Ukufunda kwakho iBhayibhili laboFakazi bakaJehova sekukuncede ukuthi ulazi iqiniso. Akuthandabuzwa ukuthi okufundileyo sekukwenze waba ngumngane kaNkulunkulu njalo waba lethemba lokuphila phakade emhlabeni olipharadayisi lapho okuzabe sekubusa khona uMbuso kaNkulunkulu. Usulikholwa iLizwi likaNkulunkulu futhi ukuba sebandleni lobuKhristu sekukwenze wathola izibusiso ezinengi. Kanti njalo usuyizwisisa indlela uJehova aphatha ngayo abantu bakhe lamuhla.—Zek. 8:23.

Njengoba ulungiselela ukubhabhathizwa, abadala bebandla bazaxoxa lawe ngemfundiso eziyisisekelo esizikholwayo njalo lokhu kuzakunceda kakhulu. (Heb. 6:1-3) Kwangathi uJehova angayibusisa yonke imizamo oyenzayo ukuze uqhubeke ufunda ngaye njalo akunike umvuzo asithembise wona.—Joh. 17:3.

1. Kungani ufuna ukubhabhathizwa?

2. Ngubani uJehova?

• “UJehova unguNkulunkulu [weqiniso, NWT] ezulwini phezulu lasemhlabeni phansi. Kakho omunye.”—Dute. 4:39.

• ‘Wena, obizo lakho unguJehova—wena wedwa ungoPhezukonke emhlabeni wonke.’—Hubo. 83:18.

3. Kungani kuqakathekile ukuthi usebenzise ibizo likaNkulunkulu?

• “Kumele lithandaze kanje: ‘Baba wethu osezulwini, kalingcweliswe ibizo lakho.’”—Mat. 6:9.

• “Wonke umuntu obiza ibizo likaJehova uzasindiswa.”—Rom. 10:13.

4. Yiwaphi amabala aseBhayibhilini achaza lokho uJehova ayikho?

• “UJehova unguNkulunkulu waphakade, uMdali wemikhawulo yomhlaba.”—Isaya. 40:28.

• “Baba wethu osezulwini.”—Mat. 6:9.

• “UNkulunkulu uluthando.”—1 Joh. 4:8.

5. Kuyini ongakunika uJehova uNkulunkulu?

• “Kumele uthande uJehova uNkulunkulu wakho ngenhliziyo yakho yonke, langomphefumulo wakho wonke, langengqondo yakho yonke, langamandla akho wonke.”—Mak. 12:30.

• “NguJehova uNkulunkulu wakho okumele umkhonze, njalo nguye yedwa okumele umenzele inkonzo engcwele.”—Luk. 4:8.

6. Kungani ufuna ukuhlala uqotho kuJehova?

• “Hlakanipha, ndodana, ulethe intokozo enhliziyweni yami; lapho ngizakwazi ukumphendula ongeyisayo.”—Zaga. 27:11.

7. Uthandaza kubani futhi uthandaza ngebizo likabani?

• UJesu wathi: “Ngiqinisile sibili ngithi kini, nxa lingacela loba yini kuBaba, uzalinika yona ebizweni lami.”—Joh. 16:23.

8. Kuyini ongakuthandazela?

• “Ngakho lina kumele lithandaze kanje: ‘Baba wethu osezulwini, kalingcweliswe ibizo lakho. UMbuso wakho kawuze. Intando yakho kayenziwe emhlabeni njengasezulwini. Siphe lamuhla isinkwa sethu salolusuku; usithethelele amacala ethu njengoba lathi sesibathethelele abalamacala kithi. Ungasingenisi ekulingweni kodwa usikhulule komubi.’”—Mat. 6:9-13.

• “Nanku esimthemba ngakho: ukuthi nxa sicela loba yini evumelana lentando yakhe, uyasizwa.”—1 Joh. 5:14.

9. Kuyini okungenza uJehova angayilaleli eminye imithandazo?

• “Bazakhala kuJehova, kodwa kayikubaphendula, . . . ngenxa yobubi ababenzileyo.”—Mik. 3:4.

• “Amehlo kaJehova akwabalungileyo, lendlebe zakhe ziyabalalela nxa bethandaza bencenga, kodwa ubuso bukaJehova bumelana labenza izinto ezimbi.”—1 Phet. 3:12.

10. Ngubani uJesu Khristu?

• “USimoni Phetro waphendula wathi: ‘UnguKhristu, iNdodana kaNkulunkulu ophilayo.’”—Mat. 16:16.

