Uyakuqakathekisa Yini Osukwamukele?

1. Abantu abanengi bajayele ukuthini?

ABANTU abanengi bajayele ukuthi ukuqakatheka kolutho ukubona nxa ungaselalo. Mhlawumbe lawe uvumelana labo. Nxa umuntu ekhule ethola konke akufunayo kujayelekile ukuthi angakuqakathekisi kangako. Ngokwesibonelo umuntu ozelwe ngabantu abanothileyo angazitshaphaza zonke izinto alazo. Labanye abasakhulayo kungabehlula ukuthi babone ukuthi kuyini okuqakatheke kakhulu empilweni ngenxa yokuthi bayabe bengakaboni ukuthi impilo injani.

2, 3. (a) Abasakhulayo abangamaKhristu kumele benzeni? (b) Kuyini okungasinceda ukuthi siqakathekise lokho esilakho?

² Nxa ungosakhulayo oleminyaka ephakathi kwengu-13 kusiya kwengu-25, kuyini okuqakathekileyo kuwe? Phela ontanga yakho abanengi emhlabeni lo baqakathekisa ukuhola imali enengi, ukuba lendlu enhle kumbe ukuba lezinto zalezinsuku. Kodwa ubuhlobo bethu loNkulunkulu buqakatheke kakhulu ukwedlula zonke izinto lezi esizibona angani yizo eziqakathekileyo empilweni. Kuyadanisa ukuthi kulezinsuku izigidi zabantu azizihluphi ngokuba lobuhlobo loNkulunkulu. Lina abasakhulayo elikhuliswe ngabazali abangamaKhristu kumele lilibambe liligagadlele ilifa eliqakathekileyo abaliphe lona.a (Mat. 5:3) Ukungaliqakathekisi kungabangela ukuthi lenze izinto ezizalizwisa ubuhlungu okwempilo yenu yonke.

³ Yikho-ke kulezinto okumele lizenze ezingalinceda ukuthi liqakathekise ilifa lenu eliligugu. Ake sikhangele ezinye izibonelo eziseBhayibhilini ezingasitshengisa ukuthi kuzasisiza ngani ukuhlala siliqakathekisa ilifa leli. Izibonelo lezi azisoze zincede abasakhulayo kuphela kodwa zizanceda wonke amaKhristu.

KABAZANGE BALIQAKATHEKISE ILIFA LABO

4. U-1 Samuyeli 8:1-5 usitshelani ngamadodana kaSamuyeli?

⁴ EBhayibhilini kulezibonelo zabantu abathola ilifa eliligugu kodwa behluleka ukuliqakathekisa. Ngokwesibonelo, umphrofethi uSamuyeli wakhonza uJehova uNkulunkulu kusukela esesemncane njalo waqhubeka esenza okuhle phambi kwakhe. (1 Sam. 12:1-5) Ngakho-ke wabatshiyela isibonelo esihle abantwabakhe uJoweli lo-Abhija futhi kwakungaba kuhle ukuthi benze njengaye. Kodwa lokhu kabazange babe lendaba lakho, bazenzela okubi. IBhayibhili lisitshela ukuthi abazange benze njengoyise, kodwa ‘bonakalisa ukwahlulela ngemfanelo.’​—Bala u-1 Samuyeli 8:1-5.

5, 6. Amadodana kaJosiya kanye lomzukulu wakhe baliqakathekisa yini ilifa ababelitshiyelwe? Chaza.

⁵ Amadodana eNkosi uJosiya lawo enza njengakaSamuyeli. UJosiya watshiyela amadodana akhe isibonelo esihle kakhulukazi. Lapho ugwalo loMthetho kaNkulunkulu lutholakala, lwabalelwa uJosiya. Wathi eseyizwile imilayo kaJehova wasebenza gadalala ukuthi ayilandele, wasusa zonke izithombe ezazikhona elizweni kanye lezinto ezaziphathelane lamadimoni njalo wakhuthaza abantu ukuthi balalele uJehova. (2 AmaKho. 22:8; 23:2, 3, 12-15, 24, 25) Siyabona-ke ukuthi uJosiya wayetshiyele amadodana akhe isibonelo esihle kakhulu. Ngokuya kwesikhathi, amadodana akhe amathathu kanye lomzukulu wakhe baba ngamakhosi kodwa akula loyedwa phakathi kwabo owaliqakathekisayo ilifa ayelamukele.

