ISIFUNDO 11

Khuluma Ngentshiseko

URoma 12:11

OKUMELE UKWENZE: Khuluma ngentshiseko ukuze uqinise njalo ukhuthaze abakulaleleyo.

Inkulumo yakho kayibe segazini. Ngesikhathi ulungiselela, cabangisisa ngokuthi kuqakatheke ngani ukuthi abantu bayizwe. Yazi kuhle inkulumo yakho ukuze kukhanye ukuthi okutshoyo kuvela enhliziyweni.
Cabanga ngabantu ozabafundisa. Cabangisisa ngokuthi indlela ozabala ngayo kumbe ozafundisa ngayo izabanceda njani abanye. Dinga izindlela ongazisebenzisa ezizakwenza ukuthi okutshoyo kuthophele ezinhliziyweni zabakulaleleyo.
Yenza indaba iphile. Khuluma ngentshiseko. Indlela osebenzisa ngayo izandla nxa ukhuluma kanye lesimo sobuso bakho kumele kuveze imizwa olayo.

Nanzelela ukuthi kawusebenzisi izandla ngendlela efananayo zikhathi zonke kuze kucine sekungani ngumkhuba. Kumele konke okwenzayo kube lenhloso. Khuluma ngentshiseko ikakhulu nxa ugcizelela imicijo eyisiqokoqela lalapho ukhuthaza abakulaleleyo ukuthi basebenzise abakufundayo. Intshiseko yakho kayingedlulisi amalawulo ngoba lokho kungacina kusenza abakulaleleyo badakeke.