11. Kungani uJesu wabuya emhlabeni?

• “Njengoba nje leNdodana yomuntu ingalandanga ukuzokhonzwa kodwa ukuzokhonza lokuzonikela ngokuphila kwayo kube yinhlawulo yabanengi.”—Mat. 20:28.

• UJesu wathi: “Kufanele ngitshumayele izindaba ezinhle zoMbuso kaNkulunkulu lakwamanye amadolobho ngoba yikho engathunywa ukuzokwenza.”—Luk. 4:43.

12. Ungatshengisa njani ukuthi uyawubonga umhlatshelo kaJesu?

• “Wafela abantu bonke ukuze abaphilayo bangasaziphileli bona, kodwa baphilele lowo owabafelayo waphinda wavuswa.”—2 Khor. 5:15.

13. UJesu uphiwe siphi isikhundla?

• “Sengiphiwe amandla wonke ezulwini lasemhlabeni.”—Mat. 28:18.

• “UNkulunkulu wamphakamisa wamnika isikhundla esiphezulu kulaleso ayelaso, njalo ngomusa wakhe wamnika lebizo eliphezu kwawo wonke amabizo.”—Flp. 2:9.

14. Uyakukholwa yini ukuthi iQula Elibusayo laboFakazi bakaJehova yilo ‘eliyinceku ethembekileyo lehlakaniphileyo’ eyabekwa nguJesu?

• “Ngubani sibili oyinceku ethembekileyo lehlakaniphileyo, ebekwe yinkosi yayo ukuthi ikhangele izisebenzi zalapha ekhaya ukuze izinike ukudla kwazo ngesikhathi esifaneleyo?”—Mat. 24:45.

15. Umoya ongcwele ngumuntu yini?

• “Ingilosi yamphendula yathi: ‘Umoya ongcwele uzakwehlela phezu kwakho, amandla oPhezukonke akugubuzele. Yikho lowo ozazalwa uzabizwa ngokuthi ungcwele futhi uyiNdodana kaNkulunkulu.’”—Luk. 1:35.

• “Ngakho nxa lina elibabi lisenelisa ukupha abantwabenu izipho ezinhle, kutsho ukuthi uBaba osezulwini yena uzimisele kakhulu ukubapha umoya ongcwele labo abawucela kuye!”—Luk. 11:13.

16. UJehova uwusebenzise njani umoya wakhe ongcwele?

• “Ngelizwi likaJehova amazulu enziwa, unkanyankanya lwezinkanyezi ngomoya womlomo wakhe.”—Hubo. 33:6.

• “Lizakwamukela amandla nxa umoya ongcwele ufika kini, njalo lizakuba ngofakazi bami . . . kuze kuyefika emaphethelweni omhlaba.”—ImiSeb. 1:8.

• “Asikho isiphrofetho soMbhalo esivela kuloba yikuphi ukuchasisa komuntu, ngoba isiphrofetho kasikaze silethwe ngentando yomuntu, kodwa abantu babekhuluma okuvela kuNkulunkulu, njengoba babeqhutshwa ngumoya ongcwele.”—2 Phet. 1:20, 21.

17. Uyini uMbuso kaNkulunkulu?

• “UNkulunkulu wasezulwini uzabeka umbuso ongasoze wabhidlizwa lanini njalo ongasoze utshiyelwe abanye abantu. Uzayibhidliza yonke leyomibuso iphele, kodwa wona uzakuma laphakade.”—Dan. 2:44.

18. UMbuso kaNkulunkulu uzakunceda njani?

• “Uzakwesula zonke izinyembezi emehlweni abo, ukufa ngeke kusabakhona, loba ukulila loba ukukhala loba ubuhlungu, ngeke kusabakhona. Izinto zakuqala sezidlulile.”—Isam. 21:4.

19. Ukwazi ngani ukuthi sekuseduze ukuthi uMbuso ulethe izibusiso emhlabeni?

• “Abafundi bamlanda bebodwa bathi kuye: ‘Sitshele, izinto lezi zizakwenzakala nini, njalo sizakuba yini isibonakaliso sokuba khona kwakho lesesiphetho somumo lo wezinto?’ UJesu wabaphendula wathi: ‘. . . Isizwe sizavukela isizwe, lombuso uvukele umbuso, futhi kuzakuba lokuswelakala kokudla kanye lokuzamazama komhlaba ezindaweni ezehlukeneyo. Lezizindaba ezinhle zoMbuso zizatshunyayelwa emhlabeni wonke ukuze kube lobufakazi ezizweni zonke, besekufika ukuphela.’”—Mat. 24:3, 4, 7, 14.

