Imibuzo Ebuzwa Ngabafundi
Sizakuma nini ukutshumayela izindaba ezinhle?
KuMathewu 24:14 uJesu wathi: “Lezizindaba ezinhle zoMbuso zizatshunyayelwa emhlabeni wonke ukuze kube lobufakazi ezizweni zonke, besekufika ukuphela.” Ibala lesiGrikhi elihunyutshwe ngokuthi ukuphela elasetshenziswa nguJesu evesini le lakuvesi 6 lo-13 litsho ukucina komhlaba lo obuswa nguSathane okuzakwenzakala ngesikhathi sempi ye-Amagedoni. (Isam. 16:14, 16) Lokhu kutsho ukuthi sizaqhubeka sitshumayela izindaba ezinhle langesikhathi sokuhlupheka okukhulu. Kanje vele kuyini ebesikukholwa ngendaba le?
Eminyakeni edlulileyo besizwisisa ukuthi umsebenzi wokutshumayela izindaba ezinhle uzakuma ngesikhathi kuqalisa ukuhlupheka okukhulu lapho okuzabhujiswa khona iBhabhiloni Enkulu. (Isam. 17:3, 5, 15, 16) Besikholwa ukuthi nxa ukuhlupheka okukhulu kungaqalisa kuyabe kungaselasikhathi sokuthi abantu bafunde ngoJehova. Sasisithi “umnyaka womusa kaJehova” uyabe usuphelile. (Isaya. 61:2) Sasicabanga lokuthi abazasinda yilabo ababekhonza uJehova ukuhlupheka okukhulu kungakaqalisi. Sasibafananisa lamaJuda asindayo ngesikhathi iJerusalema ibhujiswa ngo-607 B.C.E. AmaJuda la kwakungathi afakwe uphawu lokusinda emabunzini awo ngoba ayekhonza uJehova futhi ezonda okubi. (Hez. 5:11; 9:4) Indlela ebesizwisisa ngayo indaba le ayivumelani lamazwi kaJesu akuMathewu 24:14. Amazwi asevesini le atshengisa ukuthi abantu sebengatshintsha bakhethe ukukhonza uJehova ngesikhathi sokuhlupheka okukhulu, impi ye-Amagedoni ingakagadli.
Sesiwuzwisisa ngcono umbhalo kaMathewu 24:14. Lokhu sekusitsho ukuthi sokumele sitshintshe lendlela esizwisisa ngayo uSambulo 16:21, okhuluma ngokutshumayela umlayezo oyabe unjengesiqhotho. Ukuhlolisisa amavesi la kwenze sabona ukuthi kawaphikisani. Kungani sisitsho njalo? Kungenxa yokuthi indlela abantu ababona ngayo izindaba ezinhle iyatshiyana. IBhayibhili lithi izindaba ezinhle ‘ziluqhatshi olumnandi kwabasindiswayo’ kodwa ‘ziliphunga lokufa’ ezitheni zikaNkulunkulu. (2 Khor. 2:15, 16) Izitha zikaNkulunkulu azifuni lakuzwa ngezindaba ezinhle ngoba umlayezo esiwutshumayelayo ubuchaya egcekeni bonke ububi bomhlaba kaSathane osuzulelwa ngamanqe.—Joh. 7:7; 1 Joh. 2:17; 5:19.
Isiqhotho okukhulunywa ngaso kuSambulo 16:21 sizabe ‘sisikhulu ngendlela engajayelekanga.’ Lokhu kungabe kusitsho ukuthi ngesikhathi sokuhlupheka okukhulu abantu abanengi kakhulu bazatshunyayezwa futhi babemazi uNkulunkulu wethu uJehova. (Hez. 39:7) Kambe ukuthi bakhona yini abazazamukela izindaba ezinhle nxa iBhabhiloni Enkulu isibhujisiwe? Kungenzakala sibili. Mhlawumbe bangakhumbula ukuthi oFakazi bakaJehova babetshilo ukuthi inkolo yamanga izabhujiswa.
Into efanana lale yake yenzakala kudala. Yenzakala ngemva kwenhlupho ezilitshumi ezazehliselwe amaGibhithe. UJehova wathi ‘eseyahlulele bonke onkulunkulu baseGibhithe,’ abako-Israyeli baphuma behamba “lexuku labantu abatshiyeneyo.” (Eks. 12:12, 37, 38) Kufanele ukuthi abantu laba baqalisa ukukholwa kuJehova ngemva kokubona konke okwakukhulunywe nguMosi kusenzakala.
Labo abazakhetha ukukhonza uJehova nxa iBhabhiloni Enkulu isibhujisiwe bazathola ithuba lokusekela abafowabo bakaKhristu abazabe bengakahambi ezulwini. (Mat. 25:34-36, 40) Kodwa ithuba lelo liyabe lingasekho nxa bonke abagcotshiweyo bangaya ezulwini.
Indlela esesizwisisa ngayo indaba le itshengisa ukuthi uJehova nguNkulunkulu olesihawu njalo uyabathanda abantu. Phela “kafisi ukuthi loba ngubani abhujiswe kodwa ufisa ukuthi abantu bonke baphenduke.”—2 Phet. 3:9.