Izimiso ZoMbuso—Ukufuna Ukulunga KukaNkulunkulu

UPHAKAMISELA umakhelwane wakho isandla ngesikhathi udlula phambi komuzi wakhe. Uyamnanzelela ukuthi kulezinsuku uyakukhangelisisa lokho okwenzayo lemuli yakho. Laye uyakuphakamisela isandla acele ukuthi usondele eduze, abesesithi: “Ngicela ukubuza. Kanti yindaba lingafanani labanye abantu?” Uyambuza uthi: “Utshoni?” Abesephendula athi, “LingoFakazi bakaJehova angithi? Litshiyene labanye abantu. Alikwenzi okwenziwa ngamanye amasonto​—kalinanzi amaholideyi, njalo kalingeneli kwezombusazwe kanye lasezimpini. Akula loyedwa wenu obhemayo. Lemuli yakho ikhanya iziphethe kuhle kakhulu. Kuyini okulenza lingafanani labanye abantu kangaka?”

Uyakwazi ukuthi impendulo yile: Sibuswa nguMbuso kaNkulunkulu. UJesu uhlala esihlambulula njengoba eyiNkosi yawo. Uyasincedisa ukuthi silandele izinyathelo zakhe, besekusenza ukuthi singafanani labantu abasemhlabeni lo omubi. Engxenyeni le, sizabona ukuthi uMbuso kaMesiya uhlambulule njani ukukhonza kwabantu bakaNkulunkulu, ukuziphatha kwabo kanye lendlela izinto ebezihlelwe ngayo enhlanganisweni, konke lokhu kusenzelwa ukudumisa uJehova.