Hlonipha Impilo

KUNGANI KUQAKATHEKILE UKUTHI SIHLONIPHE IMPILO?

Nxa ungenza izinto ezifaka impilakahle yakho kumbe eyabanye engozini uyabe utshengisa ukuthi awuyiqakathekisi impilo yakho loba eyabanye.

Ukubhema kubangela imvukuzane futhi kwenza kube nzima ukuthi umzimba ulwisane lomkhuhlane lo. Kukhanya abantu abanengi ababebhema kumbe behlala duzane lomuntu obhemayo bacina bebulawe yimvukuzane yamaphaphu.
Ukudutshulwa kwabantu abanengi okwenzakala umnyaka ngamunye kubangela ukuthi abantu bahlaselwe yikuhlulukelwa. Okunye ukuchwayisisa kutshengisa ukuthi nxa kube lokudutshulwa ezikolo, labo abasala bephila bayaphambaniseka kakhulu okwempilo yabo yonke.
Abantu abatshayela bedakiwe kumbe besebenzise izidakamizwa (ama-drugs) bafaka impilo zabanye abatshayeli engozini kumbe ezalabo abahamba ngenyawo. Nxa abantu bengaqakathekisi impilo, kulimala abantu abanengi abangelacala.

ONGAKWENZA

Qakathekisa impilakahle yakho. Ungenelisa ukutshiyana lomkhuba ongafaka impilo yakho engozini onjengokubhema, uku-vaper, ukunatha kakhulu, kumbe ukusebenzisa ama-drugs. Imikhuba le iyingozi kakhulu futhi itshengisa ukuthi awuyihloniphi impilo yabanye abantu okugoqela labangakini.

“Asizihlambululeni ezintweni zonke ezingcolisa umzimba.”—2 KwabaseKhorinte 7:1.

Zivikele wena kanye labanye. Lungisisa loba yini engafaka ukuphila kwabanye engozini. Tshayela kuhle futhi ugcine imota yakho isesimeni esihle. Ungavumi ukuyengwa ngabanye ukuthi wenze izinto kumbe udlale imidlalo engakulimaza loba ikubulale.

“Nxa usakha indlu entsha kumele wakhe umduli omfitshane ogombolozele uphahla ukuze kungabi lomuntu owayo kuyo ubusuletha icala legazi endlini yakho.”—UDutheronomi 22:8.a

Woba lomusa kwabanye. Ukuhlonipha impilo kutsho lokungabandlululi muntu ngokuthi ungumhlobo bani, uvela kuliphi ilizwe, kumbe ukuthi ulani empilweni. Phela udlakela lezimpi ezinengi ezikhona lamuhla, kubangelwa lubandlululo lenzondo.

“Susani kini konke ukufukamela inzondo, lokuthukuthela, lolaka, lokuklabalala, lokuthethisa kanye lakho konke okulimazayo. Kodwa wobani lomusa komunye lomunye.”—Kwabase-Efesu 4:31, 32.

OFAKAZI BAKAJEHOVA BATSHENGISA NJANI UKUTHI BAYAYIHLONIPHA IMPILO?

OFakazi bakaJehova bancedisa abanye ukuthi baqakathekise impilo. Uhlelo lwethu lokufunda labantu iBhayibhili lemihlangano esiba layo sekuncede abanye ukuthi benelise ukutshiya imikhuba engaphambanisa impilakahle yabo.

Sizama ngamandla wonke ukusebenza sivikelekile nxa sisakha izakhiwo zethu. Labo abancedisa ukwakha izakhiwo esikhonzela kuzo loba ezinye nje izakhiwo zethu bayaqeqetshwa ukusebenza bevikelekile ukuze bangalimali nxa besebenza. Kanti njalo izakhiwo zethu zihlala zihlolwa ukuthi zisesimeni esihle yini lokuthi zisahambisana lemithetho yokuvikeleka.

Sincedisa labo abehlelwe ngumonakalo. Ngomnyaka ka-2022 sincedise ezingozini zemvelo ezingaba yi-200 emhlabeni wonke njalo sasebenzisa imali engaba ngamadola angu-12 miliyoni evela eminikelweni yabazalwane ukuze kuncediswe abantu abehlelwe zingozi lezi.

Ngesikhathi kulomkhuhlane we-Ebola eWest Africa ngo-2014 laseDemocratic Republic of Congo ngo-2018, safundisa abantu ukuthi bangenzani ukuze bangamemethekisi umkhuhlane lo obulalayo. Abantu babehamba befundiswa ukuthi kuqakathekile ukulalela ngoba kusindisa impilo. Saphinda safaka lamabhakede okugezela izandla ezindaweni zethu zokukhonzela sasesikhuthaza abantu ukuthi bangayekeli ukugeza izandla lokwenza ezinye izinto ezizabavikela emkhuhlaneni lo.

Komunye umsakazo eSierra Leone, oFakazi bakaJehova banconywa kakhulu ngokuncedisa abanye babo labanye nje emphakathini ukuthi bangenzani ukuze bangamemethekisi umkhuhlane we-Ebola.

OFakazi bakaJehova baselayinini yokugeza izandla bengakangeni eWolu yoMbuso. — Indawo yokugezela izandla eWolu yoMbuso ngesikhathi kulomkhuhlane we-Ebola eLiberia ngo-2014

a Kwakuqakathekile ukuthi ama-Israyeli awulandele umthetho lo ukuze avikele izimuli zawo kanye labanye.