Zimisele Ukwenza Imihlatshelo Ngenxa Yombuso

1. Yikuphi ukuzinikela okwenziwa ngabanengi njalo kungani bezinikela?

ABANTU bayazinikela ngokuthanda kwabo ukuze benze izinto abaziqakathekisayo. Abazali banikela ngesikhathi sabo, imali kanye lamandla abo ukuze bancedise abantwababo. Ngesikhathi abanye babo bedlala njalo bezikholisela, abasakhulayo abafisa ukuyamela ilizwe labo emincintiswaneni yama-Olympics baziqeqetsha ngamandla okwamahola amanengi nsukuzonke. UJesu laye wazinikela ukuze enze izinto ezaziqakathekile kuye. Kazange azihluphe ngokudinga inotho njalo kabanga labantwana. Kodwa wakhetha ukuqakathekisa intuthuko yomsebenzi woMbuso. (Mat. 4:17; Luk. 9:58) Abalandeli bakhe labo balahlekelwa ngokunengi ukuze basekele uMbuso kaNkulunkulu. Ingqubelaphambili yoMbuso babeyiqakathekisa ukwedlula zonke izinto njalo bazinikela ukuze benze okunengi kakhulu. (Mat. 4:18-22; 19:27) Yikho-ke, sesingazibuza, ‘Kuyini okuqakathekileyo empilweni yami?’

2. (a) Yiphi imihlatshelo eqakathekileyo okumele yenziwe ngamaKhristu eqiniso? (b) Abanye bangezelela imihlatshelo yabo ngokwenzani?

² Kuqakathekile ukuthi wonke amaKhristu eqiniso aphe imihlatshelo ethile njalo iyadingeka ukuze sibe lobuhlobo obuhle loJehova futhi sibulondoloze. Igoqela ukunikela ngesikhathi kanye lamandla ukuze sithandaze, sibale iBhayibhili, sibe lokukhonza kwemuli, siye emihlanganweni njalo sitshumayele.a (Josh. 1:8; Mat. 28:19, 20; Heb. 10:24, 25) Imizamo esiyenzayo kanye lesibusiso sikaJehova kwenza ukuthi umsebenzi wokutshumayela uhambe masinya njalo abanengi baqhubeke bebekelela ‘entabeni yethempeli likaJehova.’ (Isaya. 2:2) Abanengi basekela imisebenzi yoMbuso ngokungezelela imihlatshelo yabo ngemisebenzi abangayenzeli ukuthola ukuphila okungapheliyo, kodwa eqakathekileyo ukuze kusekelwe imisebenzi yoMbuso. Le igoqela ukuyasebenza emaBhetheli, ukuncedisa ekwakhiweni kwamaWolu oMbuso kanye lamaWolu eMihlangano emikhulu, ukuhlela imihlangano emikhulu, kumbe ukuyasiza nxa kube lezehlakalo zemvelo.

3. (a) Ukwenza imihlatshelo yoMbuso kusinceda ngani? (b) Yiphi imibuzo okumele siyihlole?

³ Khathesi sekumele siwusekele kakhulu uMbuso. Kuyathokozisa ukuthi abanengi banika uJehova imihlatshelo yokuzithandela. (Bala iHubo 54:6.) Ukupha okunjalo kwenza sithokoze kakhulu ngesikhathi silindele ukuthi uMbuso kaNkulunkulu uze. (Dute. 16:15; ImiSeb. 20:35) Lanxa kunjalo, sonke kumele sizihlolisise. Kukhona yini engingakwenza ukuze ngengezelele imihlatshelo ngenxa yoMbuso? Ngisisebenzisa njani isikhathi sami, imali, amandla kanye leziphiwo engilazo? Kuyini okumele ngikuqaphele? Asihloleni ukuthi ngobani esingabalingisela ukuze senze imihlatshelo yokuzithandela, ezakwenza ukuthi sithokoze kakhulu.

IMIHLATSHELO YAKO-ISRAYELI WASENDULO

4. Kwakubanceda ngani abako-Israyeli ukwenza imihlatshelo?

⁴ Ko-Israyeli endulo, kwakumele umuntu anikele ngomhlatshelo ukuze athethelelwe izono. Yayidingeka ukuze abantu bamukelwe nguJehova. Eminye yakhona kwakumele yenziwe loba sekutheni, njalo eminye yayingeyokuzithandela. (Levi. 23:37, 38) Iminikelo yokutshiswa yayingaba yiminikelo yokuzithandela kumbe isipho kuJehova. Isibonelo esikhulu semihlatshelo sabonakala ngesikhathi sikaSolomoni lapho kunikelwa ithempeli.​—2 ImiLan. 7:4-6.