• “Ezinsukwini zokucina kuzakuba lezikhathi ezinzima, okunzima ukuphila kuzo, ngoba abantu bazakuba ngabazithandayo, labathanda imali, labazigqajayo, labaziphakamisayo, labathukayo, labangalaleli abazali, labangabongiyo, labangathembekanga, labangathandi abanye, labangafuni isivumelwano, labanyundeli, labangazikhuziyo, labalolaka, labangakuthandiyo okuhle, labangabathengisi, labalenkani, labazikhukhumezayo, labathanda injabulo kulokuthanda uNkulunkulu, labakhanya angathi bayamesaba uNkulunkulu kodwa bephikisana lamandla alokho kumesaba.”—2 Tim. 3:1-5.

20. Ungatshengisa njani ukuthi uyawuqakathekisa uMbuso?

• “Ngakho qhubekani lifuna kuqala uMbuso kanye lokulunga kwakhe.”—Mat. 6:33.

• “UJesu wasesithi kubafundi bakhe: ‘Loba ngubani ofuna ukungilandela kazidele, athwale isigodo sakhe sokuhlutshwa, aqhubeke engilandela.’”—Mat. 16:24.

21. Ngubani uSathane njalo angobani amadimoni?

• “Lina livela kuyihlo uDeveli . . . Yena wayengumbulali kusukela ekuqaleni.”—Joh. 8:44.

• “Waphoselwa phansi umgobho, inyoka yokuqala ebizwa ngokuthi nguDeveli langokuthi nguSathane, odukisa umhlaba wonke. Waphoselwa phansi emhlabeni, lezingilosi zakhe zaphoselwa phansi kanye laye.”—Isam. 12:9.

22. Yiphi insolo uSathane alayo ngoJehova lalabo abamkhonzayo?

• “Owesifazana wathi enyokeni, ‘Singadla izithelo zezihlahla esivandeni, kodwa uNkulunkulu watsho wathi, “Lingazidli izithelo zesihlahla esiphakathi laphakathi kwesivande, njalo lingasithinti, funa life.”’ Inyoka yathi kowesifazana, ‘Kalisoze life ngempela. Ngoba uNkulunkulu uyazi ukuthi lingasidla amehlo enu azavuleka, beselisiba njengoNkulunkulu, lazi okuhle lokubi.’”—Gen. 3:2-5.

• “USathane waphendula wathi, ‘Isikhumba ngesikhumba! Umuntu anganikela loba yini alayo ukusiza impilo yakhe.’”—Jobe. 2:4.

23. Ungatshengisa njani ukuthi insolo kaSathane ingamanga?

• ‘Khonza uNkulunkulu ngenhliziyo yakho yonke.’—1 ImiLan. 28:9.

• “Ngizaze ngiyokufa ngingabulandulanga ubuqotho bami.”—Jobe. 27:5.

24. Kungani abantu besifa?

• “Isono sangena emhlabeni ngomuntu oyedwa, lokufa kwangena ngesono, ngaleyondlela ukufa kwafika ebantwini bonke ngenxa yokuthi bonke bonile.”—Rom. 5:12.

25. Abafileyo bakusiphi isimo?

• “Abaphilayo bayakwazi ukuthi bazakufa, kodwa abafileyo kabazi lutho.”—UmTshu. 9:5.

26. Yiliphi ithemba elikhona ngabafileyo?

• “Abafileyo bazavuswa, abalungileyo labangalunganga.”—ImiSeb. 24:15.

27. Bangaki abantu abazakuyabusa loJesu ezulwini?

• “Ngasengibona iMvana imi phezu kweNtaba iZiyoni ilabangu-144 000, bebhalwe ibizo layo lebizo likaYise emabunzini abo.”—Isam. 14:1.

Ukufunda iBhayibhili sekukuncede ukuthi ukwazi okufunwa nguJehova lokuthi ungaphila njani ngezimiso zakhe. Kumele ukuthi ulwazi lolu selukwenze watshintsha okunengi empilweni yakho. Kanti njalo ukuzimisela kwakho ukuphila ngendlela efunwa nguJehova kukwenze wafanela ukuba ngumtshumayeli wezindaba ezinhle.

Ukuxoxa ngemibuzo esengxenyeni le kuzakunceda ukuthi uhlale ukhumbula izimiso zikaJehova ezilungileyo lokuthi kumele wenzeni ukuze ube yinceku yakhe ayamukelayo. Kuzakunceda lokuthi uzwisise ukuthi kungani kuqakathekile ukwenza izinto ezizakutshiya ulomzwangedwa omuhle lezizadumisa uJehova.—2 Khor. 1:12; 1 Tim. 1:19; 1 Phet. 3:16, 21.

