UJehova Usincedisa Njani Ukuthi Sibekezele?

1. Yiziphi inhlupho abantu bakaJehova abahlangana lazo futhi uJehova ubathembisani? (U-1 Phetro 5:10)

BONKE abantu bakaJehova kumele babekezele ngoba insuku esiphila kuzo zinzima kakhulu. Abanye imizimba kayisavumi ngenxa yokugula. Ikanti abanye izinhliziyo zidabukile ngenxa yokufelwa. Abanye abafowethu labodadewethu bayahlukuluzwa ezimulini zabo kumbe ngohulumende ngenxa yokuthi bakhonza uJehova. (Mat. 10:​18, 36, 37) Kungelani lokuthi wena ukhathazwa kuyini, khumbula ukuthi uJehova uzakuncedisa ukuthi ubekezele.—Bala u-1 Phetro 5:10.

2. Kuyini okuzasinceda ukuthi sibekezele?

² Kutshoni ukubekezela? Umuntu obekezelayo uyaqinisela futhi kalahli ithemba lanxa ehlangana lobunzima, ehlukuluzwa loba elingwa. UJehova usinika “amandla amakhulu futhi angajayelekanga” ngoba uyakwazi ukuthi ngeke senelise ukubekezela engasincedisanga. (2 Khor. 4:7) Esihlokweni lesi sizaxoxa ngendlela uJehova asincedisa ngazo ukuthi sibekezele langalokho okumele sikwenze.

UKUTHANDAZA

3. Kungani sisithi umthandazo yisipho esimangalisayo?

³ UJehova usinike isipho esimangalisayo sokukhuluma laye lanxa singabantu abalesono. (Heb. 4:16) Kungani sisithi umthandazo yisipho esimangalisayo? Kungenxa yokuthi siyenelisa ukukhuluma loJehova ngaloba yisiphi isikhathi simtshela loba kuyini njalo yena uyasizwa kungelani lokuthi singaphi kumbe sithandaza ngaluphi ulimi. Uyasilalela ngitsho lalapho sisejele. (Jona. 2:​1, 2; Imiseb. 16:​25, 26) Lanxa siyabe sikhathazekile okokuthi siyaphelelwa ngamazwi esingawatsho kuJehova, yena uyakuzwisisa konke esiyabe sizama ukukutsho lokuthi sizizwa njani. (Rom. 8:​26, 27) Siyambonga kakhulu uJehova ngesipho lesi esimangalisayo!

4. Kungani kuqakathekile ukuthandaza sicela uJehova ukuthi asincedise sibekezele?

⁴ UJehova usitshela ukuthi “nxa sicela loba yini evumelana lentando yakhe uyasizwa.” (1 Joh. 5:14) Manje singamcela yini uJehova ukuthi asincedise sibekezele? Ye! Phela lokho kuvumelana lentando yakhe. Kungani sisitsho njalo? Nxa sibekezela ebunzimeni siyabe sitshengisa ukuthi siyamthanda uJehova futhi kuba segcekeni ukuthi uSathane uDeveli ngumqambimanga. (Zaga. 27:11) UJehova uphinda asithembise ukuthi ‘uzatshengisa amandla akhe ngokunceda labo abazinikele kuye ngenhliziyo yonke.’ (2 Imilan. 16:9) Lokhu kwenza singathandabuzi ukuthi uJehova uyafuna ukusincedisa njalo ulamandla okusinceda ukuthi sibekezele.—Isaya. 30:18; 41:10; Luk. 11:13.

5. Ukuthandaza kungakunceda njani ukuthi ube lokuthula? (U-Isaya 26:3)

⁵ IBhayibhili lithi nxa singathandaza kuJehova simtshela konke okusikhathazayo yena uzasinika, ‘ukuthula okwedlula konke ukuzwisisa okuzalinda izinhliziyo zethu lengqondo zethu.’ Kuyasiduduza kakhulu lokhu. (Flp. 4:7) Abantu abangamkhonziyo nxa behlangana lenhlupho bayazama ukwenza izinto ezitshiyeneyo bezitshela ukuthi zizabenza babe lokuthula kodwa kabakutholi. UJehova unika abantu bakhe ukuthula lokuhlaliseka okumangalisayo. Nxa sithandaza kuJehova siyabe sitshengisa ukuthi simthemba ngenhliziyo yonke futhi yena uzasinika ‘ukuthula okungapheliyo.’ (Bala u-Isaya 26:3.) Eyinye indlela asincedisa ngayo ukuthi sibe lokuthula yikusikhumbuza amavesi aduduzayo. Amavesi lawo enza sihlaliseke ngoba siyabe sikwazi ukuthi uJehova uyasithanda lokuthi ufuna sithokoze.—Hubo. 62:​1, 2.

