Izindlela Ongandisa Ngazo Inkonzo Yakho

NGESIKHATHI uJesu ethuma abafundi bakhe ukuthi bayetshumayela izindaba ezinhle zoMbuso wabatshela wathi: “Isivuno sinengi sibili, kodwa izisebenzi zilutshwana.” Ngenxa yokuthi umsebenzi okwakumele wenziwe wawumnengi, waphinda wathi: “Ngakho ncengani iNkosi yokuvuna ukuthi ithumele izisebenzi emsebenzini wayo wokuvuna.” (Mat. 9:37, 38) Wachasisela abafundi bakhe indlela umsebenzi lo okwakumele wenziwe ngayo, wasekhuluma lamazwi atshengisa ukuthi kwakumele bawenze masinyane, wathi: “Ngiqinisile ngithi kini, iNdodana yomuntu izaze ifike lilokhu lingakawabhodi wonke amadolobho ako-Israyeli.”—Mat. 10:23.

² Lalamuhla, mnengi umsebenzi wokutshumayela okumele wenziwe. Izindaba ezinhle zoMbuso kufanele zitshunyayelwe ukuphela kungakafiki, yikho kumele senze masinyane ngoba isikhathi asisekho. (Mak. 13:10) Lathi namuhla sisesimeni esinjengesikaJesu labalandeli bakhe, kodwa owethu umsebenzi mkhulu ngoba kumele sitshumayele emhlabeni wonke. Lanxa sibalutshwana kakhulu nxa silinganiswa labantu abasemhlabeni wonke, asesabi ngoba sileqiniso lokuthi uJehova uyasincedisa. Izindaba ezinhle zoMbuso zizatshunyayelwa emhlabeni wonke besekusithi ngesikhathi esibekwe nguJehova ukuphela kufike. Yikho kufanele sizibuze imibuzo le: Siwufaka kuqala yini uMbuso kaNkulunkulu ukuze siyenze ngokupheleleyo inkonzo yethu? Kuyini esingakwenza ukuze siyikhuthalele inkonzo yethu?

³ UJesu wakhuluma ngalokho uJehova akukhangelele ezincekwini zakhe ezizinikeleyo, wathi: “Kumele uthande uJehova uNkulunkulu wakho ngenhliziyo yakho yonke, langomphefumulo wakho wonke, langengqondo yakho yonke, langamandla akho wonke.” (Mak. 12:30) Kumele simkhonze ngenhliziyo yonke uNkulunkulu. Lokhu kutsho ukuthi kufanele senze konke okusemandleni ethu ukuze sitshengise ukuthi sizinikele kuJehova lokuthi sikhuthele enkonzweni yakhe. (2 Tim. 2:15) Kunengi esingenelisa ukukwenza kusiya ngezimo zethu. Ake sixoxe ngokunye kwakhona besesibona ukuthi singakwenza njani ukuze siyenze ngokupheleleyo inkonzo yethu.

UKUBA NGUMMEMEZELI

⁴ Wonke umuntu oselazi iqiniso ulethuba elihle lokutshela abanye izindaba ezinhle njengoba kungumsebenzi uJesu awunika bonke abalandeli bakhe. (Mat. 24:14; 28:19, 20) Umuntu osefuna ukuba ngumlandeli kaJesu Khristu angahle aqalise ukutshela abanye izindaba ezinhle esanda kulizwa nje iqiniso. Lokhu yikho kanye okwenziwa ngu-Andreya, uFiliphu loKhoneliya labanye. (Joh. 1:40, 41, 43-45; ImiSeb. 10:1, 2, 24; 16:14, 15, 25-34) Kodwa kuqondile yini ukuthi ahle aqalise ukwenza njalo yena engakabhabhathizwa? Ye, kuqondile. Nxa esefanele ukuba ngummemezeli ongakabhabhathizwa uyabe eselethuba lokutshumayela endlini ngendlu langezinye izindlela zokutshumayela nxa izimo zivuma.

⁵ Nxa ummemezeli esebhabhathiziwe, akuthandabuzwa ukuthi uzakwenza okusemandleni akhe ukuthi atshele abanye izindaba ezinhle. Umsebenzi wokutshumayela kufanele wenziwe yibo bonke abamemezeli, kungaba ngabesifazane kumbe abesilisa. Kuyisibusiso esikhulu ukuba lengxenye esiyenzayo ukuze sisekele uMbuso kaNkulunkulu. Labo abaqhubeka bedinga izindlela zokungezelela inkonzo yabo bazathokoza kakhulu.