⁶ Owaba yinkosi ngemva kukaJosiya yindodana yakhe uJehoyahazi, kodwa “wenza ububi emehlweni kaJehova.” Wabusa okwezinyanga ezintathu kuphela wasethunjwa nguFaro waseGibhithe wamphosela ejele, njalo wafela khonale. (2 AmaKho. 23:31-34) Ngemva kwalokho, owaba yinkosi ngumfowabo uJehoyakhimi futhi wabusa okweminyaka engu-11. Laye wenza okubi, kazange akuqakathekise lokho ayekutshiyelwe nguyise. Yikho uJeremiya waphrofetha ngaye wathi: “Uzangcwatshwa njengobabhemi.” (Jer. 22:17-19) Abanye ababusa ngemva kukaJosiya kwakuyindodana yakhe uZedekhiya kanye lomzukulu wakhe uJehoyakhini. Benza okubi kakhulu njalo akula loyedwa phakathi kwabo owakhetha ukulandela isibonelo esihle sikaJosiya.​—2 AmaKho. 24:8, 9, 18, 19.

7, 8. (a) USolomoni walitshaphaza njani ilifa ayelitshiyelwe nguyise? (b) Izibonelo eziseBhayibhilini ezimayelana labantu abachitha ilifa labo zingasifundisani?

⁷ INkosi uSolomoni yemukela okunengi kakhulu okwakuvela kuyise uDavida njalo yaqalisa isenza kuhle. Lanxa yakhulela emulini eyayimthanda kakhulu uJehova, iNkosi le yacina ingasayiqakathekisi indlela elungileyo eyayihamba ngayo. “Ekuluphaleni kwakhe uSolomoni, abafazi bakhe baphambulela ukholo lwakhe kwabanye onkulunkulu, inhliziyo yakhe ayizange ilandele uJehova uNkulunkulu wakhe ngokupheleleyo, akusabanga njengokwenhliziyo kaDavida uyise.” (1 AmaKho. 11:4) Yikho-ke uJehova wamlahla.

⁸ Amadoda la esikhulume ngawo ayekhuliswe ngabazali ababemthanda uJehova njalo ayelethuba lokwenza okuhle. Kodwa kuyadanisa kakhulu ukuthi alidlalisa ithuba leli. Loba kunjalo kulabanye endulo abakusebenzisa kuhle kakhulu lokho ababekwamukele, futhi lalamuhla ayisibo bonke abatshaphaza ilifa labo. Ake sikhangele izibonelo zabantu ababesenza kuhle ezingalingiselwa ngamaKhristu asakhulayo.

BAKUQAKATHEKISA LOKHO ABABEKWAMUKELE

9. Kuyini okuhle kakhulu esingakulingisela okwenziwa ngamadodana kaNowa? (Khangela umfanekiso osekuqaliseni.)

⁹ Amadodana kaNowa ayisibonelo esihle kakhulu kithi. Uyise walaywa ukuthi akhe umkhumbi abesengena kuwo labendlu yakhe. Akuthandabuzwa ukuthi amadodana kaNowa ayekuzwisisa ukuthi kwakuqakathekile ukwenza intando kaJehova futhi abambisana loyise. Kanti njalo amncedisa esesakha umkhumbi, basebengena kuwo. (Gen. 7:1, 7) Akwenzelani konke lokhu? UGenesisi 7:3 uthi bangenisa izinyamazana emkhunjini ukuze ‘balombe uhlobo lwazo emhlabeni.’ Labantu basinda. Amadodana kaNowa akuqakathekisa lokho ayekuthole kuyise. Yikho athola isibusiso ngoba asetshenziswa ukuthi kulondolozwe usapho lwabantu kanye lokuthi kuvuselelwe ukukhonza kweqiniso emhlabeni owawusuhlanjululiwe.​—Gen. 8:20; 9:18, 19.

