Izibusiso Ezitholwa Yilabo Ababuyela Emazweni Akibo

ABAFOWETHU labodadewethu abanengi ababethuthele kwamanye amazwe ukuze bayesebenza babuyele emazweni akibo. Bafike bayancedisa ezindaweni ezilabamemezeli abalutshwana ngenxa yokuthi bayamthanda uJehova labantu. (Mat. 22:37-39) Kuyini abakutshiyayo futhi yiziphi izibusiso abazitholileyo? Asixoxeni ngabafowethu labodadewethu beCameroon esentshonalanga ye-Africa.

“SENGISENDAWENI EYIYO ‘YOKUGOLA’”

Ngo-1998 umfowethu okuthiwa ngu-Onésime wasuka eCameroon wayahlala phetsheya okweminyaka engu-14. Ngelinye ilanga esemhlanganweni webandla wezwa umzekeliso omayelana lokutshumayela. Umzalwane owayesenza inkulumo wathi: “Nxa wena lomngane wakho lingayagola inhlanzi endaweni ezitshiyeneyo, ubusunanzelela ukuthi yena ubamba inhlanzi ezinengi kulawe, ngeke yini usuke uye kuye?”

Umzekeliso lo wenza u-Onésime wacabanga ukubuyela eCameroon, lapho okwakulabantu abanengi abafuna ukufunda iBhayibhili. Kodwa wayezibuza ukuthi uzenelisa yini ukuphila eCameroon njengoba wayesehlale iminyaka eminengi phetsheya. Yikho wavakatsha wayahlala inyanga eziyisithupha kwasekusithi ngo-2012 wathuthela khona.

U-Onésime uthi: “Kwasekumele ngijayele ukutshisa lempilo yakhona. EWolu yoMbuso kwasekumele ngijayele ukuphinda ngihlale emabhentshini. Kodwa ukuzama ukulalelisisa kwanginceda ngoba kancane kancane ngaqalisa ukukhohlwa ngezitulo ezibuntofontofo.”

Ngo-2013 u-Onésime watshada loGéraldine, owayebuyele eCameroon ngemva kokuhlala eFrance okweminyaka eyisitshiyagalolunye. UJehova wababusisa njani ngenxa yokuthi baqakathekisa ukwenza intando yakhe ukwedlula loba yini? U-Onésime uthi: “Sangena iSikolo Sabavangeli BoMbuso sasesisiya sebenza eBhetheli. Nyakenye, ebandleni lethu kubhabhathizwe izifundo zeBhayibhili ezingu-20. Khathesi ngibona angani sengisendaweni eyiyo ‘yokugola.’” (Mak. 1:17, 18) UGéraldine wengeza esithi: “UJehova ungibusise ngendlela engangingayikhangelelanga.”

INTOKOZO YOKWENZA ABAFUNDI

UJudith wayethuthele eMelika kodwa wayefuna ukwenza okunengi ekukhonzeni. Uthi, “Sonke isikhathi nxa ngasengibuyela eMelika ngemva kokuvakatsha eCameroon ngangikhala ngoba kwasekumele ngitshiye abantu abanengi engasengiqalise ukufunda labo iBhayibhili.” Lanxa kunjalo uJudith wayesesaba ukubuyela eCameroon. Wayelomsebenzi olemali owawusenza enelise ukubhadala izindleko zokwelatshwa kukayise eCameroon. Kodwa wathemba uJehova wabuyela elizweni lakibo. Uyavuma ukuthi wayeke ayikhumbule impilo yaphetsheya. Wathandaza ecela uJehova ukuthi amncedise ajayele impilo ayeseyiphila njalo wakhuthazwa ngumbonisi wesiqinti lomkakhe.

Nxa uJudith ecabanga ngalokho okwenzakala esebuyele eCameroon uthi: “Ngeminyaka emithathu ngancedisa abantu abane ukuthi babhabhathizwe.” Esetshadile waba liphayona eliqakathekileyo futhi khathesi yena lomkakhe uSam-Castel bayahambela. Kwaphetha ngani ngoyise? UJudith labangakibo bathola isibhedlela esikwelinye ilizwe esavuma ukum-opharetha mahala. Okuthokozisayo yikuthi i-operation yahamba kuhle.

UKUNAKEKELWA NGUJEHOVA

Umfowethu okuthiwa nguVictor wathuthela eCanada. Wathi esebale isihloko se-Nqabayokulinda esimayelana lemfundo ephakemeyo wacabangisisa ngemfundo yakhe. Lokhu kwenza watshiya iyunivesithi waqalisa ukufundela umsebenzi wezandla. Imfundo leyo yayingasoze ithathe isikhathi eside njengeyeyunivesithi. Uthi: “Ikhosi le yenza ngaphangisa ukuthola umsebenzi futhi yayingivumela ukuthi ngiphayone, okwakuyinto okwasekulesikhathi eside ngifuna ukuyenza.” Ngokuhamba kwesikhathi uVictor watshada loCaroline basebevakatshela eCameroon. Baya egatsheni futhi abanye abazalwane babakhuthaza ukuthi bazencedisa eCameroon. UVictor uthi: “Sasingelasizatho sokwala njengoba sasivele sikhethe ukuphila impilo elula.” Lanxa uCaroline wayeke agule, bathuthela eCameroon.