Njengoba usufunde wafika kulelibanga, akuthandabuzwa ukuthi usuzimisele ukuba senhlanganisweni kaJehova lokuzehlisa kuye. Imibuzo kanye leMibhalo esengxenyeni le kuzakunceda uzwisise ukuthi kungani kumele uzehlise ebandleni, emulini lakubohulumende abakhona lamuhla. Kuzakunceda lokuthi uqakathekise inhlelo ezenziwe nguJehova ukuze afundise abantu bakhe njalo abaqinise ukholo. Lokhu kuhlanganisa imihlangano yebandla okukhangelelwe ukuthi uyingene futhi uhlanganyele kuyo nxa izimo zivuma.

Engxenyeni le sizabona ukuqakatheka kokukhuthala emsebenzini wokutshumayela ngoMbuso ukuze sincedise abantu ukuthi bamazi uJehova lalokho asenzela khona. (Mat. 24:14; 28:19, 20) Kuzakwenza uhlale ukhumbula lokuthi ukuzinikela kwakho kuJehova uNkulunkulu kanye lokubhabhathizwa kuqakatheke kakhulu. UJehova uyakuqakathekisa konke okwenzayo ukuze utshengise ukuthi uyambonga ngomusa omkhulu akutshengise wona.

1. Ngenjani imitshado eyamukelwa nguNkulunkulu? Yisiphi isizatho esiseMibhalweni esingenza abatshadileyo bachithe umtshado?

• “Kalikaze likubale yini ukuthi owabadalayo ekuqaleni wabenza baba ngowesilisa lowesifazana? Kalikaze likubale yini lokuthi wathi: ‘Ngenxa yalesosizatho, indoda izatshiya uyise lonina inamathele kumkayo, futhi laba ababili bazakuba nyamanye’? Ngakho kabasebabili kodwa sebenyamanye. Yikho-ke lokho uNkulunkulu asekuhlanganisile kakungabi lomuntu okwehlukanisayo. . . . Loba ngubani ochitha umtshado ehlukane lenkosikazi yakhe yona ingazange iziphathe kubi kwezemacansini, abesetshada lomunye umfazi, uyaphinga.”—Mat. 19:4-6, 9.

2. Kungani kumele indoda lomkayo abahlala ndawonye batshade ngokusemthethweni? Nxa utshadile, uleqiniso yini lokuthi umtshado wenu ubhaliswe ngokusemthethweni?

• “Qhubeka ubakhumbuza ukuthi bazehlise futhi balalele ohulumende leziphathamandla.”—Tit. 3:1.

• “Umtshado kumele uhlonitshwe yibo bonke njalo umbheda womtshado akumelanga ungcoliswe ngoba uNkulunkulu uzakwahlulela abantu abaziphatha kubi kwezemacansini kanye leziphingi.”—Heb. 13:4.

3. Kuyini okhangelelwe ukuthi ukwenze emulini?

• “Lalela, ndodana yami, izeluleko zikayihlo njalo ungadeli imfundiso kanyoko.”—Zaga. 1:8.

• “Indoda iyinhloko yomkayo njengoba nje uKhristu eyinhloko yebandla. . . . Madoda qhubekani lithanda omkenu njengoKhristu owathanda ibandla.”—Efe. 5:23, 25.

• “Bobaba lingabazondisi abantwabenu kodwa qhubekani libakhulisa ngokulaya langokuxwayisa okuvela kuJehova.”—Efe. 6:4.

• “Bantwana, lalelani abazali benu kukho konke ngoba lokhu kuyayithokozisa iNkosi.”—Kol. 3:20.

• “Lani makhosikazi, zehliseni kubomkenu.”—1 Phet. 3:1.

4. Kungani kumele siyiqakathekise impilo?

• “[UNkulunkulu] nguye onika abantu bonke ukuphila lokuphefumula lazo zonke izinto. . . . Siyaphila, siyahamba njalo sikhona ngenxa yakhe.”—ImiSeb. 17:25, 28.

5. Kungani kungamelanga sibulale loba ngubani, okugoqela lomntwana ongakazalwa?

• ‘Uma amadoda alwayo angatshaya umfazi ozithweleyo . . . kube lokulimala okubi, kumele impilo ikhwitshizwe ngempilo.’—Eks. 21:22, 23.

• “Amehlo akho awubona umzimba wami ungakabi lesimo. Zonke izinsuku ezamiselwa mina zabhalwa encwadini yakho lalunye lwazo lungakabi khona.”—Hubo. 139:16.

