuntu omthandayo. Kodwa nxa ucabangisisa ngezithembiso zikaNkulunkulu eziseBhayibhilini uzakuba lethemba njalo uthole lamandla okuqhubeka ngempilo.—1 KwabaseThesalonika 4:13.

Ungathanda yini ukufunda okunye okungakunceda ukuthi ungadabuki kakhulu nxa ufelwe? Mhlawumbe ungaba leminye imibuzo, enjengokuthi “Kungani uNkulunkulu evumela ububi lokuhlupheka?” Siyakucela ukuthi ungene kuwebhusayithi yethu i-jw.org, ukuze uthole izimpendulo zeBhayibhili ezizakunceda njalo zikududuze.