Lokho Okuzaqeda Ubandlululo Kokuphela

Abantu abanengi bakusebenzisile lokho esixoxe ngakho ezihlokweni ezidlulileyo. Kunengi abakwenzileyo ukuze balwisane lobandlululo ababelalo ezinhliziyweni zabo. Loba kunjalo ngeke senelise ukuluqeda ngokupheleleyo ubandlululo sisodwa. Pho ubandlululo luzake luphele yini?

Uhulumende Ozanceda Abantu

Imibuso yabantu yehlulekile ukuqeda ubandlululo olusebantwini. Manje ukhona yini uhulumende ongenelisa ukuqeda ubandlululo?

Uhulumende ongaqeda ubandlululo kumele enelise:

1. 1. Ukutshintsha indlela abantu abacabanga ngayo lababona ngayo abanye abantu.

2. 2. Ukuthoba amanxeba asezinhliziyweni zabantu angabe ebangela ukuthi behluleke ukuphatha kuhle abanye.

3. 3. Ukuba labakhokheli abangelalo ubandlululo.

4. 4. Ukwenza abantu bezizwe zonke bamanyane.

IBhayibhili lisitshela ukuthi uNkulunkulu usewubekile umbuso onjalo. Ubizwa ngokuthi ‘nguMbuso kaNkulunkulu.’—ULukha 4:43.

Khangela ukuthi kuyini okuzakwenziwa ngumbuso lo:

1. Imfundo Enhle

“Abantu basemhlabeni [bazakufunda] ukulunga.”—U-ISAYA 26:9.

“Izithelo zokulunga zizakuba yikuthula; okufaneleyo kuzaletha ukuthula zwi lethemba kuze kube nininini.”—U-ISAYA 32:17.

Amavesi la asifundisani? UMbuso kaNkulunkulu uzafundisa abantu ukuthi benze okulungileyo. Nxa abantu bangafunda ukwehlukanisa okuhle lokubi, okulungileyo lokungalunganga, bayatshintsha indlela abaphathana ngayo. Bonke bazananzelela ukuthi okuqondileyo yikuthanda yonke imihlobo yabantu.

2. Uzaqeda Ukuphathwa Kubi

UNkulunkulu “uzakwesula zonke izinyembezi emehlweni abo, ukufa ngeke kusabakhona, loba ukulila loba ukukhala loba ubuhlungu, ngeke kusabakhona. Izinto zakuqala sezidlulile.”—ISAMBULO 21:4.

Ivesi le isifundisani? UMbuso kaNkulunkulu uzaqeda bonke ubuhlungu obubangelwa yikuphathwa kubi. Abake baphathwa kubi bazabe bengaselaso isizatho sokuba lenzondo.

3. Umkhokheli Omuhle

“Kayikwahlulela ngalokho akubona ngamehlo akhe, loba aqume ngalokho akuzwa ngendlebe zakhe; kodwa abaswelayo uzabehlulela ngokulunga aqumele abayanga basemhlabeni ngokulunga.”—U-ISAYA 11:3, 4.

Ivesi le isifundisani? Nxa uJesu Khristu, iNkosi yoMbuso kaNkulunkulu esebusa umhlaba uzabaphatha ngendlela efananayo bonke abantu. UJesu kabandlululi futhi wonke umuntu uzabe eselalela imithetho yakhe.

4. Ukumanyana

UMbuso kaNkulunkulu ufundisa abantu ukuthi babe ‘ngqondonye, babe lothando lunye, bamanyane ngokupheleleyo, babe lomcabango owodwa.’—KWABASEFILIPHI 2:2.

Ivesi le isifundisani? Ukumanyana okuzaba khona phakathi kwezakhamizi zoMbuso kaNkulunkulu kuyabe kungokweqiniso sibili. ‘Bazamanyana ngokupheleleyo’ ngoba bonke abantu bazabe bethandana ngenhliziyo yonke.