UMbuso KaNkulunkulu Uzaqalisa Nini Ukubusa Umhlaba?
Abanye abafundi bakaJesu babefuna ukwazi ukuthi uMbuso kaNkulunkulu wawuzaqalisa nini ukubusa. UJesu wabatshela ukuthi babengasoze balazi ilanga owawuzaqalisa ngalo ukubusa emhlabeni. (ImiSebenzi 1:6, 7) Kodwa wayeke wabatshela ukuthi kwakuzakuba lezenzakalo ezithile ezazizakwenzakala ngasikhathi sinye njalo abalandeli bakhe babezabona ngazo ukuthi “uMbuso kaNkulunkulu wawususeduze” lokuthi isikhathi sokuthi uqalise ukubusa sesifikile.—ULukha 21:31.
YIZIPHI IZENZAKALO EZAKHULUNYWA NGUJESU?
UJesu wathi: ‘Isizwe sizavukela isizwe, lombuso uvukele umbuso. Kuzakuba lokuzamazama komhlaba okwesabekayo. Ezindaweni ezehlukeneyo kuzakuba lokuswelakala kokudla lemikhuhlane emibi.’ (ULukha 21:10, 11) Konke lokhu kwakuzatshengisa ukuthi “uMbuso kaNkulunkulu ususeduze.” Izinto zonke lezi ziyenzakala yini emhlabeni wonke? Nampu ubufakazi:
1. IZIMPI
Ngomnyaka ka-1914 kwaba lempi eyahlukuluza abantu abanengi kakhulu. Kwakungakaze kube lempi enjalo embalini yabantu! Abezembali bathi umnyaka ka-1914 wantshintsha izinto ezinengi kakhulu. Ngalowo mnyaka kwaba lempi yomhlaba yokuqala njalo empini le kwasetshenziswa izikhali eziyingozi ezigoqela amabhomba ayewiswa zindizamtshina, izigwagwagwa, igasi ebulalayo lezinye izikhali. Kwalandela impi yomhlaba yesibili futhi empini le kwaqalisa ukusetshenziswa amabhomba alamandla kakhulu. Izimpi sezibulele abantu abanengi kakhulu kusukela ngo-1914 kuze kube lamuhla.
2. UKUZAMAZAMA KOMHLABA
I-Britannica Academic ithi umnyaka ngamunye kuba lokuzamazama komhlaba okukhulu okungaba ngu-100 okubangela “umonakalo omkhulu kakhulu.” Umbiko owakhitshwa yi-United States Geological Survey uthi kusukela ngabo-1900 kukhangelelwa ukuthi kube lokuzamazama komhlaba okukhulu okungu-16 okungenzakala ngaloba yiwuphi umnyaka. Abanye bathi okwenza kukhanye angathi ukuzamazama komhlaba sekukunengi kulakudala yikuthi abantu sebelemitshina engcono ebatshela kungakenzakali. Kungelani lokuthi bathini, ukuzamazama komhlaba kubulele abantu abanengi emhlabeni wonke.
3. UKUSWELAKALA KOKUDLA
Ukuswelakala kokudla emhlabeni wonke lamuhla kubangelwe yizimpi, ubugwelegwele, ukuwohloka kwezomnotho, ukungasetshenziswa kuhle komhlabathi lokungahleli kuhle nxa kuzaba lomumo womkhathi omubi. Umbiko we-World Food Programme ka-2018 uthi: “Abantu abangu-821 miliyoni bayalamba ikanti phakathi kwenani lelo, abangu-124 miliyoni baswela khona okokufaka emlonyeni.” Abantwana abangaba ngu-3,1 miliyoni bayafa umnyaka ngamunye ngenxa yokuswela ukudla okwakha umzimba. Ngo-2011, phakathi kwabantwana abangu-100 ababesifa, abangu-45 bakhona babebulawa yikuswela ukudla okwakha umzimba.
4. IMIKHUHLANE
Ibhuku elakhitshwa yi-World Health Organization lithi: “Kusukela ngomnyaka ka-2001, kube lemikhuhlane eminengi kakhulu enjenge-cholera, le-yellow fever futhi sekuleminye emitsha enjenge-SARS, i-pandemic influenza, i-MERS, i-Ebola le-Zika.” Lanxa abezesayensi labodokotela sebelolwazi olunengi ngemikhuhlane, lokhu besehluleka ukwelapha eminye yakhona.
5. UMSEBENZI WOKUTSHUMAYELA OWENZIWA EMHLABENI WONKE
UJesu wakhuluma ngesinye isenzakalo esasizakuba yingxenye yesibonakaliso. Wathi: “Lezizindaba ezinhle zoMbuso zizatshunyayelwa emhlabeni wonke ukuze kube lobufakazi ezizweni zonke, besekufika ukuphela.” (UMathewu 24:14) Lanxa kukunengi okungahambi kuhle emhlabeni, kukhona okuhle okwenzakalayo. Abantu abedlula 8 miliyoni, abayimihlobo etshiyeneyo batshumayela izindaba ezinhle zoMbuso kaNkulunkulu emazweni angu-240 ngezindimi ezedlula 1 000. Okunje akukaze kwenzakale loba nini!
ISIBONAKALISO LESI SITSHONI KITHI?
Konke okwakhulunywa nguJesu mayelana lezinsuku zokucina siyakubona kusenzakala lamuhla. Yindaba kumele sizihluphe ngalokhu? Ngenxa yokuthi uJesu wathi: “Nxa libona izinto lezi zisenzakala, yazini ukuthi uMbuso kaNkulunkulu ususeduze.”—ULukha 21:31.
Sekuseduze ukuthi uMbuso wenze ukuthi intando kaNkulunkulu yenziwe emhlabeni
Okwakhulunywa nguJesu lokulandelana kwezenzakalo okukhulunywa ngazo eBhayibhilini kusinceda sizwisise ukuthi uNkulunkulu wabeka uMbuso wakhe ezulwini ngo-1914.a Ngalowo mnyaka wabeka iNdodana yakhe uJesu Khristu ukuthi ibe yiNkosi. (IHubo 2:2, 4, 6-9) Sekuseduze ukuthi uMbuso kaNkulunkulu ubuse emhlabeni njalo uzakhipha bonke ohulumende abakhona ubususenza ukuthi umhlaba wonke ube lipharadayisi. Abantu bazahlala khona kuze kube nini lanini.
Sekuseduze kakhulu ukuthi kugcwaliseke amazwi asemthandazweni weNkosi athi: “UMbuso wakho kawuze. Intando yakho kayenziwe emhlabeni njengasezulwini.” (UMathewu 6:10) Kodwa kuyini obekusenziwa nguMbuso kusukela ngo-1914? Yiziphi izibusiso ezizalethwa nguMbuso nxa usubusa umhlaba?
a Ukuze uthole okunengi okuphathelane lo-1914, khangela amabala asekucineni 22, amakhasi 217 kusiya ku-220 ebhukwini elithi IBhayibhili Lisifundisani? elidindwe ngoFakazi bakaJehova.