UModekhayi lo-Esta

KASIBUYELE emuva ngeminyaka emilutshwana u-Ezra engakayi eJerusalema. UModekhayi lo-Esta ngamaIsrayeli aqakatheke kakhulu embusweni wasePhesiya. U-Esta nguye indlovukazi, njalo umzawakhe uModekhayi ulesikhundla esilandela esenkosi. Ake sibone ukuthi lokhu kwenzakala njani.

Abazali baka-Esta bafa esasemncane ngakho ukhuliswa nguModekhayi. U-Ahasuweru inkosi yasePhesiya ulesigodlo edolobheni laseSusa njalo uModekhayi ungomunye wezinceku zakhe. Ngelinye ilanga umfazi wenkosi uVashithi akayilaleli inkosi, ngakho inkosi ikhetha umfazi omutsha ukuthi abe yindlovukazi. Uyakwazi ukuthi ukhetha ubani? Ukhetha u-Esta omuhle osasemncane.

Uyayibona yini indoda le ezigqajayo abantu abayikhothamelayo? NguHamani. Uyindoda eqakatheke kakhulu ePhesiya. UHamani ufuna uModekhayi, lo ombona ehlezi lapha, ukuthi laye amkhothamele. Kodwa uModekhayi kafuni ukumkhothamela. Ucabanga ukuthi akulunganga ukukhothamela umuntu ongalunganga kangaka. Lokhu kwenza uHamani azonde kakhulu. Ngakho nanku akwenzayo.

UHamani utshela inkosi amanga ngama-Israyeli. Uthi: ‘Bangabantu ababi, abangafuni ukulalela imithetho yakho. Kumele babulawe.’ U-Ahasuweru kakwazi ukuthi umfazi wakhe u-Esta ungumIsrayeli. Ngakho ulalela uHamani, njalo wenza umthetho othi ngelanga elithile ama-Israyeli wonke kumele abulawe.

UModekhayi udana kakhulu lapho esizwa ngomthetho lo. Uthumela umlayezo ku-Esta: ‘Kumele utshele inkosi njalo uyincenge ukuze singabulawa.’ Umthetho wasePhesiya wawungavumi ukuthi kube lomuntu oyabona inkosi engabizwanga. Kodwa u-Esta uhamba ayoyibona engabizwanga. Inkosi imelulela intonga yayo yegolide. Lokhu kutsho ukuthi kasoze abulawe. U-Esta umema inkosi loHamani ukuthi bezokudla laye. Sebelapho, inkosi ibuza u-Esta ukuthi ufuna imenzeleni. U-Esta uthi uzayitshela nxa ingavuma ukuthi yona loHamani bezokudla laye ngelanga elilandelayo.

Sebesidla, u-Esta utshela inkosi: ‘Mina labantu bakithi sizabulawa.’ Inkosi iyazonda. Iyabuza: ‘Ngubani olesibindi sokwenza into enjalo?’

U-Esta uthi: ‘Isitha nguHamani njalo nguye ololunya!’

Khathesi inkosi isizonde kakhulu. Ilaya ukuthi uHamani abulawe. Ngemva kwalokho inkosi yenza ukuthi uModekhayi abelesikhundla esilandela esayo. Ngelanga ama-Israyeli okumele abulawe ngalo, uModekhayi wenza kube lomthetho ovumela ukuthi ama-Israyeli alwele ukuphila kwawo. Ngenxa yokuthi khathesi uModekhayi ungumuntu oqakatheke kakhulu, abantu abanengi bayawancedisa ama-Israyeli njalo asinda ekubulaweni yizitha zawo.