Ngaba Ngumnali Lanxa Ngangilenhloni

Ngazalelwa e-Vienna, e-Austria ngo-1951 futhi abangakithi babesonta iRoma. Lanxa ngangilenhloni zokukhuluma labantu ngangikholwa kuNkulunkulu futhi ngihlala ngithandaza kuye. Ngathi sengileminyaka engu-9 ubaba waqalisa ukufunda laboFakazi bakaJehova futhi kungakayi ngaphi lomama waqalisa ukufunda.

Sasingena lebandla leDöbling eVienna. Kunengi esasikwenza siyimuli njengokubala iBhayibhili, ukungena imihlangano yebandla lokuncedisa emihlanganweni yeziqinti. Ubaba wangincedisa ukuthi ngimthande kakhulu uJehova ngisasemncane. Okunye ayehlala ekuthandazela yikuthi mina lomnawami sibe ngamaphayona. Kodwa mina ngangingakaze ngicabange ngakho.

INKONZO YESIKHATHI SONKE

Ngabhabhathizwa ngileminyaka engu-14, ngomnyaka ka-1965. Kodwa kwakungithwalisa nzima ukusukela abantu engingabaziyo ngibatshumayeza. Ngangihlala ngicabanga ukuthi abanye engangilingana labo babengcono kulami futhi lokhu kwangenza ngafisa ukuba ngumngane wabo. Ngathi ngisanda kubhabhathizwa ngaba labangane ababengakhonzi uJehova. Ngangikukholisa ukuba labo kodwa ngangikwazi ukuthi ukuba labangane abangamthandiyo uJehova kuyingozi. Lanxa ngangikwazi lokhu, kwakunzima ukuthi ngitshiyane labo kodwa uJehova wangincedisa.

Ngalesosikhathi omunye udadewethu oleminyaka engu-16 okuthiwa nguDorothée waba ngummemezeli ebandleni lethu. Wayekuthanda kakhulu ukutshumayela endlini ngendlu. Ngangimdala mbijana kulaye kodwa ngangingakhuthalanga njengaye ekutshumayeleni. Ngangizibuza ukuthi yindaba mina ngingatshiseki. Phela abazali bami babengoFakazi kodwa abakhe babengakhonzi futhi unina wayengezwa kuhle. Lanxa kunjalo uDorothée wayetshona ekutshumayeleni. Kusukela lapho ngahle ngazimisela ukwenzela uJehova okunengi. Saqalisa ukutshumayela sonke futhi kungakayi ngaphi saba ngamaphayona asizayo sacina sesingamaphayona esikhathi sonke. Lami ngasengikukholisa ukuba sekutshumayeleni njengoDorothée futhi wangincedisa ukuthi ngithole umuntu wokuqala engafunda laye iBhayibhili. Kwakungasangithwalisi nzima kangako ukuthi ngixoxe labantu engingabaziyo engangihlangana labo endlini ngendlu kumbe nxa sitshumayela emgwaqweni lakwezinye nje indawo.

Ngomnyaka engaqalisa ngawo ukuba liphayona lesikhathi sonke, kwathuthela omunye umzalwane okuthiwa nguHeinz ebandleni lethu. Umfowethu lo wafunda iBhayibhili ngesikhathi evakatshele umnewabo onguFakazi owayehlala eCanada. UHeinz wayeliphayona eliqakathekileyo futhi ngahle ngamthanda ngiqala ukumbona. Kodwa uhlupho yikuthi yena wayefuna ukuba ngumnali. Ngazama ngamandla ukuthi kungakhanyi ukuthi ngiyazifela ngaye. Sacina sithandana sasesitshada saqhubeka siphayona e-Austria.

ISIFISO SOKUBA NGUMNALI

Izikhathi ezinengi uHeinz wayeke axoxe ngesifiso sakhe sokuba ngumnali. Kazange ake angibambe ngamandla ukuthi ngicabange ngokuba ngumnali. Kodwa imibuzo ayengibuza yona yangenza ngaba lesifiso sokuba ngumnali, wayeke athi, “Njengoba singelabantwana awuboni yini ukuthi singenzela uJehova okunengi?” Okwakungenza ngesabe ukuba ngumnali yikuthi ngilenhloni. Lanxa ngangikukholisa sibili ukuya ekutshumayeleni lokuba liphayona lesikhathi sonke, ngangicabanga ukuthi ukuba ngumnali kuzangithwalisa nzima. Kodwa umkami kazange adele, wayehlala engikhuthaza ukuthi ngicabange ngokuthi ngingabancedisa njani abantu kulokukhathazeka ngokuthi ngilenhloni.

