Singaphila Phakade

1. Kuyini okuzakwenzakala nxa singacabangisisa ngesithembiso sikaJehova sokuphila okungapheliyo?

UJEHOVA uthembisa ukuthi labo abamlalelayo bazathola ‘ukuphila okungapheliyo.’ (Rom. 6:23) Ukucabangisisa ngalokho uJehova asithembise khona kwenza simthande kakhulu. UBaba wethu osezulwini usithanda okokuthi kasoze avume ukuthi sehlukaniswe laye.

2. Isithembiso sokuthola ukuphila okungapheliyo sisinceda njani?

² Isithembiso sikaNkulunkulu sokuthi sizaphila kuze kube nini lanini sisinceda siqinisele ebunzimeni. Lanxa izitha zethu zisethusela zisithi zizasibulala asiyekeli ukukhonza uJehova. Esinye isizatho esenza siqhubeke sikhonza uJehova lanxa sisethuselwa yikuthi siyakwazi ukuthi nxa singafa uzasivusa silethemba lokuphila nini lanini singasaphindi sife. (Joh. 5:28, 29; 1 Khor. 15:55-58; Heb. 2:15) Kuyini okwenza singathandabuzi ukuthi singaphila phakade? Nanzi ezinye izizatho.

UJEHOVA UZAHLALA EKHONA

3. Kuyini okwenza singathandabuzi ukuthi uJehova uyenelisa ukusenza siphile kuze kube nini lanini? (IHubo 102:12, 24, 27)

³ Siyakwazi ukuthi uJehova uyenelisa ukwenza ukuthi siqhubeke siphila kuze kube nini lanini ngenxa yokuthi nguye osinika ukuphila njalo uzahlala ekhona. (Hubo. 36:9) Cabanga ngeminye iMibhalo etshengisa ukuthi uJehova ubevele ekhona lokuthi uzahlala ekhona. IHubo 90:2 lithi uJehova ubevele ekhona “kusukela nini nini kuze kube nini lanini.” IHubo 102 lalo lilamazwi ahambelana lawevesi le. (Bala iHubo 102:12, 24, 27.) Umphrofethi uHabakhukhi yena wathi ngoBaba wethu osezulwini: “Awu Jehova, wena kawusiNkulunkulu kusukela nini lanini yini? Wena kawufi, Nkulunkulu wami, oNgcwele wami.”—Hab. 1:12.

4. Kumele sikhathazeke yini nxa sithwala nzima ukuzwisisa ukuthi uJehova ubevele ekhona? Chasisa.

⁴ Iyakuphica yini indaba yokuthi uJehova ubekhona kusukela “nini lanini”? (Isaya. 40:28) Ayisuwe wedwa. U-Elihu wathi ngoNkulunkulu: “Leminyaka yakhe ngeke senelise ukuyibala.” (Jobe. 36:26) Kodwa ukungazwisisi into ethile akutsho ukuthi ingamanga. Ngokwesibonelo, lanxa singazwisisi ukuthi ukukhanya kusebenza njani akutsho ukuthi akukho. Ngendlela efananayo abantu abasoze bakuzwisise ngokugcweleyo ukuthi uJehova ubevele ekhona lokuthi uzahlala ekhona. Kodwa iqiniso yikuthi uNkulunkulu kalasiqalo futhi uzahlala ekhona. Ukungazwisisi kwethu akutshintshi lutho ngoMdali. (Rom. 11:33-36) Wayevele ekhona umhlaba lezinto ezisemkhathini ezigoqela ilanga lenkanyezi kungakabi khona. IBhayibhili lisitshela ukuthi uJehova “wenza umhlaba ngamandla akhe.” Kanti njalo wayekhona ‘engakaweluli amazulu.’ (Jer. 51:15; Imiseb. 17:24) Kuyini okunye okwenza siqiniseke ukuthi singaphila phakade?

