ISIHLOKO ESISEKUQALISENI | UNKULUNKULU ULENDABA LAWE YINI?
UNKULUNKULU UYAKUBONA
“Amehlo akhe aphezu kwezindlela zabantu; ubona zonke izinyathelo zabo.”—UJOBE 34:21.
Umntwana omncane uyakudinga kakhulu ukuthi abazali bamtshengise ukuthi balendaba laye
KUNGANI ABANYE BETHANDABUZA? Abanye abacubunguli baveza ukuthi umthala wethu ungaba lama-planet angaba yi-100 bhiliyoni. Nxa abantu abanengi bebona ukuthi indawo eyadalwayo inkulu kangaka, bacina bezibuza ukuthi kambe uMdali ongusomandla angazihluphelani ngokukhangela abantu abangasilutho abasemhlabeni omncane kangaka.
ILIZWI LIKANKULUNKULU LISIFUNDISANI? UNkulunkulu kazange aphongusithi qithi iBhayibhili wasitshiya sinjalo. Usenza sibe lethemba ngoba uthi: “Ngizakweluleka ngikulinde.”—IHubo 32:8.
Cabanga ngoHagari, owesifazana ongumGibhithe owaphila ngekhulu lesi-20 B.C.E. Umqhatshi wakhe, uSarayi, wamphatha kubi ngoba wayesedelela. Yikho-ke uHagari wasebaleka waqonda enkangala. Manje njengoba uHagari wayesephambanisile, uNkulunkulu wamkhalala yini? IBhayibhili lithi: “Ingilosi kaJehova yamfumana.” Liqhubeka lisithi ingilosi le yamqinisa yathi: “UJehova usezwile ngokuhawula kwakho.” UHagari wasesithi kuJehova: “UnguNkulunkulu ongibonayo.”—UGenesisi 16:4-13.
‘UNkulunkulu obonayo’ ukukhangele lawe. Ngokwesibonelo umama olothando uhlala ekhangela abantwabakhe abancane. Phela umntwana omncane uyakudinga kakhulu ukuthi abazali bamtshengise ukuthi balendaba laye. Yikho-ke loNkulunkulu uyabe elathi ikakhulu nxa sidanile njalo singelabani ongasinceda. UJehova uthi: “Ngihlala endaweni ephakemeyo lengcwele, kodwa laye ozisolayo lothobekileyo emoyeni, ukuba kuvuselelwe umoya wabathobekileyo, kuvuselelwe lezinhliziyo zabazisolayo.”—U-Isaya 57:15.
Lanxa kunjalo, ungazibuza ukuthi: ‘Mina uNkulunkulu ungibona njani? Ungahlulela ngendlela engikhangeleka ngayo yini kumbe uyananzelela lokungangale ukuze azwisise ukuthi ngingumuntu onjani?’