IMIBUZO YEBHAYIBHILI IYAPHENDULWA

Kuyini okungenza abantu abatshadileyo bathokoze?

Iseluleko esiseBhayibhilini mayelana lokuthi abatshadileyo bangayithola njani intokozo siyasebenza ngoba sivela kulowo owasungula umtshado, uJehova uNkulunkulu. Sisifundisa ukuthi sibe lezimpawu zobuntu ezingenza abatshadileyo bathokoze, siphinde sisixwayise ngokuziphatha okungadiliza umtshado. Kanti njalo sisifundisa lezindlela zokukhulumisana ezingangezelela intokozo kwabatshadileyo.​—Bala uKholose 3:8-10, 12-14.

Amadoda labomkabo kumele baphathane kuhle njalo ngenhlonipho. Nxa bobabili abatshadileyo bengalandela lokho uNkulunkulu athi bakwenze, bangathokoza.​—Bala uKholose 3:18, 19.

Kuyini okwenza umtshado ungadiliki?

Abantu abatshadileyo bangahlala ndawonye nxa bethandana. UNkulunkulu uyasifundisa ukuthanda. Yena leNdodana yakhe, bayizibonelo ezipheleleyo zokuba lothando lokuzinikela.​—Bala u-1 Johane 4:7, 8, 19.

Nxa amadoda labomkabo bekuhlonipha ukuthi umtshado luhlelo lukaNkulunkulu, bazahlala ndawonye. UNkulunkulu wenza ukuthi umtshado ube yisibopho esingapheliyo phakathi kwendoda lomkayo ukuze avikele izimuli. Kuyenzeka ukuthi umtshado ungadiliki ngoba uNkulunkulu wenza ukuthi amadoda labesifazana bafanelane njalo banakekelane. Kanti njalo wabenza ngomfanekiso wakhe, belekhono lokulingisela uthando lwakhe.​—Bala uGenesisi 1:27; 2:18, 24.