IPharadayisi Liseduze!

Izinto ezimbi ezenzakalayo khathesi emhlabeni zisitshengisa ukuthi iPharadayisi seliseduze. IBhayibhili labikezela ukuthi sizabona izikhathi ezinzima iPharadayisi lingakafiki. Siphila ezikhathini lezi lamuhla! Nanzi ezinye zezinto iBhayibhili elathi zizakwenzeka:

Izimpi ezinkulu. “Isizwe sizahlasela isizwe, lombuso uhlasele umbuso.” (UMathewu 24:7) Lesisiprofetho sigcwalisekile. Kusukela ngomnyaka ka1914, kubelezimpi zomhlaba wonke ezimbili lezinye ezincane ezinengi. Kufe izigidi zabantu ezimpini lezi.

Ukwanda kwemikhuhlane. Kuzakuba “lezifo ezindaweni ezinengi.” (ULukha 21:​11) Lokhu kuliqiniso yini? Yebo. Imvukuzane, umkhuhlane wenhliziyo, ufuba, uqhuqho, iAIDS leminye imikhuhlane kubulele izigidi zabantu.

Ukuswelakala kokudla. Emhlabeni wonke kulabantu abakuswelayo ukudla okwaneleyo. Izigidi zabantu ziyafa umnyaka ngamunye ngendlala. Lokhu ngokunye okutshengisa ukuthi iPharadayisi liseduze. IBhayibhili lithi: ‘Kuzakuba . . . lendlala.’​—UMakho 13:8.

Ukuzamazama komhlaba. “Kuzakuba . . . lokuzamazama komhlaba ezindaweni ezitshiyeneyo.” (UMathewu 24:7) Lokhu kugcwalisekile lamuhla. Kusukela ngo1914 ukuzamazama komhlaba kubulele abantu abadlula isigidi.

Abantu ababi. Abantu bazakuba ‘ngabathanda imali’ njalo “bazakuba ngabazithandayo.” Bazakuba ‘ngabathanda injabulo kulokuthanda uNkulunkulu.’ Abantwana bazakuba ‘ngabangalaleli abazali babo.’ (2 KuThimothi 3:​1-5) Kawuvumi yini ukuthi bakhona abantu abanjalo lamuhla? Kabamhloniphi uNkulunkulu njalo balwisa ukuphambanisa labo abazama ukufunda ngaye.

Ubugebengu. Kuzakuba ‘lokwanda kobubi.’ (UMathewu 24:​12) Awuvumi yini ukuthi ubugebengu sebandile ukudlula kudala. Abantu kuyo yonke indawo basengozini yokukhuthuzwa, ukuqilwa lokulinyazwa.

Zonke izinto lezi zitshengisa ukuthi umbuso kaNkulunkulu useduze. IBhayibhili lithi: “Nxa selibona izinto lezi sezisenzakala, selisazi ukuthi umbuso kaNkulunkulu ususondele.” (ULukha 21:​31) Uyini uMbuso kaNkulunkulu? Unguhulumende kaNkulunkulu wasezulwini ozaletha iPharadayisi emhlabeni. Umbuso kaNkulunkulu uzabhidliza ohulumende babantu.​—UDanyeli 2:44.