Ezempucuko Zingaphambanisa Njani Umtshado Wakho?
Nxa ezempucuko zisetshenziswa kuhle, ziyawuqinisa umtshado. Ngokwesibonelo, abatshadileyo bangasebenzisa ezempucuko ukuthi baxoxe phakathi kosuku futhi lokhu kungenza basondelelane.
Lanxa kunjalo, abanye abatshadileyo bavumela ezempucuko ukuthi . . .
zibenze baswele isikhathi sokuxoxa lesokwenza izinto ndawonye.
zibenze basebenze ngesikhathi okungamelanga basebenze ngaso.
zibenze bacine bengasathembani futhi bengasathembekanga.
OKUMELE UKWAZI
NXA LINDAWONYE
Indoda okuthiwa nguMichael ithi: “Kwezinye izikhathi nxa ngilomkami kuyabe kungani ngingedwa. Uyabe ebhizi efonini yakhe esithi, ‘Sengilesikhathi ngingakhangeli ifoni yami.’” Enye indoda okuthiwa nguJonathan ithi: “Ezempucuko zingenza indoda lomfazi baqhelelane lanxa behlala ndawonye.”
ONGACABANGA NGAKHO: Uqeda isikhathi esingakanani usefonini uxoxa labanye abantu kumbe ukhangele amameseji kulokuthi uxoxe lomkakho?—KWABASE-EFESU 5:33.
UMSEBENZI
Abanye balemisebenzi edinga ukuthi baphendule amafoni abo loba nini. Kodwa abanye imisebenzi yabo ayidingi ukuthi benze njalo. Lanxa kunjalo baqeda isikhathi esinengi besebenza loba sebesendlini. Eyinye indoda okuthiwa nguLee ithi, “Kunzima ukuthi ngingaphenduli ifoni yami nxa ikhala kumbe kungangena imeseji lanxa ngiyabe ngizitshele ukuthi ngifuna ukuba lomkami.” Owesifazana okuthiwa nguJoy uthi: “Ngisebenzela endlini, yikho kumele ngizibambe sibili ukuthi ngingaphileli ukusebenza.”
ONGACABANGA NGAKHO: Uyamlalela yini umkakho nxa ekhuluma lawe?—ULUKHA 8:18.
UKUTHEMBEKA
Abantu abanengi abatshadileyo bathi okunye okwenza baxabane labomkabo yikuthi bayabafihlela abakwenza kwezokuxhumana. Abanye baze bavuma sibili ukuthi bayafaka izinto kwezokuxhumana abangafuni ukuthi omkabo bazibone.
Akumangalisi-ke ukuthi kuthiwa ezokuxhumana zingaba yingozi kwabatshadileyo ngoba zingenza kube lula ukuthi bangathembeki. Lamagqwetha ayavuma ukuthi imbangela yamadivosi amanengi ngezokuxhumana.
ONGACABANGA NGAKHO: Uyamfihlela yini umkakho izinto ozixoxa lomuntu ongatshadanga laye?—IZAGA 4:23.
ONGAKWENZA
HLELA KUHLE
Umuntu ongadli ukudla okweneleyo kasoze abe lempilakahle. Ngendlela efananayo, umuntu ongaziniki isikhathi esaneleyo sokuba lomkakhe uzakuba lenhlupho emtshadweni wakhe.—Kwabase-Efesu 5:28, 29.
ISIMISO ESISEBHAYIBHILINI: “Libe leqiniso lokuthi yiziphi izinto eziqakatheke kakhulu.”—KWABASEFILIPHI 1:10.
Xoxani ngokuthi yiziphi izinto ezibhalwe ngaphansi elifuna ukuzenza, kumbe bhalani okunye elikucabangayo elibona angani kungalinceda ukuthi lingavumeli ezempucuko ziphambanise umtshado wenu.
Zamani ukudla ndawonye nsuku zonke
Fakani isikhathi sokubeka ezempucuko eceleni
Hlelani isikhathi sokuthi like likholise ndawonye
Bekani khatshana ezempucuko nxa selisiyalala
Citshani ezempucuko okwemizuzu engu-15 ngelanga ukuze libe lesikhathi sokuxoxa kungelalutho oluliphambanisayo
Khethani isikhathi lapho elingasoze lisebenzise khona i-inthanethi