Indaba eqakatheke kakhulu okukhulunywa ngayo eBhayibhilini imayelana loMbuso kaNkulunkulu. UMbuso lo yiwo ozasetshenziswa nguJehova ukuthi enze umhlaba wonke ube lipharadayisi njengoba wayehlosile ekuqaliseni. Uyini uMbuso kaNkulunkulu? Sikwazi njani ukuthi usuqalisile ukubusa? Kuyini osekwenziwe nguMbuso kaNkulunkulu njalo uzakwenzani esikhathini esizayo? Sizaphendula imibuzo le esifundweni lesi lakwezimbili ezilandelayo.

1. Uyini uMbuso kaNkulunkulu futhi ngubani iNkosi yawo?

UMbuso lo nguhulumende osezulwini owabekwa nguJehova uNkulunkulu futhi iNkosi yawo nguJesu Khristu. (UMathewu 4:17; UJohane 18:36) IBhayibhili lithi uJesu ‘uzakuba yiNkosi kuze kube nini lanini.’ (ULukha 1:32, 33) Njengoba uJesu eyiNkosi yoMbuso kaNkulunkulu, uzabusa bonke abantu emhlabeni.

2. Ngobani abazabusa loJesu?

Kulabanye abazabusa loJesu. “Abantu abavela kuzo zonke izizwana, lezindimi, lemihlobo yabantu kanye lezizwe . . . bazakuba ngamakhosi babuse umhlaba.” (ISambulo 5:9, 10) Bangaki abazabusa loJesu? Lamuhla kulamamiliyoni abantu abangamaKhristu kodwa abangu-144 000 yibo kuphela abazabusa loJesu besezulwini. (Bala iSambulo 14:1-4.) Wonke amanye amaKhristu azaphila emhlabeni ebuswa nguMbuso lo.—IHubo 37:29.

3. Kuyini okwenza uMbuso kaNkulunkulu ubengcono kulemibuso yabantu?

Lanxa ababusi bomhlaba bengafisa ukwenza izinto ezinhle, abalawo amandla okwenza konke abakufisayo. Ikanti abanye ababusi baqakathekisa okufunwa yibo ukwedlula ukuncedisa abanye abantu. Imibuso yabantu iyatshiyelwana kodwa uMbuso kaNkulunkulu uzabusa kuze kube nini lanini. UNkulunkulu “uzabeka umbuso ongasoze utshabalaliswe.” (UDanyeli 2:44) UJesu uzabusa umhlaba wonke futhi kasoze abandlulule muntu. Phela ulothando lomusa futhi wahlulela kuhle. Yikho uzafundisa labantu ukuthi labo babe lothando, lomusa njalo bahlulele kuhle.—Bala u-Isaya 11:9.

4. Umhlaba wonke uzabuswa nguhulumende olamandla

UJesu Khristu nguMbusi olamandla ukwedlula loba nguphi umbusi owake wabakhona. Bala uMathewu 28:18 beselixoxa ngombuzo lo:

• Kuyini okwenza uJesu abe nguMbusi ongcono kulabanye ababusi?

Imibuso yabantu iyatshiyelwana futhi umbusi ngamunye ubusa indawo encane. UMbuso kaNkulunkulu wona ke? Bala uDanyeli 7:14 beselixoxa ngemibuzo elandelayo:

• Kungani kuyizindaba ezinhle ukuthi uMbuso kaNkulunkulu “kawusoze utshabalaliswe”?

• Kungani kuyizindaba ezinhle ukuthi uMbuso lo uzabusa umhlaba wonke?

5. Ukubusa kwabantu kuzaphela

Kungani kumele uMbuso kaNkulunkulu utshabalalise imibuso yabantu? Bukelani IVIDIYO beselixoxa ngemibuzo elandelayo.

IVIDIYO: Uyini UMbuso KaNkulunkulu?—Isiqephu (1:41)

• Ukubusa kwabantu kubangeleni?