• ‘UJehova uzonda . . . izandla ezichitha igazi elingelacala.’—Zaga. 6:16, 17.

6. Umthetho kaNkulunkulu uthini mayelana legazi?

• ‘Liqhubeke lixwaya . . . igazi, lezinto eziklinyiweyo.’—ImiSeb. 15:29.

7. Kungani kumele sithande abafowethu labodadewethu?

• “Ngilinika umlayo omutsha wokuthi lithandane. Thandanani ngendlela lami engilithande ngayo. Nxa lithandana, abantu bonke bazakwazi ukuthi lingabafundi bami.”—Joh. 13:34, 35.

8. Ukuze singamemethekisi imikhuhlane eyingozi: (a) Kungani kungakuhle ukuthi umuntu olomkhuhlane othelelwanayo enze izinto ezingabangela ukuthi abanye bawubambe masinyane, njengokubagona kumbe ukubaqabuza? (b) Kungani kungamelanga acaphuke kumbe azonde nxa abanye bengamnxusanga ezindlini zabo? (c) Kungani kumele umuntu oke wenza loba yini engabangela ukuthi abe lomkhuhlane othelelwanayo ayehlolwa igazi engakathandani lomunye umuntu? (d) Kungani kumele umuntu olomkhuhlane othelelwanayo atshele umhleli wequla labadala ngesimo sakhe engakabhabhathizwa?

• “Lingabi lesikwelede saloba yini kuloba ngubani ngaphandle kwesikwelede sokuthandana. . . . ‘Kumele uthande umakhelwane wakho ngendlela ozithanda ngayo.’ Umuntu olothando kamenzeli okubi umakhelwane wakhe.”—Rom. 13:8-10.

• “Lingaqakathekisi lokho okufunwa yini kuphela kodwa liqakathekise lalokho okufunwa ngabanye.”—Flp. 2:4.

9. Kungani uJehova efuna sithethelele abanye?

• “Qhubekani libekezelelana futhi lithethelelana ngenhliziyo yonke lanxa umuntu engabe elesizatho sokusola omunye. Njengoba nje uJehova alithethelela ngenhliziyo yonke, lani kufanele lenze njalo.”—Kol. 3:13.

10. Kuyini okumele ukwenze nxa omunye ebandleni angakunyundela kumbe akuqile?

• “Nxa umfowenu angenza isono, hamba uyemvezela icala lakhe libabili kuphela. Angakulalela, usumzuzile umfowenu. Kodwa nxa engakulaleli, hamba lomuntu oyedwa loba ababili, ukuze yonke indaba iqiniswe ngobufakazi obuvela kubofakazi ababili kumbe abathathu. Nxa engabalaleli, khuluma lebandla. Kodwa nxa engalilaleli ngitsho lebandla, kuwe kabe njengomuntu wezizweni lanjengomthelisi.”—Mat. 18:15-17.

11. UJehova uthini ngezono ezilandelayo?

▪ Ukuziphatha kubi kwezemacansini

▪ Ukusebenzisa izithombe ekukhonzeni

▪ Ubutabane

▪ Ubusela

▪ Ukubheja

▪ Ukudakwa

• “Lingadukiswa. Labo abaziphatha kubi kwezemacansini, labakhonza izithombe, labaphingayo, lamadoda avuma ukwenziwa abafazi, lamadoda ayizitabane, lamasela, labayizihwaba, lezidakwa, labathethisayo, kanye labayizigebenga, kabasoze balithole ilifa loMbuso kaNkulunkulu.”—1 Khor. 6:9, 10.

12. Kufanele uzimisele ukwenzani endabeni yokuziphatha kubi kwezemacansini okugoqela loba yisiphi isenzo semacansini lomuntu ongatshadanga laye?

• “Balekelani ukuziphatha okubi kwezemacansini!”—1 Khor. 6:18.

13. Kungani kungamelanga sisebenzise loba yini engaphambanisa indlela ingqondo esebenza ngayo ngaphandle nxa sitshelwe ngudokotela?

• “Linikele imizimba yenu ibe ngumhlatshelo ophilayo, ongcwele njalo owamukelwa nguNkulunkulu, oyinkonzo engcwele eliyenza ngamandla enu okucabanga. Yekelani ukubunjwa ngumumo lo wezinto, kodwa guqulwani lintshintshe indlela elicabanga ngayo ukuze lihlolisise lizibonele intando kaNkulunkulu enhle, eyamukelekayo futhi epheleleyo.”—Rom. 12:1, 2.

