‘Lalelani Lizwisise Lokhu’

1, 2. Kuyini okwakusenza ukuthi abanengi ababelalele uJesu efundisa bangazwisisi ukuthi amazwi akhe ayesitshoni?

UMUNTU angabe esizwa ukuthi kulothile okhuluma laye, aze ezwe lokuthi ilizwi lomuntu lo linjani. Kodwa lokhu kungamnceda yini nxa engazwisisi ukuthi okukhulunywa ngumuntu lo kutshoni? (1 Khor. 14:9) Yikho kanye okwakusenzakala ngesikhathi sikaJesu. Abantu abanengi babemuzwa ukuthi uthini ngoba wayekhuluma labo ngolimi ababelwazi kuhle. Kodwa abanye bakhona babengazwisisi ukuthi amazwi akhe ayesitshoni. Yikho uJesu wathi: “Lalelani kimi lonke, lizwisise lokhu.”​—Mak. 7:14.

² Abanengi babengazwisisi ukuthi uJesu wayesitshoni. Ngenxa yani? Ngenxa yokuthi abanye basebevele belemibono yabo njalo babengafuni ukuzwisisa. UJesu waze wakhuluma ngabo wathi: “Lilendledlana yenu yokufuqela eceleni imilayo kaNkulunkulu ukuze lilandele amasiko enu!” (Mak. 7:9) Abantu laba babengazihluphi ngokuthi bazwisise ukuthi amazwi kaJesu ayesitshoni. Babengafuni ukuntshintsha ukuphila kwabo lemicabango yabo. Lanxa izindlebe zabo zazingabe zivulekile, izinhliziyo zabo zazivaleke ngci! (Bala uMathewu 13:13-15.) Manje kuyini esingakwenza ukuze ezethu izinhliziyo zihlale zivulekile ukwenzela ukuthi lokho okwafundiswa nguJesu kusincede?

SINGENZANI UKUZE LOKHO OKWAKUFUNDISWA NGUJESU KUSINCEDE?

3. Kuyini okwakusenza ukuthi abafundi benelise ukuzwisisa ukuthi amazwi kaJesu ayesitshoni?

³ Kumele senze lokho okwakusenziwa ngabafundi bakaJesu ababethobekile. Wakhuluma ngabo wathi: “Abusisiwe amehlo enu ngokuba ayabona, lezindlebe zenu ngokuba ziyezwa.” (Mat. 13:16) Kuyini okwakusenza ukuthi bona bazwisise lanxa abanye babengazwisisi? Isizathu sokuqala yikuthi babezimisele ukubuza imibuzo lokudingisisa ukuthi amazwi kaJesu ayesitshoni sibisibili. (Mat. 13:36; Mak. 7:17) Esesibili yikuthi babezimisele ukwamukela ulwazi olutsha ukuze bengezelele kulokho okwasekuvele kusezinhliziyweni zabo. (Bala uMathewu 13:11, 12.) Okwesithathu yikuthi babefuna ukukusebenzisa ezimpilweni zabo lokho ababekuzwa njalo babefuna lokukusebenzisa nxa sebezama ukunceda abanye.​—Mat. 13:51, 52, NW.

4. Yiziphi izinto ezintathu okumele sizenze ukuze sizwisise ukuthi imizekeliso kaJesu itshoni?

⁴ Kumele senze khona kanye okwakusenziwa ngabafundi bakaJesu ababethembekile nxa sifuna ukuzwisisa ukuthi imizekeliso kaJesu itshoni. Yikho-ke zintathu izinto okumele sizenze. Okokuqala, kumele sizinike isikhathi sokutaditsha lokucabangisisa ngalokho okwatshiwo nguJesu, siphinde sichwayisise futhi sizibuze lemibuzo ethile ngalokho esiyabe sikubala. Lokhu yikho okuzakwenza ukuthi sithole ulwazi. (Zaga. 2:4, 5) Nxa sesenze njalo kuyabe sekumele sihlole ukuthi ulwazi lolu lungenelana njani lalokho esikwaziyo, sibone lokuthi lusinceda ngani. Lokhu yikho okuzakwenza ukuthi sizwisise. (Zaga. 2:2, 3) Kanti njalo okokucina yikuthatha lokho esiyabe sesikufundile sikusebenzise ezimpilweni zethu. Lapho-ke siyabe sesitshengisa ukuthi silokuhlakanipha.​—Zaga. 2:6, 7.