Bala umTshumayeli 8:9 beselixoxa ngemibuzo le:

• Ubona angani kuqondile yini ukuthi uMbuso kaNkulunkulu utshabalalise imibuso yabantu? Kungani usitsho njalo?

6. UMbuso kaNkulunkulu ulababusi abalendaba lathi

INkosi yethu uJesu ‘iyasizwela ebuthakathakeni bethu’ ngoba yake yaphila lapha emhlabeni. (KumaHebheru 4:15) Amadoda labesifazana abangu-144 000 abazabusa loJesu bakhethwe nguJehova “kuzo zonke izizwana, lezindimi, lemihlobo yabantu kanye lezizwe.”—ISambulo 5:9.

• Uzwa njani ngokuthi uJesu lalabo abazabusa laye bayazizwisisa inhlupho zethu? Kungani usitsho njalo?

7. UMbuso kaNkulunkulu ulemithetho emihle kakhulu

Ohulumende bayafaka imithetho ukuze bavikele abantu. UMbuso kaNkulunkulu lawo ulemithetho enceda labo abayilalelayo. Bala u-1 Khorinte 6:9-11 beselixoxa ngemibuzo le:

• Ubona angani bekuzabe kunjani emhlabeni aluba wonke umuntu ulandela imithetho kaNkulunkulu?a

• Ucabanga ukuthi labo abafuna ukubuswa nguMbuso kaNkulunkulu kumele bayilalele yini imithetho abanika yona? Kungani usitsho njalo?

• Kuyini okutshengisa ukuthi labo abangalaleli imithetho kaNkulunkulu bangatshintsha?—Khangela ivesi 11.

ISIFINQO

UMbuso kaNkulunkulu nguhulumende osezulwini ozabusa umhlaba wonke.

Ufundeni?

• Ngobani abazabusa eMbusweni kaNkulunkulu?

• Kuyini okwenza uMbuso kaNkulunkulu ubengcono kulemibuso yabantu?

• Abafuna ukubuswa nguMbuso kaNkulunkulu kumele benzeni?

THOLA OKUNENGI

Bala isihloko lesi uzwe ukuthi uJesu wathi uMbuso kaNkulunkulu ungaphi.

“UMbuso KaNkulunkulu Yinto Esenhliziyweni Yakho Yini?” (Isihloko esikuwebhusayithi yethu)

Kungani oFakazi bakaJehova bekhetha uMbuso kaNkulunkulu hatshi imibuso yabantu?

Sikhetha Ukusekela UMbuso KaNkulunkulu (1:43)

Zwana ukuthi iBhayibhili lithini ngabangu-144 000 abakhethwe nguJehova ukuthi bayebusa loJesu.

“Ngobani Abazakuyaphila Ezulwini?” (Isihloko esikuwebhusayithi yethu)

Bala isihloko lesi uzwe ukuthi kuyini okwenza omunye umama owayesejele wangathandabuzi ukuthi nguNkulunkulu kuphela ozalungisa izinto emhlabeni.

“Sengikwazi Ukuthi Ngubani Ozaqeda Ukuphathwa Kubi Kwabantu” (Vukani!, November 2011)

UMbuso kaNkulunkulu waqalisa ukubusa ezulwini ngo-1914 futhi ngalowo mnyaka kwaqalisa insuku zokucina. Sikwazi njani lokhu? Ake siqathanise iziphrofetho eziseBhayibhilini lendlela abantu abenza ngayo kanye lalokho obekusenzakala kusukela ngo-1914.