UJEHOVA WASIDALELA UKUTHI SIPHILE PHAKADE

5. Yiliphi ithemba u-Adamu lo-Eva ababelalo?

⁵ Ngokuhamba kwesikhathi zonke izinto eziphilayo ezadalwa nguJehova emhlabeni zazizakufa, kodwa abantu bona badalwa belethemba lokuphila okungapheliyo. Lanxa kunjalo, uJehova waxwayisa u-Adamu wathi: “Akumelanga udle isihlahla sokwazi okuhle lokubi, ngoba ngelanga ozasidla ngalo uzakufa sibili.” (Gen. 2:17) Aluba u-Adamu lo-Eva bamlalela uJehova babengasoze bafe. Mhlawumbe ngokuhamba kwesikhathi uJehova wayezacina ebavumele ukuthi badle ‘isihlahla sokuphila.’ Lokhu kwakuzabe kusitsho ukuthi uJehova ubaqinisekisa ukuthi ‘bazaphila kuze kube nini lanini.’b—Gen. 3:22.

6-7. (a) Kuyini okunye okutshengisa ukuthi abantu babengadalelwanga ukuthi bafe? (b) Kuyini ongafuna ukukwenza nxa sesiphila phakade? (Khangela imifanekiso.)

⁶ Abanye abezesayensi bathi ingqondo zethu ziyenelisa ukugcina ulwazi olunengi kakhulu ukwedlula lolo esingalugcina okwempilo yethu yonke. Lokho kuyamangalisa sibili! Ngo-2010 elinye ibhuku okuthiwa yi-Scientific American Mind lathi kucatshangelwa ukuthi ingqondo yethu ingagcina ulwazi olungaba ngama-gigabytes angu-2,5 miliyoni, okungalingana levidiyo engathatha amahola angu-3 miliyoni ukuyibukela (kumbe iminyaka edlula 300). Kodwa kumele ukuthi ingqondo zethu ziyenelisa ukugcina ulwazi olunengi ukwedlula lolo okukhulunywa ngalo ebhukwini leli. Lokho kutshengisa ukuthi uJehova wadala ingqondo yethu isenelisa ukugcina ulwazi olunengi kakhulu ukwedlula lolo esiluthola eminyakeni engu-70 kumbe engu-80 nje kuphela esiyiphilayo.—Hubo. 90:10.

⁷ UJehova waphinda wasidala silesifiso esikhulu sokuqhubeka siphila. IBhayibhili lithi uNkulunkulu ‘wenza ukuthi abantu babe lesifiso sokuphila kuze kube nini lanini.’ (Umtshu. 3:11) Lokhu ngokunye okwenza sibone ukufa kuyisitha sethu. (1 Khor. 15:26) Nxa singagula kakhulu asiphonguhlala silindele ukufa. Izikhathi ezinengi siyahamba esibhedlela kumbe sinathe amaphilisi ukuze selaphe umkhuhlane oyabe usihlasele. Senza konke okusemandleni ethu ukuthi siqhubeke siphila. Kanti njalo nxa singafelwa yisihlobo kumbe umngane esimthandayo sizwa ubuhlungu obukhulu okwesikhathi eside kungelani lokuthi ubenganani. (Joh. 11:32, 33) Kuyacaca ukuthi uMdali wethu osithandayo wayevele ehlose ukuthi siphile phakade ngoba wasinika isifiso sokuthi siphile kuze kube nini lanini kanye lezinto ezisinceda ukuthi siqhubeke siphila. Kodwa zikhona ezinye izizatho ezingenza sibe leqiniso lokuthi singaphila kuze kube nini lanini. Ake sixoxe ngokunye okwenziwa nguJehova kudala lakwenza khathesi okutshengisa ukuthi lokho ayekuhlosile akutshintshanga.

OKUHLOSWE NGUNKULUNKULU AKUTSHINTSHI

8. U-Isaya 55:11 usifundisani ngalokho uJehova ahlose ukusenzela khona?

⁸ Lanxa u-Adamu lo-Eva bawona basebebangela ukuthi abantwababo bafe, uJehova kazange atshintshe lokho ayekuhlosile. (Bala u-Isaya 55:11.) Ulokhu efuna siphile kuze kube nini lanini. Lokho sikubona nxa sikhangela lokho uJehova asekukhulumile lasekwenzile ukuze agcwalise inhloso yakhe.