5. Yiwuphi umzekeliso ongasinceda ukuthi sizwisise umahluko okhona phakathi kokuba lolwazi, ukuzwisisa kanye lokuhlakanipha?

⁵ Yiwuphi umahluko okhona phakathi kokuba lolwazi, ukuzwisisa kanye lokuhlakanipha? Nanku umzekeliso ongasisiza ukuthi siwubone umahluko lo: Asithi ume phakathi laphakathi komgwaqo besekuthutsha ibhasi isidla amahabula. Okwakuqala, uyabona ukuthi le yibhasi—lolu yilo ulwazi. Okwesibili, uyananzelela ukuthi nxa ungaqhubeka uthe mpo emgwaqweni izakutshaya​—lokhu yikho ukuzwisisa! Okwesithathu, uhle weqe uphume emgwaqweni​—lokhu yikho ukuhlakanipha! Kuyakhanya-ke ukuthi kungani iBhayibhili ligcizelela ukuthi kumele ‘sigcine ingqondo ehlakaniphileyo.’ Singayekela, singafa sibili!​—Zaga. 3:21, 22, The Holy Bible in Ndebele; 1 Tim. 4:16.

6. Yiyiphi imibuzo emine ezaphendulwa nxa sesihlola imizekeliso kaJesu engu-7? (Khangela ibhokisi.)

⁶ Esihlokweni lesi lakwesilandelayo sizahlola imizekeliso kaJesu engu-7. Nxa sesihlola umzekeliso munye ngamunye kuzaphendulwa imibuzo elandelayo: Umzekeliso kaJesu utshoni? (Lokhu kusinceda ukuthi sithole ulwazi.) UJesu wawusebenziselani umzekeliso lo? (Lokhu kusinceda ukuthi sizwisise.) Thina kusinceda ngani esikufunda emzekelisweni lo njalo singakusebenzisa njani ukuthi sincede abanye? (Lokhu yikho ukuhlakanipha.) Umbuzo wokucina ngothi, ‘Lokhu kusifundisani ngoJehova langoJesu?’

INHLAMVU YEMASTADI

7. Umzekeliso wenhlamvu yemastadi utshoni?

⁷ Bala uMathewu 13:31, 32. Umzekeliso kaJesu wenhlamvu yemastadi utshoni? Inhlamvu le loba intanga imela umlayezo woMbuso kanye lebandla lobuKhristu elikhona ngenxa yokutshunyayelwa komlayezo lo. Ibandla lobuKhristu lathi liqala ngo-33 C.E., lalilincinyane njengentanga yemastadi ‘encinyane kulazo zonke izinhlamvu.’ Lanxa kunjalo, eminyakeni eyalandelayo ibandla lakhula masinyane ngendlela abantu ababengayicabangeli. (Kol. 1:23) Ukukhula lokhu kwakulusizo sibili ngoba uJesu wathi “izinyoni zezulu” zenelisa ‘ukukhusela ezingatsheni zaso.’ Izinyoni lezi zazithola ukudla, umthunzi kanye lendawo yokuhlala. Yikho-ke zimela abantu abathanda iqiniso abathola ulwazi lweBhayibhili, ukuphumula kanye lokuvikeleka ebandleni lobuKhristu.​—Qathanisa loHezekheli 17:23.

