UDavida Ubekwa Ukuthi Abe yiNkosi

USAWULI uzama ukuxotshanisa uDavida futhi. Uthatha amasotsha akhe angu-3 000 alamandla ukudlula amanye abesemdinga. UDavida uyakuzwa lokhu abesethuma izinhloli ukuze akwazi ukuthi uSawuli lamadoda akhe bangaphi ngalobobusuku. UDavida ubuza amadoda akhe amabili ukuthi: ‘Ngubani ozahamba lami esihonqweni sikaSawuli?’

U-Abhishayi uyaphendula esithi: ‘Ngizahamba lawe.’ U-Abhishayi yindodana kadadewabo kaDavida uZeruyiya. USawuli lamadoda akhe besalele, uDavida lo-Abhishayi bayanyenya bangene esihonqweni. Bathatha umkhonto kaSawuli bathathe lesigubhu sakhe samanzi. Lezi zinto ziseceleni kwekhanda lakhe. Akulamuntu obabonayo kumbe obezwayo ngoba bonke balele ubuthongo obukhulu.

Khangela uDavida lo-Abhishayi khathesi. Sebesukile njalo sebekhatshana phezu kwentaba. UDavida umemeza induna yamabutho yama-Israyeli u-Abhineri esithi: ‘Abhineri kungani ungavikeli inkosi yakho na? Khangela! Umkhonto wayo lesigubhu sayo samanzi kungaphi?’

USawuli uyavuka. Uzwa ilizwi likaDavida abesebuza esithi: ‘Nguwe yini Davida?’ Uyambona yini uSawuli lo-Abhineri phansi le?

UDavida uphendula uSawuli esithi: ‘Ye, yimi nkosi yami.’ UDavida ubuza athi: ‘Ungixotshaniselani? Ngenzeni? Nanku umkhonto wakho nkosi. Thuma omunye wamadoda akho azowuthatha.’

USawuli uthi: ‘Ngonile. Ngenze into engelangqondo.’ Ngemva kwalokho, uDavida uyahamba, uSawuli abesebuyela ngekhaya. Kodwa uDavida uyacabanga esithi: ‘USawuli uzangibulala ngelinye ilanga. Kumele ngibalekele elizweni lamaFilisti.’ Yikho kanye akwenzayo. UDavida uqila amaFilisti awenze acabange ukuthi uyawasekela.

Ngemva kwesikhathi, amaFilisti ahamba ukuyakulwa lama-Israyeli. Empini le, uSawuli loJonathani bayabulawa. Lokhu kumdanisa kakhulu uDavida. Ngakho ubhala ingoma emnandi ehlabela esithi: ‘Ngilusizi ngawe Jonathani mfowethu. Ubuthandeka kakhulu kimi!’

Ngemva kwalokhu, uDavida ubuyela kuma-Israyeli eHebhroni. Kulempi phakathi kwamadoda akhetha indodana kaSawuli u-Ishi-Bhoshethi ukuthi ibe yinkosi lamadoda afuna uDavida abe yinkosi. Kodwa amadoda kaDavida ayanqoba. UDavida ubekwa ukuthi abe yinkosi eleminyaka engu-30. Ubusa eHebhroni okweminyaka eyisikhombisa lezinyanga eziyisithupha. Amanye amadodana akhe azalwayo ekhonale ngu-Amnoni, u-Abhsalomi lo-Adonija.

Kufika isikhathi sokuthi uDavida lamadoda akhe bayehlasela idolobho elihle elibizwa kuthiwa yiJerusalema. UJowabi, indodana kadadewabo kaDavida uZeruyiya ukhokhela impi le. UDavida ubonga uJowabi ngokumenza ukuthi abe yinduna yebutho lakhe. Khathesi uDavida uqalisa ukubusa edolobheni laseJerusalema.