Kancane kancane isifiso sokuba ngumnali sakhula, yikho safila amafomu okuya eGiliyadi. Igatsha langicela ukuthi ngizame ukuthuthukisa indlela engangikhuluma ngayo lengangizwisisa ngayo ulimi lwesiNgisi. Ngazama ukukwenza lokho abazalwane ababengitshele khona. Ngafunda ulimi lwesiNgisi okweminyaka emithathu eyalandelayo. Kodwa sathi sisalibele sacelwa ukuthi siyengena lebandla leSalzburg, e-Austria, elalikhuluma ulimi lwesiSerbo-Croatian. Satshumayela endaweni leyo okweminyaka engu-7 eyalandelayo futhi umkami waba ngumbonisi wesiqinti okomnyaka owodwa, ehambela amabandla akhuluma ulimi lolo . Ulimi lolo lwalunzima sibili, kodwa uJehova wasibusisa ngoba sathola abantu abanengi ababefuna ukufunda.

Ngo-1979 sacelwa ukuthi siyevakatshela eBulgaria. Kodwa umsebenzi wethu wawungavunyelwa elizweni lelo yikho asizange sitshumayele. Senelisa ukungenisa ngudlu amabhuku enhlanganiso yethu ayezanceda odadewethu abahlanu ababehlala eSofia okuyiso isigodlo seBulgaria. Ngangisesaba kodwa uJehova wasincedisa ukuthi siwenze umsebenzi lo. Odadewethu laba babelesibindi futhi bethokoza lanxa babekwazi ukuthi bangabotshwa loba nini. Ukubona indlela ababemthemba ngayo uJehova kwangenza lami ngazimisela ukwamukela loba yiwuphi umsebenzi engingawunikwa yinhlanganiso.

Saphinda safila amafomu okuya eGiliyadi futhi sanxuswa. Sasizitshela ukuthi isikolo lesi sizasingena ngesiNgisi eMelika. Kodwa ngoNovember 1981, inhlanganiso yayisilekilasi yeGiliyadi eyayisenzelwa eGermany. Yikho sangena isikolo lesi ngolimi lwesiGerman futhi ngangiluzwisisa. Kodwa sasizibuza ukuthi sasizathunywa ngaphi nxa sesiqede isikolo.

UKUTSHUMAYELA ELIZWENI ELILEZIMPI

Sacelwa ukuthi siye eKenya. Kodwa abafowethu ababesegatsheni leKenya basibuza ukuthi singavuma yini ukuyasebenza e-Uganda elizweni elingumakhelwana. Izinto zazingamanga kuhle kwezombusazwe ngoba kwakubusa u-Idi Amini owayehluthunele uhulumende we-Uganda umbuso. Ngeminyaka leyo kwafa abantu abanengi futhi abanengi babedubeka okuzwayo. Kwazothi ngo-1979 ababephikisana lo-Idi Amini bamthathela amandla bamkhipha esikhundlleni. Ukuzwa imibiko enjengaleyi kwakungenza ngesabe ukuya elizweni lelo. Kodwa esasikufunde eGiliyadi kwakusincede salungiselela loba yini esasizahlangana layo. Yikho savuma ukuya e-Uganda.

Kwakunzima kakhulu ukuphila e-Uganda. Nanku uHeinz ayekukhulumile ngendaba le ebhukwini lomnyaka laboFakazi bakaJehova lika-2010, wathi: “Kwakungelamanzi, kungelamagetsi lezinye izinto eziqakathekileyo, amafoni ayengasebenzi. Kwakujayelekile ukuthi ilanga lingavele litshone kuzwakale imibhobho ikhala abantu bebulalana futhi abanye begqekeza ezindlini. Abantu basebetshona bezivalele ezindlini ngenxa yokwesaba.” Lanxa izimo zazinzima kangaka, abafowethu be-Uganda baqhubeka bekhonza uJehova bethembekile njalo bethokoza!