1. Iziphrofetho eziseBhayibhilini zitshengisani?

Ibhuku likaDanyeli lilesiphrofetho esitshengisa ukuthi uMbuso kaNkulunkulu wawuzaqalisa ukubusa ngemva kwesikhathi esibizwa ngokuthi ‘yizikhathi eziyisikhombisa.’ (UDanyeli 4:16, 17) UJesu laye wakhuluma ngesikhathi esifananayo wathi ‘yizikhathi ezibekiweyo zabezizwe’ lokuthi zazingakapheli ngalesosikhathi. (ULukha 21:24) Esifundweni lesi uzabona ukuthi izikhathi eziyisikhombisa zaphela ngo-1914.

2. Bekusenzakalani kusukela ngo-1914?

Abafundi bakaJesu bambuza bathi: “Sizakuba yini isibonakaliso sokuba khona kwakho lesesiphetho somumo lo wezinto?” (UMathewu 24:3) UJesu wabatshela izinto ezinengi ezazizatshengisa ukuthi useyiNkosi yoMbuso kaNkulunkulu. Wathi kwakuzakuba lezimpi, ukuswelakala kokudla, ukuzamazama komhlaba lokunye okunengi. (Bala uMathewu 24:7.) IBhayibhili liphinda lithi indlela abantu abenza ngayo yayizakwenza ‘insuku zokucina’ zibe nzima “ukuphila kuzo.” (2 KuThimothi 3:1-5) Izinto zonke lezi zaqalisa ukwenzakala kakhulu kusukela ngo-1914.

3. Kuyini okwenze izinto zaba nzima emhlabeni selokhu kwabekwa uMbuso kaNkulunkulu?

Kwaba lempi ezulwini ngesikhathi uJesu esanda kuba yiNkosi yoMbuso kaNkulunkulu. Impi le yayiphakathi kukaJesu loSathane lamadimoni akhe futhi uSathane wanqotshwa. IBhayibhili lithi: “Waphoselwa phansi emhlabeni, lezingilosi zakhe zaphoselwa phansi kanye laye.” (ISambulo 12:9, 10, 12) USathane uzonde uyafa ngoba uyakwazi ukuthi uzabhujiswa. Lokhu kwenza sizwisise ukuthi yindaba ebangela ukuhlupheka futhi esenza izinto zibe nzima emhlabeni. Kodwa kuyaduduza ukwazi ukuthi uMbuso kaNkulunkulu uzakuqeda du konke ukuhlupheka.

GEBHA UJULE

4. Iziphrofetho eziseBhayibhilini zitshengisa ukuthi uMbuso kaNkulunkulu waqalisa ukubusa ngo-1914

IVIDIYO: UMbuso KaNkulunkulu Waqalisa Ukubusa Ngo-1914 (5:02)

UNkulunkulu wenza ukuthi uNebhukhadinezari inkosi yaseBhabhiloni ibe lephupho eliyisiphrofetho. Iphupho lelo kanye lengcazelo kaDanyeli kutshengisa ukuthi isiphrofetho leso sasizagcwaliseka embusweni kaNebhukhadinezari laseMbusweni kaNkulunkulu.—Bala uDanyeli 4:17.a

Bala uDanyeli 4:20-26 beselisebenzisa itshathi ukuze lixoxe ngemibuzo elandelayo:

• (A) UNebhukhadinezari wabonani ephutsheni lakhe?—Khangela ivesi 20 lo-21.

• (B) Isihlahla asibonayo sasizakwenziwani?—Khangela ivesi 23.

• (C) Kwakuzakwenzakalani ekupheleni ‘kwezikhathi eziyisikhombisa’?—Khangela ivesi 26.

Iphupho Elimayelana Lesihlahla Lingenelana Njani LoMbuso KaNkulunkulu?

ISIPHROFETHO (UDanyeli 4:20-36)

Ukubusa

(A) Isihlahla esikhulu

Ubukhosi buyaphela

(B) ‘Gamulani isihlahla siwele phansi’ “kuze kudlule izikhathi eziyisikhombisa”

Ubukhosi buyabiselwa

(C) “Umbuso wakho uzaphinda ube ngowakho”

Ekugcwalisekeni kokuqala kwesiphrofetho lesi . . .