14. Yiphi eminye imikhuba yesidimoni engafunwa nguNkulunkulu?

• ‘Akungabi lamuntu phakathi kwenu . . . oyisanuse loba ocasisa ngemibono ocasisa imilingo njalo ophathelene lobuthakathi, ophosayo, loba olamadlozi loba olemimoya loba okhangelele kwabafileyo.’—Dute. 18:10, 11.

15. Nxa umuntu angenza isono esikhulu, kuyini okumele ahle akwenze masinyane ukuze aqhubeke engumngane kaJehova?

• “Ngasengisivuma isono sami kuwe angabe ngisasibekela ububi bami. Ngathi, ‘Ngizazivuma iziphambeko zami kuJehova.’”—Hubo. 32:5.

• “Ukhona yini ogulayo phakathi kwenu? Kabize abadala bebandla njalo kabamthandazele, bamgcobe ngamafutha ebizweni likaJehova. Umthandazo owenziwa ngokholo uzakwenza ogulayo asile futhi uJehova uzamvusa. Kanti njalo nxa enze izono, uzathethelelwa.”—Jak. 5:14, 15.

16. Kumele wenzeni nxa usazi ukuthi umKhristu othile wenze isono esikhulu?

• “Nxa umuntu angona ngenxa yokuthi kakhulumanga ebika ngendaba ethile emphakathini ngokuphathelane lokuthile ayabe ekubonile kumbe ekuzwile, uyabe elomlandu.”—Levi. 5:1.

17. Nxa kungenziwa isaziso sokuthi othile kasenguyeFakazi kaJehova kumele simphathe njani?

• “Liyekele ukuba lobudlelwano laloba ngubani obizwa ngokuthi ngumzalwane yena eziphatha kubi kwezemacansini, kumbe umuntu oyisihwaba kumbe okhonza izithombe kumbe othethisayo kumbe oyisidakwa kumbe oyisigebenga, lingaqali ukudla lomuntu onjalo.”—1 Khor. 5:11.

• “Nxa umuntu angeza kini elemfundiso etshiyene lale, lingamamukeli emizini yenu futhi lingambingeleli.”—2 Joh. 10.

18. Kungani kumele ube labangane abathanda uJehova?

• “Ohamba lezihlakaniphi uyahlakanipha, kodwa othandana leziwula uwela engozini.”—Zaga. 13:20.

• “Lingayengwa. Ukuba lobudlelwano labantu ababi kona imikhuba emihle.”—1 Khor. 15:33.

19. Kungani oFakazi bakaJehova bengangeni kwezombusazwe?

• UJesu wathi: “Kabasibo bomhlaba njengoba nje lami ngingayisuye womhlaba.”—Joh. 17:16.

20. Kungani kumele ulandele imithetho kahulumende?

• “Wonke umuntu kazehlise kuziphathamandla ngoba akulamandla angaveli kuNkulunkulu. Iziphathamandla ezikhona zibekwe nguNkulunkulu ezikhundleni ezitshiyeneyo.”—Rom. 13:1.

21. Kufanele wenzeni nxa umthetho ofakwe ngabantu uphikisana lokaNkulunkulu?

• “Kumele silalele uNkulunkulu umbusi kulokuthi silalele abantu.”—ImiSeb. 5:29.

22. Yiphi imibhalo engakunceda ukuthi ukhethe umsebenzi ongasoze ukwenze ube yingxenye yomhlaba?

• “Isizwe kasiyikuhlomela esinye isizwe ngenkemba, loba zifundele ukulwa impi futhi.”—Mik. 4:3.

• “Phumani kuyo [iBhabhiloni Enkulu] bantu bami nxa lingafuni ukuhlanganyela layo ezonweni zayo futhi lingafuni ukwamukela ezinye zezinhlupho zayo.”—Isam. 18:4.

23. Ngezinjani izinto ongazilibazisa ngazo futhi ngezinjani okumele uzibalekele?

• ‘UJehova uyabazonda labo abathanda udlakela.’—Hubo. 11:5.

• “Yenyanyani okubi, libambelele kokuhle.”—Rom. 12:9.

• “Loba yiziphi izinto eziliqiniso, loba yiziphi izinto eziqakathekileyo, loba yiziphi izinto ezilungileyo, loba yiziphi izinto ezimsulwa, loba yiziphi izinto ezithandekayo, loba yiziphi izinto okukhulunywa kuhle ngazo, loba yiziphi izinto ezinhle, loba yiziphi izinto ezibabazekayo, qhubekani licabanga ngazo.”—Flp. 4:8.