Safika eKampala isigodlo se-Uganda ngo-1982. Omunye umfowethu okuthiwa nguSam lomkakhe uChristina Waiswa basamukela kuhle kakhulu. Yibo esahlala labo okwenyanga ezinhlanu. Babehlala labantwababo abahlanu lezinye izihlobo zabo ezine. Izikhathi ezinengi lapha ekhaya kwakudliwa kanye ngelanga. Khonalokhu kutshengisa ukuthi imuli yakoWaiswa yayilomusa sibili ngoba sasihlephunelana khonalokho okuncane okwakukhona. Kunengi kakhulu esakufunda emulini le. Ezinye izifundo zakhona sazisebenzisa ngesikhathi sesihlala sodwa. Safunda ukugeza ngamanzi amalutshwana lokuthi amanzi esiyabe sihlambulule ngawo impahla siwasebenzise esambuzini. Ngo-1983, sathuthela kwenye indawo eyayithule khonapho eKampala.

Sasikukholisa kakhulu ukutshumayela. Kweyinye inyanga sanika abantu omagazini abadlula 4 000! Okunye esakuthanda kakhulu yikubona indlela abantu ababelamukela ngayo iqiniso. Babezimisele sibili ukumhlonipha uNkulunkulu futhi babekuthanda ukuxoxa ngeBhayibhili. Inyanga ngayinye sasifunda labantu abangu-20 kusiya kwabangu-30. Kunengi kakhulu esakufunda ebantwini esasifunda labo iBhayibhili. Lanxa babehamba emihlanganweni yebandla ngenyawo iviki ngayinye babethokoza, wawungeke uzwe bekhonona.

Ngo-1985 lango-1986, kwaphinda kwabalezimpi ezimbili e-Uganda. Abantwana abanengi basebengamasotsha. Wawuhlangana labo bethwele inkalakatha zemibhobho futhi yibo ababesetsha loba ngubani odlulayo. Sasihlala sithandaza kuJehova simcela ukuthi asincedise sihlaliseke lokuthi sibe lelihlo elibukhali ukuze sibalekele izingozi ezazingavuka njengoba sasizimisele ukuqhubeka sidinga abantu ababefuna ukufunda ngaye. Lakanye uJehova wayiphendula imithandazo yethu. Sasisithi singahlangana lomuntu owayefuna ukufunda ngoJehova sihle sikhohlwe lokuthi kulempi.

Okunye esasikukholisa yikutshumayeza abantu abavela kwamanye amazwe. Ngokwesibonelo, safunda loMurat loDilbar Ibatullin, ababevela eTatarstan eRussia. UMurat wayengudokotela. Bobabili babhabhathizwa futhi lokhe bekhonza uJehova bethembekile. Ngokuhamba kwesikhathi ngahlangana loTatjana Vileyska, owayehlulukelwe kakhulu okokuthi wayesecabanga ukuzibulala. Ngemva kokubhabhathizwa uTatjana wabuyela u-Ukraine futhi ngokuhamba kwesikhathi waqalisa ukuhumutsha amabhuku ethu ngolimi lwesi-Ukraine.a

SAPHIWA ISABELO ESITSHA

Ngesikhathi sivakatshele e-Austria ngo-1991, igatsha lasibhalela incwadi lisitshela ukuthi sasesiphiwe umsebenzi omutsha: Kwasekumele siye eBulgaria. Kwasekuleminyaka umsebenzi wethu wokutshumayela uvinjelwe emazweni amanengi aseYurophu, okugoqela lakweleBulgaria. Kodwa lokhu kwasokutshintshile. Ngike ngatsho ekuqaliseni ukuthi sasingenisa amabhuku enhlanganiso ngudlu elizweni leli. Kodwa khathesi sasesicelwa ukuthi siyetshumayela khona.

Abafowethu basicela ukuthi sihle siqonde eBulgaria singalugxobi e-Uganda. Asizange sisabuyela e-Uganda ukuyaqoqa okuzimpahla kwethu lokuvalelisa abafowethu labodawethu kodwa sahle saqonda egatsheni leGermany. Saphosela impahla zethu emoteni sangena umango saya eBulgaria. Sacelwa ukuthi singene ebandleni elalilabamemezeli abangaba ngu-20 elaliseSofia.