• (D) Isihlahla sasimela bani?—Khangela ivesi 22.

• (E) Wama nini ukubusa?—Bala uDanyeli 4:29-33.

• (F) Kwenzakalani kuNebhukhadinezari ngemva ‘kweminyaka eyisikhombisa’?—Bala uDanyeli 4:34-36.

UKUGCWALISEKA KOKUQALA

Ukubusa

(D) UNebhukhadinezari Inkosi yeBhabhiloni

Ubukhosi buyaphela

(E) Ngemva kuka-606 B.C.E., uNebhukhadinezari waqalisa ukuhlanya yikho wama ukubusa okweminyaka eyisikhombisa

Ubukhosi buyabiselwa

(F) Ingqondo kaNebhukhadinezari yaphenduka waseqalisa futhi ukubusa

Ekugcwalisekeni kwesibili kwesiphrofetho lesi . . .

• (G) Isihlahla sasimela obani?—Bala u-1 ImiLando 29:23.

• (H) Bama nini ukubusa? Sikwazi njani ukuthi babelokhu bengabusi ngesikhathi uJesu esemhlabeni?—Bala uLukha 21:24.

• (I) Ukubusa lokhu kwaphinda kwaqalisa nini futhi ngaphi?

UKUGCWALISEKA KWESIBILI

Ukubusa

(G) Amakhosi ako-Israyeli ayemela ukubusa kukaNkulunkulu

Ubukhosi buyaphela

(H) Ukubhujiswa kweJerusalema kumisa ukubusa kwamakhosi ako-Israyeli okweminyaka engu-2 520

Ubukhosi buyabiselwa

(I) UJesu uqalisa ukubusa ezulwini eseyiNkosi yoMbuso kaNkulunkulu

5. Izinto zitshintshe kakhulu emhlabeni kusukela ngo-1914

Bukelani IVIDIYO.

IVIDIYO: Izinto Zitshintshe Kakhulu Emhlabeni Kusukela Ngo-1914 (1:10)

UJesu wakhuluma ngokwakuzakwenzakala eseyiNkosi yoMbuso kaNkulunkulu. Bala uLukha 21:9-11 beselixoxa ngombuzo lo:

• Uyake uzibone zisenzakala yini izinto lezi kumbe uzwe ngazo?

Umphostoli uPhawuli wakhuluma ngokuthi abantu bazabe benjani ngensuku zokucina. Bala u-2 Thimothi 3:1-5 beselixoxa ngombuzo olandelayo:

• Uyake ubabone yini abantu okukhulunywa ngabo lapha?

6. Esingakwenza ukuze sitshengise ukuthi uMbuso kaNkulunkulu uyabusa

Bala uMathewu 24:3, 14 beselixoxa ngemibuzo le:

• Yiwuphi umsebenzi owenziwayo otshengisa ukuthi uMbuso kaNkulunkulu usubusa?

• Ubona angani ungenzani ukuze wenelise ukuncedisa emsebenzini lo?

UMbuso kaNkulunkulu uyabusa futhi sekuseduze ukuthi uqede zonke inhlupho ezisemhlabeni. Bala uHebheru 10:24, 25, beselixoxa ngombuzo olandelayo:

• Kumele senzeni njengoba ‘sibona usuku lusondela’?

ISIFINQO

Iziphrofetho eziseBhayibhilini lezinto ezenzakalayo emhlabeni zitshengisa ukuthi uMbuso kaNkulunkulu uyabusa. Nxa singatshela abanye ngawo njalo singene imihlangano yebandla siyabe sitshengisa ukuthi siyakholwa ukuthi uMbuso usubusa.

Ufundeni?

• Kwenzakalani ngemva kweminyaka eyisikhombisa okukhulunywa ngayo ebhukwini likaDanyeli?

• Kuyini okwenza ungathandabuzi ukuthi uMbuso kaNkulunkulu waqalisa ukubusa ngo-1914?