6. Kuyini okunye ongakuthandazela? (Khangela lomfanekiso.)

⁶ Ongakwenza. Nxa uhlangana lobunzima, “phosela umthwalo wakho kuJehova” futhi umcele ukuthi akunike ukuthula. (Hubo. 55:22) Cela uJehova akunike ukuhlakanipha ukuze wazi okumele ukwenze. (Zaga. 2:​10, 11) Mncenge ukuthi akunike amandla okuthi wenelise ukuqinisela njalo ungakhohlwa lokumbonga. (Flp. 4:6) Zama ukucabangisisa ngezindlela uJehova akuncedisa ngazo futhi uthandaze umbonge ngalokho akwenzela khona. Ungavumi ukuthi inhlupho ophakathi kwazo zikwenze ukhohlwe indlela uJehova akuncedisa ngayo.—Hubo. 16:​5, 6.

ILIZWI LIKANKULUNKULU

7. Ukubala iBhayibhili kuzasinceda njani?

⁷ Okunye uJehova asinike khona okusinceda ukuthi sibekezele liLizwi lakhe iBhayibhili. IBhayibhili lilamavesi amanengi asinceda singathandabuzi ukuthi uJehova uzahlala esisekela. Ngokwesibonelo, kuMathewu 6:8 uJesu wathi: “UYihlo uyakwazi elikuswelayo lingakaceli lakucela.” Amazwi la akhulunywa ngumuntu omazi emqonda uJehova, yikho akumelanga sithandabuze ukuthi uJehova uyabubona ubunzima esiphakathi kwabo lokuthi uzimisele ukusincedisa. Zinengi izithembiso esizithola eBhayibhilini ezingasinceda ukuthi singakhalali kodwa siqhubeke sibekezela nxa sisebunzimeni.—Hubo. 94:19.

8. (a) Yisiphi isimiso esiseBhayibhilini esingasinceda ukuthi sibekezele? (b) Kuyini okuzasinceda ukuthi sikhumbule esiyabe sikubalile?

⁸ Izimiso eziseBhayibhilini zingasinceda ukuthi sibekezele futhi senze izinqumo ezinhle. (Zaga. 2:​6, 7) Ngokwesibonelo, iBhayibhili lisikhuthaza ukuthi singakhathazeki kakhulu ngokuthi elakusasa lizabe linjani. (Mat. 6:34) Nxa singajayela ukubala iBhayibhili nsuku zonke lokucabangisisa ngalokho esikubalayo, kuzabalula ukuthi sikukhumbule.

9. Kuzasinceda ngani ukubala indaba zabantu ababelokholo okukhulunywa ngabo eBhayibhilini?

⁹ IBhayibhili liphinda lisitshele ngabanye abantu abahlangana lobunzima obutshiyeneyo kodwa bancediswa nguJehova ngenxa yokuthi babemthemba. (Heb. 11:​32-34; Jak. 5:17) Ukucabangisisa ngokwenzakala ebantwini laba, kuzasinceda sizibonele lathi ukuthi uJehova ‘ungamandla ethu lendawo yethu yokucatsha futhi uyaphangisa ukusinceda nxa sisebunzimeni.’ (Hubo. 46:1) Ukucabangisisa ngezinceku zikaJehova ezaqhubeka zithembekile lanxa zazisebunzimeni kuzasinceda ukuthi lathi silingisele ukholo lwazo futhi siqhubeke sibekezela.—Jak. 5:​10, 11.

