Lingisela Abaphrofethi—U-Amosi
1. Kungani isibonelo sika-Amosi singaba yisikhuthazo kithi?
1 Wake wazizwa ungafanelanga yini ukutshumayela ngenxa yokuthi uphuma emulini yabantu abangelamali? Nxa kunjalo, ungakhuthazwa yisibonelo sika-Amosi. Wayengumalusi wezimvu njalo esebenza izikhathi ezithile zomnyaka, lanxa kunjalo uJehova wamqinisa ukuthi atshele abantu umlayezo oqakathekileyo. (Amos. 1:1; 7:14, 15) Ngendlela efananayo, esikhathini esiphila kuso uJehova usebenzisa labo abathobekileyo. (1 Kor. 1:27-29) Yiziphi ezinye izifundo esizithola kumphrofethi u-Amosi esingazisebenzisa enkonzweni yethu?
2. Kungani singahlala siqinile lanxa siphikiswa enkonzweni?
2 Hlala Uqinile Ngesikhathi Sokuphikiswa: U-Amaziya, umphristi owayekhonza ithole wayehlala ngasenyakatho kwemibuso elitshumi yako-Israyeli. Lapho esizwa ngokuphrofetha kuka-Amosi, kwakungathi uphendula esithi: ‘Buyela ekhaya! Tshiyana lathi! Sileyethu inkolo!’ (Amos. 7:12, 13) U-Amaziya waphendulela amazwi omphrofethi u-Amosi ngesikhathi esenza isicelo eNkosini uJerobhowami sokuthi kumiswe umsebenzi ka-Amosi. (Amos. 7:7-11) Kodwa u-Amosi akazange esabe. Lamuhla, abanye abakhokheli bezinkolo badinga ukusekelwa ngabezombangazwe emzamweni wabo wokuhlukuluza abantu bakaJehova. Lanxa kunjalo, uJehova usenza sibe leqiniso lokuthi akulasikhali esikhandelwe thina esizaphumelela ngokupheleleyo.—Isa. 54:17.
3. Sazisa abantu ziphi izinto ezimbili lamuhla?
3 Yazisa Abantu Ngokwahlulela kukaJehova kanye Lezibusiso Zesikhathi Esizayo: Lanxa u-Amosi waphrofetha ngokwahlulelwa kwemibuso elitshumi yako-Israyeli, waphetha ibhuku leBhayibhili elilebizo lakhe ngesithembiso sokulungiswa kwelizwe lezibusiso ezinengi ezinhle. (Amos. 9:13-15) Lathi sikhuluma ‘ngosuku lokwahlulela’ oluzayo, kodwa le yingxenye ‘yevangeli lombuso’ okumele siyimemezele. (2 Pet. 3:7; Mat. 24:14) Ukubhubhisa kukaJehova abantu ababi e-Amagedoni kuzavula indlela yokuthi kube lepharadayisi emhlabeni.—Hubo. 37:34.
4. Yikuphi ukuqiniseka esilakho ngokuthi singenelisa ukwenza intando kaJehova?
4 Ukutshumayela umlayezo woMbuso emhlabeni olabantu abanengi abaphikisayo kuyavivinya ukuzinikela kwethu kuJehova kanye lokuzimisela kwethu ukwenza intando yakhe. (Joha. 15:19) Kodwa sileqiniso lokuthi uJehova uzaqhubeka esenza sifanele ukuthi senze intando yakhe, njengoba enza ku-Amosi.—2 Kor. 3:5.