10. Amajaha amane angamaHebheru ayeseBhabhiloni atshengisa njani ukuthi ayeliqakathekisa iqiniso ayelifundisiwe?

¹⁰ Ngemva kwamakhulu eminyaka, amajaha amane angamaHebheru atshengisa ukuthi ayekwazi ukuthi kuyini okwakuqakathekile sibili. UHananiya, uMishayeli, u-Azariya kanye loDanyeli bathunjwa basebahanjiswa eBhabhiloni ngo-617 B.C.E. Amajaha la ayemahle njalo ayekhaliphile okokuthi ayengafika aphumelele kakhulu eBhabhiloni. Kodwa kazange azihluphe ngalokho. Lokho afika akwenza khonale kutshengisa ukuthi kawazange alikhohlwe ilifa lawo, okutsho izinto ayezifundisiwe. Amajaha la amane abusiswa kakhulu ngoba kawazange alilahle iqiniso ayelifundiswe lapho esakhula.​—Bala uDanyeli 1:8, 11-15, 20.

11. Izinto uJesu ayezifundiswe nguYise zabanceda njani abanye?

¹¹ Indaba yethu ephathelane lezibonelo ezinhle iyabe isele ilenga emoyeni nxa singasakhulumanga ngoJesu, iNdodana kaNkulunkulu. Kunengi kakhulu akuphiwa nguYise njalo wakuqakathekisa kakhulu. Siyabona ukuthi wayekuqakathekisa ayekufundisiwe ngoba wathi: “Ngikhuluma kuphela lokho uBaba angifundise khona.” (Joh. 8:28) Kanti njalo wayefisa ukusebenzisa lokho ayekwamukele ukuze ancede labanye. Watshela amaxuku abantu wathi: “Ngimele ngitshumayele izindaba ezinhle lakwamanye amadolobho njalo ngokuba yikho engakuthunyelwayo.” (Luk. 4:18, 43) UJesu watshela ababemlalele ukuthi ‘kabasibo abomhlaba’ ukuze abancede ukuthi babone ukuqakatheka kokungangeni ezintweni zomhlaba lo ongelandaba leqiniso elivela kuNkulunkulu.​—Joh. 15:19.

KUQAKATHEKISE OSUKWAMUKELE

12. (a) Amazwi aku-2 Thimothi 3:14-17 atshoni kwabasakhulayo abanengi lamuhla? (b) Yiyiphi imibuzo okumele amaKhristu asakhulayo ayisebenzise nxa ezihlola?

¹² Mhlawumbe lawe wakhuliswa ngabazali abamthandayo uJehova uNkulunkulu njengamajaha esikhulume ngawo. Nxa kunjalo lokho okwatshelwa uThimothi kungasebenza lakuwe. (Bala u-2 Thimothi 3:14-17.) “Okufundileyo” mayelana loNkulunkulu kanye lokuthi ungamthokozisa njani wakuthola kubazali bakho. Mhlawumbe baqalisa ukukufundisa useselusana. Yikho-ke kumele ukuthi lokhu kukuncede kakhulu ukuthi “uhlakaniphele insindiso ngokukholwa kuKhristu uJesu” kanye lokuthi ‘uwulungisele ngokupheleleyo’ umsebenzi kaNkulunkulu. Umbuzo oyisiqokoqela nanku: Uzatshengisa yini ukuthi uyakuqakathekisa lokho osukwamukele? Kungadingeka ukuthi uzihlole ukuze ubone ukuthi uyakuqakathekisa yini. Zibuze imibuzo enjengale: ‘Ngizwa njani nxa ngicabanga ngabanengi ababethembekile abaphila endulo ababengofakazi? Ngiyaziqhenya yini ngokuba nguFakazi kaJehova? Ngizwa njani ngokuthi lamuhla lami ngiphakathi kwabalutshwana uNkulunkulu ababiza ngokuthi ngabangane bakhe? Ngiyakunanzelela yini ukuthi ukwazi iqiniso kuyisibusiso esikhulu kakhulu abanye abangelaso?’

13, 14. Amanye amaKhristu asakhulayo enzani, kodwa kungani kuyibuthutha ukwenza lokho? Nika isibonelo.

