Uyakwenza Yini Okufunwa nguJehova?

Kulula ukuthi utshele umngane wakho omthanda kakhulu ukuthi, “Loba yini oyifunayo ungitshele, ngizakwenzela.” Kodwa kukalutshwana ukuthi amazwi la uphonguwatshela umuntu ongamaziyo kumbe oyabe umazi kodwa ungamjayelanga. Abangane abazwanana kakhulu abathunywa ukuthi benzelane okuhle.

IBhayibhili litshengisa ukuthi uJehova uhlala ebenzela izinto ezibathokozisayo labo abamkhonzayo. Ngokwesibonelo, iNkosi uDavida eyayingumngane kaNkulunkulu omkhulu yathi: ‘Zinengi, Jehova, Nkulunkulu wami, izimangaliso ozenzileyo. Izinto owasilungiselela zona, zingaba zinengi ngokweqileyo ukuzibalisa.’ (IHubo 40:5) Kanti njalo uJehova wenzela labantu abangakamazi izinto ezibathokozisayo. ‘Ubapha ukudla okunengi njalo agcwalise izinhliziyo zabo ngentokozo.’​—ImiSebenzi 14:17.

Sesibonile ukuthi uJehova uyakuthanda ukwenzela abanye izinto ezibathokozisayo. Yikho-ke abafuna ukuba ngabangane bakhe labo kumele benze izinto eziletha ‘intokozo enhliziyweni yakhe.’ (IZaga 27:11) Kodwa kuyini sibili ongakwenza ukuze uthokozise uNkulunkulu? IBhayibhili lithi: “Lingakhohlwa ukwenza okulungileyo kanye lokwabela abanye, ngoba uNkulunkulu uyathokoza ngemihlatshelo enje.” (KumaHebheru 13:16) Lokhu sekusitsho yini ukuthi ukwenza okulungileyo lokwabela abanye yikho kodwa umuntu okumele akwenze ukuze athokozise uJehova?

IBhayibhili lithi: “Kungelakukholwa akwenzakali ukuthokozisa uNkulunkulu.” (KumaHebheru 11:6) Uyakunanzelela yini ukuthi u-Abhrahama “wabizwa ngokuthi ngumngane kaNkulunkulu” ngemva kokuthi ‘esekholwe uNkulunkulu’? (UJakhobe 2:22, 23) UJesu Khristu laye wagcizelela ukuthi kumele ‘sikholwe kuNkulunkulu’ nxa sifuna ukuthi uNkulunkulu asibusise. (UJohane 14:1, The Holy Bible in Ndebele) Yikho-ke uNkulunkulu ufuna ukuthi labo abasondela kuye babe lokholo. Ungenzani ukuze ube lalo? Ungaqalisa ngokulifunda zikhathi zonke iLizwi lakhe, iBhayibhili. Lokhu kuzakwenza ukuthi ‘ukwazi intando yakhe’ ubusuthola ukuthi kuyini ongakwenza ukuze ‘umthokozise ngezindlela zonke.’ Nxa uqhubeka ufunda okunengi ngoJehova njalo usebenzisa imilayo yakhe elungileyo ekuphileni kwakho, ukholo lwakho luzaqhubeka luqina njalo uzasondela kakhulu eduze kwakhe.​—KwabaseKholose 1:9, 10.