24. Kungani oFakazi bakaJehova bengazihlanganisi lamanye amasonto?

• “Ngeke lidle ‘etafuleni kaJehova’ lasetafuleni yamadimoni.”—1 Khor. 10:21.

• “‘Lehlukane labo,’ kutsho uJehova, ‘njalo yekelani ukuthinta into engcolileyo’; ‘mina ngizalamukela.’”—2 Khor. 6:17.

25. Yiziphi izimiso ezingakunceda nxa ukhetha ukuthi uzahlanganyela yini emkhosini loba edilini elithile?

• ‘[Bazihlanganisa, NWT] labezizwe bathatha imikhuba yazo. Bakhonza izithombe zazo, kwaba yisithiyo kubo.’—Hubo. 106:35, 36.

• “Abafileyo kabazi lutho.”—UmTshu. 9:5.

• “Kabasibo bomhlaba njengoba nje lami ngingayisuye womhlaba.”—Joh. 17:16.

• “Ngesikhathi esedluleyo, laba lesikhathi eseneleyo sokwenza intando yabezizweni, liphatheke ngezenzo zokuxhwala, lezinkanuko ezedlulisa amalawulo, lokunatha kakhulu, lamadili axokozelayo, lemibuthano yokunatha utshwala kanye lokukhonza izithombe okwenyanyekayo.”—1 Phet. 4:3.

26. Yiziphi izibonelo eziseBhayibhilini ezimayelana lokuthakazelela insuku zokuzalwa? Kuyini esikufunda ezibonelweni lezo?

• “Ilanga lesithathu laliyisikhumbuzo sokuzalwa kukaFaro, yikho wenzela izikhulu zakhe idili. Waphakamisa amakhanda elikamphathinkezo omkhulu lelikampheki wezinkwa omkhulu phambi kwezikhulu zakhe: Wabuyisela umphathinkezo esikhundleni sakhe, . . . kodwa walengisa umpheki wezinkwa omkhulu.”—Gen. 40:20-22.

• “Kwathi kuthakazelelwa ilanga lokuzalwa kukaHerodi, indodakazi kaHerodiya yagida phambi kwababemenyiwe, yamthokozisa kakhulu uHerodi, waze wayithembisa efunga ukuthi uzayipha loba kuyini ekucelayo. Yasicela lokho unina ayeyikhuthaze ukuthi ikucele, yathi: ‘Nginika ikhanda likaJohane uMbhabhathizi lisemganwini.’ Ngakho [iNkosi] yathumela ilizwi lokuthi uJohane aqunywe ikhanda ejele.”—Mat. 14:6-8, 10.

27. Kungani kumele ulalele abadala bebandla?

• “Lalelani abakhokhelayo phakathi kwenu, lizehlise kubo ngoba bayalilinda futhi bazalandisa. Lingenza njalo, umsebenzi wabo bazawenza bethokoza hatshi bekhonona ngenxa yokuthi lokhu kungalilimaza.”—Heb. 13:17.

28. Kungani kuqakathekile ukuthi wena lemuli yakho lizinike isikhathi sokubala iBhayibhili nsukuzonke?

• “Ukuthokoza kwakhe kusemthethweni kaJehova, futhi unakana ngomthetho wakhe imini lobusuku. Unjengesihlahla esihlanyelwe emifuleni yamanzi, esithela izithelo zaso ngesikhathi saso, ohlamvu laso kalibuni. Konke akwenzayo kuyaphumelela.”—Hubo. 1:2, 3.

29. Kungani ukuthanda ukungena imihlangano lokuhlanganyela kuyo?

• “Ngizamemezela ibizo lakho kubafowethu; emphakathini ngizakudumisa.”—Hubo. 22:22.

• “Kasicabanganeni ukuze sivuselelane ethandweni lasemisebenzini emihle, singayekeli ukuhlangana ndawonye njengoba abanye belomkhuba wokwenza njalo. Kodwa kasikhuthazaneni, ikakhulu njengoba libona usuku lusondela.”—Heb. 10:24, 25.

30. Yiwuphi umsebenzi oqakatheke kakhulu esiwuphiwe nguJesu?

• “Ngakho-ke hambani liyekwenza abantu bezizwe zonke babe ngabafundi, libabhabhathize . . . , libafundise ukulandela izinto zonke engililaye zona.”—Mat. 28:19, 20.

31. Kuyini okuthokozisa uJehova nxa sinikela ukuze sithuthukise umsebenzi woMbuso njalo sincedisa abafowethu labodadewethu ngalokho abakudingayo?