¹³ Abanye abasakhulayo abondliwe ngabazali abangamaKhristu bangangawuboni umahluko omkhulu phakathi kweqiniso esilalo kanye lobumnyama obusemhlabeni lo obuswa nguSathane. Abanye bayalingeka ukuthi bayelunguza babone ukuthi kunjani ukuphila emhlabeni kaSathane. Kodwa kungaba lengqondo yini ukuthi ubone imota isiza ubususiyakuma phambi kwayo, ufuna nje ukubona ukuthi uzalimala yini kumbe ukuthi uzakufa? Akungeke kube lengqondo lokho! Lathi akulasidingo sokuthi siyecwila ‘ekuziphatheni okubi’ okwenziwa ngabantu bomhlaba lo besesibona sesiphakathi ukuthi kubuhlungu kangakanani.​—1 Phet. 4:4, The Holy Bible in Ndebele.

¹⁴ UGener ohlala e-Asia wakhuliswa ngabazali abangamaKhristu njalo wabhaphathizwa eleminyaka engu-12. Kodwa ekukhuleni kwakhe waqalisa ukuhawukela izinto ezenziwa ngabanye emhlabeni lo. Uthi: “Ngangifuna ukuzizwela ubunandi ‘benkululeko’ etholakala emhlabeni lo.” Waqalisa ukwenza izinto ezimbi ecatshile. Eseleminyaka engu-15 wayesesenza ezinye izinto ezimbi njengabangane bakhe ababengamahlongandlebe ngokwesibonelo wayesenatha futhi ekhuluma inhlamba. UGener wayesehlala ephuza kakhulu ukufika endlini ngenxa yokuthi wayeyabe ezidlalela imidlalo yamakhompiyutha elodlakela labangane bakhe. Kodwa ngokuya kwesikhathi wananzelela ukuthi izinto ezisemhlabeni lo ezikhanya zimnandi azincedi lutho ngitsho, lugebhezi nje. Esephendukile ebandleni wathi: “Kulezilingo ezinengi ezisangikhathaza, kodwa izibusiso ezivela kuJehova zinengi kakhulu okokuthi ubunzima lobu abutsho lutho.”

15. Kuyini okumele ucabangisise ngakho nxa ungakhuliswanga ngabazali abangamaKhristu?

¹⁵ Kulabanye futhi abasakhulayo esilabo emabandleni abangakhuliswanga ngabazali abangamaKhristu. Nxa ungomunye wabo, cabanga ngesibusiso esimangalisayo owasitholayo, ngoba usumazi uMdali njalo uyamkhonza. Kulamabhiliyoni abantu emhlabeni. Yikho-ke kuyisibusiso esikhulu ukuba phakathi kwalabo uJehova abadonsele kuye wabembulela iqiniso eliseBhayibhilini. (Joh. 6:44, 45) Ngokwesibonelo, emhlabeni wonke lamuhla nxa bekungabuthaniswa abantu abayi-1 000 ndawonye, uzathola ukuthi kulomuntu oyedwa kuphela phakathi kwabo oyabe elazi iqiniso. Wena uphakathi kwabalutshwana abalaziyo. Lokhu kumele kusithokozise kakhulu sonke, kungelani lokuthi salifunda njani iqiniso. (Bala u-1 Khorinte 2:12.) UGener uthi: “Ngiyazibuza ukuthi kambe ngingubani mina ukuthi ngaziwe nguJehova, uMnikazi wezinto zonke emhlabeni lasezulwini?” (Hubo. 8:4) Omunye udadewethu ongumKhristu laye wathi: “Abantwana besikolo bayaziqhenya kakhulu nxa umbalisi wabo ebazi. Lokhu kwenza kukhanye sibili ukuthi kuyisibusiso esikhulu ukwaziwa nguJehova, uMbalisi wethu oMkhulu!”

UZAKWENZANI?

16. AmaKhristu asakhulayo kumele akhethe ukwenzani?

¹⁶ Sithemba usukubonile ukuthi ulesibusiso esikhulu kakhulu. Ngakho-ke kungaba kuhle ukuthi uzimisele ukuba phakathi kwabalutshwana asebekhethe ukwenza okulungileyo ezimpilweni zabo. Nxa ungenza njalo, uyabe ulandela lokho okwakusenziwa yizinceku zikaJehova zasendulo ezazithembekile. Ukwenza njalo kungcono kakhulu kulokulandela abasakhulayo abanengi, abafanana leziphofu ezidonselana egodini ngoba bazacina bebhujisiwe.​—2 Khor. 4:3, 4.

