Apokaripsi
4 Pasure pa izvi, ndakavona musuvo wo kumatenga wakafununguka, izwi rondakatanga kuzwa recibhuya na inini raiita inga kurira ko mbhayapaya, reciti: “Khwirai kuno, ndinozokutatija zviro zvinoda kuitika.” 2 Pasure po zviro izvi, ngo kukasika, ndakava mu simba ro mujimu ndovona cigaro co umambo hwo kudenga. Cigaro ici cainga no mundhu waicigarira. 3 Mundhu waigarepo waro waitojana no buwe ro jaspe no buwe ro sardhi. Cigaro co umambo ici, caitendenejwa ngo uta hwa humbe* waitojana no esmerardha.
4 Cigaro co umambo ici caitendenejwa ngo zvigaro zvo umambo zvinokwana kuita makumaviri o zvigaro no zvigaro zvirongomuna, zvogarihwa ngo vakuru vanokwana kuita makumaviri na varongomuna vakasimira nguvo jakacena, vano majunguja o goridhi mu musoro mavo. 5 Pa cigaro co umambo ici, pairazva, paizika maizwi no kuvaja ko mbheni. Ipona painga no zvibani* zvinomwe zvaibhwaka pamberi po cigaro co umambo, zvibani* izvi zvinoimirira mujimu munomwe ya Mwari. 6 Pambeji po cigaro co umambo ici, painga no ciro cakaita inga jombe ro vhidhru raimonikira inga kristari.
Pakati po cigaro co umambo no mumbhiripiri mwaco, mwainga no zvisikwa zvirongomuna zvinopona zvakazara ngo majiso kumbeji no sure. 7 Cisikwa co kutanga cinopona caitojana no mbhondoro. Cisikwa co cipiri cinopona caitojana no mwana wo n’gombe. Cisikwa co citatu cinopona caitojana no kumeso ko mundhu. Cisikwa co cirongomuna cinopona caitojana no hokotora inomburuka. 8 Pa zvisikwa zvirongomuna zvinopona izvi, cimwe nga cimwe cainga no mapapiro matandhatu; iwona aizara ngo majiso, mumbhiripiri no mukati mo mapapiro. Usiku no masikati zvaindonanga kuti: “Wakacena, wakacena, wakacena ndi Jehovha* Mwari, wo Masimba ese, wiya waingepo, aripo no anozoviya.”
9 Zvisikwa zvirongomuna izvi, mukuvo wese wazvinoreremeja no kukuja pomwe no kubonga Wiya wakagara pa cigaro co umambo, anopona mbhera narini, kwenda no kwenda, 10 makumaviri o vakuru no vakuru varongomuna vaigwadama pamberi pa Wiya wakagara pa cigaro co umambo. Ivona vainamata Wiya anopona mbhera narini no kukhandira majunguja avo pamberi po cigaro co umambo, veciti: 11 “Imwimwi Jehovha* Mwari wedu, munofanera kureremejwa, kukujwa no kuva no simba, ngokuti makasika zviro zvese, ngokuda kwenyu izvona zvakavepo, zvosikwa.”