Imibuzo Ebuzwa Ngabafundi

Ngesikhathi uSathane etshela u-Eva ukuthi wayengasoze afe nxa engadla isithelo sesihlahla sokwazi okuhle lokubi, wayekhuluma ngendaba esijayelekile yini emayelana lokuthi umphefumulo awufi?

Kukhanya wayengakhulumi ngayo. UDeveli kazange atshele u-Eva ukuthi umzimba wakhe wawuzakufa kodwa umoya uyephila kwenye indawo nxa esedle isithelo uNkulunkulu ayethe bangasidli. USathane wasebenzisa inyoka ukutshela u-Eva ukuthi ‘wayengasoze afe’ ngitsho nxa engadla isithelo leso. Ngamazwi la wayetshengisa ukuthi u-Eva wayezaqhubeka ephila futhi ekholisa ukuphila emhlabeni engabuswa nguNkulunkulu.​—Gen. 2:17; 3:3-5.

Manje yaqala nini imfundiso yokuthi umphefumulo awufi nxa ingaqalisanga e-Edeni? Kasikwazi. Esikwaziyo yikuthi konke ukukhonza kwamanga kwatshabalaliswa nguZamcolo ngesikhathi sikaNowa. Ngalesosikhathi akulamfundiso zamanga ezasalayo ngoba kwasinda abantu ababekhonza ngeqiniso, uNowa lemuli yakhe kuphela.

Yikho kumele ukuthi imfundiso esikhona lamuhla yokuthi umphefumulo awufi yaqala ngemva kukaZamcolo. Akuthandabuzwa ukuthi abantu abasabalala “emhlabeni wonke” ngesikhathi uNkulunkulu ephithanisa ulimi lwabantu eBhabheli bahamba lemfundiso yokuthi umphefumulo awufi. (Gen. 11:8, 9) Kungelani lokuthi indaba le engamanga yaqalisa nini esikwaziyo yikuthi yabangelwa ‘nguyise wamanga’ uSathane uDeveli futhi wathokoza eyibona isabalala.​—Joh. 8:44.