8. UJesu wawusebenziselani umzekeliso wenhlamvu yemastadi?

⁸ UJesu wawusebenziselani umzekeliso lo? Wasebenzisa umzekeliso wentanga yemastadi ekhula ngendlela emangalisayo ukuze atshengise ukuthi uMbuso kaNkulunkulu ulamandla okukhula, lawokuvikela kanye lawokunqoba loba kuyini okungazama ukuwuvimba. Kusukela ngo-1914 ingxenye esemhlabeni yenhlanganiso kaNkulunkulu ibilokhu ikhula ngendlela emangalisayo! (Isaya. 60:22) Abantu abakuyo bathola ulwazi olubavikela ezintweni ezingaphambanisa ubuhlobo babo loNkulunkulu. (Zaga. 2:7; Isaya. 32:1, 2) Okunye futhi yikuthi imisebenzi ephathelane loMbuso ilokhu iqhubekela phambili, akulamuntu ongayimisa.​—Isaya. 54:17.

9. (a) Kuyini esingakufunda emzekelisweni wenhlamvu yemastadi? (b) Umzekeliso lo usifundisani ngoJehova langoJesu?

⁹ Kuyini esingakufunda emzekelisweni wenhlamvu yemastadi? Kungenzakala ukuthi sihlala endaweni elaboFakazi abalutshwana kumbe lapho esihlala khona kuthatha isikhathi ukuthi abantu esibatshumayezayo bantshintshe. Kodwa ukukhumbula ukuthi akulanto engehlula uMbuso kaNkulunkulu kungasikhuthaza ukuthi siqinisele. Ngokwesibonelo, uMfowethu Edwin Skinner wathi efika e-India ngo-1926 kwakulaboFakazi abalutshwana kakhulu elizweni lelo. Ekuqaliseni umsebenzi wokutshumayela wachazwa ngokuthi “wawunzima kakhulu” ngenxa yokuthi intuthuko yakhona yayincane okumangalisayo. Lanxa kunjalo uMfowethu uSkinner waqhubeka etshumayela njalo wazibonela kusiba lengqubelaphambili emsebenzini wokutshumayela ngoMbuso kungelani lokuthi kwakulobunzima. Sikhuluma nje e-India sekulaboFakazi abatshumayelayo abedlula 37 000, kanti njalo nyakenye bekulabantu abedlula 108 000 eSikhumbuzweni elizweni lelo. Nansi futhi esinye isibonelo esitshengisa ukuthi umsebenzi ophathelane loMbuso uqhubekela phambili. Ngawo kanye umnyaka uMfowethu uSkinner afika ngawo e-India, umsebenzi wokutshumayela wawusanda kuqalisa eZambia. Khathesi elizweni lelo sekulabamemezeli abedlula 170 000 futhi okumangalisa kakhulu yikuthi ngo-2013 kwakulabantu abangu-763 915 eSikhumbuzweni. Le yintuthuko emangalisayo sibili!

IMVUBELO

10. Umzekeliso wemvubelo utshoni?

¹⁰ Bala uMathewu 13:33. Umzekeliso wemvubelo utshoni? Umzekeliso lo lawo ukhuluma ngomlayezo woMbuso kanye lalokho okwenzakalayo nxa singatshumayela. Inhlama “enengi” yefulawa imela izizwe zonke, njalo ukukhukhumala kwayo kumela ukusabalala kwezindaba ezinhle zoMbuso njengoba ziyabe zitshunyayelwa. Kulula ukubona ukukhula kwentanga yemastadi. Kodwa nxa imvubelo ifakwa phakathi kwenhlama yefulawa, ekuqaliseni kuyabe kungakhanyi ukuthi iyasebenza, kuze kukhanye ngemva kwesikhathi.

11. UJesu wawusebenziselani umzekeliso wemvubelo?

¹¹ UJesu wawusebenziselani umzekeliso lo? Wayetshengisa ukuthi umlayezo woMbuso ulamandla okusabalala ufike lakhatshana, lokuthi uyabantshintsha abantu. Umlayezo woMbuso usufike “lasemikhawulweni yomhlaba.” (ImiSeb. 1:8) Lanxa kunjalo, untshintsho olwenziwa ngumlayezo lo lungabe lungakhanyi ekuqaliseni kodwa luyabe lukhona. Lolu kayisilontshitsho lokwanda kwenani labantu abamukela umlayezo woMbuso olamandla kuphela, kodwa kutshiwo lendlela umlayezo lo ontshintsha ngayo ubuntu balabo abawamukelayo.​—Rom. 12:2; Efe. 4:22, 23.

