Minyaka yonke abasakhulayo abanengi abakhulele emulini zaboFakazi bayabhabhathizwa. Lawe usufuna ukubhabhathizwa yini? Nxa kunjalo kumele uqale uzwisise ukuthi kutshoni ukuzinikela lokubhabhathizwa.

• Kutshoni ukubhabhathizwa?

• Kutshoni ukuzinikela?

• Kungani ukubhabhathizwa kuqakathekile?

• Okutshiwo ngabentanga yakho

• Okungamanga lalokho okuliqiniso

Kutshoni ukubhabhathizwa?

Ukubhabhathizwa okukhulunywa ngakho eBhayibhilini kuqakathekile njalo kutsho ukucwiliswa ngokupheleleyo emanzini hatshi ukuphongufafazwa ngamanzi.

• Ukucwiliswa emanzini ngesikhathi ubhabhathizwa kutshengisa umuntu wonke ukuthi awusaphileli ukwenza lokho okufunwa nguwe.

• Ukuphuma emanzini kutshengisa ukuthi usuqalise ukuphilela ukwenza lokho okufunwa nguNkulunkulu.

Ukubhabhathizwa kutshengisa ukuthi uyavuma phambi kwabantu ukuthi uJehova nguye olelungelo lokusitshela lokho okuqondileyo lokungaqondanga futhi uyabe ukwenza kucace ukuthi uzakwenza lokho akufunayo.

Ongacabangisisa ngakho: Kungani kumele utshengise phambi kwabantu ukuthi usuzimisele ukulalela imithetho kaJehova? Khangela u-1 Johane 4:19 loSambulo 4:11.

Kutshoni ukuzinikela?

Ungakathathi inyathelo lokubhabhathizwa kumele uqale uzinikele kuJehova. Ungakwenza njani lokhu?

Thandaza kuJehova umthembisa ukuthi uzamkhonza kuze kube nini lanini lokuthi uzakwenza lokho akufunayo kungelani lokuthi kwenzakalani kumbe ukuthi abanye abantu bakhetha ukwenzani.

Nxa ubhabhathizwa uyabe usutshengisa phambi kwabantu bonke ukuthi usuzinikele kuJehova. Kutshengisa abantu ukuthi awusaziphileli kodwa usuphilela ukwenza intando kaJehova.—UMathewu 16:24.

Ongacabangisisa ngakho: Kungani impilo yakho ingaba ngcono nxa ungakhetha ukuzinikela kuJehova? Khangela u-Isaya 48:17, 18 loHebheru 11:6.

Kungani ukubhabhathizwa kuqakathekile?

UJesu wathi wonke umuntu owayefuna ukuba ngumfundi wakhe kwakumele abhabhathizwe. (UMathewu 28:19, 20) Yikho wonke umuntu ongumKhristu kumele abhabhathizwe. IBhayibhili lithi ukubhabhathizwa kuqakathekile ukuze umuntu asindiswe.—1 Phetro 3:21.

Kodwa ukuthanda kwakho uJehova lokuqakathekisa ukumkhonza yikho okumele kukwenze ufune ukubhabhathizwa. Kumele ube lombono onjengowomhubi owabhala wathi: “Ngingambonga ngani uJehova ngabo bonke ubuhle bakhe kimi? . . . Ngimemeze ibizo likaJehova. Ngizazigcwalisa izifungo zami kuJehova.”—IHubo 116:12-14.

Ongacabangisisa ngakho: Kuyini okuhle uJehova akwenzele khona futhi ungambonga ngani? Khangela uDutheronomi 10:12, 13 lo-KwabaseRoma 12:1.

Nxa ulandela izimiso zeBhayibhili futhi uzama ukuthi ube ngumngane kaNkulunkulu, mhlawumbe usucabanga ukuthi ubhabhathizwe. Manje ungakwazi njani ukuthi usungabhabhathizwa?a

Okusesihlokweni lesi

• Kumele ngibe lolwazi olunganani?

• Kumele ngibe ngisenzani khathesi?

• Okutshiwo ngabentanga yakho

Kumele ngibe lolwazi olunganani?

Ukulungiselela ukubhabhathizwa akudingi ukuthi ubambe zonke izinto ngekhanda njengomuntu ofuna ukupasa emhlolisweni wesikolo, kodwa kumele usebenzise ‘amandla akho okucabanga’ ukuze ukholwe ukuthi lokho okuseBhayibhilini kuliqiniso. (KwabaseRoma 12:1) Ngokwesibonelo:

• Uyaqiniseka yini ukuthi uNkulunkulu ukhona lokuthi nguye okumele umkhonze?

  Okutshiwo liBhayibhili: “Loba ngubani osondela kuNkulunkulu kumele akholwe ukuthi ukhona lokuthi uyabapha umvuzo labo abamdinga ngeqiniso.”—KumaHebheru 11:6.