LaseBulgaria sahlangana lobunzima obutshiyeneyo. Ulimi lwakhona sasingalwazi futhi kwakulamabhuku amabili kuphela atholakala ngolimi lwesiBulgarian, ibhuku elithi The Truth That Leads to Eternal Life lelithi My Book of Bible Stories. Kwakunzima lokuthola abantu ababefuna ukufunda iBhayibhili. Lanxa kunjalo, abafowethu labodadewethu babekhuthele ekutshumayeleni. Lokho kwenza ukuthi amalunga esonto ye-Orthodox aqalise ukuhluphana laboFakazi.

Ngo-1994 uhulumende weBulgaria wathi oFakazi yisonto engekho emthethweni. Abantu abanengi basebecabanga ukuthi oFakazi bayingozi emphakathini. Ngalesosikhathi oFakazi abanengi babotshwa. Kulezindaba ezazingamanga aluhlaza tshoko ezaziphuma kumaphephandaba lakuma-TV. Abantu besithi oFakazi bangababulali yikho besalisa abantwababo ukuthi bafakwe igazi nxa begula. Okunye ababekukhuluma yikuthi sasitshela abanye bethu ukuthi nxa impilo isinzima kakukubi ukuthi bazibulale. Kwasokunzima sibili ukuthi sitshumayele. Abantu babesithi bangasibona sitshumayela basithethise kumbe basibizele amapholisa ikanti kwezinye izikhathi babesijikijela. Kwakungasavunyelwa ukuthi amabhuku adindwa yinhlanganiso yethu angene elizweni leli. Khona lokuthola indawo esasingangenela kuyo imihlangano kwasokunzima kakhulu. Ngelinye ilanga amapholisa aphongumisa umhlangano wethu wesabelo. Mina loHeinz sasingakujayelanga ukuphathwa ngalindlela. Sawubona sibili umehluko omkhulu, kwasokuzicacela ukuthi asisekho e-Uganda. Phela abantu be-Uganda babelomusa futhi bekuthanda ukufunda iBhayibhili. UJehova wasincedisa ukuthi siqhubeke sibekezela njalo sithokoza lanxa kwakunzima.

Ukuqeda isikhathi esinengi silabafowethu labodadewethu kwasinceda kakhulu. Babemthanda uJehova futhi wawuzibonela ukuthi babekukholisa ukuba lathi. Sasincedisana ngezindlela ezitshiyeneyo futhi lokhu kwenza sathandana kakhulu. Lokho kwasifundisa ukuthi nxa singavele sithande abantu futhi sibancedise sizathokoza kungelani lokuthi sihlangana labuphi ubunzima.

Kodwa ngokungenana kweminyaka izinto zabangcono. Inhlanganiso yethu yaphinda yabhaliswa ngokusemthethweni ngo-1998 futhi saqalisa ukuthola amabhuku atshiyeneyo ngolimi lwesiBulgarian. Ngo-2004 kwanikelwa kuJehova izakhiwo zegatsha ezintsha. Sikhuluma nje, khathesi sokulabamemezeli abedlula 2 953 emabandleni angu-57 aseBulgaria. Emnyakeni wenkonzo ka-2024, abangena iSikhumbuzo babengu-6 475. Kwaqala kulabodadewethu abahlanu ebandleni elaliseSofia kodwa khathesi sokulamabandla angu-9! Sikubonile sibili ukugcwaliseka kwamazwi athi “abalutshwana bazakuba yinkulungwane.”—Isaya. 60:22.

OBUNYE UBUNZIMA ESIHLANGANE LABO

Ngake ngahlaselwa ngumkhuhlane omubi owenza ngacina ngisiya kwelatshwa e-India. Odokotela bathola ukuthi ngangile-brain tumor. Ngalaliswa okwamahora angu-12 ngi-opharethwa futhi ngahlala egatsheni le-India ngaze ngaba ngcono. Ngemva kwalokho sasesibuyela eBulgaria.