5. UJehova wakwenza njani ukuthi abayanga labo benelise ukwenza imihlatshelo?

⁵ Ngenxa yothando, uJehova wayezwisisa ukuthi abantu babengeke banikele ngemihlatshelo efananayo kodwa wayefuna ukuthi umuntu aphe lokho enelisa ukukupha. Umthetho kaJehova wawusithi igazi lenyamazana lichithwe, ‘okwakuyisithunzi sezinto ezinhle ezizayo’ esasizazithola ngeNdodana yakhe, uJesu. (Heb. 10:1-4) Kodwa ekusebenziseni umthetho lo, uJehova wayezwisisa. Ngokwesibonelo, wayevuma umnikelo wamajuba nxa umuntu wayengenelisi ukunikela ngenyamazana. Yikho-ke labayanga babenganika uJehova umhlatshelo wabo bethokoza. (Levi. 1:3, 10, 14; 5:7) Lanxa inyamazana ezazinikelwa zazingabe zehlukene, kwakulezinto ezimbili ezazifuneka emuntwini munye ngamunye owayesenza umnikelo wokuzithandela.

6. Umuntu munye ngamunye kwakumele enzeni nxa enikela, njalo kwakuqakatheke kangakanani ukulandela imithetho yokunikela?

⁶ Okokuqala, umuntu kwakumele anikele ngokuhle kulakho konke kulokho ayelakho. UJehova watshela isizwe ukuthi ukuze ‘yamukelwe,’ imihlatshelo yonke kwakungamelanga ibe lesici. (Levi. 22:18-20) Wayengasoze amukele umhlatshelo nxa inyamazana yayilesici. Okwesibili, umuntu onika umhlatshelo kwakumele abe ngongangcolanga. Nxa umuntu wayengcolile, kwakumele alethe umnikelo wesono kumbe umnikelo wecala ukuze alungisise ubuhlobo bakhe loJehova engakanikeli ngomhlatshelo wokuzithandela. (Levi. 5:5, 6, 15) Lokhu kwakungasindaba yokudlala ngayo. UJehova wayefake umthetho wokuthi nxa umuntu ongcolileyo enikela ngomnikelo wobudlelwano owawugoqela iminikelo yokuzithandela, kwakumele ajeziswe. (Levi. 7:20, 21) Kodwa, nxa umnikelo wakhe wawungelasici njalo elobuhlobo obuhle loJehova, umuntu wayengathokoza njalo akhululeke nxa esenza umhlatshelo.​—Bala u-1 ImiLando 29:9.

UKWENZA IMIHLATSHELO LAMUHLA

7, 8. (a) Kuyini okuthokozisa abanengi abenza imihlatshelo ngenxa yoMbuso? (b) Yiziphi izinto esilazo?

⁷ Lamuhla abanengi bazimisele ukusebenza ngamandla enkonzweni kaJehova njalo lokhu kuyamthokozisa. Ukwenzela abafowethu okuhle kusilethela izibusiso. Omunye umfowethu owakha amaWolu oMbuso njalo encedisa labo abawelwe yizehlakalo zemvelo uthi kenelisi lokuchaza intokozo ayithola ngokwenza imisebenzi le. Uthi, “Ukubona abafowethu labodadewethu endaweni esiyabe sikuyo bejabula njalo bebonga ngenxa yeWolu loMbuso elitsha kumbe nxa bethole uncedo ngesikhathi bewelwe yizehlakalo zemvelo kwenza kukhanye ukuthi umsebenzi wonke kanye lomzamo engiwenzayo kuqakatheke kakhulu.”

⁸ Inhlanganiso kaJehova lamuhla ihlala idinga amathuba okusekela umsebenzi wakhe. Ngo-1904, uMfowethu u-C. T. Russell wabhala wathi: “Umuntu munye ngamunye kumele azibone ebekwe yiNkosi ukuthi abe ngumphathi wesikhathi sakhe, akwenzayo, imali yakhe, njalo njalo, futhi umuntu munye ngamunye kumele azame ngamandla ukusebenzisa iziphiwo lezi ngenhliziyo yonke, ukuze iNkosi ikhazinyuliswe.” Lanxa sithola izibusiso ezinengi, kukhona okusilahlekelayo nxa sisenzela uJehova imihlatshelo. (2 Sam. 24:21-24) Yiphi indlela engcono yokusebenzisa izinto esilazo?

