Uhlupho Endlini kaDavida

UDAVIDA eseqalisile ukubusa eJerusalema, uJehova wenza ukuthi ibutho lakhe linqobe izitha zabo. UJehova wayethembise ukunika ama-Israyeli ilizwe laseKhenani. Khathesi, bencediswa nguJehova, ilizwe lonke ababelithenjisiwe selingelabo.

UDavida ubusa kuhle. Uyamthanda uJehova. Ngemva kokunqoba iJerusalema, uqala ngokuletha ibhokisi likaJehova lesivumelwano eJerusalema. Njalo ufuna ukwakha ithempeli lapha azalifaka khona.

Lapho uDavida esekhulile wenza iphutha elibi. UDavida uyakwazi ukuthi kubi ukuthatha into yomunye umuntu. Kodwa ngelinye ilanga ntambama, lapho esephahleni lwesigodlo sakhe, ukhangela phansi, abone owesifazana omuhle kakhulu. Ibizo lakhe nguBhathisheba njalo indoda yakhe kuthiwa ngu-Uriya, ingomunye wamasotsha kaDavida.

UDavida ufuna uBhathisheba kakhulu, uze athi kalethwe esigodlweni sakhe. Indoda yakhe isempini. UDavida ulala laye njalo ngemva kwesikhathi uBhathisheba ubona ukuthi uselesisu. UDavida ukhathazeke kakhulu ngakho uthumela ilizwi kumkhokheli webutho lakhe uJowabi ukuze Uriya afakwe phambili empini abulawe. Lapho u-Uriya esefile, uDavida utshada loBhathisheba.

UJehova umzondele kakhulu uDavida. Ngakho uthuma inceku yakhe uNathani ukuthi iyemtshela ngezono zakhe. Uyambona yini laphayana uNathani ekhuluma loDavida? UDavida uyazisola kakhulu ngalokho akwenzileyo ngakho uJehova kambulali. Kodwa uJehova uthi: ‘Ngenxa yokuthi wenze izinto lezi ezimbi, uzaba lenhlupho endlini yakho.’ UDavida waba lazo sibili inhlupho!

Okwakuqala, indodana kaBhathisheba iyafa. Indodana kaDavida elizibulo u-Amnoni ngesikhathi iyodwa ithatha udadewabo uThamari ilale laye ngenkani. Indodana kaDavida u-Abhsalomi ibulala u-Amnoni ngenxa yokuthi akwenzileyo kumzondise kakhulu. Ngemva kwesikhathi, u-Abhsalomi uthandwa ngabantu abanengi njalo wenza ukuthi yena abekwe ukuthi abe yinkosi. Ekucineni uDavida uyamnqoba u-Abhsalomi, njalo u-Abhsalomi uyabulawa. UDavida uba lenhlupho ezinengi sibili.

Kusenzakala konke lokhu uBhathisheba ubeletha umntwana ongumfana okuthiwa nguSolomoni. Lapho uDavida esegula njalo esegugile, indodana yakhe u-Adonija izama ukuzenza inkosi. Ngakho uDavida utshela umphristi okuthiwa nguZadoki ukuthi athele amafutha ekhanda likaSolomoni. Lokhu kukutshengisa ukuthi uSolomoni nguye ozaba yinkosi. Kungakahlali isikhathi eside lokho kwenzakele, uDavida uyafa eleminyaka engu-70. UDavida wabusa iminyaka engu-40 kodwa khathesi uSolomoni nguye oseyinkosi yama-Israyeli.