“Sesimfumene uMesiya”!

Eminyakeni engaba ngamakhulu amane ngemva kokubhalwa kwengxenye yokucina yemibhalo yesiHebheru, isiphrofetho sikaMika mayelana loMesiya sagcwaliseka: UJesu wazalelwa eBhethilehema. Ngemva kweminyaka engaba ngu-30 eyalandelayo ngo-29 C.E., ingxenye yokuqala yesiphrofetho sikaDanyeli mayelana lokuza kukaMesiya yagcwaliseka. UJesu wabhaphathizwa njalo uNkulunkulu wamgcoba ngomoya ongcwele. Ngesikhathi esiyiso, iNzalo yayisifikile, uMesiya owayelindelwe okwesikhathi eside!

Khonapho nje uJesu wahle wayiqalisa inkonzo yakhe, “ememezela izindaba ezinhle zombuso kaNkulunkulu.” (ULukha 8:1) Njengoba kwakuphrofethiwe, uJesu wayelomusa futhi emnene njalo wayebakhathalela kakhulu abanye. Ukufundisa kwakhe kwakusebenza njalo kubonisa uthando futhi welapha ‘yonke imikhuhlane’ etshengisa ukuthi wayencediswa nguNkulunkulu. (UMathewu 4:23) Abantu abadala labancane bathululeka besiza kuJesu njalo bathi bembona bathi: “Sesimfumene uMesiya”!​—UJohane 1:41.

UJesu wabikezela ukuthi uMbuso wakhe ungakabusi ngokugcweleyo emhlabeni kwakuzaba lezimpi, ukuzamazama komhlaba kanye lezinye izinhlupho. Yikho wakhuthaza bonke abantu ukuthi ‘balinde.’​—UMakho 13:⁠37.

UJesu wayeyindoda epheleleyo futhi wayelalela uNkulunkulu ngaso sonke isikhathi kodwa wayelezitha ezacina zimbulalisile. Yikho-ke ukufa kwakhe kwasinika umhlatshelo opheleleyo ukuze athenge lokho okwakulahlwe ngu-Adamu lo-Eva, okutsho ithemba lokuphila okungapheliyo ePharadayisi.

Ukufa kukaJesu kwagcwalisa isiphrofetho, njengoba kwaba njalo langokuvuswa kwakhe nguNkulunkulu eseyisidalwa somoya esilamandla ngemva kwamalanga amathathu. Ngemva kwalokho uJesu wabonakala kubafundi bakhe abedlula i-500. Engakenyukeli ezulwini, uJesu walaya abalandeli bakhe ukuthi bahambise izindaba ezinhle ezaziphathelane laye kanye loMbuso wakhe ebantwini ‘bezizwe zonke.’ (UMathewu 28:19) Bawenza kangakanani umsebenzi lo?

​—Isekelwe kuMathewu, uMakho, uLukha, uJohane, lo-1 Khorinte.