• “Dumisa uJehova ngemfuyo yakho.”—Zaga. 3:9.

• “Ngamunye wenu kenze lokho akukhethileyo enhliziyweni yakhe, angenzi elensolo loba ebanjwa ngamandla ngoba uNkulunkulu uthanda umuntu opha ethokoza.”—2 Khor. 9:7.

32. AmaKhristu kufanele akhangelele ukuhlangana labuphi ubunzima?

• “Bayathokoza asebeke bahlukuluzwa ngenxa yokwenza okulungileyo, ngoba uMbuso wamazulu ngowabo. Liyathokoza nxa abantu belithethisa, belihlukuluza, njalo bekhuluma ngani yonke imihlobo yezinto ezimbi futhi ezingamanga ngenxa yami. Thabani futhi lijabule kakhulu ngoba umvuzo wenu mkhulu emazulwini. Labaphrofethi bakudala babebahlukuluza njalo.”—Mat. 5:10-12.

33. Kungani kuyisibusiso esikhulu ukuba nguFakazi kaJehova obhabhathiziweyo?

• ‘Amazwi akho aba yintokozo yami lenjabulo yenhliziyo yami, ngoba mina ngibizwa ngebizo lakho, wena Jehova Nkulunkulu.’—Jer. 15:16.

Abantu bajayele ukubhabhathizwa emihlanganweni yeziqinti leyezabelo yaboFakazi bakaJehova. Umzalwane owenza inkulumo yokubhabhathizwa uphetha ngokucela labo abazobhabhathizwa ukuthi basukume baphendule imibuzo emibili elandelayo ngelizwi elizwakalayo:

1. Usuphendukile yini ezonweni zakho, wazinikela kuJehova njalo uyakwamukela yini ukuthi uNkulunkulu usebenzisa uJesu Khristu ukuze asindise abantu?

2. Uyakuzwisisa yini ukuthi ukubhabhathizwa kwakho kutshengisa ukuthi usunguFakazi kaJehova lokuthi usulilunga lenhlanganiso yakhe?

Nxa bangaphendula imibuzo le ngoyebo ozwakalayo bayabe ‘bevuma ebantwini’ ukuthi sebelokholo enhlawulweni kaJesu lokuthi sebezinikele kuJehova. (Rom. 10:9, 10) Labo abafuna ukubhabhathizwa kumele baqale bakhuleke futhi bacabangisise ngemibuzo le kuseselesikhathi ukuze benelise ukuyiphendula ngenhliziyo yonke.

Usuzinikele yini kuJehova ngokukhuleka kuye umthembisa ukuthi uzakhonza yena yedwa lokuthi uzaqakathekisa ukwenza intando yakhe ukwedlula loba yini empilweni yakho?

Uleqiniso yini ukuthi usukulungele ukubhabhathizwa?

Ngezinjani izigqoko okumele umuntu azigqoke nxa ebhabhathizwa? (1 Tim. 2:9, 10; Joh. 15:19; Flp. 1:10)

Kumele sigqoke ngendlela ‘elesithunzi letshengisa ukuthi sizisebenzisa kuhle izingqondo zethu’ ukuze kukhanye ukuthi ‘sizinikele kuNkulunkulu.’ Yikho ababhabhathizwayo akumelanga bagqoke izigqoko ezikhanyiselayo, ezibhaliweyo kumbe ezilama-slogan.

Kufanele bagqoke izigqoko ezifaneleyo, ezihlanzekileyo futhi ezilesithunzi. Kumele uziphathe njani nxa ubhabhathizwa? (Luk. 3:21, 22)

AmaKhristu kumele alandele indlela uJesu enza ngayo ngesikhathi ebhabhathizwa. Wayekwazi ukuthi ukubhabhathizwa yinto eqakatheke kakhulu futhi lokhu wakutshengisa ngendlela enza ngayo. Yikho nxa ubhabhathizwa, ungenzi loba yini ezakwenza kukhanye angani awusiqakathekisi isenzakalo leso njengokudlala kumbe ukubhukutsha. Kanti njalo akumelanga wenze njengomuntu osenqobe emncintiswaneni othile. Lanxa ilanga lokubhabhathizwa liqakatheke kakhulu kuwe, kumele uthabe ngendlela etshengisa inhlonipho.

Ukungena imihlangano lokuhlanganyela kuyo kuzakunceda njani ukuthi uhlale uzinikele kuJehova?

Kungani kuqakathekile ukuthi uqhubeke ulohlelo lokubala iBhayibhili uwedwa lokuthi ukhuthale ekutshumayeleni lanxa usubhabhathiziwe?