Ukufundwa Kwebhuku Elithi Draw Close to Jehovah Kuzaqalisa Ngeviki Lika-January 6
1. Kusukela ngeviki eliqalisa ngo-January 6, yiwaphi amathuba esizakuba lawo okusondela kuJehova?
1 UJehova ufuna ukuthi sisondele kuye. (Jak. 4:8) Ukuze asincede ukuthi senze njalo, kusukela ngeviki lika-January 6, sizafunda ibhuku elithi Draw Close to Jehovah eSifundweni seBhayibhili seBandla. Ngokuphathelane lenjongo yebhuku leli, ikhasi lalo lokuqala lithi: “Ukucabangisisa ngendlela uJehova atshengisa ngayo yinye ngayinye yezimpawu zakhe, ukubona indlela uJesu Khristu atshengisa ngayo lezizimpawu kanye lokuthi thina singazithuthukisa njani lezizimpawu kuzasisondeza eduze loNkulunkulu.” Ibhuku leli lake lafundwa emabandleni ngo-2004 kusiya ku-2005. Kodwa, abamemezeli abanengi abangaba yizigidi ezimbili abafunda iqiniso ngemva kweminyaka leyo kuyabe kungokokuqala kubo ukuthi bafunde ngokugcweleyo ngezimpawu zobuntu bukaJehova. Ukuphindela emuva lokhu kuzanceda labo asebalifundayo ibhuku leli ukuthi baqakathekise kakhulu izimpawu zobuntu bukaJehova.—Hubo. 119:14.
2. Lizafundwa njani ibhuku elithi Draw Close to Jehovah?
2 Indlela Elizafundwa Ngayo: Owenzisa isifundo uzaqala ngesingeniso esifitshane, mhlawumbe umutsho owodwa loba emibili. Ibhuku leli kalila mibhalo ebhalwe ukuthi bala, ngakho owenzisa isifundo nguye ozakhetha imibhalo engabalwa. Lingaphindela emuva ngokubuza umbuzo owodwa loba emibili ekucineni kwesifundo ngasinye. Nxa isifundo salelo viki silebhokisi elithi “Imibuzo Yokucabangisisa Ngayo,” lingaphindela emuva ngokuxoxa ngemibuzo esebhokisini lelo. Kusiya ngesikhathi, owenzisa isifundo angacela ukuthi eminye yemibhalo esebhokisini ibalwe njalo abuze lemibuzo yokwengezelela ukuze ibandla liphendule.
3. Njengoba sifunda ibhuku leli, kuyini okumele sikwenze futhi kungani kumele senze njalo?
3 Ongakwenza Ukuze Uncedakale: Lilungiselele kuhle ibhuku leli lanxa sewake walifunda. Phendula nxa kufundwa ibhuku leli ngoba lokhu kudumisa uJehova, futhi kukunceda ukuthi ukhumbule obekufundwa, kuphinde kuncede labanye. (Hubo. 35:18; Heb. 10:24, 25) Ukucabangisisa ngezimpawu zobuntu bukaJehova kuzakunceda ukuthi usondele kuye. (Hubo. 77:11-13) Lokhu kuzakunceda lokuthi uzimisele ukulalela imilayo yakhe njalo kukukhuthaze ukuthi utshele abanye ngaye.—Hubo. 150:1-6.