UKUNCEDISA LAPHO OKULESIDINGO KHONA

⁶ Kungenzakala ukuthi indawo elitshumayela kuyo isisetshenzwe kanenginengi futhi labantu abanengi sebezizwile izindaba ezinhle. Lokhu kungakwenza ufise ukwandisa inkonzo yakho ngokuthuthela endaweni edinga abamemezeli abanengi. (ImiSeb. 16:9) Nxa ungumdala kumbe inceku ekhonzayo, ungacabanga ngokuya kwelinye ibandla elidinga uncedo. Umbonisi wesiqinti angakwazisa ukuthi yiliphi ibandla elisesiqintini sakhe ongayancedisa kulo. Nxa kuyikuthi ufisa ukuyancedisa kweyinye indawo eselizweni lakini, iwofisi yegatsha ingakusiza uthole lapho ongaya khona.

⁷ Uyafuna yini ukuyancedisa kwelinye ilizwe? Nxa kunjalo, kuqakathekile ukuthi uqale uhlele kuhle ungakakwenzi lokhu. Kungaba kuhle ukuthi uqale uxoxe labadala bebandla okulo ukuze bakuncedise. Ukuthuthela kwelinye ilizwe yinto enkulu okumele ucabangisise ngayo ungakayenzi. (Luk. 14:28) Kodwa nxa ungasoze uhlale isikhathi eside kulelolizwe kungaba ngcono ukuthi uyencedisa endaweni eselizweni lakini.

⁸ Kwamanye amazwe amabandla amanengi alabazalwane abasanda kuba ngabadala. Abafowethu laba bathobekile njalo bazimisele ukulalela abazalwane abazoncedisa asebelesikhathi eside bengabadala. Nxa ungumdala futhi ufisa ukuyancedisa kwelinye ilizwe, khumbula ukuthi inhloso yakho ngeyokukhonza ndawonye labo, hatshi ukubathathela umsebenzi wabo. Bakhuthaze ukuthi baqhubeke bethuthuka njalo bekhuthele emisebenzini abayiphiwayo ebandleni. (1 Tim. 3:1) Bekezela nxa besenza izinto ngendlela ongayijayelanga. Sebenzisa ulwazi olalo ukuze uncedise abafowenu. Ungenza njalo, uzabasiza ukuthi basale belinakekela kuhle ibandla nxa usubuyele kini.

⁹ Ungakabhaleli iwofisi yegatsha yelizwe ofuna ukuya kulo, iKhomithi Yenkonzo yebandla okulo kumele ibhale incwadi etshengisa ukuthi uyafanela yini ibisithunyezwa kulelogatsha ndawonye lesicelo sakho. Incwadi le iyafunakala kungelani lokuthi ungumdala, uyinceku ekhonzayo, uliphayona kumbe ungummemezeli.

UKUTSHUMAYELA NGOLUNYE ULIMI

¹⁰ Okunye ongakwenza yikufunda olunye ulimi okungagoqela lolimi lwezandla. Nxa ufisa ukutshumayela ngolunye ulimi, xoxa labadala kanye lombonisi wesiqinti ukuze bakunike amacebo angakunceda. Kwezinye izikhathi iwofisi yegatsha iyahlela ukuthi kwenziwe amakilasi okufundisa abamemezeli lamaphayona ukutshumayela ngezinye indimi.

UKUBA LIPHAYONA

¹¹ Wonke ummemezeli kumele abekwazi ukuthi kuyini okufunakalayo nxa efuna ukuba liphayona elisizayo, elesikhathi sonke, iphayona eliqakathekileyo kumbe ukwenza eminye imisebenzi yenkonzo. Iphayona kufanele kube ngumKhristu obhabhathiziweyo futhi oyisibonelo esihle kwabanye, olezimo ezimvumelayo ukuthi afikise amahora afunekayo ekutshumayeleni izindaba ezinhle. Izicelo zokuba ngamaphayona asizayo kumbe awesikhathi sonke zikhangelwa yiKhomithi Yenkonzo yebandla kodwa ezokuba ngamaphayona aqakathekileyo zikhangelwa ligatsha.

