Kungani Kumele Ulibale iBhayibhili?

IBhayibhili libhuku elijayelekileyo kakhulu ukwedlula wonke emhlabeni. Ngenxa yani? Esinye isizatho ngesokuthi kulula ukulizwisisa. Lilezindaba eziliqiniso mayelana labantu abake baphila sibili kanye lobudlelwano babo njalo lendlela ababekhulumisana ngayo loNkulunkulu. Izindaba lezi zilezifundo ezisebenzayo ezibhalwe ngamabala alula njalo azwisisekayo angahunyutshelwa ezindimini ezingamakhulu. Zingazwisiswa ngabantu abahlala kuloba yiphi indawo kumbe abaphila kuloba yisiphi isikhathi. Kanti njalo izimiso zeBhayibhili ziyasebenza sonke isikhathi.

Okuqakatheke kakhulu yikuthi iBhayibhili liyasitshela ukuthi lona kayisilo bhuku nje elikhuluma ngoNkulunkulu kuphela, kodwa libhuku elivela kuye. Liveza ibizo likaNkulunkulu, ubuntu bakhe kanye lenjongo yakhe engantshintshiyo kusukela edala umhlaba labantu. Okunye okulandiswa liBhayibhili yimpi eyaqalisa kudala phakathi kokulunga lobubi: indaba evusa usinga yomhlaba wonke ezakuba lesiphetho esithokozisayo. Yikho-ke, ukubala iBhayibhili ulesifiso sokufunda iqiniso kuzakwenza ukuthi ube lokholo oluqinileyo kanye lethemba.

Esikuthola eBhayibhilini asingeke sikuthole loba ngaphi. Ngokwesibonelo iBhayibhili lisitshela iqiniso ngezindaba ezinjengalezi:

• Lapho esavela khona lokuthi kungani sihlupheka

• Lokho uNkulunkulu akwenzayo ukuze akhulule abantu

• Esakwenzelwa nguJesu

• Ikusasa labantu lelomhlaba

Kungaba kuhle kakhulu ukuthi ubale izihloko ezilandelayo ubusubona ukuthi iBhayibhili limumetheni.