10. Kumele wenzeni ukuze iBhayibhili likuncede?

¹⁰ Ongakwenza. Bala iBhayibhili nsuku zonke ubusubhala phansi amavesi owabona ekunceda kakhulu. Abanye bayabala umbhalo wosuku ekuseni ukuze babe lokunye abazatshona becabanga ngakho. Lokhu yikho kanye okwanceda omunye udadewethu okuthiwa nguMarie.a Abazali bakhe babanjwa imvukuzane futhi ngokuhamba kwesikhathi umkhuhlane wabaqinela bacina betshonile. Pho kuyini okwamncedayo ngezikhathi lezi ezinzima? Uthi: “Ngangibala umbhalo wosuku nsuku zonke ekuseni futhi ngicabangisise ngawo. Lokhu kwakunginceda ukuthi ngingatshoni ngicabanga ngendubo zami kodwa ngicabangisise ngoJehova langalokho asifundisa khona esebenzisa iBhayibhili.”—Hubo. 61:2.

ABAFOWETHU LABODADEWETHU

11. Kuzasinceda njani ukukhumbula ukuthi ayisithi sodwa esehlelwa zinhlupho?

¹¹ UJehova usinike abafowethu labodadewethu ukuze asincede ukuthi sibekezele. Ukwazi ukuthi ‘inhlupho esiphakathi kwazo zehlela bonke abazalwane bethu kuyasinceda ukuthi siqinisele.’ (1 Phet. 5:9) Lokhu kutshengisa ukuthi singaze sihlangane laloba yiziphi inhlupho ziyabe zingaqalisi ngathi. Singenelisa ukuqhubeka siqinisela njengoba nje abanye abafowethu labodadewethu bedlule kuzo.—Imiseb. 14:22.

12. Abafowethu labodadewethu basincedisa njani futhi kuyini lathi okumele sibenzele khona? (U-2 Khorinte 1:​3, 4)

¹² Abafowethu labodadewethu bazasincedisa ukuthi sibekezele. Lokhu yikho kanye okwenzakala kumphostoli uPhawuli. Ezincwadini ezitshiyeneyo azibhalayo wabonga labo abamncedisa ngesikhathi ebotshiwe, abanye babo wabaqamba ngamabizo. Abantu laba bamduduza futhi bamncedisa langezinto ayezifuna. (Flp. 2:​25, 29, 30; Kol. 4:​10, 11) Lalamuhla abafowethu labodadewethu bayasincedisa ukuthi sibekezele njengoba nje lathi sibancedisa nxa besebunzimeni.—Bala u-2 Khorinte 1:​3, 4.

13. Kuyini okwanceda uMaya ukuthi abekezele?

¹³ Abafowethu lodadewethu bamkhuthaza kakhulu udadewethu okuthiwa nguMaya ohlala eRussia. Ngo-2020, amapholisa atheleka endlini yakhe afika afuza esafuza impahla zakhe. Udadewethu wabotshwa ngenxa nje yokukhonza uJehova. UMaya uthi: “Abafowethu labodadewethu babengifonela ikanti abanye babengibhalela amameseji bengikhumbuza ukuthi bayangithanda. Ngangivele ngikwazi ukuthi abafowethu labodadewethu bayangithanda kodwa abangenzela khona ngo-2020, kwangitshiya ngingelankani.”

14. Kungani kungamelanga sibaninele khatshana abafowethu labodadewethu? (Khangela lomfanekiso.)

¹⁴ Ongakwenza. Nxa uphakathi kwenhlupho ungabanineli khatshana abafowethu labodadewethu futhi ungabi lenhloni zokucela abadala bebandla ukuthi bakuncedise. Phela abadala ‘banjengendawo yokucatshela umoya lesiphephelo sokucatshela izulu.’ (Isaya. 32:2.) Hlala ukhumbula ukuthi abafowenu labodadewenu labo baphakathi kobunzima obutshiyeneyo. Yikho zimisele ukuncedisa labo abaphakathi kobunzima ngoba lokho kuzakunceda ukuthi uthokoze njalo ubekezele.—Imiseb. 20:35.

ITHEMBA LETHU

15. Ukucabanga ngezithembiso zikaJehova kwamnceda njani uJesu futhi kungasinceda njani lathi? (Heb. 12:2)

¹⁵ Ukukhumbula izinto esizithenjiswe nguJehova kuyasinceda ukuthi sibekezele. (Rom. 15:13) UJesu laye wayehlala ekhumbula lokho uJehova ayemthembise khona futhi lokho kwamnceda ukuthi ahlale ethembekile. (Bala uHebheru 12:2.) Wayekwazi ukuthi nxa engaqhubeka ethembekile uzangcwelisa ibizo likaYise. Wayekulindele ngabomvu ukubuyela kuYise ezulwini lokubusa lamaKhristu agcotshiweyo. Kasihlaleni sikhumbula ukuthi uJehova usithembise ukuthi sizaphila phakade emhlabeni omutsha. Ukukhumbula lokho kuzasinceda sibekezele njengoba siphila emhlabeni obuswa nguSathane uDeveli.