¹² Ummemezeli angaba liphayona elisizayo okwenyanga eyodwa, okwenyanga ezithile zilandelana, kumbe okwesikhathi eside kusiya ngezimo zakhe. Abanengi bajayele ukuba ngamaphayona asizayo ngesikhathi seSikhumbuzo kumbe nxa ibandla labo livakatshelwe ngumbonisi wesiqinti. Abanye njalo baphayona nxa bevalile emsebenzini, ikanti abantwana besikolo ababhabhathiziweyo bona bajayele ukuphayona nxa izikolo zivaliwe. Ngenyanga kaMarch lo-April langesikhathi kulombonisi wesiqinti, kulelungiselelo lokuthi abamemezeli baphayone okwamahora amalutshwane. Nxa uyisibonelo esihle ebandleni njalo ufisa ukuba liphayona elisizayo, futhi izimo zakho zikuvumela ukuthi ufikise amahora afunekayo ngenyanga, ungatshela abadala ngesicelo sakho.

¹³ Ukuze ube liphayona lesikhathi sonke kumele ubesesimeni esizakuvumela ukuthi ufikise amahora afunekayo ngomnyaka. Iphayona kufanele lizimisele ukubambisana lebandla. Amaphayona akhutheleyo aluncedo kakhulu ngoba angenza abanye bakhuthalele inkonzo njalo abakhuthaze lokuthi babe ngamaphayona. Kodwa ukuze ufake isicelo sokuba liphayona lesikhathi sonke, kumele ube yisibonelo esihle njalo usulenyanga eziyisithupha kusiyaphezulu ubhabhathiziwe.

¹⁴ Amaphayona aqakathekileyo ajayele ukukhethwa kumaphayona esikhathi sonke asetshengise ukuthi akhuthele enkonzweni. Iphayona eliqakathekileyo kumele lizimisele ukuya loba ngaphi lapho elithunywa khona ligatsha. Izikhathi ezinengi amaphayona la ajayele ukucelwa ukuthi ayetshumayela ezindaweni ezingelaboFakazi abesevula amabandla. Kwezinye izikhathi amaphayona aqakathekileyo angathunyelwa emabandleni adinga ukuncediswa ukuthi enelise ukutshumayela insimu yawo yonke. Amanye angabadala athunyelwa emabandleni amancane lanxa kuyabe kungelasidingo sabamemezeli abanengi. Amaphayona aqakathekileyo aphiwa imadlana yokubhadala indleko ezithile lokuthenga izinto eziqakathekileyo azidingayo. Abanye bakhethwa ukuthi babe ngamaphayona aqakathekileyo okwesikhathi esifitshane.

UKUBA NGUMNALI

¹⁵ IKhomithi Yenkonzo yeQula Elibusayo iyakhetha abanye ukuthi babe ngabanali besebethunyelwa emazweni atshiyeneyo. Amakhomithi egatsha akulawomazwe abesebathumela ezindaweni ezilabantu abanengi. Abanali baluncedo kakhulu emsebenzini wokutshumayela njalo bayawaqinisa amabandla. Kwezinye izikhathi bayabe bevela eSikolo Sabavangeli BoMbuso. Bayaphiwa indawo zokuhlala kanye lemadlana yokubhadala izindleko ezithile leyokuthenga izinto eziqakathekileyo.

UKUBA NGUMBONISI WESIQINTI

¹⁶ Labo ababekwa liQula Elibusayo ukuthi babe ngababonisi beziqinti baqala bafundele umsebenzi lo ngokubambela abanye ababonisi beziqinti. Umzalwane okhethwa ukuthi enze umsebenzi lo kumele abe ngothanda inkonzo kanye labafowethu labodadewethu. Kufanele abe liphayona elikhutheleyo futhi elibala iLizwi likaNkulunkulu nsukuzonke. Kumele enelise ukufundisa kuhle, atshengise ukuthi ulezithelo zomoya lokuthi uyazwisisa njalo uyaqedisisa. Nxa etshadile, umkakhe laye kumele abe liphayona elenelisa ukufundisa kuhle ekutshumayeleni futhi eliyisibonelo esihle ekuziphatheni lasendleleni eliphatha ngayo abanye. Kumele azimisele ukuzehlisa kumkakhe, angamhambeli phambili ekukhulumeni lasekwenzeni izinto. Umsebenzi wababonisi beziqinti awulula, yikho labo abafisa ukuwenza kumele babe ngabaphilileyo emzimbeni. Amaphayona awafaki izicelo zokuba ngababonisi beziqinti. Kodwa nxa befisa ukwenza umsebenzi lo bangaxoxa lombonisi wesiqinti ukuze abatshele okumele bakwenze.