  Zibuze: ‘Kungani ngikholwa kuNkulunkulu?’ (KumaHebheru 3:4) ‘Kungani kumele ngimkhonze?’—ISambulo 4:11.

  Okungakunceda: Khangela isihloko sesiZulu esithi “Indalo Noma Ukuziphendukela Kwemvelo?—Ingxenye 1: Kungani Kufanele Ukholelwe KuNkulunkulu?”

• Uyaqiniseka yini ukuthi lokho okuseBhayibhilini kuvela kuNkulunkulu?

  Okutshiwo liBhayibhili: “Yonke iMibhalo iphefumulelwe nguNkulunkulu futhi iyasiza ekufundiseni, lasekukhuzeni, lasekuqondiseni izinto kanye lasekulayeni ngokulunga.”—2 KuThimothi 3:16.

  Zibuze: ‘Kungani ngikholwa ukuthi iBhayibhili ayisilobhuku elilemibono yabantu?’—U-Isaya 46:10; 1 KwabaseThesalonika 2:13.

  Okungakunceda: Khangela isihloko esithi “Indlela iBhayibhili Elingakunceda Ngayo?—Ingxenye 1: Zijayeze Ukulibala”

• Uyaqiniseka ukuthi uJehova usebenzisa ibandla ukuze agcwalise intando yakhe?

  Okutshiwo liBhayibhili: “Kumele akhazinyuliswe [uNkulunkulu] ngebandla langoKhristu uJesu kuzo zonke izizukulwane kuze kube nini lanini.”—Kwabase-Efesu 3:21.

  Zibuze: ‘Ngibona angani lokho engikufunda emihlanganweni yebandla kuvela ebantwini kumbe kuJehova?’ (UMathewu 24:45) ‘Ngiyayingena yini imihlangano lanxa abazali bami bengayingeni (nxa kuyikuthi bayakuvumela)?’—KumaHebheru 10:24, 25.

  Okungakunceda: Khangela isihloko esithi “Kungani Kumele Ungene Imihlangano eWolu YoMbuso?”

Kumele ngibe ngisenzani khathesi?

Akudingeki ukuthi ube ngumuntu ongaphambanisiyo ukuze ubhabhathizwe kodwa kumele utshengise ukuthi uzimisele “ukutshiya ububi, wenze okulungileyo.” (IHubo 34:14) Ngokwesibonelo:

• Uyayilandela yini imithetho kaJehova?

  Okutshiwo liBhayibhili: “Hlalani lilomzwangedwa omuhle.”—1 Phetro 3:16.

  Zibuze: ‘Ngitshengise njani ukuthi amandla ami okuqedisisa afundiswe “ukwehlukanisa okuhle lokubi”?’ (KumaHebheru 5:14) ‘Kulesikhathi yini engisikhumbulayo lapho engenelise khona ukulwisana lokuyengwa ngabanye abasakhulayo? Abangane bami bayangikhuthaza yini ukuthi ngenze okulungileyo?’—IZaga 13:20.

  Okungakunceda: Khangela isihloko esithi “Ngingawuqeqetsha Njani Umzwangedwa Wami?”

• Uyavuma yini nxa uphambanisile?

  Okutshiwo liBhayibhili: “Ngakho ngamunye wethu uzaziphendulela kuNkulunkulu.”—KwabaseRoma 14:12.

  Zibuze: ‘Ngithembekile yini?’ (KumaHebheru 13:18) ‘Nxa ngingaphambanisa ngiyavuma yini kumbe ngiyafihla kumbe ngesulele icala kwabanye?’—IZaga 28:13.

  Okungakunceda: Khangela isihloko esithi “Ngingawalungisa Njani Amaphutha Ami?”

• Ungumngane kaJehova yini?

  Okutshiwo liBhayibhili: “Sondelani kuNkulunkulu, laye uzasondela kini.”—UJakhobe 4:8.

  Zibuze: ‘Kukhona yini engikwenzayo ukuze ngisondele kuJehova?’ Ngokwesibonelo, ‘Ngilibala nsuku zonke yini iBhayibhili?’ (IHubo 1:1, 2) ‘Ngithandaza zikhathi zonke yini?’ (1 KwabaseThesalonika 5:17) ‘Nxa ngithandaza, ngiyamtshela konke okusenhliziyweni yami yini uJehova? Abangane bami bayamthanda yini uJehova?’—IHubo 15:1, 4.

  Okungakunceda: Khangela isihloko esithi “Indlela IBhayibhili Elingakunceda Ngayo—Ingxenye 2: Kukhwabithe Ukulibala” lesithi “Kungani Kumele Ngithandaze?”

ICEBO: Ukuze ukulungele ukubhabhathizwa, bala isahluko 37 sebhuku lesiZulu elithi Intsha Iyabuza—Izimpendulo Ezisebenzayo, UMqulu 2. Khangelisisa itshathi elisemakhasini 308 lo-309.