9. Phakathi kwemilayezo kaJesu etholakala kuLukha 10:2-4, yisiphi isimiso esingasisebenzisa mayelana lesikhathi sethu?

⁹ Isikhathi sethu. Ukuhumutsha lokudinda amabhuku ethu, ukwakha indawo zokukhonzela, ukuhlela imihlangano emikhulu, ukusiza lapho okulomonakalo, kanye lokwenza eminye imisebenzi eyabe idingeka kuthatha isikhathi esinengi kanye lomzamo. Silamahola angu-24 kuphela ngelanga. UJesu wasinika isimiso esingasinceda. Ngesikhathi ethuma abafundi bakhe ensimini, wabatshela ukuthi ‘bangabingeleli muntu endleleni.’ (Luk. 10:2-4) UJesu wayebanikelani imilayezo le? Esinye isifundiswa seBhayibhili sithi: “Ukubingelela ebantwini baseMpumalanga kwakungayisikho esikujayeleyo, njengokukhothama kancane kumbe ukuxhawula, kodwa kwakusenziwa ngokwanga, ukuguqa kanye lokucambalala enhlabathini. Konke lokhu kwakudinga isikhathi esinengi.” UJesu wayengakhuthazi abalandeli bakhe ukuthi bangabi lendaba labantu. Kodwa wayebanceda ukuthi bananzelele ukuthi balesikhathi esilutshwana njalo kwakumele basisebenzise ukwenza izinto eziqakatheke kakhulu. (Efe. 5:16) Ubona angani ungasisebenzisa njani isimiso lesi ukuze uthole isikhathi esinengi sokuncedisa emisebenzini ephathelane loMbuso?

10, 11. (a) Yikuphi okunye okwenziwayo ngeminikelo yethu yomhlaba wonke? (b) Yisiphi isimiso esiku-1 Khorinte 16:1, 2 esingasinceda?

¹⁰ Imali yethu. Kudingeka izimali ezinengi ukuze kusekelwe imisebenzi yoMbuso. Umnyaka ngamunye kusetshenziswa izizumbulu zezimali ukuze kunakekelwe ababonisi abahambelayo, amaphayona aqakathekileyo kanye labanali. Kusukela ngo-1999, sekwakhiwe amaWolu oMbuso adlula angu-24 500 emazweni asathuthuka. Kodwa kusadingeka amaWolu oMbuso aphosa abengu-6 400. Inyanga yinye ngayinye kudindwa amamagazini angaba yizigidi ezingu-100 agoqela iNqabayokulinda kanye le-Awake! Iminikelo yenu yokuzithandela yiyo esetshenziswa ukwenza lezizinto.

¹¹ Umphostoli uPhawuli wabhala isimiso esingasisebenzisa nxa sinikela. (Bala u-1 Khorinte 16:1, 2.) Ephefumulelwe, wakhuthaza abazalwane baseKhorinte ukuthi bangameleli iviki ize iphele ukuze babone ukuthi kuseleni, kodwa ekuqaliseni kweviki babeke imali eceleni ehambelana lalokho abalakho. Njengasekhulwini lokuqala, abafowethu labodadewethu lamuhla bahlela kuseselesikhathi ukuze banikele bekhululekile kusiya ngokuthi balani. (Luk. 21:1-4; ImiSeb. 4:32-35) UJehova uyakuqakathekisa ukupha okunjalo.

12, 13. Kuyini okungenza abanye bathikaze ukupha amandla leziphiwo zabo, kodwa uJehova uzabanceda njani?

¹² Amandla leziphiwo zethu. UJehova uyasisekela nxa sizimisela ukusebenzisa amandla leziphiwo zethu ngenxa yoMbuso. Uthembisa ukusincedisa nxa sesidiniwe. (Isaya. 40:29-31) Ucabanga ukuthi akula lutho ongalwenza ukuze uthuthukise umsebenzi lo yini? Ubona angani kulabanye abangcono kulawe na? Khumbula ukuthi uJehova angathuthukisa iziphiwo zethu njengalokho akwenza kuBhezaleli lo-Oholiyabhi.​—Eks. 31:1-6; khangela umfanekiso osekuqaliseni.

¹³ UJehova usikhuthaza ukuthi singathikazi lokuthi sinikele ngokuhle kulakho konke kulokho esilakho. (Zaga. 3:27) Ngesikhathi ithempeli lisakhiwa kutsha, uJehova watshela abaJuda eJerusalema ukuthi bacabangisise ngokuthi kunganani ababekwenza emsebenzini wokwakha. (Hag. 1:2-5) Kulokunye okwasekubaphambanisa njalo babengasakwazi okwakuqakathekile. Kumele sihlole ukuthi izinto esiziqakathekisayo yizo yini uJehova aziqakathekisayo. ‘Ungacabanga kuhle ngezindlela zakho’ yini ukuze wenze okunengi emsebenzini woMbuso kulezizinsuku zokucina?

