ISIFUNDO 38
Qakathekisa Isipho Sokuphila
Zinengi izinto esizikholisayo ngenxa yokuthi siyaphila lanxa nje ngezinye izikhathi siyake sehlelwe zinhlupho. Kodwa kungani kumele sikuqakathekise ukuphila? Singatshengisa njani ukuthi siyasiqakathekisa isipho sokuphila?
1. Kungani kumele sikuqakathekise ukuphila?
Kumele siyiqakathekise impilo ngoba iyisipho esisiphiwe nguJehova, uBaba wethu osithandayo. ‘Nguye osinika ukuphila’ ngoba nguye owadala zonke izinto eziphilayo. (IHubo 36:9) “Nguye onika abantu bonke ukuphila lokuphefumula lazo zonke izinto.” (ImiSebenzi 17:25, 28) UJehova usipha konke esikudingayo ukuze siqhubeke siphila futhi zonke izinto asinika zona zenza siyikholise impilo.—Bala imiSebenzi 14:17.
2. Singamtshengisa njani uJehova ukuthi siyambonga ngesipho sokuphila asinike sona?
UJehova wahle wabakwazi ngesikhathi usesibelethweni. Eyinye inceku yakhe okuthiwa nguDavida yathandaza yathi: “Amehlo akho angibona ngiqalisa ukubunjwa esiswini sikamama.” (IHubo 139:16) UJehova uyayiqakathekisa kakhulu impilo yakho. (Bala uMathewu 10:29-31.) Kumzwisa ubuhlungu kakhulu ukubona abantu bezibulala kumbe bebulala abanye ngabomo.a (U-Eksodusi 20:13) Okunye okumzwisa ubuhlungu yikusibona sifaka impilo zethu kumbe ezabanye engozini. Nxa singenza konke esenelisa ukukwenza ukuze sizivikele njalo sivikele labanye, siyabe sitshengisa ukuthi siyasiqakathekisa isipho sokuphila.
GEBHA UJULE
Engxenyeni le uzafunda ngezinye indlela ongatshengisa ngazo ukuthi uyasiqakathekisa isipho sokuphila.
3. Qakathekisa ukuba lempilakahle
Wonke umuntu ozinikela ukuba ngumKhristu weqiniso uyabe ethembisa uJehova ukuthi uzamkhonza okwempilo yakhe yonke. Phela amaKhristu akhangelelwe ukuthi anikele imizimba yawo njengemihlatshelo engcwele, yikho kumele aqakathekise impilo alayo. Bala uRoma 12:1, 2 beselixoxa ngemibuzo le:
Kungani kumele uqakathekise ukuba lempilakahle?
Ungakwenza njani lokhu?
4. Zivikele njalo uvikele labanye
IBhayibhili lisikhuthaza ukuthi sixwaye loba yini engasilimaza kumbe ilimaze abanye abantu. Bukelani IVIDIYO ukuze ubone okunye ongakwenza ukuze uvikeleke.
Bala iZaga 22:3 beselixoxa ngokuthi ungenzani ukuze wena labanye livikeleke nxa . . .
lingekhaya.
lisemsebenzini.
lidlala imidlalo.
utshayela kumbe ugade imota etshayelwa ngomunye umuntu.
5. Qakathekisa impilo yomntwana ongakazalwa
UDavida wasebenzisa amazwi ahlabusayo ukuze atshengise ukuthi uJehova uyayiqakathekisa impilo yomntwana ongakazalwa. Bala iHubo 139:13-17 beselixoxa ngombuzo olandelayo:
Ngendlela uJehova abona ngayo, impilo yomuntu iqala ngesikhathi esiba khona esibelethweni sikanina yini kumbe ngesikhathi ezalwa?
UJehova wanika ama-Israyeli imithetho eyayivikela omama abazithweleyo. Bala u-Eksodusi 21:22, 23 beselixoxa ngemibuzo le:
UJehova wathi kumele kwenziweni emuntwini owayebulele umntwana ongakazalwa ngengozi?
Ubona angani uJehova wayesizwa njani nxa umuntu ekwenze ngabomo lokho?b
Wena uthini ngendlela uNkulunkulu abona ngayo impilo yomntwana ongakazalwa?
Lanxa umama ozithweleyo engabe eyiqakathekisa impilo, kwesinye isikhathi angabona angani akula angakwenza ngaphandle kokukhipha isisu. Bala u-Isaya 41:10 beselixoxa ngemibuzo le:
Ngubani ongancedisa owesifazana ozithweleyo nxa abanye bembamba ngamandla ukuthi akhiphe isisu? Kungani usitsho njalo?
ABANYE BATHI: “Owesifazana ozithweleyo ukhululekile ukuzikhethela ukuthi uyafuna yini ukukhipha isisu loba hatshi.”
Kuyini okwenza ungathandabuzi ukuthi uJehova uyayiqakathekisa impilo kamama ozithweleyo leyomntwana ongakazalwa?
ISIFINQO
IBhayibhili lisikhuthaza ukuthi siqakathekise impilo yethu leyabanye abantu njalo siyivikele ngoba iyisipho esivela kuJehova.
Ufundeni?
Kungani uJehova eqakathekisa ukuphila kwabantu?
UJehova uzwa njani nxa ebona abantu bezibulala kumbe bebulala abanye ngabomo?
Ungenzani ukuze utshengise ukuthi uyasiqakathekisa isipho sokuphila?
THOLA OKUNENGI
Bukela ividiyo le uzwe ukuthi singatshengisa njani ukuthi siyambonga uJehova ngesipho sokuphila.
Bala isihloko lesi uzwe impendulo yombuzo othi, UNkulunkulu angamthethelela yini umuntu owake wakhipha isisu?
“IBhayibhili Lithini Ngokukhipha Isisu?” (Isihloko esikuwebhusayithi yethu)
Bala isihloko lesi ubone ukuthi ukuqakathekisa impilo njengoNkulunkulu kungasinceda njani ukuthi sikhethe kuhle imidlalo esiyidlalayo.
“Kumele Siyidlale Yini Imidlalo Eyingozi?” (Vukani!, October 8, 2000)
Bala isihloko lesi uzwe ukuthi iBhayibhili lingamnceda yini umuntu ohlutshwa yimicabango yokufuna ukuzibulala.
a UJehova useduze kakhulu lalabo abadabukileyo enhliziyweni. (IHubo 34:18) Uyazwisisa ukuthi obunye ubuhlungu benza abanye abantu bafune ukuzibulala njalo uyafisa lokubancedisa abantu abanjalo. Ukuze ubone ukuthi ubancedisa njani, bala isihloko esithi “IBhayibhili Lingakunceda Yini Ukuthi Utshiye Imicabango Yokufuna Ukuzibulala?” esisengxenyeni ethi Thola Okunengi esifundweni lesi.
b Umuntu owake wakhipha isisu akumelanga azithonisise kakhulu ngoba uJehova uzimisele ukumthethelela. Ukuze uthole okunengi ngendaba le, bala isihloko esithi “IBhayibhili Lithini Ngokukhipha Isisu?” esisengxenyeni ethi Thola Okunengi esifundweni lesi.