• Ungatshengisa njani ukuthi uyakholwa ukuthi uMbuso kaNkulunkulu uyabusa?

THOLA OKUNENGI

Bala isihloko lesi uzwe ukuthi abezembali kanye labanye bathini ngezinto ebezisenzakala emhlabeni kusukela ngo-1914.

“Ukutshintsha Kwendlela Abantu Abaziphatha Ngayo” (Vukani!, April 2007)

Bala isihloko lesi uzwe ukuthi isiphrofetho esikuMathewu 24:14 sayitshintsha njani impilo yeyinye indoda.

“Ngangiyithanda Kakhulu I-Baseball” (INqabayokulinda No. 3 2017)

Bala isihloko lesi uzwe ukuthi sikwazi njani ukuthi isiphrofetho esikuDanyeli isahluko 4 sikhuluma ngoMbuso kaNkulunkulu.

“UMbuso KaNkulunkulu Waqalisa Nini Ukubusa? (Ingxenye 1)” (INqabayokulinda, October 1, 2014)

Bala isihloko lesi uzwe ukuthi kuyini okutshengisa ukuthi “iminyaka eyisikhombisa” okukhulunywa ngayo kuDanyeli isahluko 4 yaphela ngo-1914.

“UMbuso KaNkulunkulu Waqalisa Nini Ukubusa? (Ingxenye 2)” (INqabayokulinda, November 1, 2014)

UMbuso kaNkulunkulu uyabusa futhi sekuseduze ukuthi utshintshe izinto emhlabeni. Ake sixoxe ngokunye okuhle okuzakwenziwa nguMbuso kaNkulunkulu.

1. Kuyini okuzakwenza kube lokuthula lokulunga emhlabeni?

UJesu oyiNkosi yoMbuso kaNkulunkulu uzabhubhisa abantu ababi kanye labohulumende babantu empini ye-Amagedoni. (ISambulo 16:14, 16) Ngalesosikhathi kuzagcwaliseka isithembiso esiseBhayibhilini esithi: “Sekusele isikhathi esincane nje ukuthi ababi babe bengasekho.” (IHubo 37:10) UJesu uzasebenzisa uMbuso kaNkulunkulu ukuze alethe ukuthula lokulunga emhlabeni wonke.—Bala u-Isaya 11:4.

2. Izabe isinjani impilo nxa intando kaNkulunkulu isisenziwa emhlabeni?

Nxa uMbuso kaNkulunkulu usubusa, “abalungileyo bazakudla ilifa lomhlaba, bahlale kuwo kuze kube nini lanini.” (IHubo 37:29) Ubona angani impilo izabe isinjani emhlabeni nxa sokulabantu abalungileyo bodwa, abathandanayo futhi abathanda uJehova? Kuyabe kungaselamuntu ogulayo njalo bonke abantu bazaphila kuze kube nini lanini. Akuthandabuzwa ukuthi izabe imnandi impilo enjalo!

3. UMbuso kaNkulunkulu uzakwenzani ngemva kokubhubhisa abantu ababi?

Ngemva kokubhubhisa abantu ababi, uJesu uzabusa okweminyaka engu-1 000. Ngalesosikhathi yena labangu-144 000 azabusa labo bazasusa isono ebantwini. Kanti njalo umhlaba wonke uzatshintshwa ube lipharadayisi elilabantu abathokozayo futhi abalalela imithetho kaJehova. Nxa iminyaka engu-1 000 isiphelile, uJesu uzabisela uMbuso kuYise uJehova. Ibizo likaJehova lizabe ‘selingcweliswe’ ngendlela elingakaze lingcweliswe ngayo. (UMathewu 6:9, 10) Kuyabe sekusegcekeni ukuthi uJehova ubusa kuhle kakhulu lokuthi ulendaba labantu. Ngemva kwalokho uJehova uzabhubhisa uSathane lamadimoni akhe kanye lalabo abazavukela ubukhosi bakhe. (ISambulo 20:7-10) Lonke utshintsho oluzalethwa nguMbuso kaNkulunkulu luzahlala kuze kube nini lanini.