12, 13. Yiziphi izibonelo ezitshengisa ukuthi umsebenzi wokutshumayela ngoMbuso wenza intuthuko ehambelana lokwachazwa nguJesu emzekelisweni wemvubelo?

¹² Kungakuthatha iminyaka ukubona izithelo zomsebenzi wokutshumayela. Ngokwesibonelo uFranz lomkakhe uMargit abasebenza kwenye iwofisi yegatsha, bake basebenzela ewofisini yegatsha yaseBrazil ngo-1982. Ngaleso sikhathi bahamba bayatshumayela kwenye indawo esemaphandleni elizweni lelo. Bafika bafunda iBhayibhili labantu abathile, njalo omunye wabo kwakungumama labantwabakhe abane. Umntanakhe ongumfana owayeleminyaka engu-12 wayelenhloni okokuthi nxa isifundo singakaqalisi wayejayele ukuthi sobe ayecatsha. UFranz lomkakhe abasenelisanga ukuqhubeka befunda lemuli le, ngoba basuka bantshintshelwa komunye umsebenzi wenkonzo. Kodwa ngemva kweminyaka engu-25 baphinda bavakatshela endaweni leyo. Batholani? Bathola sekulebandla elilabamemezeli abangu-69 njalo abangu-13 babengamaphayona esikhathi sonke. Kanti njalo kwasekuleWolu yoMbuso entsha. Umfana owayelenhloni-ke? Nguye osengumhleli wequla labadala ebandleni lelo! Siyabona-ke ukuthi kwenzakala khona kanye okwatshiwo nguJesu emzekelisweni wakhe wemvubelo ngoba umlayezo woMbuso wawususabalale waze wantshintsha labantu abanengi. UFranz lomkakhe bathokoza kakhulu!

¹³ Kusegcekeni ukuthi umlayezo woMbuso uyabantshintsha abantu lasemazweni lapho okulenkululeko encinyane yokutshumayela. Asingeke sitsho ukuthi sekutshunyayelwe kwafikwa ngaphi emazweni lawo njalo sijayele ukumangala kakhulu nxa sisizwa imibiko emihle evela ezindaweni lezi. Elinye lamazwe la yiCuba. Umlayezo woMbuso wafika kulelo ngo-1910, kwasekusithi uMfowethu uRussell wavakatshela khona ngo-1913. Lanxa kunjalo intuthuko yayincane kakhulu ekuqaliseni. Kodwa khathesi izinto zimi njani eCuba? Sekulabamemezeli abedlula i-96 000 abatshumayela izindaba ezinhle njalo ngo-2013 kwakulabantu abangu-229 726 eSikhumbuzweni. Le yingqubelaphambili ngempela! Lasemazweni lapho okulenkululeko yokukhonza, umlayezo woMbuso uyafika lasezindaweni oFakazi balapho abayabe becabanga ukuthi akutshunyayelwa kuzo.a​—UmTshu. 8:7; 11:5.

14, 15. (a) Lokho esikufunda emzekelisweni wemvubelo kungasinceda ngani? (b) Umzekeliso lo usifundisani ngoJehova langoJesu?

¹⁴ Okwatshiwo nguJesu emzekelisweni wemvubelo kungasinceda ngani? Ukucabangisisa ngokuthi umzekeliso kaJesu utshoni kuzakwenza sinanzelele ukuthi akumelanga silale singalele sizihlupha ngokuthi pho umlayezo woMbuso uzafika njani kumamiliyoni abantu angakatshunyayezwa. UJehova nguye okwaziyo. Kodwa thina kumele senzeni? ILizwi likaNkulunkulu lithi: “Hlanyela inhlanyelo yakho ekuseni, lantambama ungayekeli ukusebenza; ngoba kawazi ukuba yiphi ezaphumelela, le ingabe leyana, loba zombili zizaba zinhle.” (UmTshu. 11:6, The Holy Bible in Ndebele) Akumelanga sikhohlwe lokuthandazela ukuthi umsebenzi wokutshumayela uphumelele, ikakhulu emazweni lapho okulenkululeko encane yokutshumayela.​—Efe. 6:18-20.

