Ungakuthola Njani?

UZIBONA UTHOKOZA YINI? Nxa kunjalo, kuyini okukwenza uthokoze? Yimuli, umsebenzi kumbe yisonto oyingenayo yini? Engxenye ukhangelele phambili entweni engakwenza uthokoze njengokuqeda isikolo, ukuthola umsebenzi ongcono loba ukuthenga imota enhle.

Abantu abanengi bathola intokozo nxa bephumelele kwezinye izinto kumbe izifiso zabo zigcwalisekile. Kodwa intokozo leyo iba ngeyesikhathi esinganani? Intokozo enjalo ijayele ukunyamalala njengamazolo njalo lokhu kuyadanisa.

Intokozo ichazwa njengesimo sokuthaba kumbe sokujabula kakhulu esihlala sikhona njalo sigoqela ukusuthiseka lesifiso sokuthi kuhlale kunjalo.

Njengoba intokozo kuyisimo esiqhubekayo ingafaniswa lohambo oluqhubekayo olungela siphetho. Ukuthi, “Ngizathokoza nxa . . . ” kwenza ungayitholi intokozo.

Ngokwesibonelo ake sifanise intokozo lempilakahle. Singenzani ukuze sibe lempilakahle? Siyakhetha kuhle ukudla esikudlayo, senze ama-exercise njalo siyananzelela lendlela esiziphatha ngayo. Ngokufananayo nxa sifuna ukuthokoza kumele silandele indlela yokuphila eqondileyo njalo senze lokho iBhayibhili elikutshoyo.

Yiziphi izinto ezingenza uthokoze? Lanxa kulezinye eziqakatheke kakhulu kulezinye kulezi ezilandelayo, zonke zingakunceda kakhulu:

• UKUSUTHISEKA LOKUPHA

• IMPILAKAHLE LOKWENELISA UKUVUMELANA LEZIMO

• UTHANDO

• UKUTHETHELELA

• UKWAZI UKUTHI UPHILELANI

• ITHEMBA

Ibhuku elihlonitshwayo lelilenhlakanipho lithi: “Babusisiwe labo abandlela zabo zingelansolo.” (IHubo 119:1) Ake sihlole izindlela lezo.