GEBHA UJULE

4. UMbuso kaNkulunkulu uzatshabalalisa yonke imibuso yabantu

“Nxa umuntu ebuswa ngomunye umuntu uyalimala.” (UmTshumayeli 8:9) UJehova uzasebenzisa uMbuso wakhe ukuthi alungise wonke umonakalo obangelwe yimibuso yabantu.

Bala uDanyeli 2:44 lo-2 Thesalonika 1:6-8 beselixoxa ngemibuzo le:

• UJehova leNdodana yakhe uJesu bazakwenzani ngemibuso yabantu kanye lalabo abayisekelayo?

• Kuyini okwenza ungathandabuzi ukuthi uJehova loJesu bazakwahlulela ngendlela eqondileyo?

5. UJesu ukufanele ukuba yiNkosi

UJesu ukufanele ukuba yiNkosi yoMbuso kaNkulunkulu njalo uzanceda abantu ngendlela ezitshiyeneyo. Bukelani IVIDIYO ukuze ubone ukuthi uJesu utshengise njani ukuthi uyafuna ukunceda abantu lokuthi uNkulunkulu umnike amandla okwenza njalo.

IVIDIYO: UJesu Watshengisa Lokho UMbuso Ozakwenzela Abantu (1:13)

Ngesikhathi esemhlabeni, uJesu wenza izimangaliso ezaziyinzwisa yalokho uMbuso ozakwenzela abantu. Wena yikuphi okulindele ngabomvu? Emavesini alandelayo bala lawo olindele ukuwabona egcwaliseka.

6. UMbuso kaNkulunkulu uzakwenza abantu bathokoze kuze kube nini lanini

IVIDIYO: Inzwisa Yokuthi Impilo Izabe Isinjani Emhlabeni Omutsha (4:38)

Bala iHubo 145:16 beselixoxa ngombuzo lo:

• Uzwa njani ngokuthi uJehova ‘uzasuthisa izifiso zakho konke okuphilayo’?

ISIFINQO

UMbuso kaNkulunkulu uzakwenza ukuthi injongo yakhe igcwaliseke. Uzatshintsha umhlaba ube lipharadayisi elilabantu abalungileyo futhi abazakhonza uJehova kuze kube nini lanini.

Ufundeni?

• UMbuso kaNkulunkulu uzalingcwelisa njani ibizo likaJehova?

• Kuyini okwenza singathandabuzi ukuthi uMbuso kaNkulunkulu uzagcwalisa zonke izithembiso eziseBhayibhilini?

• Kuzo zonke izinto ezizakwenziwa nguMbuso kaNkulunkulu, kuyini okulindele ngabomvu?

THOLA OKUNENGI

Bala isihloko lesi uzwe ukuthi kuyini i-Amagedoni.

“Kuyini I-Amagedoni?” (Isihloko esikuwebhusayithi yethu)

Bala uzwe ukuthi kuzakwenzakalani ngesikhathi ‘sokuhlupheka okukhulu’ uJesu akhuluma ngakho kuMathewu 24:21.

“Kuyini Ukuhlupheka Okukhulu?” (Isihloko esikuwebhusayithi yethu)

Bukela ividiyo le ubone ukuthi izimuli zingenzani ukuze zicabangisise ngalokho esizakwenzelwa nguMbuso kaNkulunkulu.

Zibone UsusePharadayisi (1:50)

Bala isihloko esithi “Ngangilemibuzo Eminengi” uzwe okwanceda eyinye indoda eyayithanda ezombusazwe lodlakela.

“IBhayibhili Liyamntshintsha Umuntu” (INqabayokulinda, January 1, 2012)