Ibhokisi Lemibuzo
◼ Abantwana kumele bafundisweni ukuze bakhule ekukholweni?
Kunengi abazali abakwenzayo ukuze bakhulise abantwababo “ngokufundisa langokulaya kweNkosi.” (Efe. 6:4) Ngokwesibonelo, abazali abanengi bananzelele ukuthi kuyanceda kakhulu ukuxoxa labantwababo ngombhalo wosuku nsuku zonke ekuseni. Izimuli ezinengi nxa zisenza ukukhonza kwazo kwemuli zijayele ukubukela ividiyo besezixoxa ngayo, ikanti kwezinye izikhathi zixoxa ngesihloko esithile esisebhukwini elithi Young People Ask, zidlale umdlalo wendaba ethile eseBhayibhilini njalo ziba lesikhathi sokuphurakithiza. Kodwa abantwana kumele bafundiswe iqiniso elijulileyo eliseBhayibhilini ukuze ‘baqhubeke besiya ekukhuleni.’—Heb. 6:1.
Cabanga ngalokho esikufundisa labo esibathola nxa sisekutshumayeleni. Sandise ukusebenzisa ibhuku elithi IBhayibhili Lifundisani Sibili? nxa sixoxa labantu okokuqala kumbe nxa sesiphindela ukuze siqalise ukufunda labo iBhayibhili. Nxa singaliqeda sijayele ukuqhubeka sifunda labo ibhuku elithi “Zigcineni Lisethandweni lukaNkulunkulu.” Ngenxa yani? Ngoba ibhuku elithi Okufundiswa liBhayibhili linceda lowo esifunda laye ukuthi abe lolwazi oluqakathakeliyo ngeMibhalo. Ikanti ibhuku elithi Ethandweni lukaNkulunkulu limnceda ukuthi asebenzise izimiso zeBhayibhili nsuku zonke ekuphileni kwakhe. Ukufunda amabhuku la kwenza labo esibafundisa iBhayibhili ‘bagxile’ njalo ‘baqine ekukholweni.’ (Kol. 2:6, 7) Amabhuku la angabanceda labantwabethu ukuthi baqine ekukholweni. Phela labo kumele bafundiswe ngenhlawulo, ngoMbuso, langesimo sabafileyo. Kumele bafundiswe langokuthi kungani uNkulunkulu evumela ukuhlupheka lokuthi bangabona njani ukuthi sisezinsukwini zokucina. Kufanele bakholwe ukuthi oFakazi bakaJehova bafundisa iqiniso. Abasakhulayo kumele bazwisise izimiso zeBhayibhili kanye lokuthi ‘bangehlukanisa njani okubi lokuhle.’ (Heb. 5:14) Abazali kumele bananzelele iminyaka yabantwababo lokuthi benelisa ukuzwisisa izinto ezijule okungakanani. Kodwa abantwana abanengi baqalisa ukuzwisisa iqiniso elizikileyo eliseBhayibhilini besesebancane.—Luk. 2:42, 46, 47.
KuWebhusayithi ye-jw.org kuzakuba lezifundo ezithethwe ebhukwini elithi Okufundiswa liBhayibhili ezizanceda abazali ukuthi bafundise abantwababo. Abazali bangakuthola lokhu kuWebhusayithi yethu ngaphansi kwezihloko ezithi BIBLE TEACHINGS > TEENAGERS. Esikhathini esizayo kuzatholakala lezifundo eziyabe zithethwe ebhukwini elithi “Ethandweni lukaNkulunkulu.” Kodwa-ke abazali bangasebenzisa amabhuku la nxa belawo ngekhaya. Abazali bangasebenzisa amabhuku la kumbe izifundo ezitholakala kuWebhusayithi yethu ngesikhathi sokuKhonza kweMuli, langesikhathi befundisa omunye wabantwababo kumbe nxa befundisa umntwana ukuthi angazifundela njani eyedwa.