Izibusiso Ezizatholwa Ngabantu Abalalela UNkulunkulu

Umphrofethi uMosi wathi nxa singalalela imithetho kaNkulunkulu sizabusiswa. (UDutheronomi 10:13; 11:27) Ubuntu bukaNkulunkulu obuhle benza simlalele. Okunye okwenza simlalele yikuthi siyamthanda futhi asifuni kumdanisa, hatshi ukwesaba ukuthi uzasijezisa. ILizwi lakhe lithi: “Ukuthanda uNkulunkulu yilokhu: ukuthi silalele imilayo yakhe njalo imilayo yakhe kayinzima.”—1 UJohane 5:3.

Ukulalela uNkulunkulu kuzasinceda njani? Nanzelela izindlela ezimbili ezilandelayo.

1. KUZASENZA SIHLAKANIPHE

“Mina nginguJehova, uNkulunkulu wakho, okufundisa lokho okuhle kakhulu kuwe, ekutshengisa indlela okumele uhambe ngayo.”—U-ISAYA 48:17.

UJehova uNkulunkulu, uMdali wethu, uyasazi futhi uyasiqondisa. Nxa sifuna ukuthi esikufundiswa nguNkulunkulu kusincede ekwenzeni izinqumo, kumele sibale iMibhalo Engcwele, sibone ukuthi uNkulunkulu ufuna senzeni besesikwenza.

2. KUZASENZA SITHOKOZE

“Abathokozayo yilabo abalizwayo ilizwi likaNkulunkulu balilandele!”—ULUKHA 11:28.

Abantu abanengi abenza lokho iLizwi likaNkulunkulu elikutshoyo bayathokoza sibili. Ngokwesibonelo, enye indoda ehlala eSpain yayilolaka futhi ingakwazi ukuphatha kuhle abanye, ngitsho lomkayo. Kodwa ngelinye ilanga yabala okunye okwabhalwa ngumphrofethi uMosi okumayelana loJosefa, indodana kaJakhobe. UJosefa wathengiswa wayakuba yisigqili njalo wavalelwa ejele kungelacala ayelenzile. Lanxa kunjalo waqhubeka emnene, ethethelela futhi ehlalisana labanye ngokuthula. (UGenesisi, izahluko 37-45) Indoda le ithi: “Ukucabanga ngalokho okwenziwa nguJosefa kwanginceda ngabamnene, ngabalomusa futhi ngaba ngumuntu ozibambayo. Khathesi, sengithokoza kakhulu.”

IMibhalo Engcwele ilamacebo amanengi okuthi singabaphatha njani abanye, sizaxoxa ngalokho esihlokweni esilandelayo.