Umkami wabanjwa umkhuhlane ongajayelekanga okuthiwa yi-Huntington’s disease. Umkhuhlane lo wawusenza kube nzima ukuthi ahambe kumbe ukuthi akhulume lokuthi enze nje ezinye izinto. Umkhuhlane lo waqhubeka usiba mubi okokuthi yimi okwasekumele ngimenzele phose yonke into. Ngangikhathazeka sibili sengihlala ngizibuza ukuthi ngizawathatha ngaphi amandla okuncedisa umkami. Kodwa umfowethu osakhulayo okuthiwa nguBobi wayejayele ukumthatha ahambe laye ekutshumayeleni. Kwakungamyangisi ngitsho uBobi ukuhamba lomuntu owayekhuluma nzima lowayekhanya engaphilanga. Kwakungiduduza ukwazi ukuthi uBobi wayezahlala engincedisa ukunakekela umkami. Mina loHeinz sakhetha ukungabi labantwana ukuze senelise ukuya loba ngaphi lapho uJehova asithuma khona. Kodwa uJehova wasinika uBobi ukuthi abe ngumntanethu futhi uBobi usincedise ngendlela emangalisayo kakhulu.—Mak 10:​29, 30.

Omunye umkhuhlane uHeinz atshukana lawo yi-cancer. Ngadabuka kakhulu umkami etshona ngo-2015. Ngemva kokutshona kwakhe kwakungani ngiyinhlanzi etshelwe ngamanzi. Kunengi kakhulu umkami ayengincedisa ngakho. Ngimkhumbula nsuku zonke, kimi kungani uyaphila! (Luk. 20:38) Ngihlala ngizikhumbula izingxoxo ezimnandi esasisiba lazo lamacebo ayengitshela wona engilokhe ngiwasebenzisa lalamuhla. Angisoze ngikukhohlwe konke esakwenzela uJehova sindawonye. Ngimbonga kakhulu uJehova.

UJEHOVA UNGINCEDISILE

UJehova ubengincedisa kubo bonke ubunzima engidlule kubo. Wangincedisa ukuthi ngenelise ukuba ngumnali obathanda kakhulu abantu lanxa ngingumuntu olenhloni. (2 Thim. 1:7) Ngiyambonga kakhulu uJehova ngesibusiso anginike sona mina lomnawami ukuthi sibe senkonzweni yesikhathi sonke. Lokhu yikho kanye ubaba ayehlala ekuthandazela sisakhula. Khathesi umnawami lomkakhe balesibusiso sokuvakatshela amabandla akhuluma ulimi lwesiSerbia eYurophu. Umkakhe ngumbonisi wesiqinti.

Ukubala iLizwi likaNkulunkulu kwenza ngibe lokuthula njalo ngihlaliseke. Okunye okunginceda kakhulu yikukhuleka ngenhliziyo yonke “njengoba nje uJesu wayesenza.” (Luk. 22:44) Eyinye indlela uJehova aphendula ngayo imithandazo yami yikusebenzisa abafowethu labodadewethu engilabo ebandleni leNadezhda, eSofia abangithanda kakhulu. Bahlala benginxusa ukuthi sibe ndawonye njalo ukuba labo kungenza ngithokoze.

Ngihlala ngicabanga ngokuthi impilo izabe isinjani emhlabeni omutsha. Ngibabona ngelihlo lengqondo abazali bami bephambi komuzi wabo omuhle kakhulu labo bebahle futhi sebebatsha. Kuze kube angathi ngiyambona udadewethu epheka ukudla okumnandi okugobhozisa amathe. Umkami yena kuyabe kungathi ngimbona eme eceleni kwebhiza lakhe ayelithanda kakhulu. Ukucabanga ngezinto zonke lezi kungenza ngimbonge kakhulu uJehova.

Nxa ngicabangisisa ngakho konke okwenzakale empilweni yami lalokho engizakukholisa emhlabeni omutsha, ngivumelana lamazwi akhulunywa nguDavida atholakala kuHubo 27:​13, 14. Wathi: “Kambe bengizakuba yini aluba bengingakholwa ukuthi ngizabubona ubuhle bukaJehova ngisaphila? Themba uJehova, qina ube lesibindi. Mthembe uJehova.”