Varoma

8 Asi vaya vakabatana na Kristu Jesu avazopuwi ndava. 2 Ngokuti mutemo wo mujimu mucena unopa upenyu mukuzwira na Kristu Jesu wakakusujunura ku mutemo wo cishaishi no rufu. 3 Mutemo aucaikwanisepi kuzviita ngokuti wairemba ngo ndava yo nyama. Mwari wakazviita ngo kutumira Mwana wake wakaezana no mundhu anoshaisha, kuti apfujure cishaishi no kupa ndava ushaishi hwo nyama. 4 Kuitira kuti zviro zvakarurama zvinodiwa ngo Mutemo, zvikwanirisike kwatiri, ticikafambi wari mukuzwirana no nyama asi tinofamba mukuzwirana no mujimu mucena. 5 Ngokuti vaya vanopona* mukuzwirana no murangariro wo nyama, vanorangarira maningi zviro zvokunyama, asi vaya vanopona* mukuzwirana no mujimu wa Mwari, vanorangarira zviro zva Mwari. 6 Ngokuti kurangarira maningi zviro zvokunyama zvinoviisa rufu, asi kurangarira maningi zviro zvo mujimu wa Mwari, zvinoviisa upenyu no runyararo. 7 Ngokuti kurangarira maningi zviro zvokunyama, zvinobara kuzondana na Mwari, ngokuti nyama aizwiri mutemo wa Mwari, iyona aitokwansi kuzwira mutemo. 8 Ngo kudaro, vaya vanopona* mukuzwirana no nyama, avaiti zvinodakajisa Mwari.

9 Imwimwi amuiti mukuzwirana no nyama, asi munoita mukuzwirana no mujimu wa Mwari, kudari iwona ukagara mukati mwenyu. Asi mundhu acina mujimu wa Kristu, mundhu wondhowo asipi wake. 10 Kudari Kristu wakabatana na imwimwi, muviri wakafa ngo ndava yo cishaishi, asi mujimu mucena unopa upenyu ngokuti makarurama. 11 Ngo kudaro, mujimu wa Mwari wakamusaya Jesu mu rufu wecigara mukati mwenyu, wiya wakamusa Kristu Jesu mu rufu, anozopavo upenyu muviri jenyu jinofa ecishandisa mujimu wake unogara mukati mwenyu.

12 Ngo kudaro hama, tino zvatinofanera kuita, ticikazviitiri nyama yedu kuti tirarame* mukuzwirana no zvido zvayo; 13 Kudari mukararama* mukuzwirana no nyama, munozofa; asi kudari mukauraya zviito zvo muviri ngo mujimu, munozorarama.* 14 Ngokuti vese vanotungamirihwa ngo mujimu wa Mwari ndivona vana va Mwari kamare. 15 Imwimwi amuzivi kuashira mujimu wo uranda unomuita kuti muthyezve, asi makaashira mujimu wokuva vana vakarehwa ndi Mwari. Mujimu wondhowo ndiwona unotiitisa kuti tidanijire kuti: “Abha,* Baba!” 16 Mujimu wa Mwari unotikhohwesa kuti itusu tiri vana va Mwari. 17 Waro kudari tiri vana, tirivo vagari vo utaka hwa Mwari. Tiri vagari vo utaka hwa Mwari pamwepo na Kristu. Asi pa kutanga, itusu tinotambujika pamwepo na iyena kuti tizoashirevo rukujo naye.

18 Inini ndinovona kuti matambujiko o nguva ino aaezaniswi no rukujo watinozotatijwa. 19 Ngokuti zvisikwa zviri kuvetera ngo mwoyo wese kuvoneswa ko vana va Mwari. 20 Zvokadi, zvisikwa zvakaithwa kuti zvive zvabiresi, kuciripi ngo kuda kwazvo asi ngo kuda ka wiya wakazviitisa kuti zvive zvakadaro, ngo ndava yo vetero, 21 kuti zvisikwa zvisujunuke pa uranda hwo uvori, zvova no rusujunuko hukuru hwo vana va Mwari. 22 Ngokuti tinoziva kuti zvisikwa zvese zviri kugomera, zvecihwajihwa mbhera wari. 23 Andizvopi zvega, itusu tino mujimu mucena unotatija zviro zvinozoviya. Itusu tinogomera ngo mukati patinonga tecivetera mukuvo watinozonasa kuva vana vakarehwa ndi Mwari. Pa mukuvo wondhowo, itusu tinozosujunuhwa ku muviri yedu ngo muripo. 24 Itusu takaponeswa ngo vetero iyi; asi vetero inovoneka, asipi vetero. Ngokuti akuna mundhu anovetera zvaanovona. 25 Asi, kudari tecivetera zviro zvaticikavoni, tinogara tecizvivetera ngo mwoyo wese tecicungirira.

26 Mu njira yakafanana, mujimu mucena unotibesera patinonga takarembejeka; ngokuti cineso catinaco ngo cokutama kuziva kukumbira zviro zvatinoda. Asi mujimu wa Mwari unotikumbirira patinonga tecigomera cinyararire. 27 Asi wiya anopsaka zviri mu mwoyo mwedu, anoziva zvinonangwa ngo mujimu mucena. Ngokuti iwona unokumbira mukuzwirana no kuda ka Mwari ngo pamusoro po vandhu vake vakasanwa.

28 Itusu tinozviziva kuti Mwari anoita kuti mabasa ake ese azwirane kuti zvibesere vaya vanoda Mwari. Ndivona vakadanijwa kuti vaite kuda kwake; 29 ngokuti kuvhira pa kutanga iyena waiziva vaaizosana, wosunga kuti ivona vaizovonesa mugariro jo Mwana wake, kuitira kuti Mwana wake ave mwana wo dangwe pakati po hama zinji. 30 Kusiyapo izvo, vaya vakasanwa kuti vakhombijire mugariro jo Mwana wake, ndivona vanozodanijwa kuti vavevo varurami. Pakupejisira, iyena anozokujavo vayani vaanozodanija kuti vakarurama.

31 Waro tonangenyi ngo pamusoro po shwiro iji? Kudari Mwari ana itusu, ndiyani angazohwisana na itusu? 32 Iyena aazivi kutinyima Mwana wake kamare, asi wakatipa kuti afire itusu tese. Kureva kuti angakonehwa kutipekeja zvimweni zvese pamwepo naye? 33 Ndiyani anozopumbha vandhu vakasanwa ndi Mwari? Mwari ndiyena anovavona kuti vakarurama. 34 Ndiyani anozovatonga? Kristu Jesu ndiyena wakafa, kupinda izvi, ndiyena wakamuswa wogara pa mukono muho wa Mwari, anotikumbiriravo no kuva muimiriri wedu.

35 Ndiyani anozotiparajanisa mu rudo hwa Kristu? Kureva kuti idambujiko kana kuhwajihwa, kuteverehwa kana injara, kutama zvokusimira kana ngozi no banga here? 36 Inga zvakatahwa kuti: “Tiri kuurawa njiku jese ngo ndava yenyu, tiri kuvoniwa inga mavhuta ari kwenda kourawa.” 37 Mukusiyana, tiri kuwina pa zviro zvese izvi tecibesehwa ndi wiya wakatidaya. 38 Ngokuti ndinokhohwa kuti nee rufu, nee upenyu, ngirozi, nee utongi, nee zviro zvawari, nee zviro zvamangwana, nee masimba, 39 nee thuru,* nee kujika, nee cisikwa ciri cese haco; azvikwanisi kuparajanisa rudo hwakatatijwa ndi Mwari ecishandisa Kristu Jesu Mambo wedu.