17-19. Kuyini okungakunceda ubone ukuthi kuhle ngani ukwehlukana lomhlaba lo?

¹⁷ Kodwa akutsho ukuthi kuzahlala kulula ukwehlukana lomhlaba lo. Lanxa kunjalo, siyabe sihlakaniphile nxa singazehlukanisa lawo. Ngokwesibonelo: Cabanga ngomuntu ogijimayo osengene emncintiswaneni wama-Olympic lapho okuncintisana khona amazwe atshiyeneyo. Akuthandabuzwa ukuthi kwakumele abe ngohlukene labosowabo ukuze afike ebangeni asekulo. Kanti njalo kwakumele ayekele ukwenza izinto ezinengi ezazingamdlela isikhathi, acine eseziqeqetsha okwesikhathi esifitshane. Ngakho-ke waphumelela ngenxa yokuthi wayezimisele ukungenzi lokho okwakusenziwa ngabanye.

¹⁸ Abantu abasemhlabeni lo bacabanga ngempilo esiyiphila khathesi kuphela. Kodwa nxa ungacabanga ngekusasa lakho, uzehlukanise lomhlaba lo, njalo utshiyane lokuziphatha okungcolileyo okukuwo kanye lezinto ezingaphambanisa ubuhlobo bakho loNkulunkulu, uzathola “ukuphila okuyikuphila okuqotho.” (1 Tim. 6:19) Udadewethu esike sakhuluma ngaye uthi: “Nxa ungabambelela kulokho okukholwayo, uzazizwa unqobile sibili. Kutshengisa lokuthi uzimisele ukuthi ungalandeli okwenziwa ngabanengi emhlabeni lo obuswa nguSathane. Okuhle kakhulu yikuthi kuyabe kungani uyambona uJehova uNkulunkulu eziqhenya ngawe njalo ethokoza kakhulu! Yikho lapho obona khona ukuthi kuhle kakhulu ukwehlukana lomhlaba lo!”

¹⁹ Impilo ayisizi lutho nxa umuntu ecabanga ngalokho akuthola khathesi kuphela. (UmTshu. 9:2, 10) Nxa ungosakhulayo, nakana ngokuthi vele uphilelani njalo ucabangisise ngethuba olalo lokuthola ukuphila okungapheliyo. Ungenza njalo uzakhetha impilo ezakwenza usuthiseke njalo uzazimisela ukuthi ‘ungaphili njengabezizweni.’​—Efe. 4:17; Mal. 3:18.

20, 21. Nxa singakhetha kuhle sizazuzani, njalo kuyini esikhangelelwe ukuthi sikwenze?

²⁰ Nxa singakhetha kuhle, singaphila impilo engcono khathesi njalo sibe lethuba lokuzuza “ilifa lomhlaba,” okutsho ukuphila okungapheliyo. Zinengi kakhulu izibusiso esizilindeleyo okokuthi asingeke sizibale siziqede. (Mat. 5:5; 19:29; 25:34) Kodwa uNkulunkulu kasoze aphongusinika nje izibusiso lezi. Ukhangelele ukuthi senze okuthile. (Bala u-1 Johane 5:3, 4.) Yikho-ke nxa singahle sizimisele ukukhonza uJehova ngenhliziyo yonke khathesi, kuzasinceda kakhulu.

²¹ Kuyisibusiso esimangalisayo ukuthi samukele izinto ezinengi ezivela kuNkulunkulu. Silolwazi oluqondileyo ngeLizwi lakhe njalo siyalizwisisa iqiniso elimayelana laye kanye lalokho akuhlosileyo. Siyasikholisa kakhulu isibusiso sokubizwa ngebizo lakhe kanye lokuba ngoFakazi bakhe. UNkulunkulu usithembisa ukuthi kasoze asitshiye. (Hubo. 118:7) Kungaba kuhle ukuthi sonke nje, abadala labancane, sitshengise ukuthi siyakuqakathekisa lokho esakwamukelayo ngokuphila ngendlela etshengisa ukuthi silesifiso esikhulu sokuthi sinike uJehova ‘udumo nini lanini.’​—Rom. 11:33-36; Hubo. 33:12.