IZIKOLO ZENHLANGANISO

¹⁷ ISikolo Sabavangeli BoMbuso: Kudingakala abamemezeli abanengi abazatshumayela ezindaweni okungatshunyayelwa kuzo kangako njalo baqinise amabandla. Ngakho abafowethu labodadewethu abangatshadanga labatshadileyo bangabhalisa ukungena iSikolo Sabavangeli BoMbuso ukuze bathuthukise indlela abatshumayela ngayo. Ngemva kokusingena, bangacelwa ukuthi baqhubeke bengamaphayona esikhathi sonke endaweni edinga abamemezeli abanengi elizweni lakibo. Kodwa abanye bangacelwa ukuthi benze eminye imisebenzi beselizweni lakibo kumbe bathunyelwe kwelinye ilizwe. Kanti njalo abanye abalutshwana bangacelwa ukuthi bayekuba ngamaphayona aqakathekileyo okwesikhathi eside kumbe esifitshane. Amaphayona alesifiso sokuya esikolo lesi angangena umhlangano omayelana lalesosikolo oba khona emhlanganweni wesabelo.

¹⁸ ISikolo SeGiliyadi: Abafowethu labodadewethu abangatshadanga kanye labatshadileyo abakhethwa ukuthi bazongena isikolo lesi kumele babe senkonzweni yesikhathi sonke njalo benelise ukukhuluma isiNgisi. Kumele babe ngabantu abangenelisa ukuqinisa abanye kanye lokuthuthukisa umsebenzi wokutshumayela. Kufanele batshengise ukuthi bayabathanda abafowethu lokuthi bazimisele ukubancedisa ngomusa ukuthi balandele izimiso eziseMibhalweni kanye leziqondiso zenhlanganiso. IKhomithi yeGatsha yiyo ekhethayo ukuthi ngobani abangafaka izicelo zokungena isikolo lesi. Abaqede isikolo lesi bangacelwa ukuthi bayencedisa amabandla kumbe bayesebenzela ewofisini yegatsha eselizweni lakibo loba kwelinye ilizwe.

UKUSEBENZA EBHETHELI

¹⁹ Ukusebenza eBhetheli kuyisibusiso. Ibizo elithi Bhetheli litsho ukuthi “Indlu kaNkulunkulu,” njalo ibizo leli liyifanele indawo le ngenxa yemisebenzi eyenziwa lapho. Abafowethu labodadewethu abasebenza eBhetheli benza umsebenzi oqakathekileyo wokuhumutsha amabhuku asekelwe eBhayibhilini, ukuwadinda kanye lokuwathumela ezindaweni ezitshiyeneyo. Umsebenzi abawenzayo uqakathekile ngoba unceda iQula Elibusayo ukuthi lenelise ukunakekela kuhle amabandla emhlabeni wonke. Abahumutshi abanengi basebenzela ezindaweni okukhulunywa khona ulimi abahumutshela kulo. Lokhu kuyabanceda ukuthi bahumutshe ngendlela abantu abakhuluma ngayo lokuthi babone ukuthi abantu bayakuzwisisa yini abakubalayo.

²⁰ Umsebenzi omnengi owenziwa eBhetheli ufuna abantu abalamandla. Yikho laba ababizwa eBhetheli kumele babe ngabazalwane abasesebatsha, abazinikeleyo babhabhathizwa njalo abaqinileyo emzimbeni. Nxa ulesifiso sokuyasebenza eBhetheli, ungabuza abadala ebandleni okulo ukuthi kuyini okukhangelelwe kulabo abafuna ukusebenza khona.

UMSEBENZI WOKWAKHA IZAKHIWO ZENHLANGANISO

²¹ Umsebenzi wokwakha izakhiwo zenhlanganiso uyinkonzo engcwele njengoba nje umsebenzi wokwakha ithempeli ngesikhathi sikaSolomoni wawungcwele. (1 AmaKho. 8:13-18) Abafowethu labodadewethu lamuhla bazimisele ukuncedisa emsebenzini lo ngokusebenzisa isikhathi sabo lempahla yabo.