9. UNkulunkulu usithembisani? (UDanyeli 12:2, 13)

⁹ UJehova uthembisa ukuthi uzavusa abafileyo abanike ithuba lokuthola ukuphila okungapheliyo. (Imiseb. 24:15; Tit. 1:1, 2) Indoda ethembekileyo uJobe yayingathandabuzi ukuthi uJehova uyafisa sibili ukuvusa abafileyo. (Jobe. 14:14, 15) Umphrofethi uDanyeli wayekwazi ukuthi abantu balethemba lokuvuswa baphile nini lanini. (Hubo. 37:29; bala uDanyeli 12:2, 13.) AmaJuda aphila ngesikhathi sikaJesu lawo ayekwazi ukuthi uJehova wayenganika izinceku zakhe ezithembekileyo ‘ukuphila okungapheliyo.’ (Luk. 10:25; 18:18) UJesu wakhuluma ngesithembiso leso kanengi njalo laye wavuswa nguYise.—Mat. 19:29; 22:31, 32; Luk. 18:30; Joh. 11:25.

10. Ukuvuswa kwabafileyo okwenzakala kudala kusitshengisani? (Khangela umfanekiso.)

¹⁰ UJehova nguye osinika ukuphila njalo ulamandla okuvusa abafileyo. Wanika umphrofethi u-Elija amandla okuvusa indodana yomfelokazi waseZarefathi. (1 Amakho. 17:21-23) Kanti njalo uNkulunkulu waphinda wanika umphrofethi u-Elisha amandla okuvusa indodana yowesifazana weShunemi. (2 Amakho. 4:18-20, 34-37) Izibonelo lezi lezinye eziseBhayibhilini zitshengisa ukuthi uJehova ulamandla okuvusa abantu abafileyo. Ngesikhathi uJesu esemhlabeni watshengisa ukuthi uYise wayemuphe amandla okuvusa abafileyo. (Joh. 11:23-25, 43, 44) Khathesi uJesu usezulwini njalo ‘uphiwe amandla wonke ezulwini lasemhlabeni.’ Yikho uyenelisa ukugcwalisa isithembiso sokuthi “bonke abasemathuneni” bazavuswa belethemba lokuphila kuze kube nini lanini.—Mat. 28:18; Joh. 5:25-29.

11. Inhlawulo isinceda njani ukuthi sithole ukuphila okungapheliyo?

¹¹ Kungani uJehova wavumela ukuthi iNdodana yakhe ayithandayo ife kabuhlungu? UJesu wasiveza isizatho lapho esithi “uNkulunkulu wawuthanda kakhulu umhlaba waze wanikela ngeNdodana yakhe ezelwe yodwa, ukuze wonke umuntu otshengisa ukuthi uyakholwa kuyo angabhujiswa kodwa abe lokuphila okungapheliyo.” (Joh. 3:16) UNkulunkulu wasinika ithuba lokuthi sithole ukuphila okungapheliyo ngokunikela ngeNdodana yakhe ukuthi ibe yinhlawulo yezono zethu. (Mat. 20:28) Umphostoli uPhawuli wayichasisa kuhle ingxenye le eqakathekileyo yenhloso kaNkulunkulu lapho esithi: “Njengoba ukufa kweza ngomuntu lokuvuswa kwabafileyo kuza ngomuntu. Njengoba nje bonke abantu besifa ngenxa ka-Adamu, bonke bazakwenziwa baphile ngenxa kaKhristu.”—1 Khor. 15:21, 22.

12. UJehova uzakugcwalisa njani lokho akuhlosileyo?

¹² UJesu wafundisa abafundi bakhe ukuthi bathandazele ukuthi uMbuso kaNkulunkulu uze lokuthi intando kaNkulunkulu yenziwe lapha emhlabeni. (Mat. 6:9, 10) Okunye uNkulunkulu akuhlosileyo yikuthi abantu baphile emhlabeni kuze kube nini lanini. Ukuze uJehova akwenze lokho ubeke iNdodana yakhe ukuthi ibe yiNkosi yoMbuso wakhe. Kanti njalo ubeqoqa abantu abavela emhlabeni abangu-144 000 ukuze basebenze loJesu ekugcwaliseni inhloso yakhe.—Isam. 5:9, 10.