¹⁵ Kanti njalo akumelanga silahle ithemba nxa ekuqaliseni singaziboni izithelo zomsebenzi wethu. Akumelanga siludelele “usuku lwezinto ezincane.” (Zek. 4:10) Singamangala sesibona ukuthi umsebenzi wethu ube lempumela emihle kakhulu ebesingayicabangeli!​—Hubo. 40:5; Zek. 4:7.

UMTHENGI KANYE LEGUGU ELIFIHLIWEYO

16. Utshoni umzekeliso womthengi kanye lomzekeliso wegugu elifihliweyo?

16 Bala uMathewu 13:44-46. Utshoni umzekeliso womthengi kanye lomzekeliso wegugu elifihliweyo? Ngesikhathi uJesu esasemhlabeni abanye abathengi babehamba batsholobele baze bayefika e-Indian Ocean ukuze bathole amaphareli amahle. Umthengi okukhulunywa ngaye emzekelisweni lo umela abantu abafuna iqiniso njalo abenza konke abangakwenza ukuze balithole. Iphareli “elalilentengo ephezulu” limela iqiniso loMbuso eliligugu. Umthengi lo wathi enanzelela ukuthi iphareli leli laliligugu kakhulu, wazimisela ukuthi ahle athengise konke ayelakho ukuze alithenge. UJesu waphinda wakhuluma langendoda eyayisebenza esivandeni yasithola igugu “elifihliweyo.” Kodwa umahluko okhona phakathi kwendoda le lomthengi yikuthi yona yaphongutshayisana lalo igugu leli. Kodwa yathi isilibonile, layo yazimisela ukuthi ithengise “konke” eyayilakho ukuze ilithole.

17. Kungani uJesu wasebenzisa umzekeliso womthengi kanye lowegugu elifihliweyo?

¹⁷ UJesu wayisebenziselani imizekeliso le emibili? Wayetshengisa ukuthi iqiniso litholakala ngezindlela ezitshiyeneyo. Abanye bayalidinga njalo benze konke abangakwenza ukuze balithole. Kodwa abanye bayalithola lanxa bengasebenzanga nzima belidinga. Mhlawumbe bayabe beliphathelwe ngabanye. Kungelani lokuthi munye ngamunye wamadoda asemizekelisweni le wayelithole njani igugu, wayenanzelela ukuthi wayethole into eqakatheke kakhulu futhi wayezimisele ukudela loba yini ayelayo ukuze igugu leli libe ngelakhe.

18. (a) Imizekeliso le emibili ingasinceda ngani? (b) Isifundisani ngoJehova langoJesu?

¹⁸ Imizekeliso le emibili ingasinceda ngani? (Mat. 6:19-21) Zibuze imibuzo elandelayo: ‘Iqiniso ngilibona ngendlela amadoda la ayelibona ngayo yini? Ngiliqakathekisa njengawo yini? Ngizimisele na ukudela loba yini ukuze libe ngelami, kumbe ngivumela ukuthi izinto zansuku zonke ezingikhathazayo lokunye nje kungiphambanise?’ (Mat. 6:22-24, 33; Luk. 5:27, 28; Flp. 3:8) Nxa izinhliziyo zethu zithokoza ngokuthi salithola iqiniso, sizahlala siliqakathekisa ukwedlula loba yini ezimpilweni zethu.

19. Kuyini esizakuhlola esihlokweni esilandelayo?

¹⁹ Kasitshengiseni ukuthi siyizwile yonke imizekeliso le ephathelane loMbuso lokuthi sikuzwisisile ukuthi itshoni sibili. Kanti njalo akumelanga sikhohlwe ukuthi okuqakathekileyo kayisikho kuzwisisa ukuthi itshoni kuphela, kodwa yikwenza lalokho esikufunda emizekelisweni le. Esihlokweni esilandelayo sizahlola eminye imizekeliso emithathu besesibona ukuthi isifundisani.