²² Uyenelisa yini ukuncedisa emsebenzini wokwakha? Abafowethu abakhangela umsebenzi wokwakha elizweni lakini bangathokoza kakhulu nxa ungazimisela ukuncedisa njalo bazakufundisa lanxa ungelalwazi. Yikho nxa ungummemezeli obhabhathiziweyo futhi ulesifiso sokwenza umsebenzi lo ungaxoxa labadala bebandla okulo. Ngezinye izikhathi abanye abamemezeli abenza umsebenzi lo bayacelwa ukuthi bayencedisa lakwamanye amazwe.

²³ Zinengi indlela esingancedisa ngazo emsebenzini wokwakha. Abamemezeli ababhabhathiziweyo futhi abayisibonelo esihle abafisa ukuncedisa nxa kusakhiwa eduze lalapho abahlala khona, bangabhalisa ukuba ngamavolontiya abizwa ngokuthi ngama-Local Design/Construction volunteers. Abalezimo ezibavumelayo bangacelwa ligatsha ukuthi bayencedisa ezindaweni ezikhatshana okwamaviki amabili kusiya kunyanga ezintathu njalo babizwa ngokuthi ngama-construction volunteers. Labo abakhethwa ukuthi bancedise okwesikhathi eside babizwa ngokuthi ngama-construction servants kuthi labo abacelwa ukuthi bayekwakha kwamanye amazwe babizwa ngokuthi ngama-expatriate construction servants. IQembu Lokwakha libunjwa ngama-construction servants lama-construction volunteers njalo nxa lisakha lincediswa ngama-Local Design/Construction volunteers labamemezeli bebandla elakhelwayo. Iqembu lingaqeda ukwakha endaweni ethile liyadlula liye kwenye indawo.

HLELA OFUNA UKUKWENZA EKUKHONZENI

²⁴ Nxa usuzinikele kuJehova akuthandabuzwa ukuthi ufuna ukumkhonza kuze kube nini lanini. Kodwa usuhlelile yini ofuna ukukwenzela uJehova? Ukwenza njalo kuzakunceda ukuthi usebenzise kuhle isikhathi sakho kanye lamandla akho. (1 Khor. 9:26) Kuzakunceda lokuthi uthuthuke ekukhonzeni, unanzelele okuqakatheke kakhulu empilweni njalo ulalamele ukwenza imisebenzi etshiyeneyo enhlanganisweni.—Flp. 1:10; 1 Tim. 4:15, 16.

²⁵ Umphostoli uPhawuli wasitshiyela isibonelo esihle okumele sisilingisele. (1 Khor. 11:1) Wasebenza nzima enkonzweni ngoba kwakulamathuba amanengi uJehova ayemvulele wona. Wabhalela abazalwane baseKhorinte wathi: “Ngivulelwe umnyango omkhulu.” Lakithi kunjalo, manengi amathuba esilawo ekukhonzeni uJehova ikakhulu endabeni yokutshumayela izindaba ezinhle zoMbuso. Kodwa ekungeneni ‘ngomnyango omkhulu,’ kuzamele silwisane ‘labanengi abasiphikisayo’ njengoba kwakunjalo lakumphostoli uPhawuli. (1 Khor. 16:9) Ukuze aphumelele, uPhawuli wayezibamba. Wabhala wathi: “Ngiyawutshaya kakhulu umzimba wami ngiwenze ube yisigqili.” (1 Khor. 9:24-27) Lawe wenza njalo yini?

²⁶ Izimo zethu ziyatshiyana, yikho kuhle ukuthi sihlele ngendlela ezasivumela ukuthi senze esikuhlelileyo. Abanye basenkonzweni yesikhathi sonke lamuhla ngoba bahlela besesebancane. Bakhuthazwa ngabazali babo labanye ukuthi bahlele abazakwenzela uJehova. Ngakho bayathokoza kakhulu ekukhonzeni kwabo njalo abazisoli lakancane. (Zaga. 10:22) Okunye ongakuhlela yikuya ekutshumayeleni maviki wonke, ukuqalisa isifundo seBhayibhili kanye lokuzinika isikhathi sokulungiselela imihlangano yebandla. Okuqakatheke kakhulu yikuthi sikhuthale futhi siyenze ngokupheleleyo inkonzo yethu. Nxa singenza njalo sizamdumisa kuze kube nini lanini uJehova.—Luk. 13:24; 1 Tim. 4:7b, 8.