ISIFUNDO 12

Fundisa Ngomusa Langozwelo

1 Thesalonika 2:7, 8

OKUMELE UKWENZE: Khuluma ngendlela ezakwenza abakulaleleyo babone ukuthi ulendaba labo lokuthi uyafuna ukubasiza.

Cabanga ngabantu ozabafundisa. Zinike isikhathi sokucabanga ngenhlupho abahlangana lazo futhi uzame ukuzwisisa imizwa yabo. Lokhu kuzakusiza ukuthi ube lomusa lozwelo nxa usufundisa.
Khetha kuhle amabala. Bavuselele abantu obafundisayo, ubaduduze njalo ubaqinise. Ungasebenzisi amabala angabacaphula futhi ungachothozi abantu abangasiboFakazi kumbe ukhulume kubi ngezimfundiso zabo.
Tshengisa ukuthi ulendaba labo. Bobotheka njalo ukhulume ngelizwi elilomusa. Indlela osebenzisa ngayo izandla zakho lesimo sobuso kumele kutshengise ukuthi ulendaba labantu okhuluma labo.

Ungazibambi ngamandla uzama ukuveza imizwa engekho enhliziyweni yakho. Nxa ubala, veza imizwa esendimeni oyibalayo kodwa ungadlulisi amalawulo uze ucine usuzidonsela amehlo abantu. Khuluma ngendlela elomusa ezakwenza abakulaleleyo babone ukuthi uyabathanda.