UKUNIKELA NGALOKHO ESILAKHO

14, 15. (a) Isibonelo sabazalwane abangabayanga sisikhuthaza njani? (b) Kumele sizimisele ukwenzani?

¹⁴ Abanengi bahlala emazweni agcwele ubuyanga lokuhlupheka. Inhlanganiso yethu izimisele ‘ukunika’ abafowethu abaswelayo abahlala emazweni la. (2 Khor. 8:14) Lanxa kunjalo, abafowethu abangabayanga bayasiqakathekisa isibusiso sokupha. UJehova uyajabula nxa ebona abayanga benikela ngokuthokoza.​—2 Khor. 9:7.

¹⁵ Kwelinye ilizwe lase-Africa elisathuthuka, abanye abafowethu bakhetha ingxenye encane yesivande sabo, besebesithi bangathengisa isivuno abasithole kuleyongxenye banikele ngaleyomali ukuze basekele umsebenzi woMbuso. Elizweni lelo kwakumele kwakhiwe iWolu loMbuso elalidingeka kakhulu. Abafowethu labodadewethu bakuleyondawo babefuna ukuncedisa. Kodwa lalizakwakhiwa ngesikhathi sokulima. Ngenxa yokuthi babezimisele ukuncedisa, emini babesakha iWolu loMbuso, ntambama besebehamba bayelima emasimini. Lokhu kwakuyikuzinikela okukhulu sibili! Kuze kusikhumbuze abafowethu baseMakhedoniya ngekhulu lokuqala. Lanxa ‘babengabayanga bokucina,’ bancenga ukuthi bathole isibusiso sokuphathisa emsebenzini owawusenziwa. (2 Khor. 8:1-4) Sonke asizimiseleni ukupha ‘isipho kusiya ngokuthi siphiwe sabusiswa ngokunganani nguJehova.’​—Bala uDutheronomi 16:17.

16. Kuyini esingakwenza ukuze imihlatshelo yethu ihlale isamukeleka kuJehova?

¹⁶ Kodwa-ke, kulokunye okumele sikuqaphele. Njengama-Israyeli asendulo, kumele sibe leqiniso lokuthi imihlatshelo yethu yokuzithandela iyamukelwa nguNkulunkulu. Akumelanga yenze ukuthi sikhohlwe ukunakekela izimuli zethu kanye lokuqinisa ubuhlobo bethu loJehova. Ukunikela ngesikhathi sethu kanye lezinto esilazo ukuze sisize abanye akumelanga kwenze sicine singasela sikhathi sokuncedisa izimuli zethu ekukhonzeni kanye lasezintweni zokuziphilisa. Lokhu kuyabe kufanana lokuthi sipha esingelakho. (Bala u-2 Khorinte 8:12.) Kanti njalo kumele sihlale siqinisa ubuhlobo bethu loNkulunkulu. (1 Khor. 9:26, 27) Asihlaleni sikhumbula ukuthi nxa silandela izimiso zeBhayibhili, imihlatshelo yethu izasijabulisa futhi yenze saneliseke njalo izabe ‘isamukeleka’ kuJehova.

IMIHLATSHELO YETHU IQAKATHEKE KAKHULU

17, 18. Uzizwa njani nxa ukhangele bonke abenza imihlatshelo ngenxa yoMbuso njalo sonke kumele sicabangisise ngani?

¹⁷ Abafowethu labodadewethu abanengi ‘bazithulula njengomnikelo wokunathwa’ ngomsebenzi wabo wokusekela izinto zoMbuso ezidingekayo. (Flp. 2:17) Siyababonga kakhulu labo abazinikela ukwenza lokho. Izimuli zabafowethu abakhokhelayo emsebenzini woMbuso lazo ziyanconywa kakhulu ngokupha kwazo kanye lokuzinikela.

¹⁸ Kulomsebenzi omnengi kakhulu odingekayo ukuze sisekele izinto eziphathelane loMbuso. Sonke, kasicabangisiseni sithandaza ngokuthi singenzani ukuze senze konke esingenelisa ukukwenza. Nxa singenza njalo sizathola izibusiso ezinkulu khathesi, njalo zizakuba zinkulu kakhulu ‘esikhathini esizayo.’​—Mak. 10:28-30.