Jobe
38 Ngo kudaro, Jehovha wakadavira Jobe mukati mo dutu* eciti:
2 “Ndiyani uwo ari kuejaro kuvhiringija mbhangiro yangu,
Ecibhuya acina uzivi?
3 Ndapota, jinasirirei inga mwanarume;
Ndiri kuda kukuitira muvhunjo, iwewe undidavire.
4 Wainga kwapi pandakasika nyika?
Ndidavirei kudari wecirangarira kuti uno uzivi.
5 Ndiyani wakatara kukura kwayo, kudari wecizviziva?
Ndiyani wakaipima ngo bote?
6 Zvigajikiro zvayo zvakagara papi?
Ndiyani wakadira njiki jayo,
7 Ndhondho jomangwanani pajaikhuwa* pamwepo ngo mudakaro,
No vana vese va Mwari* pavaibwabwaijira nyara?
8 Ndiyani wakafunga musuvo jo jombe,
Paraibuda inga riri kubuda ngo mundani,
9 Pandakarisimija ngo makore
Ndoriputira* ngo cidima cikuru,
10 Pandakaridira muganwa
Ndoridira musuvo jaro no mugogo,
11 Inini ndakati: ‘Iwewe unogumira pano, audikani kupindirija;
Apa ndipona panogumira mavimbi ako makuru.’
12 Iwewe wakambotonga mangwanani?
Wakambovhunja mambakueja ndau yawo?
13 Ndiwe unovhunja ruvheneko hwo mangwanani kuti hugume kumbhiri ko nyika
No kugogomera vandhu vakashata?
14 Ruvheneko hunocinja nyika
Inga cidhindho cinosiya manyora pa dongo
Zvese zviri mukatimo, zvinonasa kuvoneka inga nguvo yakaseja.*
15 Asi vandhu vakashata, vanovhisihwa ruvheneko hwavo,
Mukono wavo wakavanga, unoguhwa.
16 Iwewe wakamboenda pa ndau inovha kumwa yo mujombe?
Kana wakamboshandisa kumwa iri pa ndau yakajika?
17 Wakatatijwa musuvo jo rufu?
Wakazwa musuvo jo cidima* here?
18 Iwewe unozwisisa kukura kwakaita nyika here?
Ndidavirei kudari weciziva zvese izvi.
19 Ngokwapi kunogara ruvheneko?
Cidima cinogara kwapi
20 Kuti iwewe uende naco kwacinogara,
No kuziva makwanja o kumuzi kwaco?
21 Iwewe unozviziva izvi ngo kuti wainga wabahwa?
Unozviziva ngo kuti uno makore mazinji?
22 Iwewe wakambonghwina mu civigiro co cando,
Kana wakambovona panogara mapuwe o nvhura,
23 Zvondakavigira mukuvo wokutambujika,
No zvondakavigira njiku yo hondo?
24 Ruvheneko hunovheneka hucivha ngokwapi?
Mbhepo yo kumavhazuva inovhunguza yecivha ngokwapi?
25 Ndiyani wakafunungura gwanja ro nvhura,
Woitazve gwanja ro dutu* rino makore no mbheni?
26 Ndiyani wakanisa nvhura kucikagari mundhu,
Mugwasha mucikagari ariwese?
27 Ndiyani wakazaja bani rakaoma rainga rakaphwanyiwa,
No kumeresa sora?
28 Nvhura ina baba wayo here?
Ndiyani wakabara madondhojwe o veto?
29 Kumwa yo mapuwe inovha mundani mwaani?
Ndiyani wakabara cando co kudenga
30 Kumwa painofukijwa inga yakafukijwa ngo buwe,
Panyezuru po kumwa yakawanda pobatana kuita buwe?*
31 Kunanga kuti iwewe unokwanisa kusunga mapote o cikwata co ndhondho cinodaninjwa kuti Kima?*
Kana kuti unokwanisa kusujunura mapote o cikwata condhondho cinodanijwa Khesiri?*
32 Iwewe unokwanisa kubudisa cikwata co ndhondho* pa nguva kwayo?
Kana kuti unokwanisa kutungamirira cikwata co ndhondho co Ashi* no vana vaco?
33 Unojiziva here mutemo jo kudenga?
Kana unokwanisa kuvangirija simba rajo* kuti jishande pasi pano?
34 Kunanga kuti iwewe unokwanisa kukhuwa* izwi rako rozika kumakore
Kuti nvhura ikufukije?
35 Kureva kuti iwewe unokwanisa kutuma mbheni?
Ijona joviya jokuvhunja kudari: ‘Tiri pano!’
37 Ndiyani ano uzivi kuti averenge makore?
Kana ndiyani anokwanisa kudurura kumwa yo mujuvi ro kudenga
38 Zvoita kuti mavhu aite matope
No mabhuvu* abatane pamwepo?
39 Kunanga kuti unokwanisa kunyanga nyama
Kuti upekeje mbhondoro?
Unokwanisa kupeja njara yo zvivana zvo mbhondoro,
40 Pajinonga jakakwatama majinogara,
Kana pajinonga jakafindarira* mu mapako ajo?
41 Ndiyani anopekeja zvokuha magunguhwe
Maphwiphwi awo paanonga ecikumbira Mwari besero
Ecimbeya no kutama cokuha?