13. Kuyini uJehova akwenzayo khathesi njalo wena kumele wenzeni?

¹³ Khathesi uJehova uqoqa “ixuku elikhulu” labantu njalo uyalifundisa lokho elingakwenza ukuze liphile ngaphansi koMbuso wakhe. (Isam. 7:9, 10; Jak. 2:8) Lanxa namuhla abantu abanengi emhlabeni bengabambananga ngenxa yokuzondana kanye lezimpi, ababumba ixuku leli elikhulu bazama ngamandla wonke ukuthi bathande yonke imihlobo yabantu. Batshengisa ngezenzo zabo ukuthi sebeqalisile ukukhanda izinkemba zabo zibe yizikali zamakhuba okulima. (Mik. 4:3) Bancedisa abantu ukuthi bathole “ukuphila koqobo” ngokubafundisa ngoNkulunkulu weqiniso kanye lalokho afuna ukukwenzela abantu kulokuthi baye ezimpini esezibulale abantu abanengi. (1 Thim. 6:19) Izihlobo zingabathwalisa nzima kumbe bangaswela imali ngenxa yokuthi basekela uMbuso kaNkulunkulu kodwa yena uba leqiniso lokuthi bayakuthola abakudingayo. (Mat. 6:25, 30-33; Luk. 18:29, 30) Lokhu kutshengisa ukuthi uMbuso kaNkulunkulu ukhona sibili lokuthi uzaqhubeka usenza lokho uNkulunkulu akuhlosileyo.

IKUSASA ELIHLE

14-15. UJehova uzasigcwalisa njani isithembiso sakhe sokususa ukufa kungasaphindi kube khona?

¹⁴ UJesu useyiNkosi yoMbuso kaNkulunkulu ezulwini njalo uzagcwalisa konke uJehova asithembisa khona. (2 Khor. 1:20) Kusukela ngo-1914 uJesu ubelokhu enqoba izitha zakhe. (Hubo. 110:1, 2) Sekuseduze ukuthi yena lalabo azabusa labo baqedise ukunqoba kwabo njalo babhubhise bonke abantu ababi.—Isam. 6:2.

¹⁵ Nxa uJesu esebusa okweminyaka eyinkulungwane abafileyo bazavuswa njalo abantu abalalelayo bazancediswa ukuthi babe ngabantu abapheleleyo. Ngemva kokuhlolwa kokucina, labo uJehova azakuthi balungile “bazakudla ilifa lomhlaba, bahlale kuwo kuze kube nini lanini.” (Hubo. 37:10, 11, 29) Kuyathokozisa ukuthi ‘isitha sokucina sizatshabalaliswa.’—1 Khor. 15:26.

16. Yisiphi isizatho esikhulu esenza sikhonze uJehova?

¹⁶ Sesibonile ukuthi ithemba lokuphila phakade livela eLizwini likaNkulunkulu. Ithemba leli lingasinceda ukuthi sihlale siqotho ezinsukwini lezi zokucina ezinzima. Kodwa ukuthola impilo engapheliyo akumelanga kube yiso sodwa isizatho esenza sihlale siqotho kuJehova. Isizatho esikhulu sokuqhubeka siqotho kuJehova lakuJesu kumele kube yikuthi siyabathanda kakhulu njalo lokhu kuzamthokozisa uJehova. (2 Khor. 5:14, 15) Nxa sithanda uJehova loJesu sizenelisa ukubalingisela besesitshela abanye ngethemba esilalo. (Rom. 10:13-15) Nxa singafunda ukuba lomusa futhi sibe ngabaphanayo, sizakuba ngabantu uJehova afuna babe ngabangane bakhe kuze kube nini lanini.—Heb. 13:16.

17. Kumele senzeni? (UMathewu 7:13, 14)

¹⁷ Uzakuba phakathi kwabantu abazathola ukuphila okungapheliyo yini? UJehova usivulele lelothuba. Sekukithi ukuthi sikhethe ukuqhubeka sihamba endleleni eya ekuphileni. (Bala uMathewu 7:13, 14.) Impilo izabe isinjani nxa sesiphila phakade? Sizaxoxa ngempendulo yombuzo lo esihlokweni esilandelayo.