IMIBUZO YEBHAYIBHILI IYAPHENDULWA
Ngubani sibili obusa umhlaba lo?
Kungani ukuhlupheka kukunengi kangaka nxa kunguNkulunkulu obusa umhlaba?
Abantu abanengi bacabanga ukuthi uNkulunkulu weqiniso nguye obusa umhlaba lo. Pho kungani umhlaba ugcwele ukuhlupheka kangaka nxa kuyikuthi lokhu kuliqiniso? (UDutheronomi 32:4, 5) IBhayibhili liyakucacisa ukuthi umhlaba lo ubuswa ngumuntu othile omubi.—Bala u-1 Johane 5:19.
Kodwa kwahamba njani ukuthi umuntu lo omubi acine esebusa abantu? Kusanda kudalwa abantu, ingilosi ethile yahlamukela uNkulunkulu njalo yayenga abantu bokuqala ukuthi labo bahlamuke. (UGenesisi 3:1-6) Lapho belalela ingilosi le eyahlamukayo, uSathane, babekhetha ukuthi babuswe yiyo. UNkulunkulu uSomandla, nguye kuphela ofanele ukubusa kodwa kababambi ngamandla abantu. Ufuna bakhethe ukubuswa nguye ngenxa yokuthi bayamthanda. (UDutheronomi 6:6; 30:16, 19) Kuyadanisa ukuthi abantu abanengi bayadukiswa bacine sebekhetha kubi njengabantu bokuqala.—Bala iSambulo 12:9.
Ngubani ozasusa izinhlupho zabantu?
UNkulunkulu uzamvumela yini uSathane ukuthi aqhubeke ngokubusa kwakhe okubi? Hatshi! Uzasebenzisa uJesu ukuze asuse bonke ububi obenziwa nguSathane.—Bala u-1 Johane 3:8.
UJesu uzachoboza uSathane esebenzisa amandla awaphiwe nguNkulunkulu. (KwabaseRoma 16:20) Ngemva kwalokho uNkulunkulu uzabusa umhlaba njalo enze ukuthi abantu baphile bethokoza njalo belokuthula njengalokhu ayekuhlosile ekuqaliseni.—Bala iSambulo 21:3-5.