16. Ukucabangisisa ngezithembiso zikaJehova kumncede njani u-Alla futhi kuyini esikufundayo?

¹⁶ Ukucabanga ngesithembiso sokuphila emhlabeni omutsha kwamnceda kakhulu omunye udadewethu okuthiwa ngu-Alla ohlala eRussia. Umkakhe wabotshwa wasevalelwa entolongweni esalindele ukuthonisiswa. Manje kuyini okwanceda udadewethu ukuthi abekezele ngesikhathi konke lokhu kusenzakala? Uthi: “Ngihlala ngithandaza kuJehova ngimbonga ngalokho asithembise khona futhi lokho kwenza ngizimisele ukuhlala ngithembekile. Ngiyakwazi sibili ukuthi lizafika eliyisithutha ngoba uJehova uzanqoba futhi lokho kuzaba yikukhululwa kwethu.”

17. Singatshengisa njani ukuthi siyambonga uJehova ngethemba asiphe lona? (Khangela lomfanekiso.)

¹⁷ Ongakwenza. Zinike isikhathi sokucabangisisa ngalokho uJehova asithembise khona. Zibone ususemhlabeni omutsha ukholisa lezihlobo labangane. Lokhu kuzakunceda ubone ukuthi loba yibuphi ubunzima ophakathi kwabo khathesi ‘ngobesikhatshana futhi abutsho lutho.’ (2 Khor. 4:17) Okunye ongakwenza yikutshela abanye ngezithembiso zikaJehova. Akucabange ukuthi bathwele nzima kangakanani. Phela bona abazazi izithembiso zikaNkulunkulu. Mhlawumbe nxa ungaqala nje ukubachathekela ngoMbuso kaNkulunkulu kanye lezithembiso zakhe sebengafuna ukuzwa okunengi.

18. Kungani kumele simthembe uJehova?

¹⁸ IBhayibhili lisitshela ngendoda okuthiwa nguJobe eyake yaba phakathi kwelitshe lembokodo. Kodwa yathi isidlule ebunzimeni lobo yatshela uJehova yathi: “Sengikwazi ukuthi uyenelisa ukwenza zonke izinto lokuthi akulalutho olucabangayo ongehluleka ukulwenza.” (Jobe. 42:2) UJobe wayekwazi ukuthi konke okukhulunywa nguJehova kuyenzakala. Lathi siyakwazi ukuthi elikaJehova aliweli phansi. Khonokho yikho okusinceda ukuthi sibekezele nxa sisebunzimeni. Akucabange ngowesifazana osebhode wabaqeda odokotela edinga usizo kodwa engalutholi. Kuthi kusenjalo athole omunye udokotela omtshela ukuthi uhlupho lungaphi lokuthi uzamelapha njani. Kufanele ukuthi uyahlaliseka lanxa ekwazi ukuthi kuzathatha isikhathi ukuthi asile. Kuyabe sekulula lokuthi aqinisele ngoba uyabe esekwazi ukuthi ngokuhamba kwesikhathi ubuhlungu abuzwayo buzaphela. Lathi okuzasinceda ukuthi sibekezele yikukhumbula ukuthi sekuseduze ukuthi zonke inhlupho ezisithwalise amagabha avuzayo ziphele.

19. Kuyini okuzasinceda ukuthi sibekezele?

¹⁹ Sibonile ukuthi uJehova kasoze asilahle loba sekutheni. Nxa singathandaza kuye uyasilalela njalo asincedise esebenzisa labafowethu labodadewethu. Uphinda asincedise esebenzisa iLizwi lakhe iBhayibhili futhi asikhumbuze izithembiso ezikulo. Nxa singakusebenzisa konke lokho sizenelisa ukubekezela kuze kufike isikhathi lapho uJehova azaqeda khona konke okusithwalise nzima njalo abhubhise lomhlaba lo obuswa nguSathane.—Flp. 4:13.