UVictor loCaroline baba ngamaphayona esikhathi sonke ukuze bancedise abantu ababelesifiso sokwazi okunengi ngeBhayibhili. Babelemali ababeyiqogelele yikho kabazange basebenze okwenyanga ezithile. Baphinda baya eCanada bafika basebenza okwenyanga ezilutshwana basebebuyela eCameroon ukuze baqhubeke ngokuphayona. Yiziphi izibusiso abazitholayo? Bangena iSikolo Sabavangeli BoMbuso, baba ngamaphayona aqakathekileyo futhi khathesi bakha izakhiwo zenhlanganiso. UVictor uthi, “Ukutshiya impilo entofontofo esasiyiphila kwenza sathembela kakhulu kuJehova futhi wasinakekela.”

INTOKOZO ETHOLWA YILABO ABANCEDISA ABANTU UKUTHI BAZINIKELE KUJEHOVA

Ngo-2002 umfundi weyunivesithi eseGermany okuthiwa ngu-Alain, wabala iphetshana elithi Basha—Nizokwenzani Ngokuphila Kwenu? Akubalayo kwamnceda ukuthi atshintshe lokho ayehlele ukukwenza empilweni. Ngo-2006 wangena i-Ministerial Training School wasethunyelwa eCameroon, ilizwe azalelwa kulo.

Esekibo wafika wathola umsebenzi ayewenza ngamalanga athile. Ngokuhamba kwesikhathi wathola umsebenzi owawuzamnika imali ethe xaxa kodwa wayekhathazekile ngoba wawuzamqedela isikhathi, acine engasatshumayeli njengakuqala. Yikho wathi ecelwa ukuthi abe liphayona eliqakathekileyo wavumela phezulu. Umqhatshi wakhe wamthembisa ukumkhwezela umholo, kodwa wala. Ngemva kwesikhathi u-Alain watshada loStéphanie, owake wahlala iminyaka eminengi eFrance. Yibuphi ubunzima ahlangana labo esethuthele eCameroon?

UStéphanie uthi: “Ngaqalisa ukugulagula. Kodwa ngiyambonga uJehova lenhlanganiso yakhe ngoba ngangiselatshwa ngibe ngcono.” UJehova wabanika umvuzo ngenxa yokuqinisela kwabo. U-Alain uthi: “Sathi siyetshumayela kwesinye isigaba esikhatshana esithiwa yiKaté sathola abantu abanengana ababefuna ukufunda iBhayibhili. Ngokuhamba kwesikhathi sasesifunda labo ngefoni. Ababili bakhona babhabhathizwa futhi kwabunjwa iqembu.” UStéphanie wengeza esithi: “Akulanto ethokozisa ukwedlula ukuncedisa abantu ukuthi bazinikele kuJehova. Ukuba sendaweni elabamemezeli abalutshwana kwenze sancedisa abanengi ukuthi babhabhathizwe.” Khathesi u-Alain loStéphanie bayahambela.

“SENZA KHONA KANYE OKWAKUMELE SIKWENZE”

UGisèle wabhabhathizwa ngesikhathi efundela ukuba ngudokotela e-Italy. Wathanda impilo elula eyayiphilwa ngamaphayona ayemfundise iBhayibhili okokuthi laye wayesefuna ukwenza okunengi enkonzweni. Yikho waba liphayona lesikhathi sonke esafunda.

UGisèle wayefuna ukubuyela eCameroon ukuze enze okunengi ekukhonzeni kodwa kulento eyayimkhathaza. Uthi, “Kwasekumele ngitshiye ukuba yisizalwane se-Italy futhi ngehlukane labangekhaya labangane bami.” Lanxa kunjalo uGisèle wathuthela eCameroon ngoMay 2016. Ngokuhamba kwesikhathi watshada loLéonce njalo iwofisi yegatsha yathi baye e-Ayos ngoba kwakudingakala abamemezeli boMbuso edolobheni lelo.

Yayinjani impilo e-Ayos? UGisèle uthi: “Kwakuhlala amaviki kungelamagetsi yikho sasingenelisi ukutshaja amafoni ethu, okwakusenza ukuthi ahlale isikhathi engasebenzi. Ngafunda ukupheka ngomliIo. Sasihamba sisiyakukha amanzi ngamabhara ebusuku, sikhanyise ngamathotshi ngoba ngalesosikhathi emthonjeni kwakungaxokozeli.” Kuyini okwabanceda ukuthi baqinisele? UGisèle uthi: “Umoya kaJehova wasinceda ukuthi siqinisele futhi mina lomkami sasisekelana. Abangekhaya labangane babesikhuthaza njalo ngezinye izikhathi babesincedisa ngemali.”

UGisèle uyathokoza yini ngokuthi wabuyela elizweni lakibo? Uthi: “Ye! Ngiyathokoza sibili. Ekuqaliseni kwakunzima futhi sasike sidane kodwa sathi sesijayele sabona ukuthi senza khona kanye okwakumele sikwenze. Siyamthemba uJehova futhi sesiseduze kakhulu laye.” ULéonce loGisèle bangena iSikolo Sabavangeli BoMbuso futhi khathesi bangamaphayona aqakathekileyo esikhatshana.

Labo abatshiya ezinye izinto ukuze bayetshumayela emazweni akibo bafanana labagoli benhlanzi abatshengisa isibindi sokumelana lobunzima ukuze babambe inhlanzi ezinengi. Asithandabuzi ukuthi uJehova uzabakhumbula ngomusa abamemezeli laba abakhutheleyo ngenxa yothando abalutshengisa ebizweni lakhe. (Neh. 5:19; Heb. 6:10) Nxa uhlala phetsheya futhi kudingakala abamemezeli boMbuso elizweni lakini, ungenelisa yini ukubuyela? UJehova uzakubusisa ungenza njalo.—Zaga. 10:22.